ཡུལ་སྐོར་སྤྲོ་འཆམ་ས་ཚིགས་ཤིག་ལས་དགོན་པའི་མཐོང་སྣང་མི་འདུག

ཟླ་སྔོན་མའི་ནང་ཐེ་ཝན་གྱི་སློབ་མཐོ་རིམ་སློབ་ཕྲུག་ཁག་ཅིག་བཞུགས་སྒར་ངྷ་རམ་ས་ལར་གཟིགས་སྐོར་དུ་ཕེབས་པ་དང་བསྟུན་ཏེ། འདི་གའི་གསར་འགོད་པས་ཐེ་ཝན་ཀོ་ལིས་སློབ་ཆེན་གྱི་སློབ་མ་ལིན་ཆིན་ཝན་ལགས་སུ་བོད་ཀྱི་གནད་དོན་དང་། དེ་སྔ་ཁོང་བོད་ནང་སྐྱོད་པའི་མཐོང་ཐོས་བཅས་ཀྱི་སྐོར་ལ་བཅར་འདྲི་ཞུས་ཡོད།

    དྲི་བ། ཐོག་མར་ཁྱེད་ཀྱིས་བོད་དོན་སྐོར་གྱི་གནས་ཚུལ་ཅི་ལྟར་ཤེས་རྟོགས་བྱུང་བའི་བརྒྱུད་རིམ་ངོ་སྤྲོད་ཅིག་གནང་རོགས།  

    ལན། ངའི་མིང་ལ་ལིན་ཆིན་ཝན་ཟེར། ད་ལྟ་ཐེ་ཝན་ཀོ་ལིས་སློབ་ཆེན་དུ་སྤྱི་ཚོགས་རིག་གནས་ཆེད་སྦྱོང་བྱེད་བཞིན་ཡོད། སློབ་གྲྭ་ཆུང་འབྲིང་སྐབས་བོད་དོན་སྐོར་གང་ཡང་ཐོས་མྱོང་མེད། སྟབས་ལེགས་པ་ཞིག་ལ་འདི་ལོའི་ཕྱི་ཟླ་ ༣ ནང་ཐེ་ཝན་དུ་བོད་ཀྱི་རིག་གནས་དུས་སྟོན་སྲུང་བརྩི་བྱས་སྐབས། ང་རང་སློབ་གྲྭའི་ཚོགས་པ་ཞིག་གི་མགོ་བ་ཡིན། དུས་སྟོན་གོ་སྒྲིག་གནང་མཁན་ཐེ་ཝན་བོད་ཀྱི་གྲོགས་པོ་ཚོགས་པས་སློབ་གྲྭ་ཁག་ནང་བོད་པ་གདན་ཞུ་གནང་སྟེ་གཏམ་བཤད་བྱེད་ཀྱི་འདུག དེ་བཞིན། ང་ཚོའི་སློབ་གྲྭའི་ནང་དུའང་བོད་མི་ཚོར་གཏམ་གླེང་ཞིག་གོ་སྒྲིག་བྱས་པ་ཡིན། དེའི་སྔོན་ལ་ངས་བོད་ནང་གི་རང་ལུས་མེར་བསྲེགས་སྐོར་གཅིག་ཀྱང་གོ་ཐོས་མ་བྱུང་ལ། ཏཱ་ལའི་བླ་མ་མཆོག་རྒྱ་གར་ནང་བཞུགས་ཡོད་པའང་ཤེས་ཀྱི་མེད།

    དྲི་བ། ཁྱོད་ཀྱིས་ཐེ་ཝན་ནང་བོད་ཀྱི་གནད་དོན་ཐད་དོ་སྣང་ཆེན་པོ་སླེབས་ཐུབ་ཀྱི་མེད་པའི་རྒྱུ་རྐྱེན་གཙོ་བོ་གང་ལ་ངོས་འཛིན་གནང་གི་ཡོད་དམ།   

    ལན། སྤྱིར་བཏང་ཐེ་ཝན་གྱི་མི་ཚོས་རྒྱལ་སྤྱིའི་ཐོག་གི་གསར་འགྱུར་རིགས་ལ་དོ་སྣང་ཞེ་དྲག་གནང་གི་མ་རེད། མ་གཞི་ཐེ་ཝན་གྱི་བརྙན་འཕྲིན་ཁག་ནང་རྒྱལ་སྤྱིའི་གནས་ཚུལ་ཉུང་ཉུང་རེད། དཔེར་ན། ད་ལྟའི་ཆར་སེ་རི་ཡའི་ནང་ཛ་དྲག་གི་འཁྲུག་ཟིང་བྱུང་གི་ཡོད་ཀྱང་། ཐེ་ཝན་མི་མང་ནང་དེའི་སྐོར་ལ་ཤེས་རྟོགས་ཡོད་མཁན་ཉུང་ཉུང་ཡིན་རྒྱུ་རེད། ཐེ་ཝན་གྱི་བརྙན་འཕྲིན་ཁག་གི་ནང་གནས་ཚུལ་ཕལ་ཆེ་བ་རུལ་སུངས་དང་། འགྲིམ་འགྲུལ་དོན་རྐྱེན། བརྩེ་དུང་དང་འཚོ་བའི་སྐོར་སོགས་རེད། ལྷག་པར་དུ་ཐེ་ཝན་ནང་མི་མང་ཕྱོགས་ཁག་གཉིས་སུ་གྱེས་ཡོད་སྟབས། སྐོར་ཞིག་གིས་བོད་ནི་རྒྱ་ནག་གི་ཆ་ཤས་ཤིག་ཏུ་ངོས་འཛིན་བྱེད་ཀྱི་ཡོད་པ་རེད། སྐོར་ཞིག་གིས་སློབ་ཆེན་པ་རྣམས་དྷ་རམ་ས་ལར་བསྐྱོད་དེ་བོད་མིའི་སྤྱི་ཚོགས་ལ་འབྲེལ་བ་འཛུགས་རྒྱུ་དང་། དྷ་རམ་ས་ལར་བྱ་འགུལ་སྣ་ཚོགས་སྤེལ་རྒྱུར་མོས་མཐུན་གནང་གི་ཡོད་པ་རེད།

    དྲི་བ། ཐེ་ཝན་གྱི་སློབ་ཆེན་ཁག་ནང་བོད་དོན་སྐོར་གྱི་དེབ་དང་ཡིག་ཆའི་རིགས་ཀློག་རྒྱུ་ཡོད་དམ། 

    ལན། ང་ཚོའི་སློབ་གྲྭར་མཚོན་ན་དཔེ་མཛོད་ནང་དཔེ་དེབ་གྲངས་འབོར་ཧ་ཅང་མང་པོ་ཡོད། སྔོན་མ་སོ་སོར་མཚོན་ནའང་བོད་དོན་སྐོར་ཧ་གོ་གི་མེད་སྟབས་དེའི་སྐོར་ལ་དོ་སྣང་བྱས་མེད། དེ་བཞིན་སློབ་ཕྲུག་གཞན་དག་ལའང་དོ་སྣང་ཡོད་པ་མ་རེད། ཉེ་ཆར་ངས་བོད་ཀྱི་གནས་ཚུལ་སྐོར་ཤེས་རྟོགས་བྱུང་རྗེས། དཔེ་མཛོད་ནང་ཕྱིན་ཏེ་འཚོལ་བཤེར་བྱས་སྐབས་བོད་པའི་སྐོར་གྱི་དཔེ་དེབ་དང་། དངོས་བྱུང་གློག་བརྙན་སོགས་མང་པོ་འདུག

    དྲི་བ། ངེད་གཉིས་ཀྱི་བཅར་འདྲི་དངོས་གཞིའི་སྔོན་ལ་ཁྱེད་རང་གིས་བོད་ནང་ཕྱིན་སྐོར་ཞིག་གསུངས་སོང་། དེའི་སྐོར་ངོ་སྤྲོད་ཅིག་གནང་རོགས། 

    ལན། ཐེ་ཝན་དུ་བོད་སོག་ལས་ཁུངས་ཡོད་པ་རེད། ཁོ་ཚོས་བོད་དང་སོག་པོ་ཀྲུང་ཧྭ་མི་སེར་རྒྱལ་ཁབ་ཀྱི་ཆ་ཤས་ཤིག་ཡིན་པའི་ལངས་ཕྱོགས་འཛིན་གྱི་འདུག འདི་ལོ་བོད་ཀྱི་རིག་གནས་དུས་སྟོན་སྐབས་ཐེ་ཝན་ནང་བོད་དོན་སྐོར་གྱི་ལས་འགུལ་སྤེལ་སྐབས་ཀྱང་། ཁོ་ཚོའི་ངོས་ནས་རོགས་འདེགས་གང་ཡང་བྱེད་ཀྱི་མི་འདུག ཉེ་ཆར་ཁོ་ཚོའི་གོ་སྒྲིག་འོག་བསམ་ཚུལ་སྤེལ་རེས་ཀྱི་ཚོགས་པ་ཞིག་མཚོ་སྔོན་དུ་བསྐྱོད་པ་རེད། མི་སྒེར་ངོས་ནས་གནམ་གྲུའི་གླ་ཆ་གཅིག་པུ་སྤྲོད་དགོས་པ་མ་གཏོགས། འགྲོ་སོང་གཞན་དག་ཆ་ཚང་ཚོགས་པའི་ངོས་ནས་གཏོང་གི་འདུག་ལ། ཉིན་རེའི་སྐོར་སྐྱོད་ས་གནས་དང་དུས་ཚོད་རྣམས་ཀྱང་ཁོ་ཚོས་གོ་སྒྲིག་ལྟར་བསྐྱོད་དགོས་ཀྱི་ཡོད་པ་རེད། ང་རང་ཡང་ཁོ་ཚོའི་གྲས་སུ་འཛུལ་ཏེ་གནས་ཚུལ་རྒྱུས་ལོན་ཆེད་བོད་ནང་བསྐྱོད་པ་ཡིན། དེ་ནི་ང་རང་རྒྱ་ནག་ཏུ་ཕྱིན་པ་ཐེངས་གཉིས་པ་དང་མཚོ་སྔོན་དུ་ཕྱིན་པ་ཐེངས་དང་པོ་ཡིན།

    དྲི་བ། རྒྱ་ནག་ནང་སླེབས་རྗེས་ཁྱོད་ཚོར་སྣེ་ལེན་དང་སྐོར་སྐྱོད་གོ་སྒྲིག་གནང་སྟངས་ཅི་འདྲ་འདུག

    ལན། པེ་ཅིན་དུ་མཚན་གཅིག་བསྡད་པའི་རིང་རྒྱལ་ཁབ་མི་རིགས་འཐུས་ཚོགས་ཟེར་བའི་ངོས་ནས་ང་ཚོར་སྣེ་ལེན་བྱས་སོང་། དེ་ནས་ཟི་ལིང་དུ་འབྱོར་རྗེས་མཚོ་སྔོན་མི་རིགས་སློབ་ཆེན་གྱིས་ང་ཚོར་སྣེ་ལེན་གྱི་འགན་འཁུར་ཏེ། དགེ་རྒན་དང་སློབ་ཕྲུག་རྣམས་ཀྱིས་སློབ་གྲྭ་དེ་གའི་ཁོར་ཡུག་གནས་སྟངས་སྐོར་ངོ་སྤྲོད་གནང་སོང་། ཁོ་ཚོས་བརྗོད་པ་ལྟར་ན། རྒྱ་གཞུང་ཐེ་ཝན་ལས་དོན་ཁང་གིས་བཀའ་མངགས་གནང་བ་རེད་ཟེར། སློབ་གྲྭ་དེའི་སློབ་ཕྲུག་མང་ཆེ་བ་རྒྱ་རིགས་རེད། བོད་རིགས་དང་ཧའེ་རིགས། ཧོར་རིགས་སོགས་ཉུང་ཤས་ཤིག་མཐོང་རྒྱུ་འདུག དེའི་རྗེས་སྐུ་འབུམ་དང་། ཁྲི་ཀ རེབ་གོང་། མཚོ་སྔོན་པོ། རྡུལ་མཚོན་ཞིབ་འཇུག་རྗེས་དྲན་ཐང་སོགས་སུ་ལྟ་སྐོར་དུ་བསྐྱོད་པ་ཡིན། དེ་སྔོན་བོད་སོག་ལས་ཁུངས་ཀྱི་གོ་སྒྲིག་མཐུན་སྦྱོར་གནང་སྟེ་སློབ་མ་རྣམས་ནང་སོག་ཏུ་བསྐྱོད་ཀྱི་ཡོད། འདི་ལོ་ཐེངས་དང་པོར་མཚོ་སྔོན་དུ་གོ་སྒྲིག་བྱས་པ་རེད།

    དྲི་བ། ཁྱེད་རང་སྐུ་འབུམ་དགོན་པར་བསྐྱོད་སྐབས་དེ་གའི་གནས་སྟངས་ག་འདྲ་འདུག

    ལན། སྐུ་འབུམ་དགོན་པ་ནི་ཡུལ་སྐོར་སྤྲོ་འཆམ་གྱི་གནས་ཤིག་ཆགས་འདུག དགོན་པ་ཞིག་གི་རྣམ་པ་རྩ་བ་ནས་མི་འདུག དེ་གར་ཡུལ་སྐོར་སྤྲོ་འཆམ་པ་ཧ་ཅང་མང་པོ་འདུག་ལ། སྣེ་ཤན་པའང་མང་པོ་འདུག དགོན་པ་ཞིག་གི་ཚོར་སྣང་སླེབས་མ་སོང་། དེ་བཞིན། ཏཱ་ལའི་བླ་མ་སྐུ་ཕྲེང་ ༡༤ སྐོར་གྱི་གནས་ཚུལ་གང་ཡང་གླེང་ཆོག་གི་མི་འདུག དགོན་པ་དེའི་ནང་སྐུ་པར་ཞིག་ཡོད་པ་དེར་ཁོ་ཚོས་འགྲེལ་བཤད་རྒྱག་སྟངས་ལྟར་ན། སྔོན་ཆད་ཏཱ་ལའི་བླ་མར་སྤྲུལ་སྐུ་གཉིས་བྱུང་སྟེ་རྗེས་སུ་གསེར་བུམ་དཀྲིགས་ཏེ་ཏཱ་ལའི་སྐུ་ཕྲེང་ ༡༤ འདི་ཉིད་ངོས་འཛིན་གནང་བ་དང་། གཞན་པ་དེ་ཏཱ་ལའི་བླ་མའི་སྤྲུལ་སྐུར་ངོས་འཛིན་ཞུ་མ་ཐུབ་ཀྱང་། ཁོ་རང་ཡང་བླ་མ་ཧ་ཅང་གལ་ཆེན་པོ་ཞིག་ཆགས་ཡོད་སྐོར་བརྗོད་དེ། སྐུ་པར་དེ་ནི་ཏཱ་ལའི་བླ་མའི་སྤྲུལ་སྐུར་ངོས་འཛིན་མ་ཐོབ་པ་དེའི་པར་རེད་ཟེར། ཏཱ་ལའི་བླ་མ་སྐུ་ཕྲེང་ ༩ བ་དང་པཎ་ཆེན་སྐུ་ཕྲེང་ ༡༠ པའི་སྐོར་ངོ་སྤྲོད་མང་པོ་བྱས་སོང་། ཏཱ་ལའི་བླ་མ་སྐུ་ཕྲེང་ ༡༤ པའི་སྐོར་ཚིག་ཟུར་ཙམ་ཡང་གླེང་གི་མི་འདུག ངས་པཎ་ཆེན་སྐུ་ཕྲེང་ ༡༡ པའི་ཡང་སྲིད་ལ་དམིགས་ཏེ། བོད་པའི་སྤྲུལ་སྐུ་ངོས་འཛིན་བརྒྱུད་རིམ་ཁྲོད་གནད་དོན་དེ་འདྲ་བྱུང་མྱོང་ཡོད་མེད་དྲིས་པར། ཁོ་ཚོས་ཏཱ་ལའི་བླ་མ་སྐུ་ཕྲེང་ ༡༠ དང་ ༡༢ བར་སྤྲུལ་སྐུ་ངོས་འཛིན་ཐད་རྙོག་དྲ་བྱུང་སྐོར་ལས། པཎ་ཆེན་སྐུ་ཕྲེང་ ༡༡ པའི་སྤྲུལ་སྐུ་ངོས་འཛིན་སྐོར་གྱི་རྙོག་དྲ་གླེང་གི་མི་འདུག སྐུ་འབུམ་དགོན་པའི་ནང་དམག་མི་འགའ་ཤས་མཐོང་སོང་། བརྙན་ལེན་པར་ཆས་མང་པོ་གང་སར་བཙུགས་འདུག

    དྲི་བ། རོང་བོ་དགོན་པར་རང་ལུས་མེར་བསྲེགས་ཀྱི་གནས་ཚུལ་བྱུང་ཡོད་པ་རེད། ཁྱེད་རང་རོང་བོ་དགོན་པར་བསྐྱོད་སྐབས་དེ་གའི་གནས་སྟངས་ག་འདྲ་ཆགས་འདུག

    ལན། རོང་བོ་དགོན་པ་དེ་ཆོས་སྡེ་ཞིག་གི་རྣམ་པ་གསལ་པོ་འདུག དེ་གར་ཡུལ་སྐོར་སྤྲོ་འཆམ་པ་ཡོང་མཁན་ཉུང་ཉུང་ཡིན་ས་རེད། དེའི་རྒྱུ་མཚན་ནི་ཟི་ལིང་དང་བར་ཐག་རིང་པོ་ཡོད་པས་རེད་ཟེར། ང་ཚོ་ས་གནས་དེར་འབྱོར་མ་ཐག་ས་གནས་མང་ཚོགས་ཀྱིས་ང་ཚོ་ཕྱི་ལོགས་ཤིག་ནས་ཡོང་བ་ཤེས་འདུག དེ་གར་བོད་རང་གི་སྲོལ་རྒྱུན་གྱི་ལྭ་བ་གྱོན་མཁན་བོད་མི་མང་པོ་མཐོང་རྒྱུ་འདུག་ལ། དགོན་པའི་ནང་ཏཱ་ལའི་བླ་མ་སྐུ་ཕྲེང་ ༡༤ པའི་སྐུ་པར་ཡང་མཐོང་རྒྱུ་འདུག དེ་ནི་ང་ལ་མཚོན་ན་བསམ་ཡུལ་ལས་འདས་པ་ཞིག་རེད། ངས་བསམ་པར་བཤམ་ཐུབ་རྒྱུ་མ་རེད་བསམ་ཡོད། ང་རང་དགོན་པ་དེར་ཧ་ཅང་དགའ་མོས་ཆེན་པོ་སྐྱེས་བྱུང་། ཡིན་ནའང་། ཕྱིར་བསླེབས་རྗེས་ངས་ད་གཟོད་འདི་ལོའི་ཕྱི་ཟླ་གསུམ་པའི་ནང་དེ་གར་རང་ལུས་མེར་བསྲེགས་ཀྱི་གནས་ཚུལ་བྱུང་བ་གོ་སོང་། དེ་སྔོན་ངའི་བསམ་པར་ས་གནས་དེ་གར་རང་དབང་ཡོད་པའི་སྣང་བ་ཞིག་སྐྱེས་སོང་། སྐབས་དེར་ཕྱིའི་རྣམ་པའི་ཐོག་ནས་ས་ཆ་དེར་དྲག་གནོན་ཞེ་དྲག་མེད་པའི་རྣམ་པ་འདུག  

    དྲི་བ། ཁྱེད་རང་བོད་ནང་དུ་བསྐྱོད་འདུན་གྱི་དམིགས་ཡུལ་གཙོ་བོ་ག་རེ་ཡིན།

    ལན། ང་རང་བོད་པའི་གནས་སྟངས་རྒྱུས་ལོན་ཆེད་བསྐྱོད་པ་ཡིན། ཡིན་ནའང་། བོད་སོག་ལས་ཁུངས་ཀྱི་གོ་སྒྲིག་འོག་སོང་བ་ཡིན་སྟབས། ཁོ་ཚོས་ཆབ་སྲིད་ཐད་རྙོག་ཟིང་གང་ཡང་མི་ཡོང་ཆེད། གནད་དོན་གལ་ཆེའི་རིགས་ཀྱི་ཐད་སྐད་ཆ་དྲིས་ཚེ་བཀག་འགོག་དང་། བོད་རིགས་དང་མཉམ་དུ་སྐད་ཆ་བཤད་འཇུག་གི་མི་འདུག སྐབས་དེར་ང་ཚོས་མཐོང་ཐོས་བྱུང་བ་ཁག་ནི། མཛེས་བཟོ་དང་རྒྱས་སྤྲོས་ཆེ་བའི་ཕྱིའི་འཛུགས་སྐྲུན་དག་དང་། བརྗིད་ཉམས་ལྡན་པའི་འགྲེམས་སྟོན་ཁང་རྣམས་རེད། བོད་མིའི་དངོས་ཡོད་འཚོ་བའི་གནས་སྟངས་ག་འདྲ་ཡོད་མེད་ཤེས་རྟོགས་བྱེད་འཇུག་གི་མི་འདུག ངོ་སྤྲོད་གནང་མཁན་གྱི་ངོས་ནས་ཀྱང་བོད་མི་རྣམས་ཀྱི་འཚོ་བ་སྐྱིད་པོ་ཡོད་པའི་སྣང་བརྙན་ཁོ་ན་འགྲེལ་བཤད་རྒྱག་གི་འདུག

    དྲི་བ། ཁྱེད་རང་མཚོ་སྔོན་པོའི་མཁའ་རུ་སྤྲོ་འཆམ་ལ་སྐྱོད་སྐབས་ཚོར་སྣང་གང་འདྲ་བྱུང་ཡོད་པ་དང་། ས་གནས་དེ་གའི་བོད་མི་ཚོའི་གནས་སྟངས་གང་འདྲ་མཐོང་སོང་། 

    ལན། མཚོ་སྔོན་པའི་མཁའ་རུ་ཡ་ང་བའི་གནས་ཚུལ་མང་པོ་མཐོང་སོང་། བོད་པ་མང་པོ་ཞིག་གིས་སོ་སོའི་བོད་ལྭ་རྣམ་པ་སྣ་ཚོགས་གྱོན་པ་དང་། ལུ་གུ་སོགས་ཁྲིད་ཡོང་སྟེ་པར་བརྒྱབ་བཅུག་རྗེས་སྒོར་མོ་སློང་གི་འདུག དེའི་ཁྲོད་སུ་བྱིས་པ་ཆུང་ཆུང་ཧ་ཅང་མང་པོ་འདུག དེ་ནི་རྒྱ་གཞུང་གིས་དེང་རབས་ཅན་བཅོས་བསྒྱུར་གྱི་གོ་རིམ་ཁྲོད། གྲངས་ཉུང་མི་རིགས་ལ་ལྟ་སྐྱོང་མ་གནང་བ་དང་། གྲངས་ཉུང་མི་རིགས་ཀྱི་ཁེ་དབང་ལ་བརྩི་འཇོག་མ་བྱས་པའི་དན་རྟགས་རེད། རྒྱ་གཞུང་གིས་དངུལ་ཁོ་ནའི་ཆེད་དུ་བོད་དེ་ཡུལ་སྐོར་སྤྲོ་འཆམ་བྱ་ཡུལ་དུ་བསྒྱུར་ཐབས་བྱས་ཏེ། བོད་མི་རིགས་ཀྱི་ཕྱུག་ཟོག་འཚོ་སྐྱོང་གི་འབྲོག་ལས་འཚོ་བའི་གོམས་གཤིས་རྩ་གཏོར་བཏང་བ་ལ་བརྟེན་ནས། ཁོང་ཚོར་འཚོ་བ་རོལ་སའི་གཞི་རྟེན་གང་ཡང་མེད་པ་ཆགས་ཏེ་ཐབས་ཟད་འུ་ཐུག་གི་གནས་སུ་ལྷུང་པ་རེད། ཡིན་ནའང་རྒྱ་རིགས་སྣེ་ཤན་པ་ཚོས་བོད་པ་དེ་དག་ནི་སྒོར་མོ་གཡོ་ལེན་བྱེད་མཁན་ཡིན་པའི་འགྲེལ་བཤད་རྒྱག་གི་ཡོད་སྟབས། ཡུལ་སྐོར་མང་པོ་ཞིག་གི་སེམས་སུ་བོད་མི་རིགས་ལ་མཐོང་སྣང་ངན་པ་ཡོང་གི་འདུག དེ་ཧ་ཅང་ཡ་ང་བ་ཞིག་རེད། རྒྱ་གཞུང་གིས་བོད་མི་ཚོར་འཚོ་བ་རོལ་ཐབས་ཀྱི་ལམ་ཁ་དང་སློབ་སྦྱོང་། གོ་སྐབས་གཞན་གང་ཡང་སྤྲད་ཡོད་པ་མ་རེད། ངས་བསམ་ན་རྒྱ་གཞུང་གིས་བོད་མི་དེ་ཚོར་འཚོ་བ་རོལ་ཐབས་ཀྱི་སློབ་སྦྱོང་དང་མཐུན་རྐྱེན་གཞན་ཞིག་སྦྱོར་དགོས་ཀྱི་འདུག ཡང་མིན་ན། ཁོང་ཚོའི་དེ་སྔའི་ཕྱུག་ཟོག་འཚོ་སྐྱོང་གི་འཚོ་བ་རོལ་སྟངས་བསླར་གསོ་དགོས་ཀྱི་འདུག 

    དྲི་བ། གོང་དུ་ཁྱེད་ཀྱིས་ང་མཚོ་སྔོན་པོའི་རྡུལ་མཚོན་ཞིབ་འཇུག་རྗེས་དྲན་ཐང་དུ་སྐྱོད་ཡོད་སྐོར་བརྗོད་བྱུང་། ས་ཆ་དེ་གང་འདྲ་ཡོད་པ་དང་། རྒྱ་གཞུང་གིས་རྡུལ་མཚོན་ཞིབ་འཇུག་བོད་ཀྱི་ས་ཐོག་ནས་བྱས་པ་དེར་དགོངས་ཚུལ་ག་རེ་ཡོད།  

    ལན། ང་རང་རྡུལ་མཚོན་ཞིབ་འཇུག་རྗེས་དྲན་ཐང་དུ་བསྐྱོད་པ་ཡིན། ད་ལྟ་དེ་ནི་རྒྱལ་གཅེས་ཀྱི་སློབ་གསོ་སྤེལ་སའི་བསྟི་གནས་ཤིག་ཆགས་འདུག གནོད་འཚབ་རང་བཞིན་ཆེ་བའི་རྡུལ་མཚོན་ཐོག་མར་ཞིབ་འཇུབ་བྱེད་ས་བོད་ཀྱི་ས་ཁུལ་དང་། ཐོག་དང་པོར་རྡུལ་མཚོན་འགལ་གཏོར་ཚོད་ལྟ་བྱ་ཡུལ་ཡུ་གུར་མི་རིགས་ཀྱི་ས་ཆ་རེད། དེ་ནི་དངོས་གནས་རྒྱུ་འབྲས་དྲང་སྙོམས་ཤིག་མ་རེད། གྲངས་ཉུང་མི་རིགས་ཀྱི་ས་ཁུལ་ནང་ཚོད་ལྟ་བྱེད་དགོས་པའི་རྒྱུ་མཚན་ཁོ་ཚོ་རང་ཉིད་ལ་གནོད་འཚེ་མི་ཐེབས་པ་དང་། གྲངས་ཉུང་མི་རིགས་ཀྱི་ཁེ་དབང་དང་བདེ་སྡུག་ལ་སེམས་ཁུར་གང་ཡང་བྱེད་ཀྱིན་མེད་པའི་རྟགས་རེད། ད་དུང་། སྣེ་ཤན་པ་དག་གིས་དེ་སྔོན་རྡུལ་མཚོན་ཞིབ་འཇུག་སྐབས། ས་ཁུལ་དེར་ཡོད་པའི་འབྲོག་སྡེ་དག་གིས་རྒྱལ་ཁབ་ཡག་པོ་ཡོང་བའི་ཆེད་དུ། སྲིད་གཞུང་གི་ལག་ནས་གུན་གསབ་གང་ཡང་ལེན་རྒྱུ་མིན་པ་བརྗོད་དེ། སོ་སོ་རང་མོས་ཐོག་རྩྭ་ཐང་དེ་དང་ཁ་བྲལ་ཏེ་ཡུལ་གཞན་དུ་གནས་སྤོ་བྱས་པ་རེད་ཟེར།  

    དྲི་བ། ཁྱོད་ཚོ་རི་བོ་ཉི་ཟླར་སླེབས་དུས་སྣེ་ཤན་པའི་འགྲེལ་བརྗོད་ཇི་ལྟར་གནང་གི་འདུག

ལན། ང་ཚོ་ཐད་ཀར་ཉི་ཟླ་རི་བོ་རང་ལ་ཕྱིན་མེད། མཚོ་སྔོན་པོ་ནས་ཁྲི་ཀར་བསྐྱོད་པའི་ལམ་བར་དུ་ཉི་ཟླ་རི་བོའི་ཡུལ་སྐོར་བཟོ་སྐྲུན་གྱི་རྣམ་པ་རྒྱང་ནས་མཐོང་སོང་། སྣེ་ཤན་པ་དག་གིས་ཝུན་ཁྲིན་ཀོང་ཇོ་ཡིས་བོད་དུ་ནང་བའི་ཆོས་ཁྱེར་ཡོང་བ། རིག་གནས་ལག་རྩལ་མང་པོ་བོད་དུ་དྲངས་པའི་སྐོར་སོགས་བརྗོད་སོང་། དེ་བཞིན། ཁྲི་ཀར་བོད་རིགས་མང་པོ་མཐོང་རྒྱུ་མི་འདུག ས་ཆ་དེར་ས་རྩི་ཁ་དོགས་འདྲ་མིན་མང་པོ་འདུག་ལ། ངོ་སྤྲོད་བྱེད་སྐབས་ཀྱང་ས་རྩིའི་གཏེར་ཁ་ཕུན་སུམ་ཚོགས་པོ་ཡོད་ཚུལ་བརྗོད་སོང་། ད་དུང་ཡ་མཚན་པ་ཞིག་ལ། ང་ཚོ་མཚོ་སྔོན་གྱི་ས་ཆ་ཁག་ཏུ་བསྐྱོད་པའི་དུས་ཡུན་ནང་། ངས་ཧ་ལམ་ཕྱི་རྒྱལ་བ་གཅིག་ཀྱང་མཐོང་མ་སོང་། ཕལ་ཆེར་ང་ཚོ་ཕྱི་རྒྱལ་གྱི་ཡུལ་སྐོར་བ་དག་དང་འབྲེལ་བ་བྱུང་འཇུག་འདོད་མེད་པ་འདྲ། 

    དྲི་བ། ཁྱེད་རང་ཐེངས་འདིར་སྐྱོད་མྱོང་བའི་བོད་ཀྱི་ས་ཁུལ་ཁག་ལས་བག་ཆགས་ཆེས་ཟབ་ཤོས་གང་རེད། 

    ལན། ང་རང་བག་ཆགས་ཆེས་ཟབ་ཤོས་ནི་ཉི་ཟླ་རི་བོའི་ཉེ་འདབས་སུ་བསླེབས་དུས། ད་གཟོད་བོད་མི་རིགས་ཀྱི་འཚོ་བ་དངོས་མཐོང་བྱུང་བསམ་པའི་སེམས་ཚོར་བྱུང་། མཚོ་ངོས་ལས་མཐོ་ཚད་རྨིད་ ༣༠༠༠ ལྷག་ཡོད་པའི་ས་ཆ་དེར། རྩྭ་ཐང་དང་འབྲོག་པའི་སྦྲ་གུར། ནོར་ལུག་འཚོ་སྐྱོང་བྱེད་བཞིན་པའི་རྣམ་པ། བོད་པ་རྣམས་སྦག་སྦག་ཞོན་ཏེ་རྩྭ་ཐང་ཐོག་སྐྱོད་བཞིན་པ་མཐོང་སོང་། དེ་ནི་ཧ་ཅང་བག་ཕེབས་པོ་དང་མཛེས་སྡུག་ལྡན་པ་ཞིག་རེད། ངས་སྔོན་ཆད་དེ་འདྲ་མཐོང་མྱོང་མེད། གལ་སྲིད་རྒྱ་གཞུང་གིས་བཙན་དབང་འོག་བོད་མི་དེ་ཚོ་རྩྭ་ཐང་འདི་དང་ཁ་བྲལ་བཅུག་ཚེ་ཅི་འདྲའི་སེམས་ཕངས་པ་ལ་སྙམ་པ་ཞིག་སྐྱེས་སོང་། དེ་མ་གཏོགས་ས་གནས་གཞན་དུ་བོད་ལྭ་གྱོན་མཁན་བོད་མི་འགའ་ཤས་མཐོང་སོང་། ཡིན་ནའང་། ཁོ་ཚོར་ཐད་ཀར་གླེང་མོལ་བྱ་རྒྱུའི་རང་དབང་མེད་སྟབས། དམིགས་བསལ་གྱི་སེམས་ཚོར་གང་ཡང་སླེབས་ཐུབ་མ་སོང་།

    དྲི་བ། བོད་ནང་མི་མང་པོས་རང་ལུས་མེར་བསྲེགས་གཏོང་བཞིན་པ་དེར་། ཁྱོད་ཀྱིས་གདེང་འཇོག་གང་འདྲ་ཞིག་གནང་གི་ཡོད་དམ།

    ལན། ཁོང་ཚོས་རང་ལུས་མེར་བསྲེགས་གཏོང་བཞིན་པ་དེ་ནི། ངས་བསམ་ན་གློ་བུར་བའི་སེམས་ཚོར་གྱི་དབང་གིས་བཏང་བ་ཞིག་མ་རེད། ཁོང་ཚོས་རྒྱུན་རིང་པོ་བསམ་བློ་ཞིབ་ཏུ་བཏང་སྟེ་གནང་གི་ཡོད་པ་རེད། དཔེར་ན། ལྡི་ལིར་རང་ལུས་མེར་བསྲེགས་གཏོང་མཁན་ཁོང་ལ་མཚོན་ན། བསམ་བློ་གཏིང་ཟབ་མོ་བཏང་སྟེ་ཧུའུ་ཅིན་ཐའོ་ལྡི་ལིར་བསླེབས་སྐབས་རང་ལུས་མེར་བསྲེགས་བཏང་ཡོད་ལ། ཁོང་ལམ་ཐག་གང་འཚམ་ཞིག་ལ་བརྒྱུགས་ཏེ་མི་མང་པོ་ཞིག་གིས་མཐོང་ཐུབ་པ་བཟོས་ཡོད། དེར་མ་ཟད། ཁོང་གིས་མེ་ལྕེ་ཁྲོད་འབོད་སྒྲ་བསྒྲགས་ཡོད་པ་རེད། མེར་བསྲེགས་ལས་འགུལ་གྱི་རྣམ་པ་འདི་ལ་བརྟེན་ནས་འཛམ་གླིང་སྒང་ཁོང་ཚོའི་རེ་འབོད་ཤེས་རྟོགས་ཤུགས་ཆེན་པོ་ཡོང་ཐུབ་ཆེད་རེད། ངས་བསམ་ན་ཁོང་རྣམ་པའི་རང་སྲོག་བློས་གཏོང་བཞིན་པ་དེ་ནི་ཧ་ཅང་གཟི་བརྗིད་ལྡན་པ་ཞིག་རེད།

    དྲི་བ། ཁྱེད་ཀྱིས་རྗེས་ཕྱོགས་བོད་དོན་ཐད་རོགས་འདེགས་དང་རྒྱབ་སྐྱོར་གྱི་ལས་དོན་དེ་འདྲ་གནང་རྩིས་ཡོད་དམ། 

    ལན། ང་རང་ངོས་ནས་བོད་ཀྱི་གནད་དོན་ཐད་ལས་ཀ་བསྒྲུབ་འདོད་ཆེན་པོ་ཡོད། ལོ་རྗེས་མ་ནི་ཏཱ་ལའི་བླ་མ་སྐུ་ཕྲེང་ ༡༣ པས་བོད་རང་བཙན་བསྐྱར་བསྒྲགས་བྱས་ནས་ལོ་ ༡༠༠ འཁོར་བའི་དུས་དྲན་རེད། ད་ལོའི་བོད་ཀྱི་རིག་གནས་དུས་དྲན་གྱི་བྱ་འགུལ་ནང་བཞིན་བོད་མི་རྣམས་ཐེ་ཝན་དུ་གདན་ཞུ་བྱས་ཏེ། འཁྲབ་སྟོན་གྱི་རྣམ་པ་དང་གཞས་སྣ་གཟིགས་འབུལ་གྱི་ལམ་ནས། ཐེ་ཝན་སྤྱི་ཚོགས་ནང་བོད་དོན་ཤེས་རྟོགས་ཡོང་རྒྱུར་འབད་བརྩོན་བྱ་དགོས་བསམ་ཡོད།    དེ་བཞིན། དུས་ཚོད་གང་འཚམ་བཏོན་ཏེ་བཙན་བྱོལ་བོད་མིའི་སྤྱི་ཚོགས་ནང་ལས་ཀ་ཞིག་བྱེད་ཐུབ་ན་བསམ་ཡོད། ཉེ་ཆར་ང་ཚོས་རྒྱ་སྐད་སློབ་གསོའི་ཐད་གླེང་མོལ་བྱུང་། ཕྱིར་ཐེ་ཝན་དུ་ཕྱིན་རྗེས་སློབ་ཐུན་ཞིག་སྒྲིག་འགོད་དང་རྒྱ་ཡིག་སློབ་མཁན་དགེ་རྒན་བཙལ་རྗེས། བོད་ཁྱིམ་སློབ་གྲྭའི་ནང་བྱིས་པ་རྣམས་ལ་རྒྱ་ཡིག་སློབ་ཁྲིད་བྱེད་ཆོག་གི་རེད་བསམ་གྱི་འདུག  

༼ བོད་ཀྱི་དུས་བབ་ཚགས་པར་ལས་འདིར་བདམས་བཀོད་བྱས། ༽

གསར་འགོད་པ། ཚེ་རིང་རྒྱལ།