སྣར་སྐྱིད་ངག་དབང་དོན་གྲུབ།
༄༅། བྲག་གཞིས་བསྟན་འཛིན་ཕེན་བདེས་བོད་ཀྱི་དུས་བབ་གསར་ཤོག་༢༠༡༢།༧།༡༠འཁོད་ནང་། ང་སྣར་སྐྱིད་རྒས་པོར་མིང་ཤས་བཟོ་བའི་ཆེད་དུ། ལོ་རྒྱུས་ཁ་ལ་འཁྱེར། སེམས་ངན་ཁོག་ཏུ་བཅུག རྫུན་གཏམ་རང་གིས་བཤད། རྫུན་ཁག་གཞན་ལ་དཀྲི་ཟེར་བ་དང་། ངན་པ་ལང་ཤོར་དུ་འགྲོ་ཉེན་མི་འོས་པར་མཐོང་ཟེར་བ་ལ་སོགས་པའི་དམའ་འབེབ་ཚིག་རྩུབ་སྣ་ཚོགས་ཤིག་བྲིས་འདུག
ངས་ནི་བསྟན་འཛིན་ཕན་བདེ་སུ་ཡིན་རྩ་བ་ནས་ངོ་ཤེས་ཀྱི་མེད། ཧོབ་ཏེ། ཨ་ཡ་མཚན། འདི་འདྲ་གང་འདྲ་ཡིན་ནམ་བསམས་ནས་གཞན་ལ་སྐད་ཆ་དྲིས་པས། ཁོ་རང་སྐུ་སྒེར་དྲུང་ཆེ་སྐུ་ངོ་བྲེ་སྲང་ལགས་ཀྱི་ཡིག་འབྲི་ཕྱག་རོགས་ཞུ་མཁན་ཡིན་པ་ཤེས་བྱུང་། གང་ལྟར་འདི་ནི་སྔོན་ལས་འཕྲལ་རྐྱེན་བྱུང་བ་ཡིན་སྟབས། ད་ཆ་ང་རང་ངོས་ནས་ལས་ངན་བསྐྱར་གསོག་མི་དགོས་པའི་བློ་སྦྱོང་ཉམས་ལེན་བྱ་རྒྱུའི་གོ་སྐབས་ཤིག་རེད་བསམས་ཏེ། གང་ཡང་བཤད་བྲིས་མ་བྱས་པར་དུས་ཡུན་ཟླ་བ་གཅིག་ལྷག་ཙམ་སོང་བའི་རིང་དེར། ངས་ལན་འདེབས་གསལ་བཤད་བྱེད་ཀྱི་མེད་པ་དེ། རང་གནོང་ཡོད་པ་རེད་ཅེས་རྒྱབ་བཤད་གླེང་གི་ཡོད་པ་གོ་ཐོས་ཡོང་གི་འདུག དེར་བརྟེན་བསྟན་འཛིན་ཕན་བདེས་ང་ལ་སྨྱོན་པ་ར་བཟིའི་སྐྱུར་འགོང་བཤད་པ་ལྟ་བུའི་སྙོན་འཛུགས་བྱས་པ་དེ་དག་ནི། བདག་ལ་གཞན་གྱིས་ཕྲག་དོག་གིས། གཤེ་སྐུར་ལ་སོགས་མི་རིགས་པའི། གྱོང་ཁ་རང་གིས་ལེན་པ་དང་། རྒྱས་ཁ་གཞན་ལ་འབུལ་བར་ཤོག ཅེས་པའི་བློ་བྱོང་ཉམས་ལེན་ལྷོད་མེད་བྱ་རྒྱུར་ཤུགས་སྣོན་བྱུང་བར་བསམས་ནས་ལན་འདེབས་བྱེད་ཀྱི་མིན།
འོན་ཀྱང་གཤམ་གསལ་རང་རེ་བོད་མིའི་སྤྱི་དོན་ལ་གནོད་པའི་དོན་གནད་ཐོག་ཁོང་རང་གི་བརྗོད་བྱ་འབྲི་སྟངས་ལ་ལད་མོ་བྱས་ཏེ། ཁོར་རང་གི་གཡོ་བྱུས་རྫུན་རྐུབ་བརྟོལ་དགོས་པ་ཞིག་བྱས་འདུག དེ་ནི་ཁྲིམས་ལུགས་དྲང་བདེན་གཞིར་རྩར་བཟུང་བའི་བོད་གཞུང་དམངས་གཙོའི་ཆབ་སྲིད་འཛིན་སྐྱོང་ཡང་དག་པ་ལ་བརྟེན་ནས། རང་རེ་བཙན་བྱོལ་བོད་མིའི་སྤྱི་ཚོགས་རྡོག་རྩ་གཅིག་སྒྲིལ་གང་ས་ཅི་ཐད་ནས་ཡར་རྒྱས་གོང་འཕེལ་མི་སྨོན་རང་སྐྱིད་བརྟན་ལྷིང་འདི་འདྲ་ཡོད་པའི་ནང་། ཁྱེད་རང་བོད་མི་དགེ་ཚུལ་སློང་གི་སྡོམ་ལྡན་ཞིག་གིས་རྒྱ་དམར་གྱི་འདོད་དོན་སྒྲུབ་པའི་འགན་འཁུར་བླངས་ཏེ་བོད་མིའི་ནང་དཀྲུག་ཤིང་རྒྱག་པའི་གཡོ་བྱུས་ལག་ལེན་བསྟར་གྱི་ཡོད་པ་དེ་རེད།
དེ་ལྟར་ཡིན་པ་ནི། གཅིག་དུ་ཁྱེད་རང་གིས་བོད་རྒྱལ་ཁབ་ཀྱི་དབུ་འཛིན་དང་། བོད་གངས་ལྗོངས་གཞུང་དམངས་ཡོངས་ཀྱི་དབུ་ཁྲིད་བླ་ན་མེད་པ་༸གོང་ས་སྐྱབས་མགོན་ཆེན་པོ་མཆོག་དང་། གུས་པ་རང་ལོ་བཅོ་བརྒྱད་ནས།ད་ལྟ་བརྒྱད་བཅུ་བརྒྱ་ལྔར་སོན་པའི་བར་འདིར་བོད་གཞུང་གི་ཆབ་སྲིད་འཛིན་སྐྱོང་སྲི་ཞུ་དང་། བོད་མི་རེ་རེར་འགན་ཡོད་སྐབས་བབ་ལས་ཁུར་གང་ཅི་དྭང་བས་འཁུར་ལེན་ཞུས་དང་ཞུ་བཞིན་པའི་གཞུང་ཞབས་རྒས་པོ་བདག་གི་དབར་ལ་དཀྲུག་ཤིང་བརྒྱབ་པ་སྟེ། སྐད་ཆ་གོ་བདེ་རྡོག་རྡོག་བཤད་ན། ༸རྒྱལ་བ་ཡིད་བཞིན་ནོར་བུ་མཆོག་དང་གུས་པའི་དབར་ལ་དཀྲུག་ཤིང་བརྒྱབ་པ་ཞིག་ཡིན་པ་ནི། ལོང་བས་བལྟས་པས་ཁམས་གསུམ་མ་ཟད། གནག་རྫིས་ཀྱང་ཤེས་རྟོགས་ཐུབ་པ་ཞིག་རེད།
གསུམ་དུ་ཁྱེད་རང་སྐུ་སྒེར་དྲུང་ཆེ་སྐུ་ངོ་བྲེ་སྲང་ལགས་ཀྱི་ཡིག་འབྲི་ཕྱག་རོགས་ཞུ་མཁན་རྣམ་རྒྱས་གྲྭ་ཚང་གི་སྐུ་གཞོགས་བསྟན་འཛིན་ཕན་བདེ་་ཡིན་ན་ནི། དེ་བས་ཀྱང་ཧ་ལས་ཧང་སང་དགོས་པ་ཞིག་ལ་སྐུ་ངོ་བྲེ་སྲང་ལགས་ང་གཉིས་ཧོལ་རྒྱུགས་དང་དངོས་དོན་མིན་པའི་གསལ་བཤད་སྐོར་ལ་༢༠༡༡ ལོ་མཇུག་ནས་གནས་འབྲེལ་ཡོད་པ་ཤེས་བཞིན་དུ། ཁྱེད་རང་གིས་གསར་ཤོག་ནང་ཕྱི་བསྒྲགས་འགྲེམས་སྤེལ་བྱེད་དགོས་ཀྱི་དམིགས་དོན་ག་རེ་ཡིན་ནམ། ཁྱེད་རང་གི་བྱེད་སྟངས་འདི་ཐོག་ནས་ཀྱང་རྒྱ་དམར་གྱི་འདོད་དོན་སྒྲུབ་ཀྱི་ཡོད་པ་ནི། ལོང་བས་བལྟས་པས་ཁམས་གསུམ་སྨོས་ཅི། གནག་རྫིས་ཀྱང་ཤེས་རྟོགས་ཐུབ་པ་ཞིག་ཡིན་པར་མངོན།
བཞི་རུ་ཁྱེད་རང་གིས་བོད་གཞུང་གི་གཞུང་ཞབས་རྒས་པོ་ངའི་བསམ་སྤྱོད་ངན་པ་འདི་འདྲ་འདུག་ཅེས་ང་ལ་མིང་ཤས་ངན་པ་བཟོ་བའི་སྒྲོ་བཏགས་རྟོག་བཟོའི་སྙོན་འཛུགས་དམའ་འབེབ་ཚིག་ངན་སྣ་ཚོགས་གསར་ཤོག་ནང་བཀོད་པ་དེ་ནི། རྒྱ་དམར་གཞུང་གི་དོན་གཅོད་ལས་ཁང་དང་། རྒྱ་དམར་གྱི་སོ་ཉུལ་ལ་དགོས་པའི་གསར་འགྱུར་ཡིག་ཆ་ཞིག་བཙན་འབྱོལ་བོད་མིའི་གསར་ཤོག་ནང་ཐོན་དགོས་པ་དེ་དོན་དྭང་བས་འཁུར་བླངས་ཀྱིས་རྩོམ་སྒྲིག་བྱས་པ་ཞིག་ཡིན་པ་ནི། ལོང་བས་བལྟས་པས་ཁམས་གསུམ་རེད་ལ། གཟུ་བོར་གནས་པའི་བློ་ལྡན་རྣམས་ཀྱིས་ནི་སྨོན་ཅི་དགོས། གནག་རྫིས་ཀྱང་ཤེས་རྟོགས་ཐུབ་པ་ཞིག་འདུག་ཅེས་ངས་ཁྱེད་རང་རང་རིགས་ཀྱི་སྤྱི་ཚོགས་ནང་ལ་དཀྲུག་ཤིང་རྒྱག་མཁན། མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་འགྲོ་བ་མིའི་ཐོབ་ཐང་ལའང་བརྩི་སྲུང་མི་བྱེད་མཁན་གྱི་ཁྲིམས་འགལ་བྱེད་པོ་ངན་པ་ལང་ཤོར་མི་འགྲོ་བའི་ཆེད་དུ། ཁྱེད་རང་གི་གཡོ་བྱུས་རྫུན་རྐུབ་གསལ་པོར་བརྟོལ་པ་ཡིན།
མཐའ་དོན། ཁྱེད་རང་གིས་གསར་ཤོག་ནང་ང་ལ་སྐྱོན་འཛུགས་ཚིག་བཅོས་ཟུར་བཏོན་གཙོ་གནད་ཆེ་ཤོས་ (༡) ངས་༸གོང་ས་མཆོག་གིས་ཧོལ་རྒྱུགས་ཤོར་འདུག་ཅེས་བྲིས་ཡོད་ཚུལ་བཀོད་འདུག་པ་དེ་ངའི་དེབ་ཆུང་གི་ཤོག་གྲངས་དང་ཡིག་འཕྲེང་གང་དང་གང་དུ་འཁོད་ཡོད་པ་དང་། (༢) ངས་སྐད་གསང་ཐོན་པོས་བརྗོད་འདུག་ཅེས་བཀོད་པ་དེ་ངས་སུ་ལ་བཤད་འདུགས་གནས་གང་དུ་བཤད་འདུག་ཁ་གསལ་གོ་བདེ་ཞིག་བོད་ཀྱི་དུས་བབ་དང་བོད་ཀྱི་བང་ཆེན་གསར་ཤོག་གཉིས་ཀའི་ནང་འགོད་དགོས་ཀྱི་འདུག་ཅེས་ནན་སྐུལ་ཞུ་རྒྱུ་དང།
ད་ཆ་བསྟན་འཛིན་ཕན་བདེ་ཁྱེད་རང་ལ་གཏམ་བརྗོད་ལ་སོགས་པའི་རང་དབང་སྤྱི་མཚུངས་ཡོད་པ་ལས། ཁྲིམས་འགལ་རང་འདོད་གང་བྱུང་འབྲི་བརྗོད་མ་ཆོག་པ་དེ་ཤེས་བཞིན་དུ། རྒྱ་དམར་གྱི་འདོད་དོན་སྒྲུབ་ཀྱི་ཡོད་པ་འདིའི་རྩ་བའི་བསམ་ངན་འབྱུང་ཁུངས་དེ་ཐོག་ཕྱིར་བལྟས་ཀྱིས་དཔྱད་སྒོམ་ཟབ་ནན་ཞིག་བྱས་ཐོག དེ་ནས་ང་གཉིས་འབྲེལ་ཡོད་སྐུ་སྒེར་དྲུང་ཆེ་སྐུ་ངོ་བྲེ་སྲང་ལགས་མཉམ་དུ་ངོ་མ་ངོ་ཐུག་ཡ་རབས་སྤྱོད་བཟང་ངང་ནས་དངོས་དོན་གླེང་མོལ་བྱ་རྒྱུ་ལས། མུ་མཐུད་རྔོ་ལོ་ཁྲོམ་འཕྱར་མ་བྱས་ན་ལེགས་པར་བསམ་པས་ཇི་དགེ་ལན་གསལ་ཡོད་པ་ཞུ་རྒྱུ་བཅས།
བཀའ་སློབ་རྒྱུན་མར་བསྩལ་དང་སྩོལ་བཞིན་པ།།
སྐུ་ངོ་སྣར་སྐྱིད་དང་བྲག་གཞིས་བསྟན་འཛིན་ཕན་བདེ་ལགས་རྣམ་གཉིས་རྫུན་རྐུབ་ཕར་བརྟོལ་ཚུར་བརྟོལ་གནང་གི་ཡིན་ནའང་། ཡིག་ནོར་འདི་ལྟ་བུ་མ་ཤོར་བ་གནང་རོགས།
ངའི་བསམ་ཚུལ་ལ། བོད་ཀྱི་སྐད་ཡིག་སྲུང་སྐྱོབ་ཀྱི་བྱ་བའི་ཐོག་མ་སྨྱུག་ཐོགས་པ་ཚོས་ཡི་གེ་དག་པོ་འབྲི་རྒྱུ་ནས་འགོ་བརྩམ་དགོས་ཀྱི་འདུག
“ཡིག་ནོར་ནི་སྐད་ཡིག་གི་བླ་སྲོག་འཕྲོག་མཁན་གྱི་དགྲ་བོ་ངོ་མ་དེ་རེད། ”
མ་དག་པ། དག་པ།
༄༅། ༄༅། །
རྫུན་སྐུབ། རྫུན་རྐུབ།
བསྟན་འཛིན་ཕེན་བདེས། བསྟན་འཛིན་ཕན་བདེས།
འགན་འཁུར། འགན་ཁུར།
ཇི་སྟར། ཇི་ལྟར།
ཉོན་རྨོངས། ཉོན་མོངས།
གཅིག་དུ། གཅིག་ཏུ།
དབུ་འཁྲིད། དབུ་ཁྲིད།
བརྒྱད་བཅུ་བརྒྱ་ལྔར། བརྒྱད་ཅུ་གྱ་ལྔར།
ལོངས་བས། ལོང་བས།
བཙན་འབྱོལ། བཙན་བྱོལ།
སྨོན་ཅི་དགོས། སྨོས་ཅི་དགོས།
ཧོལ་རྒྱུགས། ཧོལ་རྒྱུག
སྐད་གསང་། སྐད་གསངས།
ཐོན་པོས། མཐོན་པོས།
བསྟུད་མུར། བསྟུད་མར།
རྩོལ་བཞིན། སྩོལ་བཞིན།
བསྙད་འདོགས། བརྙས་འདོགས།
ང་ཚོའི་ས་ན་རིག་པའི་གནས་ལྔ་ལ་མཁས་པའི་གནག་རྫི་ཡོད་ཟེར་ན་མི་ཤེས་སྟེ་སྣར་སྐྱིད་ངག་དབང་དོན་འགྲུབ་ཀྱི་རྩོམ་འཆར་འདྲ་བོ་འབྲི་མཁན་མང་པོ་ཡོད། ངས་ངོ་མ་ཡིན་ད་རྒན་པོས་ངལ་གསོ་རྒྱབ་ན་ཡག་ཤོས་རེད།
ད་དུང་ཡིག་ནོར་དང་ཐ་སྙད་བཙོག་པ་མང་པོ་བེད་སྤྱོད་བཏང་འདུག་པས་ཀྱང་གནད་དོན་མང་པོར་རང་བཞིན་གྱིས་གསལ་སྟོན་བྱས་འདུག
ད་སྐད་ཆ་མ་འཕྲོས་མར་རྩོད་གཞི་ངོ་མའི་ཐད་གསུངས་ན་ཡག་གི
སྣར་སྐྱིད་ཀྱིས་༧གོང་ས་མཆོག་གིས་ཧོལ་རྒྱུགས་གནང་ཚུལ་བྲིས་འདུག ཤོག་གྲངས་གཉིས་གསུམ་ཞིག་ལས་ཤོག་བུའི་གྲངས་ཀ་བཤད་དགོས་དོན་ག་རེ་ཡིན་ནམ།
གཞན་”༧གོང་ས་མཆོག་དང་གུས་བའི་བར་ལ་དཀྲུག་ཤིང་”ཞེས་པའི་ཚིག་འདི་རིག་འཚོ་མ་ཟིན་པ་ཞིག་གི་སྐད་ཆ་དངོས་གནས་རེད། ཚིག་འདིས་༧གོང་ས་མཆོག་ལ་ཅི་ཙམ་བརྩི་བཀུར་བྱེད་ཀྱི་ཡོད་མེད་ཧ་གོ་ཐུབ་ཀྱི་འདུག དངོས་གནས་སྨྲ་བ་ཉུང་ན་མཛེས།
སྣར་སྐྱིད་ངག་དབང་དོན་གྲུབ་ཀྱིས་ལོ་རྒྱུས་ཀྱི་དོན་གནད་ལ་ལན་འདེབས་མ་བྱས་པར། བསྟན་འཛིན་ཕན་བདེས་འདི་དང་དེའི་བར་ལ་དཀྲུག་ཤིང་བརྒྱབས་སོང་ཞེས་ཅམ་བུའི་ཚིག་ཙམ་སྨྲ་བའི་བྱེད་སྟངས་ལ་བལྟས་ན། ཕལ་ཆེར་གདེང་འཕེར་བའི་ལན་ཞིག་རྒྱག་རྒྱུ་མེད་པ་འདྲ།
གནག་རྫིས་ཀྱང་ཤེས། གནག་རྫིས་ཀྱང་ཤེས་ཞེས་མང་པོ་ཞིག་བྲིས་འདུག གནག་རྫི་ཚོར་མཐོང་ཆུང་དེ་འདྲ་རང་བྱ་དགོས་ཅང་ཡོད་དམ། ཨ་ལ་ཀུ་རེ་ཡིན།