འདས་པའི་ཉིན་ལྔའི་རིང་སྦིར་བོད་ཚོགས་ཚོགས་ཁང་དུ་གཞོན་ལྷན་གྱི་འགན་འཛིན་ལྷན་ཚོགས་ཐེངས་ ༤༣ ཚོགས་ཏེ། བཀའ་སྤྱི་གཉིས་ལ་སྙན་ཞུ་ཕུལ་ཏེ་གཞུང་གི་སྲིད་བྱུས་ལངས་ཕྱོགས་རང་བཙན་ཐོག་བསྒྱུར་ཐབས་ལ་འབད་རྒྱུ་དང་། དབུས་རྒྱུན་གསུམ་གྱིས་མི་འགྱངས་པར་ལྡི་ལིར་དུས་ཡུན་ངེས་མེད་ཀྱི་ཟས་བཅད་གནང་རྒྱུ་བཅས་ཀྱི་གྲོས་ཆོད་བཞག་འདུག
ཟླ་འདིའི་ཕྱི་ཚེས་ ༨ ནས་ ༡༢ བར་རྒྱ་གར་ཧི་མ་ཅལ་མངའ་ཁོངས་སྦིར་གཞིས་ཆགས་བོད་མིའི་ཚོགས་ཁང་དུ། བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༣ པ་དེ་ཚོགས་ཡོད་ཅིང་། ཚོགས་འདུའི་ཐོག་གཞོན་ལྷན་དབུས་ས་གཉིས་ཀྱི་ལས་བསྡོམས་དང་རྩིས་ཁྲ་ཞིབ་བཤེར། དེ་སྔའི་གྲོས་ཆོད་ཁག་ལ་བསྐྱར་ཞིབ་ཀྱིས་ལག་བསྟར་དགོས་རིགས་མུ་མཐུད་མཇུག་སྐྱོང་། བཙན་བྱོལ་བོད་གཞུང་གི་བཞེངས་ཕྱོགས་རང་བཙན་སླར་གསོའི་ཐོག་བསྒྱུར་ཐབས་སུ་བཀའ་སྤྱི་གཉིས་ལ་ཞུ་སྙན་འབུལ་རྒྱུ་དང་། ཕྱི་ལོ་ ༢༠༡༡ ལོར་ལྡི་ལི་དང་། ༢༠༡༢ལོར་ནེའུ་ཡོག་རྒྱལ་ཚོགས་མདུན་སྤེལ་བའི་ཟས་བཅད་ལས་འགུལ་ཁག་གི་དགོས་འདུན་མཇུག་སྐྱོང་ལག་བསྟར་ཆེད། ཕྱི་ལོ་ ༢༠༡༢ ཟླ་ ༩ ཚེས་ ༣ ནས་མགོ་འཛུགས་ཀྱིས་རྒྱ་གར་རྒྱལ་ས་ལྡི་ལིར་དབུས་རྒྱུན་གསུམ་གྱིས་དུས་ཚོད་ངེས་མེད་ཀྱི་ཟས་བཅད་ལས་འགུལ་སྤེལ་རྒྱུ་གཙོས། གྲོས་གཞི་ཁག་ ༨ ཐོག་བགྲོ་གླེང་གྲོས་བསྡུར་གནང་མཐར་གྲོས་ཆོད་དོན་ཚན་ ༢༡ ཙམ་བཞག་ཡོད་འདུག
ཐེངས་འདིའི་གྲོས་གཞི་དང་པོ་རྩིས་ཁྲ་ཞིབ་བཤེར་སྐོར་ལ། བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་དང་། ས་གནས་རྒྱུན་ལས་ཁག་གི་ལས་བསྡོམས་དང་རྩིས་ཁྲར་ཞིབ་བཤེར་འཐུས་གཙང་ཟིན་པ། གཉིས་པ་དེ་སྔའི་གྲོས་ཆོད་མཇུག་སྐྱོང་གནང་རྒྱུའི་སྐོར་ལ། བོད་ཀྱི་གཞོནནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༠ པའི་གྲོས་གཞི་དོན་ཚན་གསུམ་པ་ཀ་པའི་གྲོས་ཆོད་ཨང་ ༢ པ། གྲོས་གཞི་དོན་ཚན་ལྔ་པ་ཁ་པའི་གྲོས་ཆོད་ཨང་ ༢ པ། གྲོས་གཞི་དོན་ཚན་དྲུག་པ་ཁ་པའི་གྲོས་ཆོད་ཨང་ ༢ པ། གྲོས་གཞི་དོན་ཚན་བདུན་པ་ཀ་པའི་གྲོས་ཆོད་ཨང་ ༣ པ། དེ་བཞིན་འགན་ལྷན་ཐེངས་ ༤༢ པའི་གྲོས་གཞི་དོན་ཚན་གསུམ་པའི་ཀ་པའི་གྲོས་ཆོད་ཨང་ ༡ ། གྲོས་གཞི་དོན་ཚན་བཞི་པའི་གྲོས་ཆོད་ ༢ པ་བཅས་མཇུག་སྐྱོང་ཞུ་རྒྱུ།
གྲོས་གཞི་དོན་ཚན་གསུམ་པ་ཆབ་སྲིད་དང་འབྲེལ་བའི་གཞོན་ནུའི་ལངས་ཕྱོགས་དང་ལས་འགུལ་སྤེལ་ཕྱོགས་ཐད། གཞིས་བྱེས་བོད་མིའི་ཡིད་ལ་བརྣག་པའི་འདོད་དོན་ཆོལ་གསུམ་གཅིག་ཏུ་བསྒྲིལ་བའི་བོད་རང་བཙན་སླར་གསོའི་དམིགས་ཡུལ་བོད་མི་ཡོངས་ཀྱི་སེམས་ནང་མི་འགྱུར་བརྟན་གནས་ཐུབ་ཆེད། བཙན་བྱོལ་བོད་མིའི་ས་གནས་ཁག་ནང་བོད་ཀྱི་རྒྱལ་རབས་ལོ་རྒྱུས་དང་། རང་བཙན་འཐབ་རྩོད་ཀྱི་བརྗོད་གཞིའི་ཐོག་ཟབ་སྦྱོང་སྤྲོད་རྒྱུ། བོད་རང་བཙན་ཁུངས་སྐྱེལ་གྱི་ཡིག་ཆ་ཁག་གང་མང་དཔར་འགྲེམས། འདས་པའི་ཉམས་མྱོང་དང་ད་ལྟའི་ཛ་དྲག་གནས་བབ་ལ་གཞིགས་ཏེ། བཙན་བྱོལ་བོད་གཞུང་གི་བཞེངས་ཕྱོགས་དེ་བཞིན་རང་བཙན་སླར་གསོའི་ཐོག་བསྒྱུར་ཐབས་སུ་བཀའ་སྤྱི་ལྷན་རྒྱས་ལ་ཞུ་སྙན་འབུལ་རྒྱུ།
རྒྱ་གཞུང་གིས་བོད་ནང་མི་སེར་སྤེལ་བའི་ཛ་དྲག་གི་སྲིད་བྱུས་སྣ་ཚོགས་ལ་གདོང་ལེན་ཆེད། རིས་མེད་བླ་སྤྲུལ་ཁག་གིས་བོད་ནང་གི་བོད་མི་ཚོར་བཀའ་སློབ་ལམ་སྟོན་གནང་སྐྱོང་ཡོང་བའི་ཞུ་སྙན་འབུལ་རྒྱུ་དང་། ཕྱི་ཟླ་ ༦ ཚེས་ ༥ འཛམ་གླིང་ཁོར་ཡུག་ཉིན་མོ་དེ་བཞིན་བོད་ཀྱི་གཞོན་ནུ་ལྷན་ཚོགས་ཀྱིས་གཏན་འབེབས་ལས་འགུལ་སྲུང་བརྩི་ཞུ་རྒྱུ། ༸པཎ་ཆེན་ཆུང་སྲིད་རིན་པོ་ཆེ་ད་ཆ་གར་ཡོད་ཤེས་རྟོགས་ཆེད། འདི་ལོར་གནས་མཆོག་ཝ་ར་ཎཱ་སིར་བོད་བརྒྱུད་ནང་བསྟན་ཆེས་མཐོའི་ལྷན་ཚོགས་སྐབས་ནང་པའི་བླ་ཆེན་ཁག་དང་འབྲེལ་ཡོད་ཁག་ལ་འབོད་སྐུལ་ཞུ་རྒྱུ་དང་། ༸པཎ་ཆེན་ཆུང་སྲིད་རིན་པོ་ཆེ་གཙོས་བོད་མི་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་ཡོང་སླད། གཞོན་ལྷན་དབུས་ས་གཉིས་ནས་ལས་འགུལ་སྤེལ་རྒྱུ་དང་། རྒྱ་གཞུང་གི་བོད་བརྒྱུད་ནང་བསྟན་དང་འབྲེལ་བའི་ཡིག་ཆ་ཨང་ལྔ་པ་དང་ཨང་བརྒྱད་པ་ནི། བོད་རྒྱལ་ཁབ་ཀྱི་ནང་སྲིད་ལ་ཐེ་བྱུས་བྱས་པ་ཡིན་པར་ངོ་རྒོལ་བྱས་ཟིན་པ་ལྟར། དེ་འབྲེལ་ཁྲིམས་གཞི་གང་ཞིག་གཏན་འབེབས་རིགས་ནམ་ཡང་ངོས་ལེན་མེད་པ་གསལ་སྟོན་བྱ་རྒྱུ།
གྲོས་གཞི་དོན་ཚན་བཞི་པ་རང་བཙན་སླར་གསོ་དང་དེའི་ཐད་ལས་འགུལ་སྤེལ་ཕྱོགས་སྐོར་ལ། བོད་ཕྱི་ནང་གཉིས་ནས་བོད་རང་བཙན་སླར་གསོ་དང་རྒྱ་ནག་གི་སྲིད་བྱུས་ལ་ངོ་རྒོལ་ཆེད། རྩ་ཆེའི་སྐུ་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམ་པའི་རླབས་ཆེན་སྙིང་སྟོབས་ལ་བསྔགས་བརྗོད་གུས་འདུད་དང་ཤུལ་ལུས་གཉེན་ཉེ་ནང་མི་རྣམས་ལ་ཐུགས་གསོ་ཞུ་རྒྱུ། བོད་རྒྱལ་ཁབ་ཆེད་སྐུ་ལུས་མེར་བསྲེགས་གནང་བ་དེ་འཚེ་མེད་ཞི་བའི་ལས་འགུལ་ཚད་མཐོ་ཤོས་སུ་ངོས་འཛིན་གསལ་སྟོན་དང་། ༢༠༡༡ ལོར་རྒྱ་གར་རྒྱལ་ས་ལྡི་ལི་དང་། ༢༠༡༢ ལོར་ནེའུ་ཡོག་རྒྱལ་ཚོགས་མདུན་སོ་སོར་སྤེལ་བའི་ཟས་བཅད་ལས་འགུལ་གྱི་དགོས་འདུན་ཁག་མཇུག་སྐྱོང་ལག་བསྟར་ཆེད། རྒྱ་གར་རྒྱལ་ས་ལྡི་ལིར་དབུས་རྒྱུན་གསུམ་གྱིས་ཕྱི་ལོ་ ༢༠༡༢ ཟླ་ ༩ ཚེས་ ༣ ནས་མགོ་འཛུགས་ཀྱིས་དུས་ཚོད་ངེས་མེད་ཀྱི་ཟས་བཅད་ལས་འགུལ་ཞིག་སྤེལ་རྒྱུ།
གྲོས་གཞི་དོན་ཚན་ལྔ་པ་བོད་པའི་ཆོས་དང་རིག་སྲུང་སྐྱོབ་སྐོར་ལ། བོད་ཕྲུག་རྣམས་ཀྱི་བོད་ཀྱི་སྐད་ཡིག་ལ་དོ་སྣང་ཡར་རྒྱས་ལ་དམིགས་ཏེ། བོད་སྐད་ཐོག་ཡོད་པའི་རི་མོའི་གློག་བརྙན་ཁག་གཞོན་ལྷན་དབུས་ནས་ཕྱོགས་བསྒྲིགས་ཀྱིས་ས་གནས་གཞོན་ནུ་ཁག་གིས་འགྲེམས་སྤེལ་དང་། སློབ་གྲྭ་ཁག་ཏུ་བོད་ཡིག་དགེ་རྒན་ཚད་ལྡན་བསྐོ་བཞག་དང་། དེ་དག་གི་གླ་ཕོགས་སོགས་མཐུན་རྐྱེན་ཡར་རྒྱས་གཏོང་དགོས་པ་ཤེས་རིག་ལྷན་ཁང་དང་། བོད་ཕྲུག་ཁྱིམ་སྡེ། མ་སུ་རི་བོད་ཁྱིམ། བལ་ཡུལ་གངས་ཅན་བདེ་རྩ་བཅས་ཀྱི་སྤྱི་ཁྱབ་ཡིག་ཚང་ལ་ཞུ་སྙན་འབུལ་རྒྱུ། ལྷག་དཀར་ལས་འགུལ་གྱི་ངོ་བོ་དང་། རྒྱབ་ལྗོངས། ལས་འགུལ་དེ་ཉིད་ཡོངས་ཁྱབ་ཏུ་སྲུང་བརྩི་ཞུ་ཕྱོགས་སྐོར་དེབ་ཆུང་ཞིག་གཞོན་ལྷན་དབུས་ནས་འགྲེམས་སྤེལ་བྱ་རྒྱུ།
གྲོས་གཞི་དོན་ཚན་དྲུག་པ་ ༸གོང་ས་མཆོག་གི་སྐུ་ཕྱཱའི་ཐད། རྒྱ་གར་དབུས་སའི་གཞུང་དང་རང་གཞུང་བདེ་སྲུང་ལྷན་ཁང་གིས་ད་བར་༸རྒྱལ་བའི་སྐུ་ཕྱཱའི་ཐད། ཞུ་སྒོ་གང་ལེགས་གནང་བར་ཐུགས་རྗེ་ཆེ་ཞུ་རྒྱུ་དང་། མ་འོངས་པར་སྔར་ལྷག་དེའི་ཐད་དམ་དོན་ངེས་གནང་ཡོང་རྒྱུ། སྐུའི་ངལ་གསོ་དང་ཉེན་སྲུང་སླད། གཟིམ་ཆུང་མཇལ་ཁ་སྤྱི་དང་ལྷག་པར་རྒྱ་མི་རིགས་ཁག་ལ་མཇལ་འཕྲད་ཉུང་འཕྲི་དང་། མཇལ་ཁའི་སྐབས་ངེས་པར་འབྲེལ་ཡོད་ཁག་ནས་སྔར་ལྷག་ཐུགས་གཟབ་གནང་རྒྱུའི་ཐད་ཞུ་སྙན་འབུལ་རྒྱུ།
གྲོས་གཞི་དོན་ཚན་བདུན་པ་གཞོན་ནུའི་དབུས་སའི་སྒྲིག་གཞི་ཚགས་ཚུད་ཡོང་ཐབས་སྐོར་ལ། དེ་སྔོན་ས་གཞོན་ཁག་གི་སོ་སོའི་ཚོགས་དར་ཐོག་ས་གནས་ཀྱི་ཁྱད་ཆོས་ལ་གཞིགས་པའི་པར་རིས་འཁོད་པ་ཕྱིར་བསྡུ་བྱས་ཏེ། གཞོན་ལྷན་གྱི་སྒྲིག་གཞིའི་ནང་གསལ་གཞི་སེར་པོའི་ཐོག་བོད་ཀྱི་ས་ཁྲ་ལྗང་ཁུ་འཁོད་པ་དེ་ཉིད་གཅིག་གྱུར་བེད་སྤྱོད་བྱ་རྒྱུ། བོད་ཀྱི་གཞོན་ནུ་ལྷན་ཚོགས་ཀྱི་དབུས་སའི་རྒྱུན་ལས་སྔ་རྗེས་ལོ་ ༡༥ གནང་ཞིང་། མུ་མཐུད་གཞོན་ནུའི་ཚོགས་མིར་གནས་བཞིན་པ་རྣམས་ཀྱི་རྒྱལ་གཅེས་སྙིང་སྟོབས་ལ་གུས་བཀུར་སླད་ཚོགས་ཆེན་སྐབས་ཆེ་བསྟོད་གཟེངས་རྟགས་འབུལ་རྒྱུ།
གྲོས་གཞི་དོན་ཚན་བརྒྱད་པ་སྤྱི་སྨན་དགོངས་འཆར་གྱི་སྐོར་ནས། ཕྱི་ལོ་ ༢༠༡༢ ལོར་གཞོན་ལྷན་གྱི་ཚོགས་ཆེན་ཐེངས་ ༡༥ པའི་ཚོགས་མགོན་དུ་བོད་རྒྱལ་ཁབ་ཆེན་པོའི་བླ་ན་མེད་པའི་དབུ་ཁྲིད། ༸གོང་ས་མཆོག་ཆིབས་བསྒྱུར་བཀའ་དྲིན་ཆེ་བའི་གསོལ་འདེབས་སྐྱབས་འཇུག་ཞུ་རྒྱུ་བཅས་ཀྱི་གྲོས་ཆོད་བཞག་འདུག
གསར་འགོད་པ། ཚེ་རིང་རྒྱལ།
ད་དུང་ཞུ་རྒྱུ་ཞིག་ལ་ཚོགས་ཆེན་ཐེངས་བཅོ་ལྔ་པ་ལ༼༸གོང་ས་མཆོག་ཆིབས་བསྒྱུར་བཀའ་དྲིན་ཆེ་བའི་གསོལ་འདེབས་སྐྱབས་འཇུག་ཞུ་རྒྱུ་༽ཟེར་དེ་ནམ་ཡང་ངོས་ལེན་མེད།་རྒྱུ་མཚན་རྣམ་པ་ཚོས་གསལ་པ་མཁྱེན་སྲིད་པའི་གསལ་བཤད་མི་དགོས་བ་བྱོས།
ད་ལྟ་བོད་ལ་ཛ་དྲག་གི་གནས་སྟངས་ནང་དུ་ལྷུང་ཡོད་ཙང་གཞོན་ནུའི་ངོས་ནས་དོན་དང་ལྡན་པའི་གྲོས་གཞི་ཡག་པོ་ཡོད་རྒྱུ་རེད་དྲན་བྱུང་ཡང་། རྙིང་པ་རྣམས་བསྐྱར་གླེང་ཙམ་དང་དབུ་རྒྱུན་གསུམ་གྱི་ཟ་བཅད་ངོ་རྒོལ་ཙམ་ལས་མེད་པ་ནི་ཚོགས་ཆེན་འགྲོ་སོང་ཆེན་རིན་རང་རེད་དྲན་སོང་།
ཟ་བཅད་ངོ་རྒོལ་བྱེད་དེ་རང་ལུས་སྐྱོ་པོ་བཟོ་བ་ལས་ཉི་མ་རེ་ལ་མི་མང་བརྒྱ་རེ་ཡི་རྒྱ་སྤྲང་ཚང་གི་གཞུང་ཚུབ་སྒོ་ཁ་རུ་ཉིན་མཚན་མེད་པ་ཕྱི་ནང་འགྲོ་ས་མེད་པ་བཟོས་ན་དེ་ཡག་གི་རེད་དྲན། ཅི་ཡིན་རུང་གྶརོས་གཞི་རྣམས་དེ་ཙམ་སྣང་བ་འགྲོ་མ་སོང་།་དགོང་དག།
བོད་དོན་ལས་འགུལ་ལ་རྗེས་སུ་ཡི་རང་དང་། ཆིབ་སྒྱུར་གསོལ་འདེབས་ལ་རྒྱབ་སྐྱོར་མེད།
སྒོ་དྲུག་ཚགས་གཙོ་ཡིན་སྐབས་ཀྱི་ཉོག་དྲ་དེ་རྫབ་ཆེ་ཤོས་ཤིག་རེད། དེ་འདྲ་འབྱུང་སྲིད་པར་ཞེ་ཐག་ཆོད་ཡོད་པ་ཚང་མས་ཤེས་གསལ་རེད། དེ་མ་གཏོགས་ཚོགས་གཙོ་རེ་རེའི་སྐབས་ཀྱི་ཚོགས་ཆེན་ནང་ཉོག་དྲ་མ་བྱུང་བ་གཅིག་ཀྱང་ཡོད་པ་མ་རེད། ད་ཐེངས་ཁུག་ཀྱོག་ཅིག་ནས་ཚོགས་དགོས་པ་དེ་རྙོག་དྲ་ཁྱབ་བསྒྲགས་ལ་གཡོལ་གྱི་ཡོད་པ་ཚོགས་མི་ཚང་མས་ཤེས་ཀྱི་ཡོད་པ་རེད། ཡིན་ནའང་ཞེད་སྣང་སྐྱེས་པ་ཆེ་ཤོས་དེ་ཚེ་དབང་རིག་འཛིན་ཚོགས་གཙོ་སྐབས་སྔོན་མའི་ཚོགས་ཆེན་ནང་། ཚོགས་གཞོན་དོན་གྲུབ་རྡོ་རྗེའི་སྐོར་གྱི་རྙོག་དྲ་དེ་འདྲ་འབྱུང་པ་ཡིན་ན། མི་མང་ཚོས་མ་ཤེས་ན་དགའ་གི་རེད་དྲན་པ་རེད། རྒྱུ་མཚན་དེས་དབང་གིས་ཁུག་ཀྱོག་ཅིག་ནས་ཚོགས་པ་རེད།
དབུས་རྒྱུན་གསུམ་གྱིས་ཐེངས་འདིར་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་རྒྱའི་གྲོས་ཆོད་བཞག་པ་དེར་བསྔགས་བརྗོད་ཡོད། དེ་གཅིག་ཡིན། གཉིས་པ་དབུས་གཞོན་ནུས་ད་ལོའི་རྡོར་གདན་དུས་འཁོར་དབང་ཆེན་སྐབས་སུ་ཆོས་ཞུ་བ་དག་གི་ལག་ནས་དངུལ་ག་ཚོད་བསྡུས་ཡོད་པ་དེར་རྩིས་ཁྲ་ལོགས་སུ་བཏོན་མེད་པ་དེར་ངོ་རྒོལ་ཡོད། བོད་ནང་གི་ཆོས་ཞུ་བ་མང་པོ་ཞིག་གིས་ཀྱང་རྗེས་ནས་མ་གཏོགས་ཤེས་མི་འདུག གང་ཡིན་ཟེར་ན། དུས་འཁོར་དབང་ཆེན་གོ་སྒྲིག་ཚོགས་ཆུང་དང་། བོད་ཀྱི་གཞོན་ནུ་ལྷན་ཚོགས་ཁ་ཁ་ཡིན་པ་ཤེེས་མི་འདུག གསུམ་པ། ཐེངས་འདིའི་ཚོགས་ཆེན་སྦིར་གཞིས་ཆགས་ཀྱི་ཁུག་ཀྱོག་ཚོགས་ཁང་ཞིག་ཏུ་ཚོགས་པ་དེར་རྒྱུ་མཚན་གཉིས་ཡོད་པ་རེད། དང་པོ་རྒྱ་ཁྱབ་རང་བཞིན་དང་། མི་མང་གི་མདུན་སར་འཚོགས་རྒྱུའི་སྤོབས་པས་མ་འདང་བ་རེད། གལ་སྲིད་སྔོན་མའི་ཚོགས་གཙོ་སྒོ་དྲུག་གི་སྐབས་སུ་རྙོག་དྲ་བྱུང་བ་དེ་ལྟ་བུའི་རིགས་བྱུང་ཚེ་མི་གཞན་གྱིས་མ་མཐོང་བཟང་གི་རེད་བསམ་པ་རེད། གཉིས་པ། ལས་འགུལ་སྤེལ་ཕྱོགས་དང་ལས་འཆར་སྒྲིག་སྟངས་ཀྱི་ཐད་ནས་དམིགས་བསལ་བ་གཅིག་ཀྱང་བྱུང་ཡོད་པ་མ་རེད་དེ། ད་ཐེངས་ཚོགས་ཞུགས་པ་ཡོངས་ཀྱིས་ཧ་གོ་གསལ་ལྟར། གཞུང་དང་སྒེར་གྱི་ཚོགས་སྡེ་ཁག་ཅིག་དང་། དེ་བཞིན་མི་སྒེར་རེ་ཟུང་བཅས་ཀྱི་ཐོག་ཏུ་བོད་ཀྱི་གཞོན་ནུའི་ངོས་ནས་མ་འོངས་པར་སྲིད་བྱུས་ལངས་ཕྱོགས་གང་འདྲ་འཛིན་དགོས་མིན་དང་། དཔལ་འབྱོར་དང་ཆབ་སྲིད་ལས་འགུལ་སྤེལ་ཕྱོགས་ཐད་ཀྱི་སྐད་ཆ་དང་གྲོས་གཞི་རེ་ཟུང་བྱུང་བ་དེ་དག་གི་ཆེད་དུ་ས་ཆ་ཁུག་ཀྱོག་ཅིག་ནས་ཚོགས་པ་རེད། འདི་ལ་མོས་མཐུན་རྩ་བ་ཉིད་ནས་མེད་ཅེས་ཞུ་འདོད་བྱུང་སོང་།།།
འོ། སྐད་ཆ་གཞན་པ་ཞིག ཞེད་སྣང་ཚ་བོ་ཞིག་ལ། བོད་ནང་རང་ལུས་མེར་སྲེག་ཐད་གཀྲོག་གཏམ་ཞིག་ཁྱབ་ཀྱི་འདུག་ཟེར། ཞིབ་འཇུག་བྱེད་མཁན་ཚོས་དེ་གཞོན་ནུ་དང་འབྲེལ་བ་འདུག་ཟེར།་དེ་ཤ་མ་ཚ་རང་རེད། གལ་སྲིད་ཉིན་ཞིག་ཁུངས་བརྡོལ་ན། ཁྱེད་ཚོ་ང་གསར་འབྱོར་བ་ཞིག་ཡིན་པའི་ཆ་ནས་རྩིས་ཏག་ཏག་རྒྱག་གི་ཡིན། དེ་བདེན་པ་ཡིན་ན་མཚམས་འཇོག་རོགས། བོད་ནང་གི་བོད་མི་ཚོ་གླེན་པར་མ་བརྩི། ཁོང་ཚོའང་མི་རེད། ཐུགས་ལ་ཉར་རོགས།།།
གཞོན་ནུ་དབུས་ས་གཉིས་ཀྱི་རྩིས་ཕྲར་ཞིབ་འཇུག་བྱ་རྒྱུ་གལ་ཆེན་རེད། མི་མང་ནང་སྐད་ཆ་མང་པོ་ཡོད་སྟབས་དེ་དགོས་ངེས་ཤིག་རེད། ཚོགས་ཆེན་རྩ་བའི་ནས་ཡག་པོ་འདུག་བསམས་སོང།
ཡིན་ནའང། གླེན་རྟགས་ཚ་བོ་ཞིག་ག་རེ་བསྟན་འདུག་བསམས་ན། གཞུང་གི་ལངས་ཕྱོགས་རང་བཙན་དུ་བསྐྱོད་རྒྱུར་བཀའ་སྤྱི་གཉིས་ལ་སྙན་ཞུ་ཕུལ་གྱི་ཡིན་ལབ་ན། མང་གཙོའི་སྤྱི་ཚོགས་ཀྱི་གཞུང་གི་འགྲོ་སྟངས་མ་ཤེས་པས་རེད། དེ་བས་རང་བཙན་པ་སྤྱི་ལ་བསམ་བློ་བཏང་ནས་རང་བཙན་ཁ་ལ་ཁྱེར་ནས་ཞབས་འདྲེན་མ་ཞུས་ན་བཟང། དེ་གཟབ་གཟབ་བྱེད་གལ། དངོས་གནས་ལངས་ཕྱོགས་ལ་འགྱུར་བ་གཏོང་གི་ཡིན་ན། རང་ངོས་ནས་ཡིད་ཆེས་བརྟན་པོ་དགོས་པ་རེད། རང་ངོས་ནས་ཡིད་ཆེས་རྙེད་པ་དེས་མི་མང་གི་ཡིད་ཆེས་ཀྱང་འགུག་ཐུབ་དགོས་པ་རེད། དེ་བཀུགས་པ་ཡིན་ན། ད་གཟོད་ལངས་ཕྱོགས་ལ་འགྱུར་བ་གཏོང་ཐུབ་ཀྱི་རེད།
དེ་གཞོན་ལྷན་གྱིས་ཐུབ་ཀི་རེད་དམ་མ་རེད། དེ་དྲི་བ་རེད། ད་ལྟའི་ཆར་དབུས་རྒྱུན་ནང་མི་མང་ཕར་ཞོག དབུས་རྒྱུན་ནང་ཁུལ་ཡང་རྡོག་ལ་སྒྲིལ་བོ་ཞིག་མེད་པ་དེ། དཔལ་འབྱོར་ཁོ་ནའི་དཀའ་ངལ་མིན་པར། དབུས་རྒྱུན་ཚང་མ་མཉམ་རུབ་བྱ་སའི་རང་བཙན་གྱི་ལངས་ཕྱོགས་རྒྱུ་མཚན་ཡག་པོ་མ་ཤེས་པ་དང། རང་བཙན་སྒྲུབ་ཐབས་ཁྱོན་ནས་རྙེད་ཀྱི་མེད་སྟབས། གླ་ཆ་ལེན་མཁན་གྱི་དབུས་རྒྱུན་ཞིག་ཆགས་ཡོད་པས། ལངས་ཕྱོགས་རང་བཙན་དུ་བསྒྱུར་རྒྱུ་ཞེས་པ་འདི་གཞོན་ལྷན་དབུས་རྒྱུན་ཁོ་ནས་གླེང་ན་ཧ་ཅང་བྱབ་ཆུང་ཆགས་ངེས་པ་རེད།
དེ་བས་ང་ཚོ་རང་བཙན་པ་ཚང་མ་འཛོམས་ནས་གཟབ་གཟབ་བྱས་ན་མ་གཏོགས། རང་བཙན་རྦད་དེ་བརླག་ཉེན་ཞེ་དྲག་ཡོད་པ་རེད། འཇམ་དབྱངས་ནོར་བུ་དང་ལྷ་བཟང་ནི་སེམས་ཤུགས་ཆག་ནས་ཤི་གྲབས་ཡོད་པ་གསལ་བོ་རེད། སེམས་ཤུགས་ཡོད་ཀྱང་ཐབས་ལམ་ཞིག་མ་རྙེད་པ་གསལ་བོ་རེད། མཚམས་རེར་སྐུ་མདུན་ལ་ཁ་གཏོང་སྐུར་བ་འདེབས་པ་དེ་ཙམ་རེད།
ཀརྨ་ཆོས་འཕེལ་ནི་འཇམ་ནོར་སོགས་དང་རང་བཙན་བཤད་སྟངས་འདྲ་བོ་མེད། མཚན་སྨད་ཞུ་མཁན་གྲས་སུ་མེད་ཅེས་ཚགས་པར་སྟེང་བཀོད་འདུག དེས་ཀྱང་རང་བཙན་པ་ཚོ་ཁ་འཐོར་ཡིན་པ་གསལ་བོ་རེད།
དེས་ན་དབུས་རྒྱུན་ཡིན་ན་འདྲ ། འགན་འཛིན་ལྷན་ཚོགས་ཡིན་ན་འདྲ། སོ་སོའི་ག་རེ་འཇོན་གྱི་ཡོད་མེད་སྐྱག་རྫུན་མ་བཤད་པར་དྲང་པོར་ཞུ་དགོས་པ་དེ་གལ་ཆེན་རེད། གོ་ཐོས་བྱས་ན། མང་ཆེ་བ་ནམ་རྒྱུན་སློབ་སྦྱོང་མི་བྱེད་མཁན་བོད་དོན་ལ་དོ་སྣང་མི་བྱེད་མཁན་རྐྱང་རྐྱང་རེད་ཟེར། དེ་འདྲ་ཡིན་ན་པེ་ཟགས་རེད། དེ་བས་སོ་སོའི་ཕ་མ་དང་བུ་ཕྲུག་ཚ་བོ་ཚ་མོ་རྣམས་ལ་མགོ་བསྐོར་གཏོང་མི་ཉན་པ་དེ་ཉམས་ལེན་གནང་རོགས།
དབུས་བོད་ཀྱི་གཞོན་ནུའི་སྙིང་སྟོབས་དང་ལྷག་བསམ་ལ་རྗེས་སུ་ཡི་རང་ཞུ།།
བོད་ཨ་མདོ་རྔ་བ་ནས་མི་གཉིས་ཀྱིས་རང་ལུ་ཞུ་འབུལ་གནང་ནས་ཆུ་ཚོད་ཕྱེད་ཀ་ལྷག་ལས་འགྲོ་མི་འདུག། ད་ལྟ་རང་གོ་སོང་། ཨོཾ་མ་ཎི་པདྨེ་ཧུཾཿཨོཾ་མ་ཎི་པདྨེ་ཧུཾཿཨོཾ་མ་ཎི་པདྨེ་ཧུཾཿཨོཾ་མ་ཎི་པདྨེ་ཧུཾཿ