ཁ་སང་བོད་ཨ་མདོ་རྔ་པ་རྫོང་ཐོག་ཏུ་གྲྭ་བ་ཞིག་དང་མི་སྐྱ་ཞིག་གིས་དུས་མཉམ་དུ་རང་ལུས་མེར་བསྲེགས་བཏང་ཡོད་པ་དང་། དེའི་རྗེས་གྲྭ་བ་དེ་སྐུ་གྲོངས་ཡོད་པའི་གནས་ཚུལ་ཡང་འདུག
ཁ་སང་ཕྱི་ཚེས་ ༡༣ ཉིན་གྱི་བོད་ནང་གི་ཆུ་ཚོད་ ༦།༥༠ ཙམ་ལ་བོད་མདོ་སྨད་རྔ་པ་རྫོང་ཆོས་རྗེ་མ་ཞང་སོ་རུ་མ་སྡེ་བའི་རང་ལོ་ ༢༡ ཡས་མས་ཡིན་པའི་མི་སྐྱ་བཀྲ་ཤིས་དང་། རང་ལོ་ ༢༠ ཡས་མས་ཡིན་ཞིང་སོ་རུ་མ་སྡེ་བའི་རྔ་པ་ཀིརྟི་དགོན་པའི་སྨན་པ་གྲྭ་ཚང་གི་གྲྭ་ལུང་རྟོགས་གཉིས་ཀྱིས་རྔ་པ་ཀིརྟི་དགོན་པའི་འདབ་ཀྱི་མ་ཎི་འཁོར་ཁང་ཞིག་གི་ནང་ནས་རང་ལུས་ལ་མེར་བསྒྲོན་ཏེ་དཔའ་བོའི་སྲང་ལམ་ནས་ངོ་རྒོལ་སྐད་འབོད་གནང་ཡོད་འདུག
དེ་ཡང་གྲྭ་ལུང་རྟོགས་ཀྱིས་དཔའ་བོའི་སྲང་ལམ་ནས་སྐད་འབོད་བྱེད་བཞིན་གཞུང་ལམ་དབུས་མའི་བཞི་མདོར་བསླེབས་མཚམས་ཉེན་རྟོག་པ་ཁག་ཅིག་གིས་རུབ་ནས་མེ་བསད་དེ་བཙན་ཁྲིད་བྱས་འདུག་ལ། བཀྲ་ཤིས་ཀྱིས་དཔའ་བོའི་སྲང་ལམ་ནས་སྐད་འབོད་བྱེད་བཞིན་ཡོང་སྐབས་གཞུང་ལམ་དུ་མ་སླེབས་ཙམ་ལ་ཉེན་རྟོག་པ་མང་པོས་རུབ་བརྡུང་བྱས་ནས་མེ་བསད་དེ་རླངས་འཁོར་ནང་བཙན་ཁྲིད་བྱས་ཡོད་ཀྱང་། སྐབས་དེར་ཁོང་གྲོངས་ཡོད་མེད་གསལ་པོ་ཤེས་རྟོགས་ཐུབ་མི་འདུག ཁོང་གཉིས་སྐབས་ཐོག་དེར་རྔ་པའི་སྨན་ཁང་དུ་ཁྱེར་ནས་དུས་ཚོད་ཕྱེད་ཀ་ཙམ་རིང་བསྡད་རྗེས་འབར་ཁམས་ལ་ཁྱེར་ཡོད་ཀྱང་དངོས་སུ་མཐོང་མཁན་གྱིས་བརྗོད་པར། གཉིས་ཀ་མེས་ཚིག་པའི་རྨས་སྐྱོན་ཚབས་ཆེན་ཡིན་སྟབས། གསོན་པོ་ཡོང་རེ་མེད་ཚུལ་བརྗོད།
ལུང་རྟོགས་ཀྱི་ཕ་མིང་ལ་རིས་ཆུང་ཟེར་ཞིང་དེ་སྔོན་ནས་འདས་གྲོངས་སུ་ཕྱིན་ཡོད་པ་དང་མ་མིང་ལ་ཀླུ་མོ་ཡིན་འདུག ཁོང་རྔ་པ་ཀིརྟི་དགོན་པའི་སྨན་པ་གྲྭ་ཚང་ཡིན་ཞིང་བཀྲ་ཤིས་གྲྭ་པ་ཡིན་སྐབས་ཁོང་གཉིས་འཛིན་གྲྭ་གཅིག་པ་ཡིན་འདུག ཕྱི་ཚེས་ ༡༣ ཉིན་གྱི་སྔ་དྲོ་སྨན་པ་གྲྭ་ཚང་ཚོགས་འཚོགས་སྐབས་ལུང་རྟོགས་ཀྱིས་བོད་ཀྱི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་ཆེད་དུ་དགེ་འདུན་རེ་ལ་རྒྱ་སྒོར་གཅིག་རེ་སྐུ་འགྱེད་བཏང་སྟེ་བསྔོ་བ་སྨོན་ལམ་དང་སྐྱབས་འཇུག་ཞུ་སྐུལ་གནང་འདུག བཀྲ་ཤིས་ཀྱི་མ་མིང་ལ་རྔ་པོ་ཟེར་ཞིང་ཁོང་དེ་སྔོན་ཀིརྟི་དགོན་པའི་གྲྭ་པ་ཡིན་པ་ཕྱི་ལོ་ ༢༠༡༡ ལོར་སྐྱ་སར་བབས་ནས་ཕ་མའི་རྩར་བསྡད་ཡོད་འདུག
དོན་རྐྱེན་བྱུང་མ་ཐག་ཉེ་འཁོར་གྱི་མི་མང་གིས་ཀི་ལྡིར་བྱས་ཏེ་སྐད་འབོད་སྣ་ཚོགས་བྱས་འདུག་པར་དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པ་སོགས་འབོར་ཆེན་བསླེབས་ཏེ། མི་མང་ལ་ལྕགས་དབྱུག་འཛེར་མ་ཅན་སོགས་ཀྱིས་གང་བྱུང་གཅར་རྡུང་བྱས་ཏེ། མི་མང་པོ་ཞིག་ལ་རྨས་སྐྱོན་བཟོས་ཤིང་། མི་ཁག་ཅིག་སྐབས་ཐོག་དེར་འཛིན་བཟུང་བཙན་ཁྲིད་བྱས་པར་མ་ཟད། མི་གཅིག་གི་མགོ་ལ་ལྕགས་དབྱུག་འཛེར་མ་ཅན་གྱིས་གཞུས་ཏེ་མགོ་ཡོངས་རྫོགས་ཁྲག་གིས་བགོས་ཡོད་པར་མ་ཟད། མི་དེའི་རྗེས་ཀྱི་གནས་ཚུལ་གསལ་པོ་ཤེས་རྟོགས་ཐུབ་མི་འདུག དེའི་རྗེས་རྔ་པ་རྫོང་མཁར་ཡོངས་ལ་དམིགས་བསལ་ཉེན་རྟོག་པ་ཧ་ཅང་མང་པོ་འགྲེམས་འཇོགས་བྱས་འདུག
དེ་རིང་ཕྱི་ཚེས་ ༡༤ ཉིན་ཡང་རྔ་པའི་རྫོང་མཁར་ལ་དམིགས་བསལ་ཉེན་རྟོག་པ་དང་སྤྱི་བདེ་ཉེན་རྟོག་པ་མང་པོ་འགྲེམས་འཇོག་བྱས་ཡོད་འདུག དེ་རང་ཞོགས་པར་གནས་ཚུལ་གསར་དུ་འབྱོར་གསལ་ལ། གྲྭ་ལུང་རྟོགས་འདས་གྲོངས་སུ་ཕྱིན་ཡོད་ཀྱང་ཁོང་གི་སྐུ་ཕུང་འབར་ཁམས་ལ་ཁྱེར་ཡོད་སྟབས་ནང་མིར་སྤྲད་ཡོད་མེད་ཤེས་རྟོགས་མ་ཐུབ། ཁ་སང་རྔ་པའི་སྨན་ཁང་ནས་འཁྱེར་སྐབས་མི་གཅིག་སྨན་ཁང་གིས་ཛ་དྲག་ནད་པ་སྐྱེལ་འདྲེན་བྱེད་སའི་རླངས་འཁོར་ནང་ཁབ་ཆེན་བརྒྱབ་ནས་ཁྱེར་ཡོད་འདུག་ལ། གཞན་དེ་དམག་མིའི་རླངས་འཁོར་ནང་བཞག་ཡོད་ཀྱང་དེའི་གནས་སྟངས་ཤེས་རྟོགས་མ་བྱུང་།
གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
ང་ཚོའི་དང་པོ་མི་ལ་ཕར་མ་བཤད་སྔོན་དུ་རང་ཉིད་ལ་ལྟ་རྒྱུ་གལ་ཆེན་པོ་རེད། བོད་ནང་དུ་རང་རིགས་དཔའ་བོ་དཔའ་མོ་གྲངས་ལྔ་བཅུ་ལྷག་གིས་རང་གི་ཚེ་སྲོག་སྒྲོན་མེར་ཕུལ་སོང་། གཞུང་སྒེར་གྱིས་བྱུང་མ་སོང་ཟེར་མཁན་ཁྱོད་ཀྱིས་དེ་སྔ་ལས་འགུལ་དང་ཕྱག་ལས་ག་རེ་གནང་ཡོད་དམ། བོད་ནང་གི་རང་ལུས་མེ་སྲེགས་གཏོང་མཁན་རྣམས་ལའང་དབུ་ཁྲིད་དང་། སྣེ་ཁྲིད་མེད་པར་རང་ཉིད་ཀྱི་སེམས་ཐག་གཅོད་ཀྱི་ཡོད་པ་ཁྱེད་ཀྱང་ཤེས་དགོས། གང་ལྟར་འབད་པ་གནང་དགོས་ཡ།
འདིར་ཕེབས་པའི་དྲ་གྲོགས་རྣམ་པ། འདིར་མཆན་འདེབས་ཀྱིན་མི་འདུག་ཟེར་ནས་སེམས་ཤུགས་ཆག་དགོས་དོན་གང་ཡང་ཡོད་མ་རེད། ང་ལྟ་བུར་མཚོན་ན་གནས་ཚུལ་འདི་དུས་བབ་ཚང་ནས་མ་མཐོང་སྔོན་ལ་ངོ་དེབ་དང་། དྲ་ལམ་གཞན་ནས་ཤེས་རྟོགས་བྱུང་བས། རང་ཉིད་ཀྱི་སེམས་སྡུག་ཡོད་ཚད་ངོ་དེབ་སོགས་ཀྱི་གྲོགས་ཕན་ཚུལ་བཤད་རེས་བྱེད་བཞིན་ཡོད།
གཙོ་བོ་ང་ཚོས་བོད་ནང་གི་བོད་མིས་རང་ལུས་མེ་བསྲེག་བཏང་ཚད་གྲངས་ཀ་བརྒྱབ། ཕྱི་བསྒྲགས་བྱེད་བཞིན་བསྡད་ན་དེ་ཡང་ཐབས་ཤེས་ཤིག་མིན་པ་གསལ་བོ་རེད། བཙན་བྱོལ་དུ་ཡོད་པའི་གཞུང་དང་ཚོགས་པ་གང་རུང་གིས་དབུ་ཁྲིད་པའི་སྟེང་ནས། ཕྱི་ལྟོས་མེད་པའི་བོད་བསྐྱོད་ལས་འགུལ་སྤེལ་ན་འཕྱིས་དྲག་མེད་ནས་སྔ་དྲག་མེད་པའི་གནས་བབ་དེ་ཚང་མས་ཤེས་དགོས་པ་ཞིག་རེད། རྒྱལ་གཅེས་དཔའ་བོ་དེ་དག་གིས་རང་གི་ལུས་སྲོག་ལོངས་སྤྱོད་ཡོད་ཚད་བློས་བཏང་སྟེ། བོད་སྤྱི་བའི་བདེ་སྡུག་གི་ཆེད་དུ་ཨུ་ཐུག་ཐབས་ཟད་ངང་བསྔོས་ཟིན་ན། ང་ཚོས་རང་ཉིད་ཀྱི་འཁོས་འབྱོར་ཕྲན་བུ་རེ་བློས་མ་ཐོངས་པར་སྡོད་པ་ནི་ངོ་ཚ་དགོས་པ་ཞིག་རེད་ལ། སྐུ་གཤེགས་དཔའ་བོ་དཔའ་མོ་རྣམས་ཀྱིས་ཤི་དུར་ཁུང་ནས་གཟིགས་པའི་ཚེ་ན་ཡང་། ང་ཚོའི་ཉེས་བ་གནམ་སར་ཤོངས་དཀའ་བ་བཤད་མ་དགོས་པ་ཞིག་རེད། དེ་བས་ཚང་མས་རང་གཞུང་ལ་ཁ་ཕྱོགས་ཏེ་འདིའི་སྐོར་ལ་བསམ་འཆར་འདོན་འགོ་བརྩམ་རྒྱུ་ལས་གང་ཡང་ལྷག་ཡོད་མ་རེད། སྤུན་ཟླ་ཚོ་ལངས་ཤོགས།
རྒྱལ་ཞེན་པ་ཁོང་གཉིས་ཀྱི་སྙིང་སྟོབས་ལ་བསྔགས་བརྗོད་དང་རྗེས་སུ་ཡི་རངས་ཞུ།
སྔར་ཡིན་ན་གནས་ཚུལ་འདི་འདྲ་བྱུང་སྐབས་མཆན་བུ་འདེབས་མཁན་མང་པོས་འཚང་ཀ་རྒྱག་བཞིན་ཡོད་མོད། གནས་ཚུལ་འདི་བྱུང་ནས་ཉིན་གཉིས་འགོར་ཡང་་། མཆན་འདེབས་མཁན་གཉིས་ལས་མི་འདུག འདི་ལས་ངས་ཡིད་སྐྱོ་བའི་ངོ་གདོང་གཞན་ཞིག་མཐོང་ཡོང་གི་འདུག སྔར་ཡིན་ན་མེར་བསྲེགས་ལས་འགུལ་སྐོར་གྱི་གནས་ཚུལ་ཀློག་གྲངས་སྟོང་ཕྲག་མང་པོ་ཡོད་མོད། དེ་རིང་ལྔ་བརྒྱ་ཡས་མས་ལས་མི་འདུག། དཀོན་མཆོག་མཁྱེན། མེར་བསྲེགས་ལས་འགུལ་ལ་བོད་མི་རིགས་ལ་ཡང་ཚོ་ལ་ཡང་རྒྱུན་ལྡན་ནས་ཚོར་མེད་ཆགས་བཞིན་ཡོད་ན། མི་རིགས་གཞན་ལ་ཤོད་མ་དགོས་པ་ཞིག་རེད། ད་ཅི་བྱ། ཨ་ཁ་ཁ་
སྦྲ་དཔལ་ལྡན་ལགས། སུ་ཞིག་སྐྱིད་པོ་་བྱས་ནས་བསྡད་འདུག ང་ཚོ་རང་རེའི་དཔའ་རྒོད་རེ་རེ་མེར་བསྲེགས་གནང་བ་ན་མིག་ཆུ་ཁྲོམ་ཁྲོམ་དུ་མ་བཞུར་བ་ཧ་ལམ་མེད། ལས་འགུལ་སྤེལ་སྟངས་ཤིག་སློབ་དཱ། ཁོང་རྣམ་གཉིས་ལ་༸ཡིད་བཞིན་ནོར་བུས་ཐུགས་རྗེས་སྤྱན་གྱིས་གཟིགས་པར་ཤོག བདེ་ཅན་ཞིང་དུ་འཁྲིད་རོགས་ཧཾགནང་།
རེད་རེད་ བོད་ནང་གི་བོད་མི་དེ་ཚོས་མེ་བསྲེགས་བསྡད་ན་འུ་ཚོས་སྐྱོད་པོ་བྱས་ནས་བསྡད་འདུག་ཀི་ བོད་ནང་ཀི་བོད་མི་དེ་ཚོས་གཅེས་སྲོག་དམར་པོ་མེ་རུ་སྒྲོན་དུས་འུ་ཚོས་ཆོས་བརྒྱུད་ཀྱི་འཚོགས་འདུ་དང་། སྒེར་གཞུང་གི་མཛད་སྒོ་ གཞུང་ཞབས་མི་སྣའི་བཀའ་སློབ་ལ་ཉན་ནས་སོས་དལ་འདུག་ བོད་ནང་གི་བོད་མི་ག་ཚོད་སྲེག་སོང་
བཙན་བྱོལ་གཞུང་སྒེར་གཉིས་ཀྱིས་ལས་འགུལ་ཚ་ཐག་ཅིག་གང་ནས་སྤེལ་སོང་། བཀའ་བློན་དང་བཀའ་ཁྲི་ཕྱི་རྒྱལ་ལ་ལྟ་སྐོར་དུ་འགྲོ་ཞོར་སྐད་ཆ་བཤད་ཟི་བྱས་ན་ཅིས་མི་ཆོག་གམ