རང་བཙན་ཆེད་བོད་ཀྱི་རྒྱལ་ཡོངས་ལྷན་ཚོགས་གསར་འཛུགས་ལས་འཕྲོས་པའི་གཏམ།

འབྲོང་དཀར་པོ།

ཕྱི་ལོ་ ༢༠༡༢ ལོའི་ཟླ་ ༦ ཚེས་ ༢༧ ཉིན་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་ནང་རང་བཙན་ཚོགས་འདུ་ཞེས་པ་ཞིག་ཚོགས་འདུག  ཚོགས་འདུའི་གནས་ཚུལ་རྣམས་རིམ་བཞིན་གསར་ལམ་ཁག་ནང་ཐོན་པར་གཞིགས་ན་ཚོགས་འདུ་དེ་ནི་དེ་སྔོན་ཕྱི་ལོ་ ༢༠༡༢ ཟླ་ ༣  ཚེས་ ༡༡ ཉིན་ཨ་རིའི་གྲོང་ཁྱེར་ནེའུ་ཡོག་ནང་ཚོགས་པའི་རང་བཙན་ཚོགས་འདུའི་འཇུག་མཐུད་ཡིན་པར་བཤད་འདུག རང་ངོས་ནས་ཚོགས་འདུ་འདིའི་ཐོག་སྡོམ་ཚིག་བཀོད་ན་དོན་དག་གསུམ་གྱི་སྟེང་དབྱེ་མཚམས་བཅད་དེ་བསམ་གཞིག་བྱས་ཆོག་པ་འདུག་སྙམ། དེ་ཡང་དང་པོ། ༸རྒྱལ་དབང་བཅུ་གསུམ་པས་རང་བཙན་བསྐྱར་བསྒྲགས་བྱས་ཏེ་ལོ་ ༡༠༠ འཁོར་བའི་རྗེ་དྲན་གྱི་རང་བཙན་ཚོགས་ཆེན་ཚོགས་རྒྱུ། གཉིས་པ། རང་བཙན་འཐབ་རྩོད་ཀྱི་དཔུང་ཁག་ཆིག་སྒྲིལ་བཟོ་རྒྱུ།  གསུམ་པ། དམིགས་ཡུལ་ལྔ་ཅན་གྱི་འོག་བོད་ཀྱི་རྒྱལ་ཡོངས་ལྷན་ཚོགས་གསར་འཛུགས་བྱ་རྒྱུ་བཅས་རེད། རྔམ་བརྗིད་ལྡན་པའི་དོན་གནད་འདི་ཚོའི་ངོ་གདོང་ལ་ལྟས་ན་དགའ་འོས་ཤིང་རེ་བས་ཁེངས་པའི་རྣམ་པ་མངོན་ཡང་། དོན་གནད་རེ་རེ་བཞིན་དམར་ཧྲེང་དུ་བུད་དེ་གློ་སྙིང་མཆིན་གསུམ་གྱི་འགྲེལ་བརྗོད་བྱས་ན་རྙོག་འཛིང་ཆེ་ལ་གསལ་ཁ་མེད་པའི་དོན་གནད་ཤ་སྟག་རེད། དེར་བརྟེན་གནད་དོན་འདི་ཚོའི་ཐོག་རང་ཉིད་ཀྱི་བསམ་གཞིག་སྣ་ཚོགས་ཤིག་འཇིགས་ཞུམ་མེད་པའི་ཐོག་ནས་སྲོང་པོར་བརྗོད་རྒྱུ་ཡིན་པས་རྒྱ་ཆེའི་ཀློག་པ་པོ་རྣམས་ནས་དགོངས་འཇགས་ཞུ། །

དང་པོ། ༸རྒྱལ་དབང་བཅུ་གསུམ་པ་འུད་སྒྲོག་བྱེད་དོན་ཅི་ཡིན།

མིའི་རིགས་ཀྱི་དཔལ་ཡོན་ལྡན་པའི་སྤྱི་ཚོགས་འགོ་ཚུགས་པ་ནས་བཟུང་འགྲོ་བ་མིའི་ལོ་རྒྱུས་ནང་དཔེ་མཚོན་གཟེངས་བསྟོད་འོས་པའི་མི་སྣ་མང་པོ་བྱུང་བ་བཞིན་ང་ཚོ་བོད་མིའི་ལོ་རྒྱུས་ནང་དུའང་དད་གུས་རྗེས་དྲན་བྱ་འོས་ཀྱི་མི་སྣ་མང་དག་ཅིག་བྱུང་ཡོད་པས་ན་ ༸གོང་ས་༸སྐྱབས་མགོན་བཅུ་གསུམ་པ་ཆེན་པོ་མཆོག་ཀྱང་བོད་ཀྱི་ལོ་རྒྱུས་ཀྱི་ཀྱོག་མཚམས་ཤིག་ན་རླབས་ཆེན་གྱི་མཛད་པ་བསྐྱངས་མྱོང་བའི་གཟེངས་བསྟོད་རྗེས་དྲན་འོས་པའི་མི་སྣ་ཞིག་ཡིན་པར་ཐེ་ཚོམ་ཅི་ཡང་མེད་པ་ཞིག་རེད། འོན་ཀྱང་དེང་སྐབས་འཆར་ལོའི་ནང་༸རྒྱལ་དབང་བཅུ་གསུམ་པས་རང་བཙན་བསྐྱར་བསྒྲགས་བྱས་ནས་ལོ་བརྒྱ་འཁོར་བའི་རྗེས་དྲན་དང་འབྲེལ་བའི་ཐོག་ནས་བོད་རང་བཙན་གྱི་དར་ཆ་བསྒྲེང་རྒྱུའི་སྦིར་གྲགས་བྱེད་པ་འདི་ལ་བསམ་གཞིག་ནན་མོ་ཞིག་བྱ་དགོས་འདུག་སྙམ།  ༸གོང་ས་བཅུ་གསུམ་པས་བསྐྱར་བསྒྲགས་བྱས་པའི་རང་བཙན་གྱི་གནས་བབས་ལ་བསམ་ཞིབ་བྱས་ན་སྣ་མང་རྙོག་འཛིང་གིས་ཁེངས་པའི་རང་བཙན་གྱི་གནས་བབས་ཤིག་གླེང་དགོས་པ་རེད། ང་ཚོའི་ལོ་རྒྱུས་ནང་༸སྐྱབས་མགོན་བཅུ་གསུམ་པ་ཆེན་པོས་རྒྱ་གར་ནས་རང་ཡུལ་ལྷ་ལྡན་ཞིང་དུ་ཕྱིར་ཕེབས་གྲུབ་མཚམས་ཕྱི་ལོ་ ༡༩༡༣ ཟླ་ ༡ ཚེས་༨ ཉིན་སྦུག་དམ་རྩ་ཚིག་ཅིག་ཡོངས་གྲགས་སུ་སྤེལ་བ་འདི་ཉིད་བོད་རང་བཙན་སྐྱར་བསྒྲགས་གནང་བར་ངོས་འཛིན་བྱེད་ཀྱི་ཡོད། སྦུག་དམ་རྩ་ཚིག་མའི་ནང་ “བོད་རིགས་སྐྱེ་བོ་མཆོག་དམན་ཚང་མས་ཀྱང་རང་ནུས་གང་ཤར་གྱི་རྒྱ་དམག་དང་འཐབ་འཛིང་མུ་མཐུད་བྱས་པ་བཅས་ལ་བརྟེན་དབུས་གཙང་ཁུལ་ལ་ཡོད་པའི་རྒྱ་དམག་ཚང་མ་མཐར་བསྐྲོད་བཏང་ཟིན་ཏེ། ངོས་ཀྱང་རང་གི་སྐྱོང་ཡུལ་ཆོས་ལྡན་གྱི་ཞིང་དུ་བདེ་འབྱོར་ཐོག  ཁམས་ཕྱོགས་སུ་ཡོད་པའི་འཕྲོས་ལྷག་རྣམས་ཀྱང་རིམ་བཞིན་མཐར་སྐྲོད་གཏོང་རྒྱུ་བཅས།” ཞེས་གསུངས་པ་བཞིན་སྐབས་དེའི་གནས་བབས་ལ་བསམ་གཞིག་བྱས་ན་དབུས་གཙང་གི་ས་ཁུལ་ནས་རྒྱ་དམག་མཐར་བསྐྲད་ཀྱང་འབྲི་ཆུའི་རྒྱུད་ཀྱི་བོད་ཁོངས་ས་ཁུལ་མང་པོའི་ནང་རྒྱ་བོད་དམག་འཛིང་བྱེད་མུས་ཀྱི་སྐབས་༸གོང་ས་མཆོག་བོད་ཀྱི་རྒྱལ་ས་ལྷ་ལྡན་དུ་ཞབས་སོར་འཁོད་ཙམ་ཞིག་ཡིན་པ་གསལ་པོ་ཤེས་ཐུབ་པས་སྐབས་དེར་འབྲི་ཆུ་ཚུན་ཆོད་ཀྱི་ས་ཁུལ་ཙམ་ལ་མ་གཏོགས་བདེ་འཇགས་མེད་པས་ན་ས་མཚམས་ཀྱི་གནས་བབས་ཁ་གསལ་མེད། སྐབས་དེར་གཞུང་ས་ཕྱོགས་ནས་དམག་དོན་སྤྱི་ཁྱབ་མཁན་དྲུང་བྱམས་པ་བསྟན་དར་བཀའ་བློན་བླ་མར་གནས་སྤར་གྱིས་མདོ་སྨད་ཞི་དྲག་སྤྱི་འདོམས་སུ་བསྐོ་གཞག་མཛད་དེ་ཁམས་ཕྱོགས་ཀྱི་རྒྱ་དམག་མཐར་སྐྲོད་དུ་མངག་བྱ་བྱས་ཡོད། དུས་སྐབས་དེར་རྒྱ་དམག་གི་དམག་དོན་ལས་ཁུངས་ལྟེ་བ་ཆབ་མདོར་ཡོད་ཅིང་དམག་སྤྱི་པིན་ཐུང་ལིང་ཡིན། ཁམས་ཕྱོགས་ས་ཁུལ་རི་བོ་ཆེ་དང་། ལྕགས་ཟམ། ནང་ཆེན། ཆབ་མདོ། སྡེ་དགེ། འཇོ་མདའ་སོགས་རྒྱ་དམག་ནས་བཟུང་ཡོད། མདོ་སྤྱིས་ཁྱུང་པོ་སོགས་ཀྱི་ས་ཁུལ་དུ་ཡོད་པའི་རྒྱ་དམག་རྣམས་ལ་དྲག་འཐབ་ཀྱིས་མཐར་སྐྲོད་བྱེད་པ་དང་། ཕྱོགས་གཞན་ནས་ཞི་བའི་ཐབས་ལམ་ལ་བརྟེན་ནས་རྒྱ་བོད་ས་མཚམས་ཀྱི་རྩོད་རྙོག་རྣམས་གཙང་མ་ཡོང་ཐབས་ལ་འབད་པ་གནང་བཞིན་ཡོད་པ་བཞིན་མཐར་ཕྱི་ལོ་ ༡༩༡༤ ལོར་སིམ་ལར་རྒྱ་བོད་དབྱིན་གསུམ་གྱི་དབང་ཚད་ཆ་ཚང་ལྡན་པའི་སྐུ་ཚབ་ལྷན་འཛོམས་ཐོག་༼ ཤིང་སྟག་སིམ་ལའི་ཆིངས་ཡིག ༽ཅེས་པ་བཞག་ཡོད། ཆིངས་གྲོས་སྐབས་ཐོག་མར་བོད་ཕྱོགས་ནས་ཤར་ཕྱོགས་ས་མཚམས་དར་རྩེ་མདོ་ཚུན་དགོས་པར་གསུངས་ཤིང་རྒྱ་ཕྱོགས་ནས་རྒྱ་བོད་ས་མཚམས་ཀོང་པོ་རྒྱ་མདའ་ལ་ཆ་འཛིན་དགོས་སྐོར་བཤད་ནས་ཆིང་དོན་ཐོག་དོན་ལྡན་གྱི་གྲོས་འཆམས་མ་བྱུང་བས་མཐར་དབྱིན་ཇིའི་སྐུ་ཚབ་ནས་བོད་ལ་ཕྱི་ནང་གཉིས་བཟོས་ཏེ། <མེ་ཁལ་གྱིས་བརྩམས་པའི་བོད་ཀྱི་གནས་བབས་ཞེས་པའི་དེབ་ནང་བོད་ཕྱི་མ་ཞེས་པ་རོབ་རྩིས་ཀྱིས་བོད་དབུས་དང་ནུབ་ཕྱོགས་དང་། བོད་ནང་མ་ཟེར་བ་རྒྱ་ནག་དང་ས་འབྲེལ་ཨ་མདོ་དང་ཁམས་ཀྱི་ཆ་ཤས་ཏེ་བོད་ཀྱི་ཤར་དང་། བྱང་ཤར་གྱི་ཆ་ཤས་ཡིན། ཞེས་གསལ།> རྒྱ་མིས་བོད་ཕྱི་མའི་ནང་དམག་མི་མི་གཏོང་བ་སོགས་ཀྱི་ཆིངས་དོན་ལ་དབྱིན་བོད་སྐུ་ཚབ་ནས་མིང་རྟགས་བཀོད་ཡོད། སིམ་ལའི་ཆིངས་དོན་ལ་རྒྱ་ཕྱོགས་ནས་མིང་རྟགས་མ་བཀོད་པ་སོགས་དོན་ཕན་ལྡན་པ་མ་བྱུང་བས་ཁམས་ཁུལ་རྒྱ་དམག་ནས་ཀོང་པོ་རྒྱ་མདའ་བར་འགྲོ་རྒྱུ་ཡིན་པའི་སྦིར་གྲགས་བྱུང་བར་བརྟེན་མདོ་སྤྱི་བླ་མས་མུ་མཐུད་དྲག་རྒོལ་བྱས་ཏེ་ཆབ་མདོར་ཡོད་པའི་རྒྱའི་དམག་དོན་ལྟེ་གནས་བླངས་པ་སོགས་རྒྱ་དམག་ཕམ་པར་བྱས་ཏེ་དར་རྩེ་མདོ་བར་འགྲོ་རྒྱུའི་དམག་གྲ་བསྒྲིགས་པས་རྒྱ་ཕྱོགས་ཀྱི་རེ་ཞུ་བཞིན་དབྱིན་གཞུང་བར་བཞུགས་ཀྱིས་རྒྱ་བོད་བར་སླར་ཡང་ཆབ་མདོར་ཞི་ཆིངས་བྱས་ཡོད།

རྒྱལ་རབས་སྨྲ་བའི་དབང་ཕྱུག་ཞྭ་སྒབ་པ་དབང་ཕྱུག་བདེ་ལྡན་མཆོག་གིས། རྒྱ་བོད་གཉིས་དབྱིན་གཞུང་བར་བཞུགས་ཀྱིས་ཉིན་མང་པོ་བཀའ་མོལ་གནང་བའི་མཐར་རེ་ཞིག་ས་མཚམས་དབྱེ་འབྱེད་མཛད་པའི་འབྲི་ཆུའི་ཆུ་རྒྱུད་ཀྱིས་བཅད་པ་སྡེ་དགེ་དང་དཔལ་ཡུལ་མ་གཏོགས་ཤར་ཕྱོགས་རྣམས་གནས་སྐབས་རྒྱ་ཕྱོགས་ནས་ཉར་རྒྱུ་དང་། ཞེས་སོགས་གསུངས་པ་བཞིན། སྐབས་དེར་ཆབ་མདོར་ཕྱི་ལོ་ ༡༩༡༨ ཟླ་ ༨ ཚེས་ ༡༩ འཁོད་པའི་ཆིངས་ཡིག་དོན་ཚན་བཅུ་གསུམ་ཅན་ཞིག་བཞག་པའི་དོན་ཚན་གསུམ་པའི་ནང་རྒྱ་བོད་གནས་སྐབས་ས་མཚམས་བྱེད་རྒྱུར་རྒྱ་གཞུང་ཁོངས་སུ་ས་སྒོ། འབའ། ཚ་ཁ་ལྷོ། རྟ་ཤོ། སྡེ་རོང་། ལི་ཏང་། སྒང་རྩེ། ཉག་རོང་། བྲག་འགོ། རྟའུ། ཉག་ཆུ་ཁ། དར་རྩེ་མདོ། རོང་མི་བྲག་སྒོ། ལྕགས་ཟམ་ཁ། རྒྱལ་རྩེ་རོང་། ཆ་ཕྲེང་། རྟའོ་ཕྲིན་བཅས་ཤར་ཕྱོགས་ས་སྡེ་ས་སྒོ་རྣམས་རྒྱ་གཞུང་ནས་བདག་སྤྲོད་བྱེད་རྒྱུ། བོད་ཕྱོགས་དཔོན་འགོ་ཞི་དྲག་དམག་མི་ས་ཆ་དེ་ཁོངས་བསྡད་མི་ཆོག བོད་གཞུང་ཁོངས་སུ་རྫོང་ཀག་རི་བོ་ཆེ། རྔན་མདའ། ཆབ་མདོ། བྲག་གཡབ། རྨར་ཁམས་སྒར་ཐོག གོ་འཇོ། ས་ངན།་ཐང་ཕུག ལྡན་ཁོག སེར་ཤུད། སྡེ་དགེ། དཔལ་ཡུལ་བཅས་ཀྱི་ཁོངས་སུ་གཏོགས་པ་ནུབ་ཕྱོགས་ས་སྡེ་རྫོང་ཁག་རྣམས་བོད་གཞུང་ནས་བདག་སྤྲོད་བྱ་རྒྱུ། རྒྱ་ཕྱོགས་དཔོན་འགོ་ཞི་དྲག་དམག་མི་རྣམས་ས་ཆ་དེ་ཁོངས་བསྡད་མི་ཆོག  ཅེས་སོགས་འཁོད་ནས་ཆིངས་དོན་དེ་ཚོར་རྒྱ་བོད་གཉིས་ཐད་ནས་མོས་མཐུན་ཡོད་ཚུལ་སོགས་འཁོད་ཡོད། ཆིངས་ཡིག་འདི་ཉིད་བཞག་རྗེས་ཀྱང་རྒྱ་བོད་བར་ས་མཚམས་སུ་དམག་འཁྲུག་བྱས་ཏེ་བོད་ཕྱོགས་སྔར་ཡོད་ས་ཆ་འགའ་ཤས་ཤོར་ཡོད་ཀྱང་མཐར་ཕྱི་ལོ་ ༡༩༣༣ ཟླ་ ༦ ཚེས་ ༡༥ ཉིན་ཟི་བོད་ཆིངས་ཡིག་དོན་ཚན་ལྔ་ཅན་བཞག་ནས་སྔར་གྱི་ཆིངས་དོན་ལ་རང་གནས་ཡོང་བ་བྱས་ཡོད། དུས་དེ་ནས་བཟུང་འབྲི་ཆུའི་རྒྱུད་ལ་ས་མཚམས་བཟུང་ནས་ཕྱིན་ཡོད། ༸སྐྱབས་མགོན་བཅུ་གསུམ་པ་ཆེན་པོས་ཆུ་གླང་ལོ་ནས་ཆུ་སྤྲེལ་ལོ་བར་ཕྱིའི་རྒྱལ་སྲུང་དྲག་དཔུང་རྒྱ་བསྐྱེད་དང་། ནང་གི་གཞུང་འཛིན་ལམ་ལུགས་ཕྲ་ཚུགས་ཡོང་ཐབས་ལ་འབད་པ་གནང་འབྲས་སུ་འབྲི་ཆུ་ས་མཚམས་སུ་བཅད་པའི་བོད་ལྗོངས་སུ་ཆུ་སྤྲེལ་ཞལ་གདམས་ནང་རང་གི་སྐྱོང་ཡུལ་བོད་ལྗོངས་ཆོས་ཀྱི་ཞིང་སར་སླར་འཁོད་དེ་ཆུ་གླང་ནས་བཟུང་། ཆུ་སྤྲེལ་བར་བོད་ལྗོངས་འདི་ཉིད་དུ་བདེ་སྐྱིད་རྫོགས་ལྡན་གསར་དུ་བཞད་པས། ཞེས་སོགས་གསུངས་པ་བཞིན་སྐབས་དེའི་རང་དབང་གཙང་མའི་རྒྱལ་མཚམས་ཀྱི་གནས་བབས་ནི་དེ་ཙམ་ཞིག་ཏུ་གནས་ཡོད་པ་གསལ་པོ་ཡིན། དེ་རྗེས་༸རྒྱལ་དབང་བཅུ་གསུམ་པ་ཆེན་པོ་མཆོག་ཕྱི་ལོ་ ༡༩༣༣ ཟླ་ ༡༢ ཚེས་ ༡༧ ཉིན་གྱི་དགོང་དྲོ་ནོར་གླིང་དུ་དགོངས་པ་ཞི་དབྱིངས་སུ་འཐིམ་ཚུལ་བསྟན་ཡོད། དུས་དེ་ནས་བཟུང་དར་རྩེ་མདོ་བར་གྱི་ས་མཚམས་རྩོད་ལེན་བྱ་སེམས་མེད་པ་ཙམ་མ་ཟད། སྔར་ཡོད་རྒྱལ་མཚམས་སྲུང་བྱའང་དེ་མུར་གནས་ཏེ་ནང་ཁུལ་རྩོད་རྙོག་སྣ་མང་གིས་དུས་འདའ་བར་བྱས་ཡོད། དུས་ཕྱིས་ཀྱི་ས་མཚམས་གནས་བབས་སྐོར་འབའ་བ་ཕུན་དབང་གི་མི་ཚེའི་ལོ་རྒྱུས་བོད་མི་གསར་བརྗེ་བ་ཞིག་ཅེས་པའི་དེབ་དེའི་ལེའུ་དྲུག་པའི་ནང་ “ངེས་གཉིས་བོད་སྡེའི་འབྲི་ཆུའི་ངོས་སུ་འབྱོར་རྗེས། འགག་སྒོ་ཡོད་སར་བསྐྱོད་ནས་དེར་ཡོད་བོད་དམག་གི་འགོ་པར་ཏཱ་ལའི་བླ་མའི་དོན་གཅོད་ཁང་གིས་གནང་བའི་ཡི་གེ་མིག་སྟོན་བྱས།” ཞེས་སོགས་གསུངས་པ་ལས་ཤེས་ནུས། དེར་བརྟེན་ལོ་རྒྱུས་ཀྱི་རྒྱབ་ལྗོངས་གནས་ཚུལ་འདི་འདྲའི་འོག་༸གོང་ས་བཅུ་གསུམ་པ་ཆེན་པོའི་དར་ཆ་བསྒྲེངས་ཏེ་བོད་རང་བཙན་གྱི་གནས་བབས་བསྐྱར་གླེང་བྱེད་པ་ནི་དུས་ལས་ཡོལ་ཟིན་པ་ཞིག་རེད། ཕྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་མིས་བཙན་བཟུང་བྱས་རྗེས་བཙན་བྱོལ་གཞུང་ནས་བོད་དོན་འཛམ་གླིང་རྒྱལ་ཚོགས་ལ་ཞུ་སྙན་སོགས་གནང་བའི་ཡིག་ཆ་ལ་གཞིགས་ན་ཕྱི་ལོ་ ༡༩༧༩ བར་གཞུང་ཕྱོགས་ནས་འཐབ་རྩོད་བྱས་པའི་རང་བཙན་གྱི་གནས་བབས་དེ་ཡང་འབྲི་ཆུ་ས་མཚམས་སུ་བཟུང་པའི་རང་བཙན་གྱི་གནས་བབས་བསྐྱར་གླེང་བྱས་པ་ཙམ་ཡིན་འདུག འོན་ཀྱང་ཕྱི་ལོ་ ༡༩༧༩ ནས་བཟུང་གཞུང་གི་ཆབ་སྲིད་འཐབ་རྩོད་ཀྱི་ཁ་ཕྱོགས་ལ་འགྱུར་བ་ཆེན་པོ་ཞིག་བྱུང་ཡོད། དུས་དེ་ནས་བཟུང་ཆོལ་གསུམ་གཅིག་ཏུ་སྒྲིལ་བའི་བོད་རིགས་ཡོངས་རྫོགས་ཀྱི་གནས་བབ་གླེང་འགོ་ཚུགས་ཡོད།

ཕྱི་ལོ་ ༡༩༨༧ ཟླ་༩ ཚེས་ ༢༡ ཉིན་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་བསྩལ་བའི་གསུང་འཕྲིན་ནང་དོན་ཚན་དང་པོ། བོད་ས་ཡོངས་རྫོགས་ཞི་བའི་བསྟི་གནས་ཤིག་ཏུ་བསྒྱུར་རྒྱུ། ཞེས་འཁོད་ཅིང་། དོན་ཚན་དང་པོའི་འགྲེལ་བཤད་ནང་བོད་ཤར་ཕྱོགས་ཆོལ་ཁ་ཁམས་དང་། ཨ་མདོ་ཐེ་བའི་ས་ཁྱོན་ཡོངས་རྫོགས། ཞེས་སོགས་གསལ་ཡོད། དེ་རྗེས་ཕྱི་ལོ་ ༡༩༨༨ ཟླ་ ༦ ཚེས་ ༡༥ ཉིན་སི་ཊ་སི་སྦག་ཏུ་ཡུ་རོབ་གྲོས་ཚོགས་སུ་གནང་བའི་གསུང་བཤད་ནང་། བོད་ཆོལ་ཁ་གསུམ་ཡོངས་རྫོགས་སྤྱིའི་བདེ་རྩ་དང་། མི་མང་དང་དེའི་ཁོར་ཡུག་སྲུང་སྐྱོབ་བྱེད་ཆེད་མི་དམངས་ཀྱི་འདོད་བློ་གཙོར་བཟུང་གིས་ཁྲིམས་ལུགས་གཞིར་བཟུང་བཙུགས་པའི་རང་སྲིད་རང་འཛིན་གྱི་མང་གཙོའི་ཆབ་སྲིད་ཀྱི་གོང་བུ་ཞིག་ཏུ་བསྒྱུར་རྒྱུ། ཞེས་སོགས་གསུངས་ཡོད། ད་ལྟའི་ཆར་ཞི་བའི་གྲོས་འཆར་དོན་ཚན་ལྔ་དང་། སི་ཊ་སི་སྦག་གི་གསུང་བཤད་དེ་རང་བཞིན་ནུས་མེད་དུ་སོང་ཡོད་པར་གསུངས་ཀྱང་། ཕྱི་ལོ་ ༢༠༠༨ ཟླ་ ༣ ནང་བོད་ཀྱི་རྒྱལ་ས་ལྷ་ས་ནས་འགོ་ཚུགས་ཏེ་བོད་ཆོལ་ཁ་གསུམ་གྱི་ས་ཁྱོན་ཡོངས་ལ་ཞི་བའི་ངོ་རྒོལ་ཆེན་མོ་ལངས་ཤིང་། ཕྱི་ལོ་ ༢༠༠༨ ཟླ་ ༡༢ ཚེས་ ༤ ཉིན་ཡོ་རོབ་གྲོས་ཚོགས་ཀྱི་ཚོགས་འདུ་རྒྱས་འཛོམས་ཐོག་གནང་བའི་སྦར་སིལ་གསུང་བཤད་ནང་སླར་ཡང་བོད་ཆོལ་ཁ་གསུམ་གཅིག་ཏུ་སྒྲིལ་བའི་རང་སྐྱོང་གི་གནས་བབས་སྐྱར་གླེང་གནང་ཡོད། སྦར་སིལ་གསུང་བཤད་ནང་། ཕྱི་ལོ་ ༢༠༠༨ ཟླ་ ༡༠ ཚེས་ ༣༡ ཉིན་ང་ཚོས་བོད་མི་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་སྤྲད་པ་ཡིན། ཞེས་གསུངས་ཡོད། སྐབས་དེར་རྒྱ་ཕྱོགས་སུ་སྤྲད་པའི་ཡིག་ཆ་དོན་ཚན་གཉིས་པ། བོད་རིགས་གཅིག་གྱུར་གྱི་ངོ་བོ་ལ་བརྩི་བཀུར་དགོས་པ། ཞེས་པའི་དོན་ཚན་དེའི་ནང་ཆོལ་གསུམ་གཅིག་སྒྲིལ་གྱི་རང་སྐྱོང་གནས་བབ་གསལ་གླེང་བྱས་ཡོད། ཁ་ཅིག་གིས་མཐོན་པོ་རང་བཙན་གྱི་གནས་བབ་ནས་དམའ་ས་དབུ་མའི་ལམ་དུ་བབས་ཚུལ་གསུང་གི་ཡོད་ཀྱང་། དོན་དམ་པར་ཆོལ་གསུམ་རྒྱ་ཆེའི་མི་མང་གི་ནུས་པ་གཅིག་སྒྲིལ་གྱི་སྡིངས་ཆ་ཆེན་པོ་ཞིག་བསྐྲུན་ཡོད། ད་ལྟའི་ཆར་བོད་ཀྱི་རྩ་དོན་ཆེད་རང་ལུས་མེར་བསྲེགས་ཀྱི་ལས་འགུལ་སྤེལ་མཁན་ནང་རེ་བཟུང་མ་གཏོགས་ཕལ་ཆེ་བ་འབྲི་ཆུའི་ཤར་རྒྱུད་ཀྱི་བོད་སའི་ཁོངས་ནས་ཐོན་གྱི་ཡོད། རྒྱ་ཕྱོགས་ནས་༸གོང་ས་༸སྐྱབས་མགོན་བཅུ་བཞི་པ་ཆེན་པོར་བོད་ཆེན་པོ་འུད་སྒྲོག་བྱེད་མཁན་ཞེས་སྐྱོན་འཛུགས་བྱེད་དོན་ཡང་འདི་རང་ཡིན། ཕྱི་ལོ་ ༢༠༡༡ ཟླ་ ༨ ཚེས་ ༨ ཉིན་༸གོང་ས་སྐྱབས་མགོན་ཆེན་པོ་མཆོག་ནས་གསུངས་དོན། “ང་རང་ལོ་བཅུ་དྲུག་སྐབས་སྲིད་སྐྱོང་སྟག་བྲག་རིན་པོ་ཆེའི་སྐུ་མདུན་ནས་ཆབ་སྲིད་ཀྱི་དབང་ཆ་རྩིས་ལེན་ཞུས་པ་ཡིན། ད་ཆ་ལོ་དྲུག་བཅུ་ཕྱིན་པའི་རྗེས་ལ་མང་གཙོའི་ཐོག་ནས་འོས་འདེམས་བྱས་ཏེ་ཐོན་པའི་སྲིད་སྐྱོང་བློ་བཟང་སེང་གེ་ལ་རྩིས་འབུལ་ཞུ་བ་འདི་དངོས་ནས་རིང་ནས་སྙིང་དུ་བརྣག་པའི་འདོད་པའི་དོན་ཟེར་བའི་དོན་དག་གཅིག་འདི་ཆགས་ཡོད།” ཅེས་གསུངས་པ་བཞིན། བཀའ་ཤག་གི་སྲིད་དམ་བདེ་སྐྱིད་མ་རྩིས་འབུལ་ཞུས་ཡོད། ད་ལྟ་གཞུང་འཛིན་སྲིད་སྐྱོང་གི་ཐུགས་འགན་བཞེས་མུས་ཡིན་པ་སྲིད་སྐྱོང་བློ་བཟང་སེང་གེས་ཀྱང་ཆོལ་གསུམ་གཅིག་སྒྲིལ་གྱི་མི་རིགས་ས་གནས་རང་སྐྱོང་གི་གནས་བབས་རྩོད་ལེན་བྱེད་ཀྱི་ཡོད། ད་ལྟ་བོད་ཆོལ་ཁ་གསུམ་གྱི་མི་མང་དམ་ཚིག་འོ་ཆུ་གཅིག་སྒྲིལ་ཡོད་པའི་དུས་སྐབས་སུ་སྐད་ཆ་གང་ཞིག་བཤད་དགོས་ཀྱང་སྔ་ཕྱིའི་རྒྱབ་ལྗོངས་ལ་བསམ་ཞིབ་ནན་མོ་བྱས་ཏེ། མ་བཤད་ན་མི་སེམས་དུམ་བུར་བཏང་སྟེ་མི་རིགས་དུམ་བུར་འགྲོ་བའི་ཉེན་ཁ་ཡོད་པ་ངེས་པར་དུ་ཤེས་དགོས་སོ། །

གཉིས་པ། རང་བཙན་འཐབ་རྩོད་ཀྱི་དཔུང་ཁག་ཆིག་སྒྲིལ་བཟོ་ཐུབ་བམ།

དུས་རྒྱུན་ང་ཚོའི་སྤྱི་ཚོགས་ནང་རང་བཙན་འཐབ་རྩོད་པའི་མིང་འཛིན་གྱི་ཚོགས་པ་དང་མི་སྒེར་དེ་ཚོ་ཚང་མ་བློ་སེམས་གཅིག་མཐུན་ཡོད་པ་ལྟ་བུ་མངོན་ཡང་དེ་ནི་རང་བཙན་གྱི་སྐད་ཆ་མང་པོ་ཞིག་ད་བར་སྤྱི་སྤོམ་ཞིག་གི་ཐོག་བཞག་པའི་དབང་གིས་རེད། ད་ཆ་༸གོང་ས་བཅུ་གསུམ་པའི་མཚན་གནས་རྗེས་འབྲེལ་གྱི་རང་བཙན་གནས་བབས་བསྐྱར་གླེང་བྱེད་ཀྱི་ཡིན་ཞེས་ཤོད་མཁན་ཡོད། སྐད་ཆ་འདི་རང་བཙན་འཐབ་རྩོད་ཀྱི་མིང་འཛིན་པ་ཚང་མ་གཅིག་མཐུན་གྱི་སྐད་ཆ་ཞིག་ཡིན་བཟོ་མི་འདུག འོན་ཀྱང་༸གོང་ས་བཅུ་གསུམ་པའི་དར་ཆ་སྒྲེང་མཁན་དེ་ཚོས་རང་བཙན་འཐབ་རྩོད་པ་ཚང་མ་དར་ཆ་འདིའི་འོག་ཆིག་སྒྲིལ་ཡོང་རྒྱུར་བསམ་བློ་གཏོང་གི་ཡོད། བསམ་ཡུལ་ལས་འདས་པ་ཞིག་ལ་སྐད་ཆ་འདི་རང་གིས་རང་བཙན་དཔུང་ཁག་གི་ཆིག་སྒྲིལ་གཏོར་སྲིད་པ་རེད། གནས་ཚུལ་གསལ་པོ་མ་བྱུང་བའི་དབང་གིས་དེ་སྔ་ང་ཚོའི་སྤྱི་ཚོགས་ནང་ཁམས་པ་རང་སྐྱོང་གི་སྐད་ཆ་བྱུང་ཡོད་ལ། ཉེ་བའི་ཆར་དབུ་མའི་ལམ་གྱི་སྲིད་བྱུས་ཐོག་ལའང་༸གོང་ས་མཆོག་གི་དབུ་མའི་ལམ་དང་། ཟམ་གདོང་རིན་པོ་ཆེའི་དབུ་མའི་ལམ་ཞེས་པའི་སྐད་ཆ་ཡང་བྱུང་ཡོད། མ་འོངས་པར་རང་བཙན་གྱི་གནས་བབས་མི་འདྲ་བ་ཁ་ཤས་ཀྱི་སྐད་ཆ་ཡོང་མི་སྲིད་པ་མ་རེད། དཔེ་ན་རང་བཙན་འཐབ་རྩོད་པ་འཇམ་དབྱངས་ནོར་བུས། དེ་སྔོན་གསར་འགྱུར་བརྒྱུད་ལམ་ཐོག་རང་བཙན་གྱི་གནས་བབས་སྐབས་དང་དུས་བསྟུན་གྱི་གནས་བབས་གླེང་དགོས་པ་བཤད་ཡོད་ལ་ཕྱི་ལོ་ཉིས་སྟོང་གསུམ་མམ་བཞི་གང་རུང་ཞིག་གི་ཨེ་ཤ་ཡའི་རང་དབང་རླུང་འཕྲིན་ཁང་གི་རེ་གཟའ་ཉི་མའི་གཏམ་གླིང་གི་ལེ་ཚན་ཞིག་ཏུ་རེ་ཞིག་ལྷོ་བྱང་ཀོ་རི་ཡ་བཞིན་ཕྱེད་ཀ་དམར་ཤོག་འོག་དང་ཕྱེད་ཀ་རང་དབང་ཐོག་ཕྱིན་ཀྱང་འགྲིག་པའི་བསམ་ཚུལ་སྟོན་ཡོད། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་སྐབས་འགའ་ཤས་ཐོག་ཚོགས་མི་བསམ་ཡོད་འགའ་ཤས་ནས་རང་བཙན་གྱི་གནས་བབས་ཁ་གསལ་དགོས་སྐོར་ཞུས་ཡོད་ཀྱང་སྐད་ཆ་དེ་ཚོ་སྤྱི་སྤམ་ཞིག་ཏུ་བཞག་ཡོད། འོན་ཀྱང་རང་ངོས་ནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་དར་ཐོག་བོད་ཆོལ་ཁ་གསུམ་གྱི་ས་བབ་ཆ་ཚང་མཚོན་པའི་ས་ཁྲ་དེ་བཞག་ཡོད་པར་བརྟེན་ཁོ་ཚོས་རྩོད་བཞིན་པའི་རང་བཙན་གྱི་གནས་བབས་དེ་ས་ཁྲ་དེ་རང་ལ་ངོས་འཛིན་བྱེད་ཀྱི་ཡོད། དེ་བཞིན་རང་བཙན་འཐབ་རྩོད་པ་ཀླུ་མཁར་བྱམས་སོགས་གཞན་ཚོའི་ཀླད་པའི་ནང་རང་བཙན་གྱི་གནས་བབས་ག་འདྲ་ཡོད་མེད་གསལ་པོ་མེད། རང་བཙན་འཐབ་རྩོད་ཀྱི་མིང་འཛིན་འགའ་ཤས་ནི་དབང་ལྡན་མི་སྣ་འགའ་ཤས་ཀྱི་རྒྱུག་ཁྱི་ཙམ་ལས་ཁོ་ཚོ་རང་ངོས་ལ་རང་ཚུགས་ཐུབ་པའི་བསམ་བློའི་ནུས་པ་གང་ཡག་མེད། ང་ཚོ་བསམ་བློ་དང་སྐད་ཆ་མང་པོ་ཞིག་གི་ཐོག་ནས་མཉམ་འཛོམས་བྱས་པ་དེ་བསམ་བློ་དང་སྐད་ཆ་མང་པོ་ཞིག་གིས་ཁ་གཏོར་གཏོང་ཉེན་ཡོད། དོན་དམ་དུ་ད་ལྟའི་འཆར་རང་བཙན་འཐབ་རྩོད་པ་ཚང་མ་བློ་མཐུན་ཆགས་མེད། །

གསུམ་པ། རྒྱལ་ཡོངས་ལྷན་ཚོགས་ཀྱི་མ་འོངས་པ་གང་ཡིན་ནམ།

ཉེ་ཆར་གྱི་རང་བཙན་ཚོགས་འདུའི་ངོ་བོར་བལྟས་ན་སྤྱི་འཐུས་ལས་ཐོག་པ་བཅུ་ཙམ་ཚོགས་ཞུགས་གནང་ཡོད་པ་སོགས་ལས་རྒྱལ་ཡོངས་ལྷན་ཚོགས་དེ་གྲོས་ཚོགས་ཀྱི་གསོས་ཕྲུག་ཅིག་ཆགས་ཐབས་ལ་རེ་བ་བྱེད་ཀྱི་མེད་དམ་སྙམ། གང་ལྟར་ཡང་བོད་ཀྱི་རྒྱལ་ཡོངས་ལྷན་ཚོགས་ཞེས་པ་དེ་དམིགས་ཡུལ་ལྔའི་ཐོག་ལས་དོན་བསྒྲུབ་ཆེད་དུ་བཙུགས་པ་འགྲེལ་བརྗོད་བྱས་ཡོད། དམིགས་ཡུལ་དང་པོ་གཉིས་ནི་བོད་རང་བཙན་གྱི་རྒྱལ་ཁབ་བདག་དབང་ཆ་ཚང་ཡོད་པ་ཞིག་སླར་གསོ་བྱེད་རྒྱུ་དང་། རང་དབང་ཅན་གྱི་འོས་འདེམས་དང་། ཁྲིམས་ཀྱི་དབང་བསྒྱུར། སྐྱེ་བོ་སྒེར་གྱི་རང་དབང་གི་གཞི་རྩ་བཅས་ལ་བརྟེན་པའི་དམངས་གཙོའི་ལམ་སྲོལ་ཅན་གྱི་གཞུང་ཞིག་བོད་ནང་དུ་འཛུགས་རྒྱུ་ངེས་གཏན་བྱ་རྒྱུ། བཅས་འདི་གཉིས་རེད། རྩ་བའི་དམིགས་ཡུལ་འདི་གཉིས་ནི་སྒྲོམ་གཞི་བླངས་པ་ཙམ་ལས་བོད་རང་བཙན་གྱི་རྒྱལ་ཁབ་ཅེས་པའི་གནས་བབས་ཁ་གསལ་གྱི་ཡིག་ཆ་གང་ཡང་མེད། འབྱུང་འགྱུར་ནང་དམིགས་ཡུལ་འདི་ཚོའི་ཐོག་ཞིབ་གྲོས་གཞི་ནས་འགྲོ་རྒྱུ་རེད། དམིགས་ཡུལ་གསུམ་པ་ནི། རང་དབང་ཅན་གྱི་བོད་ནང་དུ་ཚུལ་མཐུན་དང་ཁྲིམས་མཐུན་གྱིས་བདམས་པའི་བོད་མི་མང་གི་སྲིད་གཞུང་ཞིག་མ་བཙུགས་བར་དུ་བཙན་བྱོལ་བོད་གཞུང་དེ་མུ་མཐུད་གནས་རྒྱུ་དེ་ངེས་གཏན་བྱ་རྒྱུ། ཞེས་པ་འདི་རེད། སྐབས་འདིའི་བཙན་བྱོལ་བོད་གཞུང་ཞེས་པ་དེ་གང་ལ་ངོས་འཛིན་བྱ་དགོས་གསལ་པོ་མེད་པ་ཞིག་རེད་འདུག གང་ཡིན་ཞེ་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྲིད་སྐྱོང་སྟག་བྲག་རིན་པོ་ཆེའི་སྐུ་མདུན་ནས་ཚུར་བཞེས་གནང་བའི་གཞུང་སའི་ཆབ་སྲིད་ཀྱི་སྐུ་དབང་དེ་མང་མོས་འོས་འདེམས་བྱུང་བའི་སྲིད་སྐྱོང་བློ་བཟང་སེང་གེ་ལ་ཕར་འབུལ་ཞུས་ནས་གཞུང་སའི་ལས་དོན་ཐམས་ཅད་ད་ལྟ་གྲ་གྲུ་མ་ཉམས་པར་ཕྲ་ཚུགས་ཡོད་ཀྱང་། གཞོན་ལྷན་ནས་ད་ལྟ་བོད་གཞུང་བསྡུ་གསོག་བརྒྱབ་སོང་། ཞེས་བོད་གཞུང་གི་རྒྱལ་རྟགས་སོགས་གཞོན་ལྷན་ནས་བདག་པོ་རྒྱག་རྒྱུ་ཡིན་སྐོར་བཤད་པ་མ་ཟད། ཨ་རིའི་དུས་དབང་སྐབས་བཙན་བྱོལ་བོད་གཞུང་ཞེས་བྲིས་པའི་སྟོད་གོས་འགྲེམ་སྤེལ་གྱི་ལས་འགུལ་སྤེལ་ཡོད།  དེ་བཞིན་འཇམས་དབྱངས་ནོར་བུ་སོགས་ནས་ཀྱང་བོད་གཞུང་བསྡུ་གསོག་བརྒྱབ་ཟིན་པས་ད་སྒྲིག་འཛུགས་ཤིག་ཆགས་ཟིན་པར་བརྟེན་ནུས་པ་མེད་སྐོར་སོགས་འདྲ་མིན་བཤད་ཡོད། གནས་ཚུལ་འདི་འདྲའི་ཐོག་ནས་བསམ་གཞིག་བྱས་ན་རྒྱལ་ཡོངས་ལྷན་ཚོགས་ཀྱི་དམིགས་ཡུལ་ནང་གསལ་བའི་བཙན་བྱོལ་བོད་གཞུང་ཞེས་པ་དེ་གང་ལ་ངོས་འཛིན་དགོས་མིན་གསལ་པོ་མེད། དམིགས་ཡུལ་བཞི་པ་ནི། བཙན་བྱོལ་བོད་གཞུང་གི་གཡོལ་མེད་འགན་འཁྲི་ནི་བོད་རང་བཙན་འཐབ་རྩོད་ཀྱི་ལས་འགན་ཏེ། འདི་ནི་ཆོད་སེམས་དང་ལྷག་བསམ་གཡོ་བ་མེད་པ་ཞིག་གི་ཐོག་ནས་བསྒྲུབ་རྒྱུ་དེ་ངེས་གཏན་བྱེད་རྒྱུ། ཞེས་པ་འདི་རེད། དམིགས་ཡུལ་བཞི་པས་གསུམ་པ་རྙོག་འཛིང་ཆེ་རུ་བཏང་ཡོད། ད་ཡོད་དབུས་བོད་མིའི་སྒྲིག་འཛུགས་ཀྱི་ལང་ཕྱོགས་ནི་འགྱུར་མེད་དུ་གནས་ཡོད། གལ་ཏེ་འབྱུང་འགྱུར་ཚོགས་ཆེན་ཐོག་མང་མོས་ཀྱིས་གཞུང་གི་ཆབ་སྲིད་ལངས་ཕྱོགས་འགྱུར་བ་བཏང་ནས་རང་བཙན་འཐབ་རྩོད་ཐོག་ཕེབས་ན་རྩོད་མེད་དང་། གལ་སྲིད་ཚོགས་ཆེན་ཐོག་མང་མོས་ཀྱིས་ལངས་ཕྱོགས་ལ་འགྱུར་བ་མེད་པར་རང་གནས་བྱུང་ན་དམིགས་ཡུལ་བཞི་བའི་ལྟ་བ་འཛིན་མཁན་གྱི་བཙན་བྱོལ་གཞུང་དེ་རྒྱལ་ཡོངས་ལྷན་ཚོགས་ཞེས་པར་གོ་དགོས་སམ། ཡང་ན་རྒྱལ་ཡོངས་ལྷན་ཚོགས་དེས་གཞུང་གསར་པ་འཛུགས་རྒྱུ་ཡིན། དེ་ལྟར་ན་གཞུང་དེ་ད་ལྟའི་དབུས་བོད་མིའི་སྒྲིག་འཛུགས་ཀྱི་ཁ་གཏད་ཚོགས་པ་ཞིག་ཏུ་འགྱུར་སྲིད་ན་བཙན་བྱོལ་བོད་མིའི་སྤྱི་ཚོགས་འདི་དུམ་བུར་གཏོང་སྲིད་པས་དེ་རྒྱལ་ཡོངགས་ལྷན་ཚོགས་ཀྱི་དམིགས་ཡུལ་མིན་པའི་རེ་བ་ཡོད། དམིགས་ཡུལ་ལྔ་པ་ནི་བོད་ཀྱི་ཆོས་རིག་སྲུང་སྐྱོབ་སྐོར་ཡིན་པས་དམིགས་བསལ་ཞུ་དགོས་གང་ཡང་མི་འདུག གོང་བརྗོད་ཕྲན་གྱི་བསམ་ཚུལ་ཐད་འབྲེལ་ཡོད་མང་པོས་འགྲིག་མིན་བསམ་འཆར་ཡོད་ངེས་པས་དགོངས་འཆར་ལྷུག་པོ་གནང་རོགས་གནང་། །

ད་ནི་གུས་པས་གསལ་བཤད་བྱ་དགོས་པ་འགའ་ཤས་འདུག་༸རྒྱལ་དབང་བཅུ་གསུམ་པ་ཆེན་པོའི་སྐུ་དུས་དང་འབྲེལ་བའི་ལོ་རྒྱུས་ཚང་མ་བཙན་བྱོལ་སྤྱི་ཚོགས་ནང་གི་རྒྱལ་རབས་སྨྲ་བའི་དབང་ཕྱུག་གཅིག་པུ་ཞྭ་སྒབ་པ་དབང་ཕྱུག་བདེ་ལྡན་གྱིས་བརྩམས་པའི་སྲིད་དོན་རྒྱལ་རབས་ལས་དྲངས་པ་ཡིན། རང་བཙན་ཚོགས་འདུ་དང་རྒྱལ་ཡོངས་ལྷན་ཚོགས་སྐོར་གྱི་གནས་ཚུལ་རྣམས་བོད་ཀྱི་དུས་བབས་གསར་ཤོག་ལས་དྲངས་པ་ཡིན་པས་དེ་དོན་དགོངས་འཇགས་ཞུ།

ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་བྲིས།