རྒྱ་གར་རང་བཙན་ཉིན་མོ་སྲུང་གཙི།

དེ་རིང་ཕྱི་ཟླ་ ༨ པའི་ཚེས་ ༡༥ ཉིན་ནི་རྒྱ་གར་རང་བཙན་ཐོབ་ནས་ལོ་ ༦༥ འཁོར་བཞིན་ཡོད་པར། དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་གཙོས་པའི་བཀའ་བློན་རྣམ་པ་དང་སྲི་ཞི་ལས་བྱེད་ཚོས་བཀའ་ཤག་མདུན་ཐང་དུ་དུས་དྲན་སྲུང་གཙི་གནང་སོང་ལ། ངྷ་སའི་གཞུང་འབྲེལ་མིན་པའི་ཚོགས་པ་ཁག་ཅིག་གིས་ངྷ་ས་ཉིན་མོའི་སློབ་གྲྭའི་ནང་དུས་དྲན་སྲིང་གཙི་གནང་སོང་།

ད་ནིང་ཞོགས་པའི་ཆུ་ཚོད་ ༩ སྟེང་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གཙོས་པའི་ཕྱག་རོགས་བཀའ་བློན་རྣམ་པ་དང་། ཟུང་དྲུང་ཡན་གྱི་སྲི་ཞུ་ལས་བྱེད་ཡོངས་བཀའ་ཤག་མདུན་ཐད་དུ་འཛོམས་ཏེ། རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་ཀྱིས་རྒྱ་གར་རང་བཙན་ཉིན་མོ་ཐེངས་ ༦༥ པ་དེ་སྲུང་གཙི་གནང་ཡོད། སྐབས་དེར་བཀའ་ཁྲི་མཆོག་གིས་གསར་འགོད་པ་ཚོར། རྒྱ་གར་དང་བོད་གཉིས་ནི་ས་ཁམས་ཁོར་ཡུག་དང་། ལོ་རྒྱུས་ཐོག་ནང་ཆོས་རིག་གཞུང་། ཆབ་སྲིད་སོགས་ཀྱི་ཐད་ནས་དམིགས་བསལ་དང་ཐུན་མོང་མ་ཡིན་པའི་འབྲེལ་བ་ཡོད་པ། ལྷག་པར་དུ་འདས་པའི་མི་ལོ་ ༥༠ ལྷག་གི་རིང་བཙན་བྱོལ་བོད་མི་ཚོར་རྒྱ་གར་གཞུང་དམངས་གཉིས་ཀྱིས་རྒྱབ་སྐྱོར་གཟིགས་སྐྱོང་གནང་པར་བཀའ་དྲིན་ཆེན་པོ་ཡིན་པ་སོགས་གསུངས་ཡོད།

དེ་རིང་སྔ་དྲོར་ངྷ་ས་ས་གནས་མགོ་འཛིན་ལས་ཁུངས་དང་ཧིན་བོད་མཛའ་འབྲེལ་ཚོགས་པ། བོད་ཀྱི་རྩོད་རྙོག་འདུམ་འགྲིག་ཁང་། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རྒྱལ་ཡོངས་མང་གཙོ་ཚོགས་པ། ས་གནས་གཞོན་ནུ་དང་བུད་མེད། བོད་རང་བཙན་སློབ་ཕྲུག་ཚོགས་པ། ཐང་ཁྲོམ་སྐྱིད་སྡུག་ཚོགས་པ་བཅས་ཀྱིས་ངྷ་སའི་ཁྲོམ་གཞུང་ནས་མངར་ཟས་བཀྲམས་ཏེ་རྒྱ་གར་རང་བཙན་གྱི་ཉིན་མོ་སྲུང་གཙི་གནང་ཡོད་ལ། ཉིན་རྒྱབ་ཆུ་ཚོད་ ༡།༣༠ སྟེང་གོང་གསལ་ཚོགས་པ་ཁག་གིས་ངྷ་ས་བོད་ཁྱིམ་ཉིན་སློབ་ཚོགས་ཁང་དུ་དུས་དྲན་སྲུང་གཙིའི་མཛད་སྒོ་ཞིག་ཀྱང་ཚོགས་སོང་།

མཛད་སྒོའི་སྐུ་མགྲོན་དུ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་ཡ་སེན་(Ajay Singh Mankotia)མཆོག་དང་། ངྷ་རམ་ས་ལའི་ས་གནས་སྐོར་སྲུང་མགོ་བ། ངྷ་ས་གྲོང་སྡེ་ལས་ཁུངས་ཀྱི་མགོ་དཔོན། དབུས་བོད་མིའི་སྒྲིག་འཛུགས་ཕྱི་དྲིལ་དྲུང་ཆེ་བཀྲ་ཤིས་ལགས་བཅས་གདན་ཞུ་གནང་འདུག

མཛད་སྒོའི་ཐོག་མར་ཉིན་སློབ་ཐང་ཆེན་དུ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་ངྷ་ས་ས་གནས་ཉེན་རྟོག་མགོ་བ་གཉིས་ཀྱིས་རྒྱ་གར་རྒྱལ་དར་སྒྲེང་འཛུགས་དང་རྒྱ་གར་རྒྱལ་ཀླུ་བཏང་རྗེས་སྐུ་མགྲོན་རྣམས་ཚོགས་ཁང་ནང་འཛོསམ་ཏེ། ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་ཀྱིས་དུས་དྲན་ངོ་སྤྲོད་གནང་བར་ཉིན་མོ་འདི་ནི་རྒྱ་གར་མི་མང་གི་གཟི་བརྗིད་ལྡན་པའི་དུས་ཆེན་ཞིག་ཡིན་པ་དང་། བཙན་བྱོལ་བོད་མི་ཚོས་ཀྱང་དུས་ཆེན་འདི་སྲུང་གཙི་དང་ལྷན་དུ་རྒྱ་གར་གཞུང་དམངས་ལ་སེམས་གཏིང་ནས་ཡི་རེངས་དང་བཀའ་དྲིན་རྗེས་དྲན་ཞུས་པ་མ་ཟད། ལོ་ངོ་ ༢༠༠ ལྷག་རིང་རྒྱ་གར་མི་མང་གི་ཚེ་སྲོག་གིས་འཐབ་རྩོད་བྱས་མཐར་དབྱིན་ཇིའི་འོག་ནས་རང་བཙན་ཐོབ་ཡོད་ཀྱང་། བོད་མི་ཚོས་འདས་པའི་ལོ་ ༥༣ རིང་འཚེ་མེད་ཞི་བའི་འཐབ་རྩོད་བྱས་ཡོད་ཅིང་། ཉེ་བའི་དུས་ནས་བོད་ནང་རང་ལུས་མེར་བསྲེགས་ཀྱི་གནས་སྟངས་ཛ་དྲག་འོག་འདས་གྲོངས་སུ་གྱུར་པ་རྣམས་ལ་གུས་འདུད་དང་། མི་རིང་བར་ཧིན་བོད་མཉམ་འབྲེལ་ཐོག་བོད་རང་དབང་གི་ཉིན་མོ་སྲུང་གཙི་ཐུབ་པའི་རེ་སྨོན་ཡོད་པ་སོགས་བརྗོད་སོང་།

དེའི་རྗེས་དམིགས་བསལ་སྐུ་མགྲོན་ཕྱི་དྲིལ་དྲུང་ཆེ་བཀྲ་ཤིས་མཆོག་གིས། རྒྱ་གར་རང་དབང་འཐབ་རྩོད་པ་དང་སྐབས་དེའི་མགོ་ཁྲིད་རྣམ་པ་དེང་གི་རྒྱ་གར་བ་དང་བོད་མི་ཚང་མས་སེམས་ལ་དྲན་དགོས་པ་དང་། རྒྱ་གར་ནི་རིག་གཞུང་དང་ཆབ་སྲིད་སོགས་ཕྱོགས་མང་པོའི་ཐོག་ནས་བོད་མི་ཚོར་བཀའ་དྲིན་ཆེན་པོ་ཡིན་པ། དེ་རིང་གི་ཉིན་མོ་འདི་ནི་བོད་མི་ཚོས་རྒྱ་གར་མི་མང་ལ་སོ་སོའི་སྙིང་དབུས་ནས་བཀའ་དྲིན་བསམ་ཤེས་ཀྱི་རྣམ་པ་སྟོན་པའི་གོ་སྐབས་ལེགས་ཤོས་ཤིག་ཡིན་སྐོར་སོགས་གསུངས་སོང་།

མཐར་ཧིན་བོད་མཛའ་འབྲེལ་ཚོགས་པའི་ཚོགས་གཙི་ཨ་ཇེ་སེན་མཆོག་གིས། ༧གོང་ས་ཏཱ་ལའི་བླ་མ་མཆོག་ནི་འཁྲུངས་ས་བོད་ཡིན་ཡང་། བཞུགས་གནས་རྒྱ་གར་དང་ལྷག་པར་དུ་ངྷ་རམ་ས་ལར་རྒྱུན་བཞུགས་གནང་བ་དེས། རྒྱ་གར་བ་སྤྱི་དང་བྱེ་བྲག་ཏུ་ངྷ་ར་ས་ལའི་རྒྱ་གར་མི་མང་ལ་བྱིན་རླབས་དང་བཀའ་དྲིན་བླ་ན་མེད་པ་ཞིག་ཆགས་ཡོད་པ་དང་། ༧གོང་ས་མཆོག་ནི་འཛམ་གླིང་ནང་མཐོང་དཀའ་བའི་མི་སྣ་རླབས་ཆེན་ཞིག་ཡིན་ཞིང་། རྒྱ་གར་དང་མི་མང་དང་གཙོ་བོ་ཧི་མ་ཅལ་དང་ངྷ་སའི་རྒྱ་གར་མི་མང་གིས་༧གོང་ས་མཆོག་གི་བཀའ་དྲིན་དུས་ནམ་ཡང་བརྗེད་མི་ཉན་པོར་སེམས་ལ་ཉར་དགོས་པ། ལྷག་པར་དུ་སོ་སོར་གཞུང་དང་རང་དབང་ཡོད་པའི་མི་རིགས་ཤིག་ཡིན་སྟབས། བློ་སྟོབས་ཆེན་པོས་ཐོག་ནས་༧གོང་ས་མཆོག་དང་བོད་མི་ཚོར་རྒྱབ་སྐྱོར་དང་འཐབ་རྩོད་ལ་མཉམ་ཞུགས་བྱ་དགོས་པའི་སྐུལ་མ་གནང་སོང་།

མཛད་སྒོའི་གསུང་བཤད་ཁག་གྲུབ་རྗེས་ཡོངས་གླིང་སློབ་གྲྭ་དང་ཉིན་སློབ། ཐང་སྟོང་གླུ་གར་ཚོགས་པ་སོགས་ཀྱིས་གཞིས་སྣ་འཁྲབ་སྟོན་གནང་སོང་། དེ་དང་འབྲེལ་ངྷ་ས་ས་གནས་གཞོན་ནུའི་ཚོགས་གཙོ་བསྟན་འཛིན་བརྩིན་འགྲུས་ལགས་ཀྱིས། བོད་ནང་གི་གནས་བབ་འདི་འདྲ་ཞིག་གི་འོག་གཞིས་སྣ་འཁྲབ་སྟོན་བྱ་རྒྱུ་དེ་ཙམ་འོས་འཚམས་མིན་ཡང་། འདི་ནི་དགའ་སྤྲོའི་རྣམ་པ་ཞིག་མིན་པར་རྒྱ་གར་རང་བཙན་ཉིན་མོ་སྲུང་གཙི་དང་། བོད་མི་ཚོར་ཡང་རང་བཙན་དགའ་སྤྲོའི་ཉིན་མོ་ཞིག་ལ་རེ་སྨོན་དང་དྲན་གསོ་བྱས་པ་ཡིན་སྐོར་བརྗོད་བྱུང་།

གསར་འགོད་པ། བནྡེ་སྐྱབས།