ཉི་ཧོང་གིས་རྒྱ་མི་སྐོར་ཞིག་འཇུ་བཟུང་།

གཟའ་ཉི་མའི་ཉིན་རྒྱ་མི་སྐོར་ཞིག་གིས་དར་ཆ་འཕྱར་ཏེ་སཱིན་ཁཱ་ཁའོ་གླིང་ཕྲན་སྟེང་འཛེགས་པར་བརྟེན། ཉི་ཧོང་དང་རྒྱ་ནག་བར་གྱི་གླིང་ཕྲན་བདག་དབང་རྩོད་རྙོག་ཛ་དྲག་ཏུ་ཕྱིན་འདུག

 ཁ་ཕྱི་ཚེས་ ༡༥ ཉིན་རྒྱ་ནག་ཧོང་ཀོང་གི་མཚོ་གླིང་སྲུང་སྐྱོབ་གྲུ་གཟེངས་ཤིག་ཉི་ཧོང་དང་རྒྱ་ནག་མཐའ་མཚམས་མཚོ་ཁུལ་དུ་བསྐྱོད་རྗེས། ཧོང་ཀོང་དང་ཨོ་མཱན། ཐེ་ཝན་བཅས་ཀྱི་མི་ ༨ དང་། གསར་འགོད་པ་ ༢ ། གྲུ་གཟེངས་ཁ་ལོ་བ་ ༤ བཅས་ཀྱིས་ལག་ཏུ་རྒྱ་ནག་གི་རྒྱལ་དར་དང་། ཐེ་ཝན་གྱི་རྒྱལ་དར། ཧོང་ཀོང་དང་ཨོ་མཱན་གྱི་ས་ཁུལ་དར་ཆ་བཅས་འཕྱར་ཏེ། ཉི་ཧོང་དང་རྒྱ་ནག་གཉིས་བར་བདག་དབང་རྩོད་རྙོག་ཅན་གྱི་སཱིན་ཁཱ་ཁའོ་(Senkaku Islands)གླིང་ཕྲན་སྟེང་འཛེགས་ཡོད་པ་དང་། སྐབས་དེར་ཉི་ཧོང་གི་མཐའ་སྲུང་རུ་ཁག་གིས་མི་དག་འཇུ་བཟུང་བྱས་ཡོད་པ་མ་ཟད། གླིང་ཕྲན་ཉེ་ཁུལ་དུ་མཚོ་དམག་གྲུ་གཟེངས་ལྔ་ལྷག་དང་། ཐད་འཕུར་གནམ་གྲུ་སོགས་ཀྱིས་སྐོར་སྲུང་དམ་དྲག་བྱ་མགོ་བརྩམས་ཡོད་འདུག

ཉིན་དེར་རྒྱ་གཞུང་གིས་རྒྱ་ནག་གནས་སྡོད་ཉི་ཧོང་གཞུང་ཚབ་ལ་ཐུག་འཕྲད་བྱས་ཏེ། ཆ་རྐྱེན་གང་ཡང་མེད་པའི་ཐོག་ནས་རྒྱ་ནག་གི་མི་དེ་དག་ཕྱིར་གློད་དགོས་པ་བརྗོད་ཡོད་པ་དང་།  ཐེ་ཝན་ཕྱི་འབྲེལ་སྡེ་ཁག་གིས་ཀྱང་གླིང་ཕྲན་དེ་རྒྱ་ནག་མི་སེར་རྒྱལ་ཁབ་ཀྱི་མངའ་ཁོངས་ཡིན་པ་ནན་བརྗོད་དང་། ཡིན་ནའང་། ཐེ་ཝན་གྱིས་གླིང་བདག་དབང་སྲུང་སྐྱོབ་ཐད་ནས་རྒྱ་དམར་གཞུང་དང་ལག་འབྲེལ་བྱ་རྒྱུ་ཡིན་སྐོར་ཡང་བརྗོད་ཡོད་པ་རེད། དེ་བཞིན། གླིང་ཕྲན་བདག་དབང་གི་གནད་དོན་དེའི་ཐད། ཨ་རིའི་གཞུང་གིས་ཉི་ཧོང་དང་རྒྱ་ནག་གཉིས་ཀྱིས་ཕན་ཚུན་བར་འཁྲུག་ཟིང་སློང་རྐྱེན་གྱི་བྱ་སྤྱོད་མི་སྤེལ་བའི་འབོད་སྐུལ་དང་། ཨ་རིའི་ངོས་ནས་རྒྱལ་ཁབ་སུ་གང་གི་ཕྱོགས་བྱ་རྒྱུ་མིན་པ་བརྗོད་འདུག

འཛམ་གླིང་འཁྲུག་ཆེན་གཉིས་པ་མཇུག་སྒྲིལ་རྗེས། ཕྱི་ལོ་ ༡༩༧༡ ལོར་ཉི་ཧོང་བཙན་བཟུང་བྱེད་མཁན་ཨ་རིའི་དམག་གིས་སཱིན་ཁཱ་ཁའོ་(རྒྱ་ནག་གིས་ཡའེ་ཡུས་གླིང་ཕྲན་དུ་འབོད)་གླིང་ཕྲན་གྱི་བདག་དབང་དེ་ཉི་ཧོང་ལ་རྩིས་སྤྲོད་བྱས་པ་ནས་བཟུང་། གླིང་ཕྲན་དེ་ནི་ཉི་ཧོང་དང་རྒྱ་ནག ཐེ་ཝན་བཅས་ཀྱི་བར་བདག་དབང་རྩོད་རྙོག་ཅན་གྱི་གནད་དོན་ཞིག་ཏུ་གྱུར་ཡོད།