བྲག་གཞིས་བསྟན་འཛིན་ཕན་བདེ།
མདོ་སྨད་པ་མཁས་དབང་དགེ་ཆོས་ཀྱིས། མངོན་འགྱུར་རྟགས་ཀྱིས་བདེན་པ་ངོ་སྤྲད་ཀྱང་། །ངམ་ནག་བཞིན་གྱི་གཉེར་མ་མི་སངས་པ། །མདོར་ན་ཕྲག་དོག་ཅན་གྱི་སྐྱེ་བོ་དེའི། །དགའ་བའི་དངོས་པོ་གཞན་གྱི་རྒུད་པ་ཉིད། །ཅེས་གསུངས་པ་ལྟར་ཕྲན་བསྟན་འཛིན་ཕན་བདེས་སྐུ་ངོ་ཆེན་མོ་སྣར་སྐྱིད་ངག་དབང་དོན་གྲུབ་ནས་༸གོང་ས་༸སྐྱབས་མགོན་ཆེན་པོས་ལོ་རྒྱུས་ཀྱི་གལ་གནད་ཅིག་ལ་ཧོལ་རྒྱུག་བཏང་འདུག་ཅེས་གཞི་མེད་སྐྱོན་འཛུགས་བྱས་པར་ལུང་རིགས་ཀྱི་ལམ་ནས་ལན་འདེབས་བྱས་པ་མདའ་མོ་སྙིང་ལ་ཕོག་ཀྱང་ན་ཟུག་མེད་ཁུལ་གྱིས་དོན་ངོ་མའི་ཐོག་ལན་འདེབས་མེད་པར་ཆང་གིས་སྨྱོས་པའི་སྐད་ཆ་ལྟར་ག་བཤད་འདི་བཤད་མེད་པར་གྱུར་པ་མ་ཟད། ད་དུང་ངང་པ་ཆུས་ཁྱེར་བ་རྐྱལ་དུ་རློམ་པའི་དཔེ་བཞིན་དུ་རང་ཉིད་ཟེར་རྒྱུས་ཕོངས་ཀྱང་བློ་སྦྱོང་གི་ཉམས་ལེན་ཡིན་ཁུལ་བྱས་ཚོད་ལ་བལྟས་ན་དགེ་ཆོས་ཀྱིས། ཇི་ཙམ་དངོས་པོའི་གཤིས་ལ་ཉེ་གྱུར་པ། །དེ་ལྟར་མཁས་པའི་ཚིག་ནི་ལྐུགས་འགྱུར་བས། །ཞེས་གསུངས་པ་བཞིན་ད་རྒས་པོ་ལ་དངོས་གནས་ཅང་བཤད་རྒྱུ་མེད་པ་གསལ་པོ་རེད་འདུག་པས་ན་ཆོས་རྗེ་གུང་ཐང་པས། བསྟན་འགྲོའི་དོན་གྱི་འོ་མ་ཞིག །བསྲུབ་པའི་སྙིང་པོ་བཙལ་ཆེས་ན། །བཤང་དྲི་ཁ་བ་ཨ་ཙ་མ། །དཀར་ཡིན་ཐོག་ཏུ་བཞག་ན་ཆོག་པ་ལ། །ཞེས་གསུངས་པའི་གསུང་གི་དགོངས་དོན་ཉམས་སུ་ལེན་ན་མི་མཛེས་སམ་སྙམ། འོན་ཀྱང་སྐུ་ངོ་མཆོག་ནས་གུས་པས་ཁོང་རང་དང་༸རྒྱལ་བ་རིན་པོ་ཆེའི་བར་ལ་དཀྲུག་ཤིང་བྱས་ཚུལ་གསུངས་འདུག་པར་སྐབས་འདིའི་ཐ་སྙད་བཀོལ་སྤྱོད་བྱེད་སྟངས་ནས་བསམ་ན་ཁོང་རང་དང་༸རྒྱལ་བ་རིན་པོ་ཆེའི་བར་ལ་གཤིབ་སྡུར་གྱི་ཆ་ཡོད་མདོག་བསྟན་འདུག་པ་འདི་ནས་ཀྱང་ཐེ་ཚོམ་དང་ཡ་མཚན་སྐྱེ་དགོས་པ་ཞིག་འདུག རང་ངོས་ནས་བསམ་ན་ཁྱེད་རང་དང་༸གོང་ས་མཆོག་གི་བར་ས་དང་གནམ་གྱི་ཁྱད་པར་ཡོད་པ་གསལ་པོ་ཡིན་པས་དེའི་བར་ན་དཀྲུག་གཞི་ཅིག་ལྷག་ཡོད་དམ་སྙམ།
དེ་མིན་ཁྱེད་རང་དང་སྐུ་ངོ་བྲེ་སྲང་ལགས་ཡིག་འབྲེལ་བྱེད་པའི་དུས་ཚེས་སྐབས་ང་རྣམ་རྒྱལ་གྲྭ་ཚང་གི་བོད་དྲུང་ཡིན་པ་ཁྱེད་རང་ནས་ཀྱང་ཤེས་ཀྱི་ཡོད་པ་མ་རེད་པས། ད་ནི་ངས་སྐུ་ངོའི་རེ་སྐུལ་བཞིན་ལན་འདེབས་བྱ་དགོས་གཅིག་རང་ཡོད་པ་དེའི་ཐོག་འགྲེལ་བརྗོད་བྱས་ན་སྐུ་ངོ་མཆོག་ནས་ཁོང་རང་ནས་༸གོང་ས་མཆོག་གིས་ཧོལ་རྒྱུག་ཤོར་ཚུལ་ཁོང་གི་དེབ་ཀྱི་ཤོག་གྲངས་གང་དང་། ཡིག་ཕྲེང་གང་དུ་འདུག་ཅེས་ང་ལ་ཚུར་དྲི་བ་བཏང་འདུག དེ་ནི་གཡག་བརྐུས་པས་མ་ཚད་རྔ་མའི་དར་ཆ་རང་རེད། གནད་དོན་འདིའི་ཐོག་སྐུ་ངོ་མཆོག་དག་སེལ་བྱ་འདོད་ཡོད་ན་ཁོང་རང་གི་དེབ་ཆུང་དེའི་དཔར་གཞི་ཆ་ཚང་ཞིག་དྲ་ཐོག་ཏུ་བཞག་ན་ངས་བཤད་པ་ལས་གསལ་བ་ཡོང་ངེས་ཀྱང་དེ་འདྲ་བྱ་རྒྱུའི་སྤོབས་པ་སྐུ་ངོ་ལ་མེད་པ་གསལ་པོ་རེད། ད་ངས་ངལ་བ་ཁྱད་དུ་སད་ནས་ཁོང་གི་དེབ་ནང་དོན་དམ་ཇི་འདྲ་བྲིས་ཡོད་པའི་དཔེ་མཚོན་འགའ་ཤས་བཤུས་ཏེ་ཀློག་པ་པོའི་སྤྱན་ལམ་དུ་བཤམ་ན། ཁོང་གི་དེབ་ཤོག་གྲངས་ ༨ ནང་འོག་རྩིས་ཡིག་ཕྲེང་གསུམ་པ་ནས་འགོ་བཙུགས་ཏེ་འདི་ལྟར་བྲིས་ཡོད། “༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་བཅུ་བཞི་པའི་བོད་མི་མང་སྤྱི་འཐུས་མཐུན་མོང་ལ་བསྩལ་བའི་གསུང་འཕྲིན་ཆ་ཚང་ལེབ་བཤུས་ཀྱིས་འདི་གཤམ་བཀོད་པའི་ནང་ཧོལ་རྒྱུགས་ཤོར་གནང་གསལ་བར་མངོན་གྱི་འདུག” ཅེས་དང་། ཡང་དེབ་ཆུང་ཤོག་གྲངས་ ༡༧ ནང་གོང་རྩིས་ཡིག་ཕྲེང་བཅུ་གཅིག་ནས་འགོ་བཙུགས་ཏེ་འདི་ལྟར་བྲིས་ཡོད། “གོང་གསལ་གསུང་འཕྲིན་ནང་འགལ་རྐྱེན་དབང་གིས་(སྤོམ་ཚིག་འདིའི་དངོས་དོན་ཕྱི་ལོ་ ༡༩༠༤ ལོར་རྒྱ་གར་དབྱིན་གཞུང་གི་དམག་དཔུང་ནས་བོད་སར་བཙན་འཛུལ་བྱས་པ་དེ་སྐབས་༸རྒྱལ་དབང་སྐུ་གོང་མ་)སོག་ཡུལ་དང་། རྒྱ་ནག་ལ་ཕེབས་ཞེས་འཁོད་འདུག་པ་དེ་ནི། ༸རྒྱལ་དབང་སྐུ་གོང་མའི་རྣམ་པར་ཐར་པ་རིན་ཆེན་ཕྲེང་བའི་ནང་། ཕྱི་ལོ་ ༡༩༠༤ ལོར་དབྱིན་དམག་གིས་བོད་སར་བཙན་འཛུལ་སྐབས། གློ་བུར་གསང་ཐབས་ཀྱིས་ཉེན་གཡོལ་དུ་ཕེབས་པར་ཚོད་དཔག་ཧོལ་རྒྱུགས་ཀྱིས་བཀོད་འདུག་པ་དེ་ལ་རྩ་འཛིན་ཧོལ་རྒྱུགས་ཤོར་གནང་གསལ་བར་མངོན་གྱི་འདུག” ཅེས་དང་། ད་དུང་དེའི་གཤམ་དུ་སྤྱི་འཐུས་ལྷན་ཚོགས་ནས་ཧོལ་རྒྱུག་ཤོར་ཚུལ་སོགས་སྐད་གསང་མཐོན་པོས་བཤད་འདུག་པ་ཡིག་ཚོགས་ལ་འཇིགས་ནས་མ་བྲིས་སོ།།
སྤྱིར་གུས་པར་སྐུ་ངོ་མཆོག་ལ་འགྲན་བཟོད་པའི་ཡོན་ཏན་སྣེ་གཅིག་མེད་ཀྱང་། ཆོས་རྗེ་ས་པཎ་གྱིས། དེང་སང་དུས་ན་ལོ་གྲངས་རྒན་གྱུར་ན། །བླུན་པོ་རྣམས་ཀྱང་གཙུག་གཏོར་ཇི་བཞིན་ཏེ། །ཤེས་རབ་རྒྱ་མཚོའི་ངོས་ལྟར་ཡངས་པ་ཡང་། །གཞོན་ནུར་གྱུར་ན་ཚད་མར་འཛིན་པ་དཀོན། །ཞེས་གསུངས་པ་ལྟར་མ་གནང་བར་ཐོག་མར་སྐུ་ངོའི་དེབ་ལ་གཟིགས། དེ་ནས་གུས་པའི་རྩོམ་ཡིག་དང་པོ་དང་། གཉིས་པ་བཀླག་ན་གསལ་པོ་མཁྱེན་ཐུབ་པས་དེ་དོན་བཞིན་ཀློག་པ་པོ་རྣམས་ནས་དགོངས་འཇགས་ཞུ།།
འདིར་སྨྲས་པ།
བཅུ་གསུམ་༸རྒྱལ་བར་རྗེས་དྲན་ཞུ་བ་དང་།།
ཡ་ཧན་ཀྲང་ལ་རྒྱབ་ཁུངས་བཅོལ་བ་འགལ།།
བཅུ་བཞི་༸རྒྱལ་བས་ཧོལ་རྒྱུག་ཤོར་སྐད་དང་།།
ཐམས་ཅད་མཁྱེན་པའི་མཚན་གྱིས་བསྟོད་པ་འགལ།།
རང་གིས་སྤུངས་པའི་འགལ་བའི་ཁུར་ཆེན་འདི།།
འདེགས་པར་མི་ནུས་ཉམ་ཐག་འགྲོ་བ་ལ།།
ཕྱག་ན་པདྨོས་ཐུགས་རྗེའི་དབྱིངས་ནས་དགོངས།།
ཕྱི་མའི་ལམ་སྣེ་ཟིན་པར་བྱིན་གྱིས་རློབས།།
བདེན་པའི་གནས་ལུགས་མཐོང་བའི་བློ་མིག་ཉམས།།
ཚོད་དཔག་རྟོག་བཟོར་རིག་པ་ཤེལ་ལས་དྭངས།།
ད་ནི་ཤེས་རབ་འཆལ་བའི་སྐྱེ་བོ་ལ།།
འཇམ་དཔལ་ལྷ་ཡི་ཚོགས་རྣམས་དགོངས་སུ་གསོལ།།
ལྟོ་གོས་གཏམ་གསུམ་བླ་མའི་དྲིན་ལ་བརྟེན།།
སྒྲོ་འདོགས་སྐུར་འདེབས་བླ་མ་ཉིད་ལ་བྱས།།
བློ་སྦྱོང་གསར་པའི་ཉམས་ལེན་ལ་བརྟེན་ནས།།
ནམ་མཁའི་པདྨོའི་ཞིང་དུ་སྐྱེ་བ་ཤོག།
ཅེས་གུས་བསྟན་འཛིན་ཕན་བདེ་པས་ཕྱི་ལོ་ ༢༠༡༢ ཟླ་ ༨ ཚེས་ ༡༥ ཉིན་བཞུགས་སྒར་དུ་བྲིས་པ་འདིས་ཀྱང་སྤྱི་ཚོགས་ཀུན་ཞི་བདེར་གྱུར་ཅིག།།།
བསྟན་ཕན་ཞེས་པའི་མི་དེ་ལུད་གྲ་ཆས་གྱོན་ལག་ཏུ་ཕྲེང་བ་འཁྱེར་ནས་སེམས་པ་གཞན་གྱི་ཕུན་གསུམ་ཚོགས་པ་མཐོང་དུས་མི་ཟོད་པའི་བློ་སྐྱེད་མཁན་ཞིག་རེད།
རྒྱ་དམར་གྱིས་༸གོང་ས་མཆོགས་ལ་ཞི་མེད་རྐྱོན་འཛུག་ཉིན་ནས་ཉིན་མཐུད་དེ་བྱས་པ་དེ་རིགས་ལ། དོན་སྣང་པུ་ཙམ་མེད་པར་། ནང་དཀྲུགས་རྒྱགས་མཁན་ཞིག་རེད་
སྒེར་གྱི་སྙིང་ནད་དེ་ནང་ཁུལ་དུ་བསྡུམ་འགྲིགས་བྱས་ན་གང་འདྲ་མ་རེད། རྩོམ་དེབ་གང་རུང་ནང་རང་གིས་སྐྱོན་མཐོང་སོ་ན་དང་པོ་སྐྱོན་དེ་གང་འདྲ་ཡིན་མིན་ཞིབ་འཇུག་བྱེད་དགོས་པ་ལས་རང་གི་བསམ་ཚུལ་དེ་ཚད་མར་འཛིན་ནས་གཞན་ལ་སྨད་པ་དེ་དངོས་གནས་ཡག་པོ་མ་རེད། བྱས་ཙ་ན་སྒེར་དོན་རིགས་ཚགས་པར་སྟེང་མ་འགོད་རོགས།
རྩོམ་ཡག་པོ་བྲིས་འདུག །ངས་བྱས་ན་ང་ཚོ་ནང་ཁུལ་དུ་འདི་འདྲའི་རྩོད་པ་མ་སྐྱོན་ན་ག་འདྲ་འདུག །རྒྱ་ནག་གུང་ཁྲན་ཏང་ནས་བོད་ཀྱི་ལོ་རྒྱས་ཡོད་ཚད་ལ་ཁྱོག་བཤད་དང་བོད་ཡུལ་དུ་དམྱལ་བ་མི་ཡུལ་དུ་འཕོས་འདྲའི་དཀའ་སྡུག་ཡོད་ན་ཡང་བདེ་སྐྱིད་ཡོད་ལུགས་ཀྱི་ཁྱོད་བཤད་འཛམ་གླིང་དུ་བསྒྲགས་དང་སྒྲོག་བཞིན་པར་དངོས་དོན་གྱི་གསལ་བཟད་དམ་དགག་ལན་འདྲ་སྐྱོན་ན་མི་ལེགས་སམ།
ད་རྒས་པོ་གུ་ཡངས་སུ་གཏོང་རོགས། སྤྱིར་༧གོང་ས་མཆོག་ལ་མཐོང་ཆུང་མཚན་སྨོད་ཞུ་མཁན་རིགས་ཡན་པོར་མི་གཏོང་བ་རང་རེའི་ལས་འགན་ཡིན་ཡང། སྐབས་འདི་ནས་རྒད་པོ་འདི་ལ་དམིགས་བསལ་བཏང་ན་འོས་འཚམས་སུ་མཐོང།།
ཕྱག་ན་པདྨོའི་བྱིན་རླབས་བདུད་རྩིའི་རྒྱུན།།
བདག་སོགས་སྙིང་གི་ཟུངས་སུ་རྟག་སྨིན་ཅིང་།།
བཀའ་བཞིན་སྒྲུབ་པའི་མཆོད་པས་རབ་བསྙེན་ནས།།
ཀུན་བཟང་མཆོད་མཆོག་རྒྱ་མཚོར་མཐར་སོན་ཤོག།
ཐུགས་རྗེ་ཆེ། ཡིག་ལན་གསལ་ཐག་ཆོད་བྲིས་བྱ། འདི་དང་འདི་འདྲའི་འབྲི་མཁན་དང་ཤོད་མཁན་རྣམས་ཀྱི་ཚིག་ཟུར་ཙམ་ཡང་ཐར་བ་མ་གཏོང་རོགས། ཐུགས་རྗེ་ཆེ།