གནས་ཚུལ་གསལ་པོ་བརྡ་སྤྲོད་པ།

ཟླ་བ་དོན་གྲུབ་ཨཱཅཱརྱ་པས་བྷེངྒལོར་ས་ཐོག་ནས།

༄༅།།  ཉེ་བའི་ཉིན་ཤས་སྔོན་ནས་རྒྱ་གར་ལྷོ་ཕྱོགས་(ཀརྞཊཀ)མངའ་སྡེའི་གྲོང་ཁྱེར་(བྷེངྒལོར་)གཙོ་བོར་གྱུར་པའི་ས་གནས་འགའ་རེའི་ནང་རྒྱ་གར་བྱང་ཤར་ནས་ཡིན་པའི་མི་མང་པོ་རང་གང་ནས་ཡོང་བའི་བྱང་ཤར་དུ་གནས་སྐབས་ཕྱིར་ལོག་བྱས་པའི་རྒྱུ་རྐྱེན་ནི།རྒྱ་གར་གྱི་གསར་ཤོག་(ཌེཀེནཀོརོནིཀལDeccan Chronicle)གྱི་ད་རིང་ ༢༠༡༢ ཟླ་ ༨ ཚེས་ ༡༩ འདོན་ཐེངས་ལྟར་ན། (བྷེངྒལོར)ཁུལ་གནས་སྡོད་བྱེད་པའི་རྒྱ་གར་བྱང་ཤར་ཁུལ་གྱི་མི་རྣམས་ལ་རང་ཡུལ་དུ་ཕྱིར་ལོག་བྱ་དགོས་པའི་སྡིགས་ར་སྐུལ་བའི་ལག་ཐོགས་འཕྲིན་ཐུང་བཏང་བ་ལ་བརྟེན་ནས་རྒྱ་གར་བྱང་ཤར་ནས་ཡིན་པའི་མི་དེ་ཚོར་འཇིགས་སྣང་དང་སེམས་ཁྲལ་བྱུང་ནས་མི་མང་པོ་ཞིག་མེ་འཁོར་ནང་ཚང་ཀ་ཤིག་ཤིག་རང་ཁོངས་བྱང་ཤར་དུ་བྲོས་ཕྱིན།

སྡིགས་ར་སྐུལ་བའི་ལག་ཐོགས་ཁ་པར་འཕྲིན་ཐུང་དེའི་འབྱུང་ཁུངས་(པཀིསིཐན)ནས་ཡིན་པ་དང་། དྲྭ་རྒྱའི་ཐོག་ཀྱང་འདྲ་དཔར་ལ་བཅོས་བསྒྲིགས་བྱས་ཏེ་བརྙན་དཔར་རྫུན་མའང་ཁྱབ་སྤེལ་བྱས་པའི་དཀྲོག་གཏམ་སྤེལ་མཁན་གྱི་འབྱུང་ཁུངས་ཀྱང་(པཀིསིཐན)ནས་ཡིན་པ་དང་། (བྷེངྒལོར)གྲོང་ཁྱེར་ནང་སྡིགས་ར་སྐུལ་བའི་འཕྲིན་ཐུང་བཏང་མཁན་དང་དྲྭ་རྒྱའི་དཔར་རྫུན་འགྲེམས་སྤེལ་དང་དཀྲོག་གཏམ་སྤེལ་མཁན་ནི་(བྷེངྒལོར)ས་ཁུལ་(ཀོརོམངྒལ)ནང་ལག་ཐོགས་ཁ་པར་བཟོ་བཅོས་ཚོང་ཁང་ཆུང་ཆུང་ཞིག་གི་དོ་བདག་གཞོན་ནུ་གཉིས་ཡིན་པ་དང་ཁོ་གཉིས་ཁ་ས་རེས་གཟའ་སྤེན་པའི་ཉིན་ས་གནས་ཉེན་རྟོག་པས་འཛིན་བཟུང་བྱས་འདུག

རྒྱ་གར་བྱང་ཤར་(ཨསཾ)མངའ་སྡེའི་ནང་ཁྱིམ་མཚེས་རྒྱལ་ཁབ་(བྷངླདེཤི)ནས་སྐྱབས་བཅོལ་བ་མང་པོ་ཡོང་བར་བརྟེན་ཡུལ་མི་ཨསཾ་པ་རྣམས་དང་ས་ཆ་དང་ལས་ཀ་སོགས་ཀྱི་ཐད་རྩོད་གཞི་བྱུང་བཞིན་པ་དང་། ཁྱིམ་མཚེས་ཡུལ་གཞན་(བྷརྨ)འི་ནང་ཆོས་ལུགས་ཐ་དད་ཅན་པའི་དབར་འཁྲུག་རྩོད་དང་ཕན་ཚུན་གསོད་རེ་བྱུང་བའི་གནས་ཚུལ་དེ་གཉིས་གཙོ་བོར་གཞི་བཅོལ་ནས། དཀྲོག་གཏམ་སྤེལ་མཁན་རྣམས་ཀྱིས་འཁྱོག་བཤད་དང་དཔར་རྫུན་བཅོས་བསྒྲིགས་དང་སྡིག་ར་བསྐུལ་བའི་འཕྲིན་ཐུང་བཏང་བའི་ལས་བརྩམས་པ་རེད།

རྒྱ་གར་དབུས་གཞུང་དང་(ཀརྞཊཀ)མངའ་སྡེའི་གཞུང་དང་(བྷེངྒལོར)ས་གཞུང་རྣམས་ཀྱིས་མི་མང་བདེ་འཇགས་ཆེད་དུ་ཉེན་རྟོག་པ་དང་སྐོར་སྲུང་བ་ཆེད་གཏོང་དང་། མི་མང་རྣམས་དཀྲོག་གཏམ་ལ་ཡིད་ཆེས་བྱ་མི་རུང་བ་དང་། དོན་མེད་འཇིགས་སྣང་བྱ་མི་དགོས་པའི་བསླབ་བྱ་བྱེད་མུས་དང་། འབྲེལ་ཡོད་ཚོགས་པ་ཁག་དང་ཆོས་ལུགས་ཀྱི་འགོ་ཁྲིད་རྣམས་ཀྱིས་ཀྱང་རང་ཁོངས་མི་མང་ལ་འཁྱོག་བཤད་དག་སེལ་གནང་མུས་སོགས་ཞི་བདེ་ལྷིང་འཇགས་དང་དམིགས་བསལ་གྱི་བྱང་ཤར་ཁུལ་ནས་ཡིན་པའི་མི་རྣམས་དང་དེའི་ཞོར་ལ་བྱང་ཤར་མི་རྣམས་དང་གདོང་གཞི་མཚུངས་པའི་མི་རྣམས་དང་དེ་རྣམས་ཀྱི་སྡོད་གནས་ས་ཁུལ་དུ་དམིགས་བསལ་གྱི་སྐོར་སྲུང་བ་ཆེད་བཙུག་གནང་བཞིན་ཡོད།

མཆན།

༡༽རྒྱ་གར་བྱང་ཤར་ཁུལ་ཞེས་པ་ནི། རྒྱ་གར་གྱི་བྱང་ཤར་ཕྱོགས་གང་དུ་(ཨསཾ)མངའ་སྡེ་དང་། (ཨརུནཅལ)མངའ་སྡེ་དང་། (མེགྷལཡ)མངའ་སྡེ་དང་།

(ནཱགཱལེནྜི)མངའ་སྡེ་དང་། (མཎིཔུར)མངའ་སྡེ་དང་། (མིཛོརཾ)མངའ་སྡེ་དང་། (ཏིརིཔུར)མངའ་སྡེ་རྣམས་ཚུད་ཡོད། 

༢༽གནས་ཚུལ་གསལ་པོ་བརྡ་སྤྲོད་པ་འདི་ནི་ཆེད་མངགས་ཆོས་ལུགས་དང་མི་རིགས་དབྱེ་འབྱེད་ཀྱི་ཐ་སྙད་བེད་སྤྱོད་མ་བྱེད་པར་ཡུལ་ལ་ཞི་བདེ་ལྷིང་འཇགས་ཡོང་བའི་ཆེད་དུ་དམིགས་པའི་སྒོ་ནས་བྲིས་ཡོད།

༣༽གོང་གི་གནས་ཚུལ་འདི་ནི་ད་རིང་བར་གྱི་གནས་ཚུལ་ཙམ་དང་། གཙོ་བོ་ནི་རྒྱབ་ལྗོངས་ཀྱི་གནད་དོན་ཞུ་བ་ཡིན།

༤༽རང་རེའི་སྤྱི་ཚོགས་ནང་གནས་ཚུལ་ཇི་ཡིན་གསལ་པོ་གོ་རྟོགས་ཡོང་བའི་ཆེད་དུ་མ་བསྐུལ་དང་བླངས་ཀྱིས་གནས་ཚུལ་གསལ་པོ་བརྡ་སྤྲོད་པ་འདི་འགྲུལ་བཞུད་ངང་བྲིས་པ་ལགས་སོ།།