གནས་ཚུལ་ཛ་དྲག་མིན་ཡང་ཚང་མས་ཡིད་གཟབ་བྱ་གལ་ཆེ།

ཨ་སམ་ནང་རྙོག་དྲ་དེར་རྐྱེན་བྱས་ཏེ་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཁག་ཅིག་ནང་ཟང་ཟིང་ཆགས་ཡོད་པ་དང་། བོད་རིགས་སློབ་ཕྲུག་དང་སིལ་འཚོང་པ་མང་ཆེ་བ་ཞིག་ཀྱང་ཕྱིར་རང་རང་གི་ནང་དུ་ལོག་པ་དང་། ཁ་ཤས་གནས་སྐབས་རིང་ཉེན་ཡོལ་ལྟ་བུར་གདན་ས་ཁག་ཏུ་སྐྱོད་ཡོད་འདུག  

ཉེ་ཆར་ཨ་སམ་ནང་ས་གནས་བྷོ་ཌོ་གྲངས་ཉུང་མི་རིགས་དང་ཁ་ཆེ་བའི་བར་འཁྲུག་རྩོད་བྱུང་རྗེས། རྒྱ་གར་གྱི་གྲོང་ཁྱེར་དང་ས་གནས་མང་པོའི་ནང་ཟང་ཟིང་ཆགས་ཀྱིན་ཡོད་ཅིང་། ལྷག་པར་དུ་རྒྱ་གར་ལྷོ་ཕྱོགས་བྷིང་ལོར་དང་མེ་སོར་སོགས་ཀར་ན་ཊ་ཀ་མངའ་སྡེ་ནང་ཡོད་པའི་རྒྱ་གར་བྱང་ཤར་ཁུལ་གྱི་མཐོ་སློབ་སློབ་ཕྲུག་དང་། ལས་བྱེད་ཚོང་ལས་པ་སོགས་སྟོང་ཕྲག་མང་པོ་ཕྱིར་རང་གི་ལུང་པར་ལོག་གི་ཡོད་པ་མ་ཟད། གྲོང་ཁྱེར་དེ་དག་ནང་གི་བོད་མི་ཚོས་ཀྱང་ཞེད་སྣང་འོག་སོ་སོའི་ནང་དང་། ལྷོ་ཕྱོགས་གདན་ས་ཁག་ཏུ་བྲོས་བྱོལ་བྱེད་ཀྱི་ཡོད་འདུག

གསར་འགོད་པས་ཁ་པར་བརྒྱུད་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་སྤྱི་ཁྱབ་པ་ཀརྨ་སེང་གེ་མཆོག་ལ་ལྷོ་ཕྱོགས་བོད་མའི་གཞིས་ཆགས་དང་བོད་མིའི་འདུས་སྡོད་ས་གནས་ཁག་གི་གནས་སྟངས་གང་འདྲ་ཆགས་ཡོད་མེད་བཀའ་འདྲི་ཞུས་པར་ཁོང་གིས། གཙོ་བོ་བྷིང་ལོར་དང་མེ་སོར་གྲོང་ཁྱེར་ནང་ཡོད་པའི་རྒྱ་གར་བྱང་ཤར་ཁུལ་གྱི་མི་རྣམས་ཞེད་སྣང་གིས་ཕྱིར་ལོག་བྱེད་ཀྱི་ཡོད་པ་དང་། བོད་རིགས་སློབ་ཕྲུག་དང་སིལ་འཚོང་བ་དག་ཀྱང་ཞེད་སྣང་གིས་ཁུངས་སོ་སོའི་གཞིས་ཆགས་ཁག་དང་གྲྭ་ས་ཁག་ཏུ་བྲོས་བྱོལ་ལྟ་བུ་བྱེད་ཀྱི་ཡོད་འདུག དེ་ནི་བོད་པ་ཚོ་ཨ་སམ་གྱི་འཁྲུག་རྩོད་ལ་འབྲེལ་བ་མེད་ཀྱང་། རྒྱ་གར་བྱང་ཤར་ཁུལ་གྱི་མི་དང་བོད་པ་ཚོའི་ཕྱི་ཚུལ་འདྲ་བོ་ཡོད་སྟབས། གལ་སྲིད་གནས་ཚུལ་ཛ་དྲག་ཆགས་པ་ཡིན་ན་ཁ་ཆེ་ཚོས་བོད་མི་ཚོའང་བྱང་ཤར་ཁུལ་གྱི་མི་དང་ནོར་ཏེ། གནས་ཚུལ་འབྱུང་སྲིད་པའི་ཞེད་སྣང་བྱེད་ཀྱི་ཡོད་སྐོར་གསུངས་བྱུང་།

ཡང་ཁོང་གིས་ལྷོ་ཕྱོགས་ཁུལ་གྱི་བོད་པ་ཚོའི་བདེ་འཇགས་སྐོར་གྱི་གནས་བབ་ངོ་སྤྲོད་གནང་པ་ལྟར་ན། ཉེ་ཆར་གནས་བབ་ཛ་དྲག་ཏུ་གྱུར་འཕྲད་མངའ་སྡེ་གཞུང་གིས་བོད་མིའི་འབྲེལ་ཡོད་མི་སྣ་འབོད་འགུག་བྱས་ཏེ། མངའ་སྡེ་ནང་གི་བོད་མི་ཚོ་བྲོས་བྱོལ་བྱེད་མི་དགོས་པ་དང་། མངའ་བདེ་གཞུང་གིས་བོད་མི་ཚོའི་བདེ་འཇགས་ལ་འགན་ལེན་སྲུང་སྐྱོབ་བྱ་རྒྱུའི་ཁས་ལེན་བྱས་ཡོད་པ་མ་ཟད། འབྲེལ་ཡོད་མི་སྣ་ཚོས་ཐོ་གཞུང་ཕུལ་བ་ལྟར་གཞིས་ཆགས་ཁག་དང་དགོན་སྡེ་ཁག དེ་བཞིན་ཁ་འཐོར་བོད་མིའི་སྡོད་གནས་བཅས་སུ། ཉེན་རྟོག་པ་དང་བདེ་སྲུང་མི་སྣ་འགྲེམས་འཇོག་བྱས་ཡོད་འདུག་ལ། ཁོང་གིས་ “མངའ་སྡེ་གཞུང་གིས་ཉེན་སྲུང་གང་ལེགས་བྱེད་ཀྱི་ཡོད་ཀྱང་། མཐའ་གཅིག་ཏུ་གནས་ཚུལ་ཛ་དྲག་འབྱུང་གི་མ་རེད་ལབ་ཐུབ་ཁག་པོ་རེད།  དེར་བརྟེན། བོད་མི་ཚོས་གཟབ་ནན་བྱ་རྒྱུ་ཧ་ཅང་གལ་ཆེན་པོ་ཡིན་པ་དང་། གལ་སྲིད་ཕྱི་ལོགས་སུ་འགྲོ་དགོས་བྱུང་ན་མི་མང་པོ་མཉམ་དུ་འགྲོ་བའམ། ཡང་ན་ས་གནས་སོ་སོའི་རྒྱ་གར་འབྲེལ་ཡོད་ལས་ཁུངས་ལ་ཉེན་སྲུང་མི་གཏོང་རོགས་ཞུས་ན་གྲ་སྒྲིག་ཡོད་རེད”ཅེས་འབོད་སྐུལ་གནང་སོང་།

གསར་འགོད་པས་སྦེལ་ཀོབ་དང་མོ་གྷོ་ཊི་ས་གནས་ལས་ཁུངས་སོ་སོར་འབྲེལ་བ་བྱས་ཏེ་གནས་ཚུལ་དྲིས་སྐབས། གཞིས་ཆགས་ནང་མི་རྣམས་རྒྱུན་ལྡན་ཡིན་པ་དང་། མངའ་སྡེ་གཞུང་གི་ཉེན་རྟོག་པ་དང་བདེ་སྲུང་མི་སྣ་མང་པོ་གང་སར་འགྲེམས་འཇོག་བྱས་ཡོད་འདུག་ལ། མོ་གྷོ་ཊི་ས་གནས་མགོ་འཛིན་ལས་ཁུངས་ཀྱི་ལས་དྲུང་བསྟན་འཛིན་མཆོག་ལྡན་ལགས་ཀྱིས་ “ད་སྔ་དཀྲོག་གཏམ་མང་པོ་ཞིག་འབྱུང་གི་ཡོད་ཀྱང་། དེ་དག་ར་འཕྲོད་པ་དེ་འདྲ་གང་ཡང་མིན་པ་དང་། འདས་པའི་ཉིན་འགའི་རིང་འདི་ཕྱོགས་ཀྱི་དགེ་འདུན་པ་མང་པོ་ཞིག་སྦེལ་ཀོབ་ཏུ་དགེ་ལུགས་རྒྱུགས་སྤྲོད་དུ་ཕྱིན་སྐབས། རྒྱ་གར་ཉེན་རྟོག་པ་དང་བདེ་སྲུང་མི་སྣིས་མེ་སོར་བར་དུ་སྲུང་སྐྱོབ་ཐོག་ཕར་སྐྱེལ་ཚུལ་ལེན་བྱེད་ཀྱི་ཡོད་པ་རེད་”ཅེས་བརྗོད་བྱུང་།

གསར་འགོད་པས་བྷང་ལོར་(Bangalore)སློབ་ཕྲུག་ཚོགས་པའི་ས་གནས་གཞོན་ནུའི་ཚོགས་གཙོ་ཨ་ཆོས་ལགས་སུ་ཁ་པར་བརྒྱུད་གནས་ཚུལ་རྒྱུས་ལོན་བྱས་སྐབས། ཁོང་གིས་འདས་པའི་ཉིན་འགའི་ནང་སློབ་ཕྲུག་ཚོར་ཞེད་སྣང་ཆེན་པོ་བསླེབས་ཏེ། མང་པོ་ཞིག་གིས་མཐོ་སློབ་ནས་དགོངས་པ་ཞུས་ཏེ་སོ་སོའི་ནང་དང་ས་གནས་གཞན་དུ་ཕྱིན་ཡོད་པ་དང་། ཡང་སྒེར་ངོས་ནས་སྡོད་ཁང་གླས་ནས་བསྡད་ཡོད་མཁན་མང་པོ་ཞིག་བོད་ཁྱིམ་སྡོད་ཁང་དུ་སྤོ་བཞིན་ཡོད་ཅིང་། ད་སྔ་དམིགས་བསལ་དོན་རྐྱེན་འདྲ་བྱུང་མེད་མོད། རེ་ཟུང་ལ་ཉེན་བརྡ་བཏང་པའི་གནས་ཚུལ་དེ་འདྲ་བྱུང་ཡོད་པ་དངོས་བདེན་ཡིན་ཚུལ་བརྗོད་སོང་། ཁོང་གིས་ “ཁ་སང་ཀར་ན་ཊ་ཀའི་ནང་སྲིད་བློན་ཆེན་ང་ཚོ་ཡོད་སར་ཡོང་སྟེ། ཁྱེད་ཚོས་སེམས་འཚབ་རྩ་བ་ཉིད་ནས་མ་བྱེད། ཁྱེད་ཚོར་གནས་ཚུལ་འདི་མ་འཇམ་པར་དུ་གཞུང་གིས་སྲུང་སྐྱོབ་འགན་ལེན་བྱ་ངེས་ཡིན་ཞེས་གསུངས་བྱུང་ལ། ཁ་སང་ས་གནས་ཡུལ་མི་ཚོ་ཡོང་སྟེ་ཁྱེད་ཚོར་ཉེན་སྲུང་དང་རྒྱབ་སྐྱོར་བྱ་ངེས་ཡིན་ཞེས་བརྗོད་བྱུང་པ་མ་ཟད། དེ་རིང་ཁོ་ཚོའི་ཚོགས་འདུ་ཞིག་ལ་མགྲོན་འབོད་ཀྱང་བྱས་བྱུང་། སྤྱིར་ས་གནས་ཡུལ་མི་དང་ང་ཚོར་དེ་ཙམ་འབྲེལ་བ་མེད་ཀྱང་། ཐེངས་འདིར་ཁོང་ཚོས་རོགས་རམ་དང་བོད་མི་ཚོའི་གནས་སྟངས་ཐོག་ཐུགས་འཚབ་ཆེན་པོ་གནང་གི་འདུག”ཟེར།

མཱང་ལོར་(Mangalore) སློབ་ཕྲུག་ཚོགས་པའི་ཚོགས་གཞོན་བཀྲ་ཤིས་ནོར་བུ་ལགས་སུ་འབྲེལ་བ་བྱས་སྐབས། ཁོང་གིས་གནས་བབ་ངོ་སྤྲོད་བྱས་པ་ལྟར་ན། མང་ལོར་གྲོང་ཁྱེར་ནང་གི་བོད་ཕྲུག་ཚོར་དམིགས་བསལ་དོན་རྐྱེན་བྱུང་མེད་ཀྱང་། སྨན་ཞབས་པ་རེ་ཟུང་མ་གཏོགས་སློབ་ཕྲུག་མང་ཆེ་བ་ས་གཞན་དུ་ཕྱིན་ཚར་ཡོད་འདུག་ལ། མེ་སོར་(Mysore)སློབ་ཕྲུག་ཚོགས་པའི་ཚོགས་གཙོ་བློ་བཟང་འཇམ་དབྱངས་ལགས་ཀྱིས་ཀྱང་སྨན་ཞབས་པ་ཁག་ཅིག་ལ་དགོངས་པ་མ་སྤྲད་སྟབས་མཐོ་སློབ་ཀྱི་སྡོད་ཁང་ནང་བསྡད་ཡོད་པ་ལས། གཞན་ཚང་མ་སོ་སོའི་ནང་དང་ས་གནས་གཞན་དུ་ལོག་ཚར་ཡོད་ཚུལ་བརྗོད་བྱུང་།

ཅེན་ནའེ་(Chennai)སློབ་ཕྲུག་ཚོགས་པའི་ཚོགས་གཙོ་བསྟན་འཛིན་ཕུན་ཚོགས་ལགས་ཀྱིས། ཅེན་ནའེ་ནང་ཡོད་པའི་རྒྱ་གར་བྱང་ཤར་ཁུལ་གྱི་མི་ཁག་ཅིག་ནང་མིས་འབོད་འགུལ་བྱས་སྟབས་ལོག་ཡོད་པ་ལས། གནས་ཚུལ་ཛ་དྲག་གང་ཡང་མེད་པ་མ་ཟད། སློབ་ཕྲུག་རྣམས་རྒྱུན་ལྡན་ལྟར་འཛིན་གྲྭར་སྐྱོད་བཞིན་ཡོད་འདུག ཊ་མེལ་ཎ་ཌུ་(Tamil Nadu) མངའ་སྡེའི་ནང་སྲིད་ལས་ཁུངས་དང་། ཅེན་ནའེ་གྲོང་ཁྱེར་ཉེན་རྟོག་ལས་ཁུངས་བཅས་ཀྱིས་ཁོང་ཚོར་འབྲེལ་བ་བྱས་ཏེ། གྲོང་ཁྱེར་ནང་གི་བོད་ཕྲུག་ཚོས་ཞེད་སྣང་བྱ་མི་དགོས་པ་དང་། ཁོ་ཚོའི་བདེ་འཇགས་ལ་ཁེགས་ཐག་བྱ་རྒྱུ་ཡིན་སྐོར་བརྗོད་ཡོད་འདུག

གོང་གི་འབྲེལ་ཡོད་མི་སྣ་ཁག་དང་། རྒྱ་གར་དབུས་དང་མངའ་སྡེ་གཞུང་སོ་སོའི་གསང་པའི་ལས་ཁུངས་དང་ཞིབ་འཇུག་སྡེ་ཚན་ཁག་གིས་བརྗོད་པའི་གནས་ཚུལ་ལྟར་ན། ཨ་སམ་གྱི་དོན་རྐྱེན་བྱུང་རྗེས་རྒྱ་གར་གྱི་གྲོང་ཁྱེར་ཁག་ཅིག་ནང་ཟང་ཟིང་ཆགས་པ་ཏེ་གཙོ་བོ་ཁ་པར་ནང་གི་འཕྲིན་ཐུང་དང་། ངོ་དེབ་སོགས་བརྒྱུད་དེ་དཀྲོག་གཏམ་སྣ་ཚོགས་བཟོས་ཡོད་ཅིང་། གནས་ཚུལ་དེ་དག་གི་རྒྱབ་ལྗོངས་ལ་ཞིབ་བཤེར་བྱས་སྐབས། འཕྲིན་ཐུང་དང་པར་རིས་ཕལ་ཆེ་བ་པ་ཀི་སི་ཐན་ནས་བྱུང་ཡོད་པར་ངོས་འཛིན་གཅིག་གྱུར་བྱུང་ཡོད་འདུག

གསར་འགོད་པ། བནྡེ་སྐྱབས།