ཨེ་ཁུ་ཌོར་གྱི་སྲིད་འཛིན་གྱིས་ཁོ་ཚོའི་གཞུང་ཚབ་ནང་དབྱིན་ཇི་འཛུལ་ཐབས་བྱེད་ཀྱིན་པ་དེས། དབྱིན་ཇིས་རྒྱལ་སྤྱིའི་ཕྱི་འབྲེལ་ཐད་སོ་སོ་རང་ཤི་རྒྱག་གིན་ཡོད་སྐོར་བརྗོད་འདུག
ཁ་སང་གཟའ་ཉི་མའི་ཉིན་ལྷོ་ཨ་ཧྥི་རི་ཀ་གླིང་གི་ཨེ་ཁུ་ཌོར་རྒྱལ་ཁབ་ཀྱི་སྲིད་འཛིན་རཱ་ཧྥེལ་(Rafael Correa) གྱིས། ཨ་སན་ནི་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་གཞིར་བཟུང་། སོ་སོའི་ཚེ་སྲོག་ལ་སྲུང་སྐྱོབ་ཆེད་ལོན་ཊོན་དུ་ཡོད་པའི་ཨེ་ཁུ་ཌོར་གཞུང་ཚབ་ཁང་ནང་ཉེན་ཡོལ་དུ་འཛུལ་པ་ཞིག་ཡིན་པ་དང་། གལ་སྲིད་དབྱིན་གཞུང་གིས་ཨ་སན་འཛིན་བཟུང་ཆེད་ཁོ་ཚོའི་གཞུང་ཚབ་ཁང་ནང་འཛུལ་ཚེ། དེ་ནི་རྒྱལ་སྤྱིའི་ཁྲིམས་ལུགས་དང་འགལ་ཡོད་པ་མ་ཟད། དབྱིན་གཞུང་གིས་རྒྱལ་སྤྱིའི་ཕྱི་འབྲེལ་ཐད་སོ་སོ་རང་ཤི་རྒྱག་གིན་ཡོད་ལ། དེ་འདྲའི་གནས་ཚུལ་བྱུང་ཚེ་རྒྱལ་ཁབ་གཞན་དག་ནང་ཡོད་པའི་དབྱིན་ཇིའི་གཞུང་ཚབ་ཁང་ཁག་ལའང་། དེར་མཚུངས་ཀྱི་དཀའ་ངལ་འཕྲད་ངེས་ཡིན་པའི་ཉེན་བརྡ་བཏང་འདུག
༢༠༡༠ ལོར་ཝེ་ཀེ་ལའེ་ཀིས་(Wikileaks) གསར་ཁང་གིས་ཨ་རི་སོགས་རྒྱལ་སྤྱིའི་གཞུང་ཚབ་ཁང་མང་པོའི་ཕྱི་འབྲེལ་གསང་པའི་ཡིག་ཆ་ཕྱིར་བསྒྲགས་བྱས་པའི་རྗེས། གསར་ཁང་གསར་འཛུགས་བྱེད་མཁན་ཨ་སན་ལ་དངོས་ཤུགས་བརྒྱུད་གསུམ་ནས་གནོན་ཤུགས་རིམ་པར་བསླེབས་པ་མ་ཟད། སི་ཝེ་ཌེན་(Sweden) གྱི་བུད་མེད་གཉིས་ཀྱིས་ཁོ་ཚོར་ཨ་སན་གྱིས་བཙན་གཡེམ་བྱས་ཡོད་ཚུལ་ཁྲིམས་གཏུགས་བྱས་པར་བརྟེན། དབྱིན་གཞུང་གིས་ཁོང་སི་ཝེ་ཌིན་ལ་རྩིས་སྤྲོད་ཀྱིས་ཁྲིམས་བཤེར་ཐག་གཅོད་བྱ་རྒྱུ་གཏན་འཁེལ་སྟབས། ཁོང་དབྱིན་ཡུལ་ལོན་ཊོན་དུ་ཡོད་པའི་ཨེ་ཁུ་ཌོར་(Ecuador)གཞུང་ཚབ་ཁང་དུ་ཉེན་ཡོལ་སྐྱབས་བཅོལ་དུ་བྲོས་ཡོད་པ་རེད།
ཨ་སན་གྱིས་དབྱིན་གཞུང་གིས་ཁོང་སི་ཝེ་ཌེན་ལ་རྩིས་སྤྲོད་བྱས་ཚེ། དེ་ནས་རིམ་པས་ཨ་རིར་རྩིས་སྤྲོད་ཐོག་སྲོག་ཆད་གཏོང་རྒྱུར་དོགས་ཏེ། ཕྱི་ཟླ་ ༧ ནང་ལོན་ཊོན་དུ་ཡོད་པའི་ཨེ་ཁུ་ཌོར་གཞུང་ཚབ་ཁང་ནང་སྐྱབས་བཅོལ་མགོ་འདོགས་བྱས་ཚུལ་བརྗོད་ཡོད་པ་རེད།
དེ་བཞིན། སི་ཝེ་ཌིན་གྱི་བུད་མེད་གཉིས་ལ་བཙན་གཡེམ་བྱས་ཡོད་ཚུལ་བརྗོད་ཀྱིན་པའི་ཐད། ཨ་སན་གྱིས་ད་ནི་ཁོང་ལ་མ་ཉེས་ཁག་གཡོགས་བྱས་པ་ཞིག་ཡིན་པ་མ་ཟད། གནས་ཚུལ་དེའི་རྒྱབ་ལྗོངས་ན་ཨ་རི་ཡོད་ལ། གཙོ་བོ་ ༢༠༡༠ ལོར་ཝེ་ཀེ་ལའེ་ཀིས་ནང་ཕྱི་འབྲེལ་གསང་པའི་ཡིག་ཆ་མང་པོ་ཕྱིར་བསྒྲགས་བྱས་པ་དེར། འཁོན་ལན་སློག་ཆེད་ཁ་གཡར་ས་བཙལ་བ་ཞིག་ཡིན་སྐོར་བརྗོད་འདུག
