བཞུགས་སྒར་རིག་ལམ་སློབ་གཉེར་ཁང་གིས་བོད་ཕྱི་ནང་གཉིས་ཀྱི་བོད་མི་དང་ཧི་མ་ལ་ཡའི་རི་རྒྱུད། ཕྱི་རྒྱལ་ཡུལ་གྲུ་ཁག་བཅས་ཀྱི་སློབ་ཕྲུག་ ༡༡༢ ཙམ་ལ་རིན་མེད་ཐོག་ནང་ཆོས་སློབ་སྦྱོང་གི་གོ་སྐབས་སྤྲོད་ཀྱིན་ཡོད་འདུག
བཞུགས་སྒར་རིག་ལམ་སློབ་གཉེར་ཁང་གིས་འདས་པའི་ལོ་ངོ་དུ་མའི་རིང་བོད་ཕྱི་ནང་གཉིས་ཀྱི་བོད་མི་གཙོས། ཧི་མ་ལ་ཡའི་རི་རྒྱུད་དང་རྒྱ་གར། ཨ་རི་དང་དབྱིན་ལན། སུད་སི། ཐའེ་ཝན། ཀོ་རི་ཡ། ཝེ་ཐི་ནམ། སིང་གྷ་པོར། སོག་པོ། རྒྱ་གར་བ་བཅས་ཀྱི་ནང་ཆོས་དོན་གཉེར་ཅན་མང་པོ་ཞིག་ལ་མཚན་ཉིད་དང་ནང་ཆོས་སློབ་གཉེར་གྱི་གོ་སྐབས་སྤྲོད་ཀྱིན་ཡོད་པ་དང་། ཉེ་ལམ་གསར་འགོད་པ་ཆེད་དུ་བཞུགས་སྒར་རིག་ལམ་སློབ་གཉེར་ཁང་དུ་ཕྱིན་ཏེ། སློབ་གཉེར་ཁང་གི་སློབ་མ་བསྡུ་སྟངས་དང་སློབ་གཉེར་སོགས་ཀྱི་ཐད་ལ་རྒྱུས་ལོན་བྱས་པ་ཡིན།
བཞུགས་སྒར་རིག་ལམ་སློབ་གཉེར་ཁང་དུ་ད་ལྟའི་ཆར་ཁྱོན་བསྡོམས་སློབ་ཕྲུག་ ༡༡༢ ཡོད་ཅིང་། དེ་དག་ཁྲོད་བོད་མི་ ༥༢ དང་ཧི་མ་ལ་ཡའི་རི་རྒྱུད་ཀྱི་མི་རིགས་ ༣༨ ། ཕྱི་རྒྱལ་བ་ ༢༢ བཅས་རེད། བོད་རིགས་སློབ་ཕྲུག་ཁྲོད་བོད་ནས་ཡོང་བ་ ༤༠ དང་། བཙན་བྱོལ་ནང་སྐྱེས་བ་ ༡༢ ། ཧི་མ་ལ་ཡའི་རི་རྒྱུད་ལས་ལ་དྭགས་པ་ ༡༢ ། མོན་རྟ་དབང་ཁུལ་གྱི་སློབ་མ་ ༡༡ ། སྤི་ཏི་བ་ ༩ ། ཁུ་ནུའི་སློབ་མ་ ༣ ། རྟ་མང་དང་བལ་ཡུལ་སོགས་ཀྱི་སློབ་མ་ ༣ བཅས་འདུག ཕྱི་རྒྱལ་ཁག་གི་སློབ་ཕྲུག་དག་ནི་ཀོ་རི་ཡའི་སློབ་མ་ ༨ དང་། ཝེ་ཐི་ནམ་གྱི་སློབ་མ་ ༣ ། ཐའེ་ཝན་གྱི་སློབ་མ་ ༢ ། ཨ་རིའི་སློབ་མ་ ༢ ། སིང་གྷ་པོར་ ༡ ། སོག་པོ་ ༡ ། རྒྱ་གར་བ་ ༣ ། དབྱིན་ཡུལ་ ༡ ། སུད་སིའི་སློབ་མ་ ༡ བཅས་འདུག
སློབ་གཉེར་ཁང་གི་འགན་འཛིན་གཞོན་པ་དགེ་བཤེས་སྐལ་བཟང་དགྲ་འདུལ་ལགས་ཀྱིས་ངོ་སྤྲོད་གནང་བ་ལྟར་ན། སློབ་གཉེར་ཁང་འདིས་ལོ་གཉིས་རེའི་མཚམས་སུ་སློབ་མ་བསྡུ་བཞིན་ཡོད་པ་དང་། འཛིན་རིམ་བརྒྱད་པའི་གནས་ཚད་དང་སློབ་ཐོན་ཕྱག་འཁྱེར་ཡོད་རིགས་ལ་ཡིག་ཚད་གཏོང་དགོས་ཤིང་། འཛིན་རིམ་བཅུ་བ་ཡན་ཐོན་པ་ཚོ་ཐད་ཀར་འཛུལ་ཆོག་གི་ཡོད་འདུག བོད་ནས་ཕེབས་མཁན་ཚོར་ཕྱག་འཁྱེར་ཐོག་ངོས་འཛིན་བྱེད་དཀའ་བའི་དབང་གིས་རིག་གནས་ཀྱི་རྨང་གཞིའི་ཤེས་ཚད་འཚང་རྒྱུགས་བཏང་སྟེ་ལེན་གྱི་ཡོད་ཅིང་། ཕྱི་རྒྱལ་ཁག་དང་ཧི་མ་ལ་ཡའི་རི་རྒྱུད་ཀྱི་སློབ་མ་ཚོར་འཛིན་རིམ་བརྒྱད་པ་ཐོན་པའི་ཕྱག་འཁྱེར་ལས་གཞན། བོད་སྐད་བོད་ཡིག་གི་རྨང་གཞི་ཚད་ལྡན་དགོས་ཀྱི་ཡོད་འདུག ལོ་ཤས་གོང་ནས་བཟུང་ཕྱི་རྒྱལ་བ་དང་ཧི་མ་ལ་ཡའི་རི་རྒྱུད་ཀྱི་སློབ་མ་མང་དུ་ཕྱིན་སྟབས། ས་མིག་གཞིར་བཟུང་ཡིག་ཚད་ཀྱི་ལམ་ནས་བསྡུ་རུབ་བྱེད་ཀྱི་ཡོད་ཅིང་། ཕྱི་རྒྱལ་བ་དང་ཧི་མ་ལ་ཡའི་རི་རྒྱུད་ཀྱི་སློབ་མ་རྣམས་ལ་སློབ་ཡོན་རིན་མེད་ཡིན་ཡང་། སྡོད་གནས་དང་ཟ་མ་རང་ངོས་ནས་ཐབས་ཤེས་བྱ་དགོས་ཀྱི་ཡོད་འདུག
སློབ་གཉེར་ཁང་འདིར་སྔོན་མ་འཛིན་གྲྭ་ཕར་ཕྱིན་བར་ཡོད་ཅིང་། ཕྱིས་སུ་དབུ་མ་དང་སློབ་དཔོན། གསང་སྔགས་བཅས་སུ་སྤར་ཡོད་འདུག ད་ལྟའི་ཆར་ཁྱོན་སློབ་ཡུན་ལོ་ ༡༧ ཡིན་འདུག་ལ། དེ་ཡང་ཕར་ཕྱིན་རབ་འབྱམས་པ་ལོ་ ༧ དང་། དབུ་མ་རབ་འབྱམས་པ་ལོ་ ༣ ། རིས་མེད་སློབ་དཔོན་གྱི་སློབ་ཚན་ཁག་ལོ་ ༤ ། གསང་སྔགས་ཀྱི་སློབ་ཚན་ཁག་ལོ་ ༢ བཅས་ཁྱོན་ལོ་ ༡༦ བཅས་དང་། སྔོན་འགྲོའི་བསྡུས་གྲྭ་རྩིས་པ་ཡིན་ན་ཁྱོན་ལོ་ ༡༧ ལ་སློབ་གཉེར་བྱས་རྗེས་རིས་མེད་དགེ་བཤེས་ཀྱི་ཕྱག་འཁྱེར་འབུལ་གྱི་ཡོད་འདུག
ཡང་གསར་འགོད་པས་དགེ་བཤེས་ལགས་སུ། མ་འོངས་པར་རིག་སློབ་ཀྱི་ངོས་ནས་སློབ་མའི་སློབ་སྦྱོང་ཐད་ལས་གཞི་གསར་བ་སྤེལ་འཆར་ཡོད་མེད་དྲིས་པར་ཁོང་གིས། “ ང་ཚོའི་ངོས་ནས་ལས་གཞི་གསར་བ་སྤེལ་རྒྱུའི་འཆར་གཞི་མེད། གང་ཡིན་ཞེ་ན། ད་ལྟའི་རིག་ལམ་སློབ་གཉེར་ཁང་གི་བསླབ་གཞི་དེ་དག་དམིགས་བསལ་བ་ཞིག་དང་ལས་གཞི་གསར་བ་ཞིག་རེད། གདན་ས་ཁག་ལ་མཚོན་ན་ཆོས་རྒྱུད་ཁག་གི་སློབ་ཚན་ལ་ཞེ་དྲག་ལྟ་ཐུབ་ཀྱི་ཡོད་མ་རེད། འདི་གར་ས་དགེ་བཀའ་རྙིང་སྔགས་དང་བཅས་པ་ཡོད་སྟབས། འདི་ནས་སློབ་ཐོན་བྱུང་སྐབས། རིས་སུ་མ་ཆད་པའི་གྲུབ་མཐའ་ཁག་གི་གནས་ཚད་གང་འཚམ་ཡོད་སྟབས། འདི་ཧ་ཅང་གི་དམིགས་བསལ་བ་ཡིན་དྲན་ཡོད། ཕྱི་རྒྱལ་ཁག་ནས་ཡོང་བའི་སློབ་མ་ཚོར་མཚོན་ནའང་། འདི་གར་ནང་ཆོས་སློབ་གཉེར་གྱི་ཞོར་དུ་བོད་པའི་རིག་གནས་སྤྱི་ལ་རྒྱུས་མངའ་ཡོད་པ་ཞིག་ཆགས་འགྲོ་བ་རེད། ད་སྔ་བོད་པའི་ཆོས་དང་རིག་གཞུང་སྲུང་སྐྱོབ་ཐོག་ལག་རྗེས་ཆེན་པོ་ཡོད་མཁན་དང་། ཕྱི་རྒྱལ་དུ་སྙན་གྲགས་ཆེན་པོ་རྒྱས་ཡོད་པ་རེ་ཟུང་ཡོད” ཅེས་བརྗོད་བྱུང་།
གནས་ཚུལ་འདིའི་ཐད་གསར་འགོད་པས་རིག་ལམ་སློབ་གཉེར་ཁང་དུ་སློབ་སྦྱོང་བྱེད་ཀྱིན་པའི་ཕྱི་རྒྱལ་སློབ་མ་ཁག་ཅིག་ལ་ནང་ཆོས་སློབ་སྦྱོང་བྱེད་དགོས་པའི་དམིགས་ཡུལ་དང་མ་འོངས་པར་འཆར་གཞི་ག་རེ་ཡོད་མེད་དྲིས་པར། རྒྱ་གར་བྷང་བྷེ་ནས་ཡོང་བའི་སློབ་མ་བསླབ་གསུམ་ལགས་ཀྱིས། “ ང་རང་ ༢༠༠༤ ལོར་སྐུ་སྒེར་ཡིག་ཚང་གི་རོགས་རམ་འོག་ས་རཱ་མཐོ་སློབ་དུ་འཛུལ་ཏེ་ལོ་ ༤ རིང་བོད་སྐད་བོད་ཡིག་སྦྱངས་རྗེས་ ༢༠༠༧ ལོར་༸གོང་ས་མཆོག་གི་མདུན་ནས་དགེ་སློང་བསྒྲུབས་པ་ཡིན། ༢༠༠༩ ལོ་ནས་རིག་ལམ་སློབ་གཉེར་ཁང་དུ་ཞུགས་ཏེ། ད་ལྟ་ཕར་ཕྱིན་སྐབས་བཞི་པ་ཡིན། ངས་ནང་ཆོས་སྦྱོང་དོན་ང་ཚོ་བྷང་བྷེ་ས་ཆར་སྔོན་མ་ནང་ཆོས་ལ་དོ་སྣང་བྱེད་མཁན་ཉུང་ཉུང་རེད། ད་ལྟ་ནང་ཆོས་ལ་དོ་སྣང་ཡོང་གི་ཡོད་ཀྱང་། ཆོས་འཆད་མཁན་མེད་པའི་དཀའ་ངལ་ཡོད་སྟབས། ངས་འདིར་ནང་ཆོས་ཀྱི་སྐོར་ལ་སློབ་སྦྱོང་བྱས་རྗེས་ས་གནས་མི་མང་ལ་ཕན་ཞིག་ཐོགས་ན་བསམ་གྱི་ཡོད། མ་འོངས་པར་ངས་མུ་མཐུད་དུ་དབུ་མ་དང་མཛོད་བཅས་ལ་སློབ་སྦྱོང་བྱ་འཆར་ཡོད” ཅེས་བརྗོད་བྱུང་།
ཨ་རི་ནས་ཕེབས་པའི་ངག་དབང་བློ་གྲོས་ལགས་ཀྱིས། ང་རང་ ༢༠༠༥ ལོར་ངྷ་རམ་ས་ལར་ཡོང་བ་ཡིན། སྐབས་དེར་སྒེར་གྱི་དགེ་རྒན་བཙལ་ཏེ་བོད་སྐད་དང་བོད་ཡིག་སྦྱོང་ཞོར་བོད་ཀྱི་བདེ་རྩའི་ཡིག་ཚང་ནང་དང་བླངས་ལས་ཀ་བྱས་པ་ཡིན། ཕྱིས་སུ་ཨ་རིར་ཕྱིན་ཏེ་ལོ་གཅིག་རིང་དངུལ་བསགས་ཤིང་། དེའི་རྗེས་ཕྱིར་ལོག་ནས་ས་རཱ་མཐོ་སློབ་དུ་ལོ་ ༥ རིང་རིག་གནས་དང་རྒྱལ་རབས། ནང་དོན་རིག་པ། མཚན་ཉིད། བསྡུས་གྲྭ བློ་རིག་རྟགས་རིག ཕར་ཕྱིན་ལོ་དང་པོའི་བར་སློབ་སྦྱོང་བྱས་པ་ཡིན། ད་ལོའི་ཕྱི་ཟླ་ ༤ པར་རིག་ལམ་སློབ་གཉེར་ཁང་དུ་ཡོང་བ་ཡིན། ང་ལ་བོད་ཡིག་སྦྱོང་འདོད་ཀྱི་འདུན་པ་དེ་ང་ཐོག་མ་ཨ་རིའི་མཐོ་སློབ་ནང་འགྲོ་བཞིན་པའི་སྐབས་བོད་པའི་སློབ་གྲོགས་ཤིག་ཡོད། ཁོང་བརྒྱུད་དེ་ངས་བོད་ཀྱི་གནས་ཚུལ་དང་༸གོང་ས་མཆོག་གི་སྐོར་ཤེས་སོང་། དེ་ནས་ང་བོད་པའི་རིག་གནས་ལ་སློབ་སྦྱོང་བྱ་འདོད་སྐྱེས་སོང་། མ་འོངས་པར་ཐོངས་མཆན་གྱི་དཀའ་ངལ་མ་འཕྲད་ཚེ་ངས་རིག་སློབ་དུ་དབུ་མ་བར་སྦྱོང་གི་ཡིན། ངས་ནང་ཆོས་སྦྱངས་རྗེས་ཨ་རིའི་སྤྱི་ཚོགས་ནང་ཞབས་ཞུ་བསྒྲུབ་རྒྱུའི་དམིགས་ཡུལ་མེད། གཙོ་བོ་ང་རང་ཉིད་ཀྱི་སེམས་ཀྱི་དཀའ་ངལ་སེལ་ཆེད་དང་། སེམས་ཀྱི་ཉོན་མོངས་དུག་གསུམ་མེད་པ་བཟོ་ཆེད་ཡིན། ” ཞེས་བརྗོད་བྱུང་།
ཀོ་རི་ཡའི་ཨ་ནེ་ཆིའུ་ཙང་ལགས་ཀྱིས། ང་ ༢༠༠༠ ལོར་ངྷ་རམ་ས་ལར་ཡོང་སྟེ། བོད་ཀྱི་དཔེ་མཛོད་ཁང་དང་ལྷོ་ཕྱོགས་རྒྱུད་སྨད་གྲྭ་ཚང་བཅས་སུ་བོད་སྐད་དང་བོད་ཡིག་གི་འབྲི་ཀློག་སྦྱངས་རྗེས། ས་རཱ་མཐོ་སློབ་དུ་ལོ་གཉིས་དང་ཕྱེད་ཀའི་རིང་ཕར་ཕྱིན་དང་པོ་བར་སློབ་སྦྱོང་བྱས་པ་ཡིན། ༢༠༠༤ ལོར་ཀོ་རི་ཡར་ལོག་སྟེ་ཀོ་རི་ཡའི་ལུགས་སྲོལ་ལྟར་བཙུན་མ་བྱས་ཏེ་བཙུན་མའི་སློབ་སྦྱོང་ཆ་ཚང་ཐོན་ཡོད། ༢༠༡༡ ལོར་རིག་སློབ་དུ་འཛུལ་ཏེ་ད་ལྟ་ཕར་ཕྱིན་ལོ་རིམ་གཉིས་པ་ཡིན། ངས་བོད་སྐད་དང་བོད་ཡིག་སྦྱོང་དོན། ༸གོང་ས་མཆོག་གི་གསུང་ཆོས་ཆ་ཚང་ང་རང་གིས་ཁ་ཐུག་ཏུ་གོ་ཐུབ་པར་བྱ་རྒྱུ་དང་། ལམ་རིམ་ཆེན་མོ་ཆ་ཚང་ལྟ་ཐུབ་པ་བྱ་ཆེད་ཡིན། མ་འོངས་པར་ངས་དབུ་མ་བར་དུ་བལྟ་རྒྱུའི་འཆར་གཞི་ཡོད། སོ་སོར་རིག་པ་དང་སློབ་སྦྱོང་ཡག་པོ་མེད་ཀྱང་། མ་འོངས་པར་བོད་པའི་བཀའ་བསྟན་གཉིས་ཀ་ཀོ་རི་ཡའི་སྐད་ཡིག་ནང་ཕབ་སྒྱུར་བྱ་ཐུབ་མཁན་གྱི་མི་སྒེར་དང་ཚོགས་པ་གང་འདྲ་ཞིག་ཡོད་ཀྱང་། ངས་གང་ཐུབ་ཀྱིས་ཞབས་ཞུ་དང་ཆ་རྐྱེན་བསྐྲུན་རྒྱུ་ཡིན” ཞེས་བརྗོད་བྱུང་།
སུད་སི་ནས་ཕེབས་པའི་ཨ་ནེ་བསྟན་འཛིན་དབང་མོ་ལགས་ཀྱིས། ང་ ༢༠༠༣ ལོར་རྒྱ་གར་ནང་ཡོང་སྟེ། ཐོག་མར་བོད་ཀྱི་དཔེ་མཛོད་ཁང་དུ་ཟླ་དྲུག་རིང་བོད་ཡིག་སྦྱངས་པ་དང་མཉམ་དུ་ནང་ཆོས་འཛིན་གྲྭ་སོང་བ་ཡིན། ཕྱིས་སུ་མཚན་ཉིད་ལ་ལྟ་ཆེད་རྒྱ་གར་ལྷོ་ཕྱོགས་བྱང་ཆུབ་ཆོས་གླིང་དུ་བསྡད་ཡོད་ཀྱང་། དཀའ་ངལ་མང་པོ་འཕྲད་སྟབས་དགེ་རྒན་གྱི་ལམ་སྟོན་ལྟར་ངྷ་རམ་ས་ལར་ཡོང་སྟེ། སྐུ་སྒེར་ཡིག་ཚང་ལ་རེ་སྐུལ་ཐེངས་མང་པོ་ཞུས་རྗེས་ཚུལ་རྒྱུགས་གཏོང་རྒྱུའི་གོ་སྐབས་བྱུང་སོང་། ༢༠༠༧ ལོར་རིག་ལམ་སློབ་གཉེར་ཁང་དུ་འཛུལ་དེ་ད་ལྟའི་ཕར་ཕྱིན་སྐབས་བཞི་པ་ཡིན། མ་འོངས་པར་དབུ་མ་ཆ་ཚང་བར་ལྟ་རྒྱུའི་འདུན་པ་ཡོད། ང་ཆུང་ཆུང་སྐབས་ཉི་ཧོང་གི་ནང་ཆོས་ཕྲན་བུ་ལྟ་མྱོང་ཡོད། ཁོང་ཚོའི་ནང་ཆོས་ནང་མགོན་པོ་ཀླུ་སྒྲུབ་ལྟ་བ་ལོག་སྟེ་ནང་ཆོས་ལ་སློབ་གཉེར་བྱས་ཡོད་སྐོར་བྲིས་འདུག སྐབས་དེ་འདྲ་ཞིག་ནས་ནང་ཆོས་ལ་སློབ་གཉེར་བྱ་འདོད་ཆེན་པོ་སྐྱེས་སོང་། ངས་ནང་ཆོས་སྦྱོང་དོན་སོ་སོ་ཡག་པོ་ཆགས་རྒྱུའི་ཆེད་དུ་ཡིན། ད་ལྟའི་ཆར་དཀའ་ངལ་ཞིག་ཡོད་པ་ནི། སོ་སོ་བུད་མེད་ཅིག་ཡིན་པའི་ཆ་ནས་བོད་པའི་སྤྱི་ཚོགས་ནང་དང་། ལྷག་པར་དུ་གྲྭ་པའི་སྤྱི་ཚོགས་ནང་དུ་མཐོང་ཆུང་བྱེད་མཁན་རེ་ཟུང་ཡོང་གི་འདུག དེས་མཚམས་རེར་སེམས་པ་མ་སྐྱིད་པ་བཟོ་ཡི་འདུག ” ཅེས་བརྗོད་བྱུང་།
བཞུགས་སྒར་རིག་ལམ་སློབ་གཉེར་ཁང་ནི། ཕྱི་ལོ་ ༡༩༧༣ ལོར་སྐབས་དེར་བཙན་བྱོལ་ནང་བོད་ཡིག་དགེ་རྒན་མེད་པའི་དཀའ་ངལ་དང་། གཏན་འཇགས་སློབ་གྲྭའི་ནང་ཡོད་པའི་དགེ་འདུན་པ་རྣམས་ལ་ནང་ཆོས་སློབ་གཉེར་བྱ་སའི་བསྟི་གནས་ཞིག་དགོས་པའི་ཆེད་དུ་གསར་འཛུགས་གནང་བ་ཞིག་ཡིན་ཞིང་། ད་ལྟའི་བར་སློབ་གཉེར་ཁང་འདིས་བོད་ཕྱི་ནང་གཉིས་དང་ཧི་མ་ལ་ཡའི་རི་རྒྱུད། ཕྱི་རྒྱལ་ཡུལ་གྲུ་ཁག་བཅས་ཀྱི་སློབ་ཕྲུག་སྐྱ་སེར་མང་པོར་ནང་ཆོས་སློབ་སྦྱོང་གི་གོ་སྐབས་སྤྲད་དེ། དབྱིན་ཡིག་དང་རྒྱ་ཡིག ཀོ་རི་ཡ། མཱ་ལེ་ཤི་ཡཱ། ཝེ་ཐི་ནམ་བཅས་ཀྱི་གསུང་སྒྱུར་པ་དང་། དགོན་སྡེ་ཁག་གི་དབུ་འཛིན་དང་མཁན་པོ། དགེ་རྒན་ཆེན་མོ་སོགས་མི་སྣ་མང་པོ་ཞིག་གསོ་སྐྱོང་བྱས་ཡོད་འདུག
གསར་འགོད་པ། དོན་གོ
༼ གོང་གི་གནས་ཚུལ་འདི་བོད་ཀྱི་དུས་བབ་ཚགས་པར་ལས་འདིར་བཀོད།༽
བཞུགས་སྒར་རིགས་ལམ་སློབ་གཉེར་ཁང་འདི་ལྟ་བུ་ཞིག་ང་ཚོའི་བཙན་བྱོལ་སྤྱི་ཚོགས་ནང་འཛུགས་ཐུབ་པ་ནི་སྤོབས་པ་བྱ་འོས་པ་ཞིག་རེད། མ་ཟད་སློབ་ཚན་ཡང་ས་སྐྱ། བཀའ་བརྒྱུད་། རྙིང་མ། དགེ་ལུགས་བཅས་ཀྱི་གཞུང་ལུགས་ལ་ཐོས་བསམ་སྒོམ་གསུམགནང་རྒྱུ་ཡོད་པ་དང་། ལྷག་པར་དུ་རྗེ་ཙོང་ཁ་པའི་སྔགས་རིམ་ཆེ་མོར་ཐོས་བསམ་ཚད་དང་ལྡན་པ་གནང་རྒྱུའི་གོ་སྐབས་འདི་ལྟ་བུ་འདི་བོད་ཕྱི་ནང་གི་བོད་བརྒྱུད་ནང་བསྟན་སློབ་གཉེར་ཁང་གང་དུ་ཡང་མེད་པས་བསྔགས་པའི་འོས་དང་ཐལ་མོ་སྦྱར་བའི་འོས་སུ་གྱུར།།།
ཨ་རིའི་་ཨ་ནེས།
་་་་ ངས་ནང་ཆོས་སྦྱངས་རྗེས་ཨ་རིའི་སྤྱི་ཚོགས་ནང་ཞབས་ཞུ་བསྒྲུབ་རྒྱུའི་དམིགས་ཡུལ་མེད། གཙོ་བོ་ང་རང་ཉིད་ཀྱི་སེམས་ཀྱི་དཀའ་ངལ་སེལ་ཆེད་དང་། སེམས་ཀྱི་ཉོན་མོངས་དུག་གསུམ་མེད་པ་བཟོ་ཆེད་ཡིན། ་་་་་
ཞེས་དང་
སུད་སི་ཨ་ནེས།
་་་་ ད་ལྟའི་ཆར་དཀའ་ངལ་ཞིག་ཡོད་པ་ནི། སོ་སོ་བུད་མེད་ཅིག་ཡིན་པའི་ཆ་ནས་བོད་པའི་སྤྱི་ཚོགས་ནང་དང་། ལྷག་པར་དུ་གྲྭ་པའི་སྤྱི་ཚོགས་ནང་དུ་མཐོང་ཆུང་བྱེད་མཁན་རེ་ཟུང་ཡོང་གི་འདུག དེས་མཚམས་རེར་སེམས་པ་མ་སྐྱིད་པ་བཟོ་ཡི་འདུག ་་་
བཚན་བྱོལ་བོད་ཕྲུག་༡༢ལས་མེད་པ་འདིས་གང་མཚོན་ཐུབ་བམ། !!!?????