བོད་མི་གཉིས་འཛིན་བཟུང་།

རྒྱ་ནག་གཞུང་གིས་ཁམས་དཀར་མཛེས་དགའ་ལྡན་ཆོས་གླིང་དགོན་གྱི་བཙུན་མ་ཞིག་དང་། གསེར་རྟ་རྫོང་གི་བོད་མི་གཅིག་བཅས་བོད་མི་གཉིས་འཛིན་བཟུང་བྱས་འདུག

ཨེ་ཤེ་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༥ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༨།༣༠ ཡས་མས་སུ་དཀར་མཛེས་བོད་རིཊ་རང་སྐྱོང་ཁུལ་དཀར་མཛེས་རྫོང་ཀ་བྲག་ཤང་གི་ཕ་ཚེ་དབང་འགྱུར་མེད་དང་མ་ཚེ་རིང་དཔལ་མོ་གཉིས་ཀྱི་བུ་མོ། དཀར་མཛེས་དགའ་ལྡན་ཆོས་གླིང་དགོན་པའི་རང་ལོ་ ༣༩ ཡིན་པའི་བཙུན་མ་མ་བཤད་སྒྲུབ་ལྷ་མོ་ལགས་ཀྱིས། རྫོང་གི་ཁྲོམ་གཞུང་དུ་“ ༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག བོད་ལ་རང་དབང་དགོས། ༸རྒྱལ་བ་བསྟན་འཛིན་རྒྱ་མཚོ་བོད་ལ་གདན་འདྲེན་ཞུ་དགོས། ” ཞེས་སྐད་འབོད་ཁྲོམ་སྐོར་དང་ཡིག་ཆ་འགྲེམས་སྤེལ་བྱས་སྐབས། ཉེན་རྟོག་པས་འཛིན་བཟུང་བཙན་འཁྲིད་བྱས་ཏེ་དཀར་མཛེས་རྫོང་གི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་མ་ཟད། སྐབས་དེར་ཁོང་གི་ཡིག་ཆ་པར་བརྒྱབས་པའི་ཉེས་འཛུགས་འོག་ཕྱི་གླིང་བ་ཞིག་ཀྱང་ཉིན་དེར་འཛིན་བཟུང་བཙོན་འཇུག་བྱས་ཡོད་འདུག

དེ་བཞིན། ཟླ་འདིའི་ཕྱི་ཚེས་ ༡༢ ཉིན་གྱི་བོད་ནང་གི་ཆུ་ཚོད་ ༣།༠༠ ཡས་མས་སུ། དཀར་མཛེས་བོད་རིགས་རང་སྐྱོང་ཁུལ་གསེར་རྟ་རྫོང་ཡར་ལུང་ཡུལ་ཚོ། ཆོས་སྐོར་སྨད་མ་སྡེ་བའི་རང་ལོ་ ༣༤ ཡིན་པའི་ཚེ་སྐྱབས་ལགས་སུ། ཉེན་རྟོག་པས་འདི་ལོའི་ལོ་སར་བཀག་འགོག་བྱེད་མཁན་དང་གསང་བ་ཕྱིར་བསྒྲགས་མཁན། ནམ་རྒྱུན་བོད་དོན་དང་འབྲེལ་བའི་ལས་འགུལ་སྤེལ་བའི་ཉེས་མིང་འོག  ས་གནས་ཀྱི་གནུབས་ཟུར་ཡུལ་ཚོའི་ནང་འཛིན་བཟུང་གིས་གསེར་རྟ་རྫོང་གི་བཀག་ཉར་ཁང་དུ་བཀག་ཉར་བྱས་ཡོད་འདུག

ཚེ་སྐྱབས་ལགས་ནི། ཕ་ཚེ་འདས་གུ་རུ་དང་མ་ཐུགས་སྐྱིད་གཉིས་ཀྱི་བུ་ཡིན་པ་དང་། ནམ་རྒྱུན་འཚེམ་བཟོ་དང་ཟ་ཁང་གི་ལས་ཀ་གཉེར་མཁན་ཞིག་ཡིན་འདུག་ལ།  ཁོང་དང་བཟའ་ཟླ་གཡང་རྡོ་གཉིས་ལ་རང་ལོ་ ༡༦  ཡིན་པའི་བུ་མོ་བདེ་སྐྱིད་མཚོ་དང་། རང་ལོ་ ༡༧ ཡིན་པའི་བུ་བསོད་ནམས་བཅས་བྱིས་པ་གཉིས་ཡོད་འདུག