རྒྱ་ནག་ལ་དཔལ་འབྱོར་ཉམ་ཉེས་ཚབ་ཆེན་འབྱུང་བ།

ཝེ་ཅིན་ཧྲིན་གྱིས་བརྩམས།  ཚེ་རིང་རྡོ་རྗེས་བསྒྱུར།

རྒྱ་ནག་ནང་ཁུལ་གྱི་དཔལ་འབྱོར་རིག་པ་སྨྲ་བས་བཏོན་པའི་རྩིས་གྲངས་ལ་བལྟས་ན། རྒྱ་ནག་གི་བཟོ་ལས་མ་རྩ་འཇོག་པའི་ཁོར་ཡུག་བསྟུད་མར་ཇེ་སྡུག་ཏུ་སོང་སྟེ་བཟོ་ལས་ཐོན་སྐྱེད་ནུས་པ་ལྷག་མ་བྱུང་ནས་ཉམ་ཉེས་སྣ་ཚོགས་བསླངས་འདུག གནས་ཚུལ་ཡོང་ཁུངས་དེས་བཟོ་ལས་སྡེ་ཚན་སོ་སོའི་ཐོན་སྐྱེད་ལ་ལྷག་མ་བྱུང་བའི་གནས་སྟངས་དཔེ་ཡི་སྒོ་ནས་བསྟན་འདུག་སྟེ། རྣོ་ལྕགས་ཐོན་སྐྱེད་ནུས་ཤུགས་བརྒྱ་ཆའི་ ༢༡ ལྷག་པ། རླངས་འཁོར་ཐོན་སྐྱེད་ནུས་ཤུགས་བརྒྱ་ཆའི་ ༡༢ ལྷག་པ། ཨར་འདམ་ཐོན་སྐྱེད་ནུས་ཤུགས་བརྒྱ་ཆའི་ ༢༨ ལྷག་པ། གློག་འབྱེད་ཧ་ཡང་ཐོན་སྐྱེད་ནུས་ཤུགས་བརྒྱ་ཆའི་ ༣༥ ལྷག་པ། བཙའ་ཐུབ་ཞུན་ལྕགས་ཐོན་སྐྱེད་ནུས་ཤུགས་བརྒྱ་ཆའི་ ༦༠ ལྷག་པ། ཞིང་སྨན་ཐོན་སྐྱེད་ནུས་ཤུགས་བརྒྱ་ཆའི་ ༦༠ ལྷག་པ། འོད་བསྟེན་གློག་རྫས་ཐོན་སྐྱེད་ནུས་ཤུགས་བརྒྱ་ཆའི་ ༩༥ ལྷག་པ། ཤེལ་སྒོ་ཐོན་སྐྱེད་ནུས་ཤུགས་བརྒྱ་ཆའི ༩༣ ལྷག་པ་བཅས་སོ།། ཐོན་སྐྱེད་ནུས་ཤུགས་ལྷག་མ་འདི་འདྲ་མང་པོ་བྱུང་བའི་བཟོ་ལས་དེ་ཡིས་རྒྱ་ནག་གི་དཔལ་འབྱོར་ལ་དུས་ཡུན་རིང་བའི་ཉམ་རྒུད་ཞིག་སློང་རྒྱུ་ནི་ལྡོག་ཏུ་མེད་པ་ཡིན།

གནས་བབ་འདི་ནི་དུས་རབས་སྔོན་མའི་ལོ་རབས་སུམ་ཅུ་བའི་ནང་དུ་བྱུང་བའི་ཨ་རིའི་དཔལ་འབྱོར་ཉམ་རྒུད་ཆེན་མོ་དང་ཧ་ཅང་འདྲ། དཔལ་འབྱོར་རིག་པའི་ཆེད་མཁས་པས་ཀྱང་འདི་ལྟར་བཤད་དེ། ཐོན་སྐྱེད་ནུས་ཤུགས་ལྷག་མ་བྱུང་བའི་གནས་སྟངས་འདི་དང་།  རྒྱལ་ནང་གི་ས་ཆ་སོ་སོ་ན་དགུང་ལ་ཟུག་པའི་ཐོག་ཁང་གཅིག་ལ་གཅིག་འགྲན་གྱིས་བསྐྲུན་པའི་གནས་སྟངས་འདི་ཚང་མ་ནི། གནས་བབ་ཉེན་ཚབ་ཆེ་ཆུང་གི་ཁྱད་པར་ཙམ་མ་གཏོགས། སྔར་བྱུང་གི་དཔལ་འབྱོར་ཉམ་རྒུད་རྣམས་དང་ཧ་ཅང་མཚུངས། རྒྱ་ནག་ནང་གི་ད་ཡོད་ཀྱི་དགུང་ལ་ཟུག་པའི་ཐོག་ཁང་གི་གྲངས་ཀ་གཅིག་པུའི་ངོས་ནས་ཀྱང་ཨ་རིར་ཡོད་པའི་དགུང་ཟུག་ཐོག་ཁང་གི་སྤྱིའི་གྲངས་འབོར་ལས་བརྒལ་འདུག ཡིན་ནའང་རྒྱ་ནག་གི་སྤྱིའི་ཡོང་འབབ་དང་མི་རེའི་ཆ་སྙོམས་ཡོང་འབབ་གཉིས་ནི་ཨ་མེ་རི་ཁ་དང་བར་ཁྱད་ཤིན་ཏུ་རིང་། གནས་སྟངས་འདིས་རྒྱ་ནག་གི་དཔལ་འབྱོར་ཚ་དྲོད་ཆེ་དྲགས་པ་གསལ་བཤད་བྱས་པ་ཙམ་དུ་མ་ཟད། ཡ་མ་གཟུགས་དང་སྨྱོ་རྟགས་ཆེ་བ་བསྟན།

 འདི་ལྟར་བཤད་དོན་གང་ཡིན་ཞེ་ན། རྒྱ་ནག་གི་དཔལ་འབྱོར་ནི་ཚོང་རའི་དཔལ་འབྱོར་མིན་པར་ར་མ་ལུག་གི་ཚོང་རའི་དཔལ་འབྱོར་ཞིག་ཡིན་པ་འདི་རྒྱུ་མཚན་ཐོག་མ་དེ་ཡིན། དེའི་ཕྱིར་རྒྱ་ནག་གི་དཔལ་འབྱོར་ནི་ཚོང་རས་རང་དབང་གིས་འདུམ་སྒྲིག་བྱེད་པ་ཞིག་མིན་པ་དང་། ཚོང་ར་དང་སྲིད་གཞུང་གཉིས་ཀྱིས་རང་རང་སོ་སོའི་ཕྱོགས་སུ་འཐེན་འཁྱེར་བྱེད་པ་མ་ཟད། ཕན་ཚུན་ལ་འགོག་རྐྱེན་དང་གེགས་བྱེད་པའི་རྐྱེན་གྱིས་དཔལ་འབྱོར་ལ་རྙོག་འཛིང་བྱུང་། དེ་གཉིས་ཀྱིས་སོ་སོར་དམིགས་ཡུལ་མི་འདྲ་བ་རེ་བཟུང་ཡོད་པས་འདུམ་སྒྲིག་མང་དུ་བྱས་ན་རྙོག་འཛིང་ཆེ་རུ་འགྲོ་བ་དང་། མ་གཞི་ཚོང་ར་རང་ངོས་ནས་འདུམ་སྒྲིག་ལེགས་པོ་བྱ་མ་ཐུབ་པའི་ཚོང་རའི་འགྲོ་ལུགས་ལ་འདུམ་སྒྲིག་བྱས་པས་རྙོག་འཛིང་དེ་ལས་ཆེ་རུ་བཏང་། ར་མ་ལུག་གི་ཚོང་རའི་དཔལ་འབྱོར་དང་འཆར་གཞི་ཅན་གྱི་དཔལ་འབྱོར་ཟེར་བ་འདི་གཉིས་ཀྱི་རྙོག་འཛིང་གི་འབྱུང་རྩ་ནི་དེ་ཡིན། འཆར་གཞི་ཅན་གྱི་དཔལ་འབྱོར་ཟེར་བ་དེའང་ངོ་བོའི་སྟེང་ནས་ར་མ་ལུག་གི་ཚོང་རའི་དཔལ་འབྱོར་ལམ་ལུགས་ཞིག་ཡིན་ཞིང་དེ་ཚོང་ར་དང་དངུལ་སྒོར་ལས་ནམ་ཡང་ཁ་བྲལ་མྱོང་མེད།  འཆར་གཞི་ཅན་གྱི་དཔལ་འབྱོར་ལམ་ལུགས་ཀྱིས་འགྲོ་བ་མིས་གནའ་སྔ་མོ་ཞིག་ནས་སྡོམ་ཚིག་བཀོད་པའི་ཚོང་རའི་ཆོས་ཉིད་ལ་ཆ་འཇོག་མི་བྱེད་པའི་ཁྱད་པར་ཙམ་མ་གཏོགས། དེ་དང་ད་ལྟའི་རྒྱ་ནག་གི་ར་མ་ལུག་གི་ཚོང་རའི་དཔལ་འབྱོར་གཉིས་ཀྱི་བར་ན་འདོམ་གང་དང་འདོམ་ཕྱེད་ཀྱི་ཁྱད་པར་ཙམ་ལས་ངོ་བོའི་ཆ་ནས་ཁྱད་པར་མེད།

དཔེ་མཚོན་ཞིག་བརྗོད་ན། ད་ལྟའི་ཁང་ས་ལས་རིགས་དང་བཟོ་སྐྲུན་ལས་རིགས་ཚ་དྲོད་ཆེ་དྲགས་པ་འདི་ན་ནིང་ད་ལོའི་བར་དུ་བྱུང་བའི་གནད་དོན་ཞིག་རྩ་བ་ནས་མིན། ལོ་མང་པོར་འ་འུར་ཟང་ཟིང་བྱས་ཀྱང་མཚམས་མི་ཆད་པའི་རྒྱུ་མཚན་ཅི་ཡིན་ནམ། རྒྱལ་ནང་གི་ཆེད་མཁས་པ་དང་མང་ཚོགས་ཀྱིས་ཀྱང་དེའི་རྒྱུ་རྐྱེན་ལ་སྡོམ་ཚིག་བཀོད་འདུག་སྟེ་སྲིད་ཇུས་ལམ་སྟོན་ལ་ཐུག་འདུག་ཟེར་བ་འདི་ཡིན། དཔོན་གནས་འཕར་མིན་གྱི་ཚད་གཞི་ནི་(DGP)༼འགྱུར་མཆན། རྒྱལ་ནང་ཐོན་བསྐྱེད་སྤྱི་འབོར།༽འཕར་མིན་ལ་བལྟ་དགོས་པ་དང་། ས་གནས་སྲིད་གཞུང་གིས་འགྲོ་གྲོན་ཞིག་གཏོང་ནའང་ཁང་ས་ལས་རིགས་ཀྱི་དཔྱ་ཁྲལ་ལ་བལྟ་དགོས། ལྐོག་ཟ་རུལ་སུངས་བྱེད་ནའང་ཁང་ས་ལས་རིགས་དེ་བཟའ་བྱ་ཆེན་པོར་བྱེད་པ་ཡིན། ཁེ་བཟང་ཡོད་ཚད་ཁང་ས་ལས་རིགས་ཀྱི་སྟེང་དུ་འདུས་ཡོད་པས་རླབས་རྒྱུན་འདི་སུ་ཞིག་གིས་འགོག་ཐུབ་བམ།

མི་ལ་ལས་དབུས་གཞུང་གིས་བཀའ་རྒྱ་སྒྲོག་པ་དེས་མི་ཕན་ནམ་ཟེར། འོན་ཀྱང་གནད་དོན་གང་ཡིན་ཞེ་ན། དབུས་གཞུང་གི་བཀའ་རྒྱ་དེ་ས་གནས་མགོ་ཁྲིད་ཀྱི་ཁེ་ཕན་དང་མ་བསྟུན་ཚེ། བཀའ་རྒྱ་དེ་ཀྲུང་ནན་ཧེའི་ཕྱི་རོལ་དུ་ཐོན་དཀའ། འདི་ནི་སྤྱིར་བཏང་གི་ཤེས་བྱ་ཞིག་ཏུ་གྱུར་ཟིན་འདུག བཀའ་རྒྱ་ཟེར་བ་དེ་མང་ཚོགས་ལ་སྟོན་པའི་བཟོ་ལྟ་ཙམ་ཡིན་པ་དང་། དབུས་གཞུང་གིས་མ་གཞི་ནས་རང་གི་རྒྱུ་ནོར་གྱི་ལམ་ཁ་གཅོད་འདོད་མེད། དབུས་གཞུང་གི་མགོ་ཁྲིད་ཆེ་དྲག་ཚོའི་ནང་ན་རྒྱུ་ནོར་ཧམ་ཟ་མི་བྱེད་མཁན་རེ་འགའ་ཙམ་ཡང་ག་ལ་ཡོད། སྦྱིན་བདག་གིས་ཁ་ནས་བཀོད་པ་རེ་བཏང་ན་གཡོག་པོ་ཚོ་ཨ་ཐང་ཆད་ཆད་དུ་རྒྱུག་ཟེར་བ་འདི་ག་རང་ཡིན། སྦྱིན་བདག་གི་དངུལ་སྒོར་ནི་གཡོག་པོ་ཚོས་བསྡུས་ནས་བྱུང་བ་དང་། གཡོག་པོ་ཚོའི་རྒྱུ་ནོར་གྱི་ལམ་ཁ་བཅད་ན་སྦྱིན་བདག་རང་ཉིད་ཀྱི་རྒྱུ་ནོར་གྱི་ལམ་ཁ་བཅད་པ་མིན་ན་ཅི། དེའི་ཕྱིར། ས་གནས་ཀྱི་མགོ་ཁྲིད་གཅིག་པུ་ཐ་ཤལ་ཡིན་པ་དང་དབུས་གཞུང་ཡག་པོ་འདུག་བསམ་མི་རུང་། དེ་འདྲ་འདོད་ན་རང་མགོ་རང་གིས་གཡོག་པའི་བཤད་ཚུལ་ཙམ་ཡིན།

 ཡང་གྲོགས་པོ་ལ་ལས། དབུས་གཞུང་གིས་ནུབ་ཕྱོགས་རྒྱལ་ཁབ་དང་འདྲ་བའི་དངུལ་སྒོར་ལས་དོན་སྙོམ་སྒྲིག་བྱེད་ཐབས་ལག་ལེན་བྱེད་པ་མིན་ནམ། ཅིའི་ཕྱིར་བྱེད་ཐབས་དེ་རྒྱ་ནག་གི་ས་ཆུ་དང་མ་འཕྲོད་པ་ཡིན་ནམ་ཟེར། འདི་ནི་སྐུ་ཞབས་ཧུའུ་ཡའོ་པང་གིས་ལོ་ངོ་སུམ་ཅུའི་ཡར་སྔོན་དུ་བཏོན་པའི་དྲི་བའང་ཡིན། ཁོ་ཚོས་གནས་ལུགས་སླ་མོ་ཞིག་ཧ་གོ་མི་འདུག སྲིད་ཇུས་སྲིད་ཇུས་ཟེར་བ་དེ་ཆབ་སྲིད་དང་འབྲེལ་བའི་ཇུས་འགོད་ཡིན་པ་བཤད་མ་དགོས་པ་དང་ལྷག་པར་དུ་ཆབ་སྲིད་ལམ་ལུགས་དང་འབྲེལ་བ་ཡོད། ནུབ་ཕྱོགས་དམངས་གཙོའི་ཆབ་སྲིད་ཀྱི་སྟངས་འཛིན་འོག་ཏུ། ཆབ་སྲིད་ཀྱིས་བཏོན་པའི་སྲིད་ཇུས་དེ་ནི་ཚོང་རའི་ཆོས་ཉིད་ལ་བསྟུན་པ་ཤ་སྟག་ཡིན། དེ་ལས་ལྡོག་ན། མང་ཚོགས་ཀྱིས་ཁས་མི་ལེན་པ་དང་ལོ་བཞི་རེའི་ནང་དུ་ཁྲིམས་དང་མཐུན་པའི་གྱེན་ལོག་ཐེངས་རེ་བྱེད་པ་ཡིན། ཆབ་སྲིད་པ་ཚོས་རང་གི་ཁེ་ཕན་དང་རྒྱལ་འབངས་ཀྱི་ཁེ་ཕན་གྱི་ཆེད་དུ་བསམ་བློ་བཏང་སྟེ་ངེས་པར་དུ་ཚོང་རའི་ཆོས་ཉིད་བརྩི་དགོས།

 སྒེར་འཛིན་ཆབ་སྲིད་ནི་ནུབ་ཕྱོགས་དམངས་གཙོའི་ཆབ་སྲིད་དང་མི་འདྲ། གོང་ནས་དཔེར་དྲངས་པ་བཞིན་དུ་དཔོན་པོ་ཚོའི་སྒེར་ཕན་ནི་རྒྱལ་ཁབ་དང་མི་མང་གི་ཁེ་ཕན་ལས་ཁ་གྱེས་ཡོད་པ་དང་ཐ་ན་ལྡོག་ཟླ་ཡིན། དཔོན་ཆེན་ཚོས་དཔོན་ཆུང་དག་གི་ལྐོག་ཟ་རུལ་སུངས་ཀྱི་གོ་སྐབས་གཅོད་མི་སྲིད་པ་དང་། དཔོན་རུལ་རྒྱུ་གཟན་གྱི་ཁེ་ཕན་དང་མཐུན་ན། གོ་སྐབས་དེ་རྒྱལ་ཁབ་དང་མི་མང་གི་ཁེ་ཕན་ལ་འགལ་མིན་ཁ་ཡ་མི་བྱེད་པ་ཡིན། གོང་རིམ་ལ་ཇུས་ཡོད་ན་འོག་རིམ་ལ་ཇུས་ལན་ཡོད་ཟེར་བ་དེ་ག་རང་ཡིན། རྦ་རླབས་དྲག་ཏུ་འཕྱུར་བའི་ཆུ་ལོག་ལ་འགོག་ཐབས་མེད་པ་ཇི་བཞིན་དུ། རྒྱ་ནག་གི་དཔལ་འབྱོར་ནི་རྒྱལ་འབངས་ཀྱི་ཁེ་ཕན་ལ་དམིགས་པ་ཞིག་མིན་པ་དང་། གྲངས་ཀ་ཉུང་བའི་དཔོན་པོ་རྒྱུ་གཟན་དང་ཚོང་པ་རུལ་པ་དག་གི་ཁེ་ཕན་གྱི་ཆེད་དུ་འཁོར་བསྐྱོད་བྱེད་པའི་དཔལ་འབྱོར་གྱི་གནས་སྟངས་ཡ་མ་གཟུགས་ཞིག་ཡིན།

སྲིད་བྲན་ཏུ་གྱུར་བའི་མཁས་པ་དང་ངོ་དགའ་སྤྲེལ་ལད་ལ་དགའ་བའི་སྨྱུག་ཐོགས་པ་འགའ་ཤས་ཀྱིས་ད་དུང་འབད་པ་ཆེན་པོས་སྒྲུབ་བྱེད་བཀོད་དེ། རྒྱ་ནག་གི་དཔལ་འབྱོར་འགྲོ་ལུགས་ཟེར་བ་འདི་ལ་བཟོ་བཅོས་གང་འཚམ་རེ་བྱས་ན། རྒྱུན་མཐུད་ནས་འཁོར་བསྐྱོད་བྱས་ཏེ་འགྲོ་ཐུབ་པ་ཡིན་ཟེར། རེ་བ་བཟང་སར་རྒྱག་པའི་འབྱོར་འབྲིང་ཤེས་ལྡན་པ་མི་ཉུང་བ་ཞིག་གིས་མིག་ཅེར་ནས་སྒུག་འདུག་པ་དང་ལུང་བསྟན་འདི་མངོན་སུམ་དུ་འགྱུར་བར་རེ་བ་བཅངས་འདུག ཡིད་ཕངས་པ་ཞིག་ལ། ཁོ་ཚོ་ལས་ཀྱང་རིག་པ་རྣོ་བའི་རྒྱ་ནག་གི་མཐོ་རིམ་མི་སྣས་འཛམ་གླིང་འཇིག་པའི་ཉིན་མོ་མཐོང་ཟིན་པ་དང་། ཆག་གྲུམ་ཤོར་བའི་གྲུ་གཟིངས་སྟེང་གི་ཙི་ཙི་རྣམས་ཟིང་ཟིང་གིས་འབྲོས་པ་ཇི་བཞིན་དུ། མི་ཚེ་ལ་མཁོ་བའི་ནོར་བུ་གསུམ་སྟེ་ཆུང་མ་དང་བུ་ཕྲུག་དང་དངུལ་ཁུག་བཅས་པ་བདེ་འཇགས་ཀྱི་ས་ཁུལ་དུ་སྤོས་ཚར་འདུག འདིས་གང་ཞིག་གསལ་བཤད་བྱས་འདུག་ཅེ་ན། མཐོ་རིམ་མི་སྣ་ཚོས་རྒྱ་ནག་གི་ཆབ་སྲིད་འདི་ནི་རེ་བ་མེད་པའི་ཆབ་སྲིད་ཅིག་ཡིན་པ་གསལ་ཐིང་ངེར་ཤེས་པ་དེ་དང་། རྒྱ་ནག་གི་ཆབ་སྲིད་ལ་ཐེབས་པའི་ནད་ཀྱི་རྩ་བ་ནི་སྲིད་དོན་ཐག་གཅོད་ཀྱི་དབང་ཚད་ལྡན་པའི་གོང་རིམ་གྱི་ཁེ་ཕན་ནི་རྒྱལ་ཁབ་དང་འབངས་ཀྱི་ཐུན་མོང་གི་ཁེ་ཕན་དང་ཁ་ཁར་སོང་བ་འདི་ཡིན། སྐབས་རེར་ང་ཚོས་རིག་གཅིག་རྐང་འཛིན་པ་དང་མཁས་པ་རྣམས་ཀྱིས་མ་འཇོན་སྙམ་ནས་སྡུག་དམོད་བྱ་སྲིད། དེ་འདྲ་བྱས་ན་དྲང་བཞག་ཅིག་མིན། རིགས་གཅིག་རྐང་འཛིན་པ་དང་མཁས་པ་ཕལ་ཆེར་གྱིས་བཏོན་པའི་གྲོས་གཞི་ཁ་ཅིག་ནི་སྒྲུབ་ཏུ་རུང་ལ་ཕན་འབྲས་ལྡན་པ་ཡིན། དོན་དངོས་ཀྱི་སྟེང་ནས་ཕན་འབྲས་མ་བྱུང་བ་ནི་ཁོ་ཚོ་ལན་སོང་བ་མིན་པ་དང་། ས་ཆ་གཞན་དང་རྒྱལ་ཁབ་གཞན་དུ་ལག་ལེན་བྱས་ན་ཕན་འབྲས་ཐོན་པའི་བྱེད་ཐབས་དང་སྲིད་ཇུས་དེ་རྣམས་རྒྱ་ནག་གི་ཆབ་སྲིད་ཀྱི་ཁོར་ཡུག་འོག་ནས་བྲོ་བ་གཞན་ཞིག་ཏུ་གྱུར་སོང་བས་ཡིན། ཧུའུ་ཡའོ་པང་གིས་ལོ་རབས་བརྒྱད་ཅུ་བའི་ནང་དུ་བྲོ་བ་དེ་ཚོར་སོང་བ་དང་། དེ་བཞིན་དུ་གཟུར་གནས་ཀྱི་རིགས་གཅིག་རྐང་འཛིན་པ་དང་མཁས་པ་ཚོས་ཀྱང་དུས་ད་ལྟར་བྲོ་བ་དེ་ཚོར་བ་དང་། བློ་ཁོག་ཆེ་བ་དག་གིས་སྐད་གསེང་མཐོན་པོས་སྒེར་འཛིན་ཆབ་སྲིད་ལམ་ལུགས་བཅོས་བསྒྱུར་མ་བྱས་ན་བཅོས་བསྒྱུར་གཞན་གང་གིས་ཀྱང་ཕན་ཐོགས་མེད་ཅེས་འབོད་སྒྲ་སྔར་ནས་སྒྲོག་གིན་འདུག

 འོན་ཀྱང་སྒེར་འཛིན་ཆབ་སྲིད་ཀྱི་ཁྱད་ཆོས་ནི་བདེན་པ་སྨྲ་བའི་མི་ལ་ཁ་བཙུམ་དུ་འཇུག་པ་དང་བཅོས་བསྒྱུར་ཕྲན་བུ་ཁོ་ན་ལས་གསར་བརྗེ་རང་བཞིན་གྱི་འགྱུར་བ་འགྲོར་མི་འཇུག་པ་འདི་ཡིན། དེ་ལྟར་རྒྱུན་འཁྱོངས་ནས་ལོ་ངོ་སུམ་ཅུ་ལྷག་སོང་ཟིན་པ་དང་། ཁོ་ཚོའི་བསམ་པར་རྒྱུན་སྲིང་ནས་འགྲོ་བ་ལ་གནད་དོན་མེད་པ་ཉམས་མྱོང་གིས་ར་འཕྲོད་ཡོད་སྙམ་འདུག ཁོ་ཚོའི་ལུང་རིགས་ཀྱི་སྒྲུབ་བྱེད་ནི་ཤེས་ཡོན་པ་ཚོས་དུས་རྒྱུན་དུ་རྒྱ་ནག་གི་མིའི་སྤུས་ཚད་ཞན་པར་བརྗོད་པ་དེ་ཡིན། ཡིན་ནའང་གནའ་དེང་གི་ཆར་རྒྱལ་ཁབ་ཕྱི་ནང་གི་སྤུས་ཚད་དེ་ལས་ཞན་པའི་མང་ཚོགས་ཀྱིས་སྔར་བཞིན་གྱེན་ལོག་བྱེད་སྲིད་པ་སྔར་བྱུང་ཉམས་མྱོང་ལས་དུས་མཚུངས་སུ་ར་སྤྲོད་བྱས་ཡོད་པ་ཁོ་ཚོས་བརྗེད་འདུག མུ་མཐུད་རྒྱུན་འཁྱོངས་བྱས་ནས་འགྲོ་བའི་མཇུག་འབྲས་ནི་དཔལ་འབྱོར་དང་སྤྱི་ཚོགས་ཀྱི་འགལ་ཟླ་ཀུན་ནས་རྡོལ་བ་དང་། དེ་ནི་གནམ་འོག་གི་ཟིང་ཆ་ཆེན་པོ་ཡིན་པས་གསར་བརྗེ་མ་བྱས་ཀྱང་གསར་བརྗེ་ཆགས་པ་ཡིན།

ཞི་བའི་གསར་བརྗེ་བྱས་ནས་མི་ཉུང་ཤས་ཞིག་བློས་གཏོང་བ་དེ་བཟང་ངམ། ཡང་ན་གནམ་འོག་འཁྲུགས་ནས་སུ་གང་ཡང་གཡོལ་ཐབས་མེད་པ་དེ་བཟང་ངམ། རྒྱ་ནག་པ་ཀུན་གྱིས་གནད་དོན་འདི་ལ་ཁེ་གྱོང་གི་ཚད་བསྡུར་བྱེད་ཀྱིན་འདུག དེ་ལས་ཀྱང་ཆེ་བའི་་གནད་དོན་ནི་ཉེན་ཁ་འདི་བརྒྱུད་འདོད་པའི་མི་ཡོད་མེད་དང་ཉེན་ཁ་འདི་བརྒྱུད་པའི་ནུས་པ་ཡོད་མེད་དེ་ཡིན། ཡོད་མེད་དང་ནུས་མི་ནུས་བཤད་མི་དགོས་པ་དང་། གང་ལྟར་རྒྱ་ནག་གི་འགྲོ་ལུགས་ཟེར་བ་འདི་སྡུག་ཨ་ཐང་ཆད་ནས་མཐའ་རུ་སླེབས་ཟིན་འདུག

མ་རྩོམ་གྱི་ཡོང་ཁུངས་་ནི་ཨེ་ཤ་ཡ་རང་དབང་རླུང་འཕྲིན་ཁང་རྒྱ་སྐད་སྡེ་ཚན།