དེ་རིང་ཞོགས་པར་འདི་གའི་གསར་འགོད་པས་ཁ་པར་བརྒྱུད་ལྷོ་ཕྱོགས་བོད་མིའི་སྤྱི་ཁྱབ་པ་ཀརྨ་སེང་གེ་ལགས་སུ། དེ་སྔའི་ལྷོ་ཕྱོགས་ཁུལ་གྱི་རྙོག་དྲ་དེ་གང་འདྲ་ཆགས་ཡོད་མེད་བཀའ་འདྲི་ཞུས་པར། ཁོང་གིས་གཅིག་ནས་ཀཱ་ན་ཊ་ཀ་གཞུང་གི་འགན་སྲུང་དང་། གཉིས་ནས་ཉིན་འགའི་གོང་ནང་སྲིད་བཀའ་བློན་མཆོག་གཞིས་ཆགས་ཁག་ཚང་མར་ཆེད་ཕེབས་དང་འབྲེལ་ཡོད་མངའ་སྡེ་གཞུང་གི་མི་སྣ་དང་ཉེན་རྟོག་པ་ཚོར་འབྲེལ་བ་བྱས་ཏེ། ད་ཆར་གཞིས་ཆགས་ཁག་ལྷིང་འཇགས་ཆགས་ཡོད་པ་དང་། བྷིང་ལོར་དང་མེ་སོར་སོགས་ཀྱི་མཐོ་རིམ་སློབ་མ་ཚོ་ཡང་ཕྱིར་ལོག་སྟེ་འཛིན་གྲྭར་སྐྱོད་མགོ་བརྩམས་ཡོད་སྐོར་བརྗོད་བྱུང་།
གསར་འགོད་པས་བྷང་ལོར་དང་མེ་སོར་སོགས་ཀྱི་བོད་རིགས་མཐོ་རིམ་སློབ་ཕྲུག་ཚོགས་པའི་ཚོགས་གཙོ་སོ་སོར་ཁ་པར་བརྒྱུད་ད་ཆར་སློབ་ཕྲུག་རྣམས་འཚང་འཛོམས་བྱུང་ཡོད་མེད་དང་། གནས་ཚུལ་གཞན་ལྷག་ཡོད་མེད་ཐད་སྐད་ཆ་དྲིས་སྐབས། ད་ཆར་སློབ་ཕྲུག་རྣམས་ཕྱིར་ལོག་སྟེ་རྒྱུན་ལྡན་ལྟར་སོ་སོའི་འཛིན་གྲྭར་ཕེབས་བཞིན་ཡོད་སྐོར་བརྗོད་བྱུང་ལ། བྷང་ལོར་མཐོ་རིམ་སློབ་མའི་ས་གནས་གཞོན་ནུའི་ཚོགས་གཙོ་ཨ་ཆོས་ལགས་ཀྱིས་ “ད་ཆར་གནས་ཚུལ་ལྷིང་འཇགས་ཆགས་ཏེ་སློབ་ཕྲུག་རྣམས་སོ་སོའི་འཛིན་གྲྭར་སྐྱོད་ཀྱི་ཡོད། ས་གནས་གཞོན་ནུ་དང་བོད་རང་བཙན་སློབ་ཕྲུག་ཚོགས་པ། བྷང་ལོར་བོད་ཁྱིམ་སྡོད་ཁང་(Youth Hostel) བཅས་ཀྱིས་མཐོ་སློབ་སོ་སོར་འབྲེལ་བ་བྱས་ཏེ། ཉེ་སྔོན་གློ་བུར་ཐོག་རྒྱག་ལ་སློབ་ཕྲུག་རྣམས་ཉེན་གཡོལ་དུ་འགྲོ་དགོས་བྱུང་ཡོད་སྟབས། སློབ་གྲྭར་འབྱོར་ཐོ་འགོད་ཐུབ་མེད་པ་རྣམས་ལ་འབྱོར་ཐོ་རག་ཐབས་བྱེད་ཀྱི་ཡོད། སློབ་ཕྲུག་ཕལ་ཆེ་བར་འབྱོར་ཐོ་རག་སོང་”ཞེས་བརྗོད་བྱུང་། ཉིན་རེའི་སློབ་ཞུགས་འབྱོར་ཐོ་མང་པོ་སྟོང་པར་ལྷག་ཚེ་ཡིག་རྒྱུགས་གཏོང་རྒྱུར་འགོག་རྐྱེན་འཕྲད་ཀྱི་ཡོད་འདུག
ཡང་བྷང་ལོར་བོད་ཁྱིམ་སྡོད་ཁང་གི་འགན་འཛིན་རྒན་དོན་འགྲུབ་ལགས་ཀྱིས་བརྗོད་པ་ལྟར་ན། ཉེ་ཆར་བོད་རིགས་དང་མཐོ་རིམ་སློབ་མ་ཚོར་ཞེད་སྣང་ཆེན་པོ་ཞིག་བྱུང་སྟེ་ཕྱོགས་སོ་སོར་ཉེན་གཡོལ་དུ་ཕྱིན་ཡོད་ཀྱང་། དེའི་རྗེས་རྒྱ་གར་དབུས་དང་མངའ་སྡེ། གྲོང་ཁྱེར་གཞུང་བཅས་ཀྱིས་འགན་སྲུང་གང་ལེགས་བྱས་པ་དང་། ཁ་ཆེ་གནད་ཡོད་མི་སྣ་ཚོ་དང་ཚོགས་འདུ་ཐེངས་གསུམ་ཙམ་ཚོགས་ཏེ། ཁ་ཆེ་གནད་ཡོད་མི་སྣ་ཚོས་འབར་མའི་གནད་དོན་དེ་གཞན་ཞིག་ཡིན་པ་དང་། ཨ་སམ་ནང་གི་དཀའ་རྙོག་ནི་ས་གནས་གྲངས་ཉུང་མི་རིགས་ཤིག་དང་ས་གནས་ཁ་ཆེ་བ་དག་གི་འཁྲུག་རྩོད་ཅིག་ཡིན་པ་ལས། ཆོས་ལུགས་ཀྱི་རྩོད་རྙོག་ཅིག་མིན་པ། ལྷག་པར་དུ་རྒྱ་གར་ནང་གི་ཁ་ཆེ་བ་ཚོས་གནད་དོན་དེས་རྐྱེན་པས་གཞན་ལ་དྲག་རྒོལ་བྱ་འཆར་ཡོད་སྐོར་བཤད་པ་ནི་དཀྲོག་གཏམ་ཡིན་པ། ཀཱ་ན་ཊ་ཀའི་ནང་གི་བྱང་ཤར་ཁུལ་གྱི་མི་དང་བོད་པ་ཚོར་དཀའ་ངལ་ཅི་ཞིག་འཕྲད་ཀྱང་ཁོ་ཚོར་འབྲེལ་བ་བྱ་རོགས་ཞེས་སོགས་བརྗོད་ཡོད་འདུག
ཉེ་སྔོན་མེ་སོར་གྲོང་ཁྱེར་ནང་བོད་རིགས་གཞོན་སྐྱེ་བསྟན་འཛིན་དར་རྒྱས་ལ་ངོ་ཐག་མ་ཆོད་པའི་མི་གཉིས་ཀྱིས་གྲིས་བཙུགས་ཏེ་སྨན་ཁང་དུ་བསྐྱལ་དགོས་བྱུང་བའི་གནད་དོན་ཐད་གསར་འགོད་པས་བསྐྱར་དུ་རྒྱུས་ལོན་བྱས་པར། ད་ཆར་བསྟན་འཛིན་དར་རྒྱས་ལགས་ཀྱི་གཟུགས་པོའི་གནས་སྟངས་ཡག་པོ་ཆགས་ཡོད་པ་དང་། མི་འགྱངས་པར་ཕྱིར་སྦེལ་ཀོབ་ཏུ་ལོག་འཆར་ཡོད་འདུག ད་སྔ་ཁོང་ལ་གྲི་རྒྱག་མཁན་མི་གཉིས་པོ་དེ་སུ་ཡིན་ཁ་གསལ་བྱུང་མི་འདུག
གསར་འགོད་པ། བནྡེ་སྐྱབས།
