དེ་རིང་བཞུགས་སྒར་དུ་དམངས་གཙོའི་དུས་དྲན་སྲུང་གཙི་གནང་སྟེ། གཞུང་དང་དམངས་གཉིས་ངོས་ནས་སོ་སོར་དམངས་གཙོ་དང་འབྲེལ་བའི་ལས་འགུལ་སྣ་ཚོགས་སྤེལ་སོང་།
དེ་རིང་བཞུགས་སྒར་ངྷ་རམ་ས་ལར་བཙན་བྱོལ་བོད་མིའི་དམངས་གཙོའི་དུས་དྲན་ཐེངས་ ༥༢ པ་དེ་སྲུང་གཙི་གནང་ཡོད་ཅིང་། ཞོགས་པའི་ཆུ་ཚོད་ ༩།༠༠ སྟེང་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་མཆོག་དབུ་བཞུགས་ཐོག གཞུང་འབྲེལ་མཛད་སྒོ་ཚོགས་ཡོད་པ་དང་། གཞུང་འབྲེལ་མཛད་སྒོ་གྲོལ་རྗེས་དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག བོད་ཀྱི་འབྲེལ་སྟོན་ཁང་དུ་ཨོ་སི་ཊོ་ལི་ཡར་རྟེན་གཞི་བྱས་པའི་རྒྱ་རིགས་ཐེབས་རྩ་ཁང་ “རུས་ཆི་རིག་གཞུང་ཐེབས་རྩ་ཁང་”གིས་ ༢༠༠༨ ལོར་བོད་ནང་གི་དངོས་ཡོད་གནས་ཚུལ་སྐོར་གྱི་གློག་བརྙན་བཟོ་སྐྲུན་པ་དོན་འགྲུབ་དབང་ཆེན་ལགས་ཀྱི་དངོས་བྱུང་གློག་བརྙན་༼འཇིགས་བྲལ༽ཞེས་པར་ཐེབས་རྩ་ཁང་དེའི་ཐེངས་ལྔ་བའི་༼རྒྱ་ནག་ཡར་ཐོན་སྐུལ་འདེད་དམིགས་བསལ་གཟེངས་རྟགས༽ ཞེས་པ་འབུལ་བཞེས་ཀྱི་མཛད་སྒོ་སྟབས་བདེ་ཞིག་ཚོགས་ཏེ། ཐེབས་རྩ་ཁང་གི་ཚོགས་རྒྱ་རིགས་བུད་མེད་ཆི་ཅཱ་ཀྲིན་གྱིས་ཐེབས་རྩ་ཁང་གི་ལོ་རྒྱུས་ངོ་སྤྲོད་དང་འབྲེལ་དོན་འགྲུབ་དབང་ཆེན་ལ་གཟེངས་རྟགས་དེ་འབུལ་ལམ་ཞུ་དགོས་པའི་རྒྱུ་མཚན་ངོ་སྤྲོད་གནང་རྗེས། འགྲུབ་དབང་ཆེན་ལགས་ཀྱི་བུ་མོ་ཆུང་ཤོས་རང་ལོ་ ༡༡ ཡིན་པ་ལྷ་མོ་སྒྲོལ་མ་ལགས་ཀྱིས་རྒྱའི་བཙོན་འོག་ཏུ་ཡོད་པའི་ཕ་དོན་འགྲུབ་དབང་ཆེན་གྱི་ཚབ་བྱས་ཏེ་གཟེངས་རྟགས་དེ་བཞེས་ཡོད།
རུས་ཆི་ཐེབས་རྩ་ཚོགས་པའི་ཚོགས་གཙོ་ཆི་ཅཱ་ཀྲིན་ལགས་ཀྱིས་བརྗོད་པ་ལྟར་ན། ཁོང་གི་ཕ་རྒན་ཆི་ཙིན་ཀྲི་ཡིས་རྒྱ་ནག་དམར་པོའི་སྲིད་གཞུང་ལ་ངོ་རྒོལ་བྱས་སྟབས་ལོ་ ༣༠ རིང་རྒྱའི་བཙོན་འོག་ཏུ་ཚུད་ཡོད་པ་མ་ཟད། མོ་རང་ཡང་ལོ་ ༡༠ རིང་རྒྱའི་བཙོན་འོག་ཏུ་བསྡད་ཡོད་འདུག་ལ། གཟེངས་རྟགས་འདི་རྒྱ་ནག་ནང་གི་གཞི་རིམ་མི་མང་ཚོའི་དཀའ་སྡུག་གི་འབོད་སྒྲ་སྒྲོག་མཁན་གྱི་རྩོམ་པ་པོ་དང་དངོས་བྱུང་གློག་བརྙན་བཟོ་སྐྲུན་བྱེད་མཁན་ཕུལ་བྱུང་པ་ཚོར་སྤྲོད་ཀྱི་ཡོད་འདུག
གཞན་གླིང་ཚ་ཚེ་བརྟན་རྡོ་རྗེའི་ཨ་མ་སྡོམ་པོ་སྐྱིད་ལགས་ཀྱིས་དེ་རིང་གི་དམངས་གཙོའི་དུས་དྲན་གྱི་ཉིན་མོ་དང་བསྟུན་ཏེ། གཙུག་ལག་ཁང་གི་སྒོ་ཆེན་མདུན་དུ་ཟས་བཅད་ངོ་རྒོལ་གྱི་ལས་འགུལ་ཞིག་མགོ་འཛུགས་གནང་ཡོད་པ་དང་། ཨ་མ་སྡོམ་པོ་སྐྱིད་ལགས་ཀྱིས་ཟས་བཅད་ངོ་རྒོལ་གནང་དགོས་པའི་རྒྱུ་མཚོན་སྐོར་ངོ་སྤྲོད་གནང་སྐབས་ཁོང་གིས། “ང་ཚེ་བརྟན་རྡོ་རྗེ་གཅིག་པུའི་ཆེད་དུ་མིན། གཙོ་བོ་ཚེ་བརྟན་རྡོ་རྗེའི་ཞི་བའི་དོན་ཚན་ ༥ ལ་རྒྱལ་ཚོགས་དང་མི་མང་གི་རྒྱབ་སྐྱོར་ཡོང་ཆེད་དང་། ལྷག་པར་དུ་བོད་ནང་གཞོན་སྐྱེས་མང་པོ་ཞིག་གིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གནང་གི་
ཡོད་པ་རེད། ང་རང་བུ་ཕྲུག་གི་ཨ་མ་ཞིག་ཡིན་སྟབས། མེར་བསྲེགས་གཏོང་མཁན་ཚོའི་ཕ་མ་ནང་མིར་སྡུག་བསྔལ་ཅི་ཙམ་ཡོད་པའི་སྐོར་ལ་བསལ་བློ་འཁོར་ན་འགྲོ་ས་ནས་གོམ་པ་འཁྱོར་ཡོང་གི་འདུག” ཅེས་བརྗོད་བྱུང་ལ། བོད་ནང་གི་མེར་བསྲེགས་ཞི་འཇགས་ཡོང་ཆེད་རང་དབང་ལུང་པར་ཡོད་པའི་བོད་མི་ཚང་མས་སོ་སོའི་ཐད་ནས་ལས་འགུལ་འདྲ་མིན་སྤེལ་གནང་རྒྱུའི་རེ་སྐུལ་གནང་སོང་།
ཉིན་རྒྱབ་ཆུ་ཚོད་ ༣།༠༠ སྟེང་། བོད་རྒྱལ་ཡོངས་མང་གཙོ་ཚོགས་པ་དང་ངྷ་ས་ས་གནས་གཞོན་ནུ་གཉིས་ཀྱི་གོ་སྒྲིག་འོག ངྷ་ས་བོད་ཁྱིམ་ཉིན་སློབ་ཚོགས་ཁང་དུ། འབར་མའི་དམངས་གཙོ་དོན་གཉེར་བ་ལྕམ་ཨང་སན་སུའུ་ཀེ་མཆོག་གི་མི་ཚེ་དང་དམངས་གཙོའི་འཐབ་རྩོད་སྐོར་གྱི་གློག་བརྙན་ཞིག་མང་ཚོགས་ལ་གཟིགས་འབུལ་གྱིས་དུས་དྲན་སྲུང་གཙི་བྱས་སོང་ལ། གློག་བརྙན་མགོ་འཛུགས་སྐབས་ས་གནས་གཞོན་ནུའི་ཚོགས་གཙོ་བསྟན་འཛིན་བརྩོན་འགྲུས་ལགས་ཀྱིས། ལྕམ་ཨང་སན་སུའུ་ཀེ་མཆོག་ནི་བོད་མི་ཙམ་མིན་པར་འཛམ་གླིང་མི་མང་གིས་མིའི་རིགས་ཀྱི་དམངས་གཙོའི་འཐབ་རྩོད་ཀྱི་ལོ་རྒྱུས་ཁྲོད་དྲན་གསོ་དང་མིག་དཔེར་འཛིན་འོས་པའི་མི་སྣ་རླབས་ཆེན་ཞིག་ཡིན་སྐོར་ངོ་སྤྲོད་གནང་སོང་།
གཞན། ཉིན་རྒྱབ་ཆུ་ཚོད་ ༢།༣༠ སྟེང་ངྷ་ས་མདོ་སྨད་ས་གནས་རྒྱུན་ལས་ཀྱི་གོ་སྒྲིག་འོག ངྷ་ས་ཡོངས་གླིང་སློབ་གྲྭའི་ཚོགས་ཁང་ནང་། ཉེ་ཆར་མདོ་སྨན་དབུས་རྒྱུན་རྣམས་བལ་ཡུལ་དང་རྒྱ་གར་ནང་གི་ས་གནས་ཁག་ཏུ་ཆེད་བཅར་ཐོག་ཆབ་སྲིད་གོ་རྟོགས་གོང་མཐོར་བཏང་བ་དང་། མདོ་སྨད་དབུས་སའི་བར་གྱི་འབྲེལ་ལམ་འཕེལ་རྒྱས། མདོ་སྨད་དབུས་སྤྱི་ཁྱབ་ལས་ཁུངས་ཀྱི་ལས་བསྡོམས་ངོ་སྤྲོད་སོགས་གནང་སོང་། སྐབས་དེར་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་བསྟན་པའི་དངོས་གྲུབ་ལགས་ཀྱིས་ཚོགས་ཞུགས་མདོ་སྨད་མི་མང་ཚོར། བོད་ནང་དུ་མདོ་སྨད་མི་མང་གིས་རང་ལུས་མེར་བསྲེགས་གཙོས་བོད་བསྟན་པ་ཆབ་སྲིད་ཆེད་ལས་དོན་རྒྱ་ཆེར་སྤེལ་དང་སྤེལ་མུས་ཡིན་པ་ལྟར། བཙན་བྱོལ་ནང་མདོ་སྨད་པ་མང་པོ་ཞིག་གིས་དངོས་ཤུགས་བརྒྱུད་གསུམ་ནས་ལས་འགུལ་འདྲ་མིན་ཐད་རང་འགན་རང་ཁུར་བྱེད་ཀྱི་ཡོད་ཀྱང་། རེ་ཟུང་ཞིག་གྱག་མེད་ཚོར་མེད་ངང་སྡོད་པ་ནི་ངོ་ཚ་དགོས་པའི་གནས་ཡིན་སྐོར་བརྗོད་སོང་།
གསར་འགོད་པ། བནྡེ་སྐྱབས།
ཆིག་སྟོང་དགུ་བརྒྱའི་རེ་གཅིག །
དགུ་པའི་གཉིས་པའི་དུས་སུ། །
བོད་ཀྱི་མང་གཙོ་དབུ་བརྙེས། །
ལོ་འཁོར་ང་གཅིག་འཁོར་སོང་། །