བྷོ་རེ་ཡ་ཐུར་མེ་ལྕེ་སྐོར་སྐྱོད།

བོད་མི་མང་སྤྱི་འཐུས་རྨོག་རུ་བསྟན་པ་ལགས་ཀྱིས་གནས་ཚུལ་ཁོ་སྤྲོད་གནང་བ་ལྟར་ན། ཁ་སང་བོད་ཀྱི་དམངས་གཙོའི་ཉིན་མོ་དང་བསྟུན་ཏེ། བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་བདེན་པའི་མེ་ལྕེ་སྐོར་སྐྱོད་ལས་འགུལ་དེ་ཨུ་རུ་སུའི་མངའ་ཁུལ་བྷོ་རེ་ཡ་ཐུར་སྐོར་སྐྱོད་དང་མཚན་རྟགས་བསྡུ་རུབ་གནང་ཡོད་འདུག

ཕྱི་ཚེས་ ༡ ཉིན་མོ་སུ་ཁོའི་བོད་དོན་རྒྱབ་སྐྱོར་བ་བོད་ཀྱི་ཁང་པའི་ཚོགས་གཙོ་ལྕམ་ན་རྒྱ་ལགས་ཀྱིས་བདེན་པའི་མེ་ལྕེ་ཡི་དཔལ་འབར་འཁྱེར་དེ་བྷོ་རེ་ཡ་ཐུར་འབྱོར་ཡོད་པ་དང་། གནམ་ཐང་དུ་འབྱོར་སྐབས་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་ཚོགས་གཞོན། དྲུང་ཆེ་གཙོ་བོས་མི་མང་གིས་སྣེ་ལེན་མཇལ་དར་བསྒྲོན་ཡོད་ཅིང་། ཁ་སང་ཕྱི་ཚེས་ ༢ ཉིན་བྷོ་རེ་ཡ་ཐུའི་ཨོ་ལན་བྷ་ཏི་གྲོང་ཁྱེར་གྱི་མཐོ་རིམ་སློབ་གྲྭའི་ཚོགས་ཁང་ནས་བདེན་པའི་མེ་ལྕེ་སྐོར་སྐྱོད་གདན་འདྲེན་ཞུས་ཏེ། མཁན་པོ་ཆོས་རྡོ་རྗེ་ལགས་དང་དགེ་བཤེས་བྱམས་པ་འཕྲིན་ལས་སོགས་ཀྱི་གཙོ་བོས་མི་ ༥༠༠ ལྷག་ཅིག་མཉམ་འཛོམས་བྱུང་ཡོད་འདུག

བོད་རིགས་སྤྱི་མཐུན་ཚོགས་པའི་ཚོགས་གཙོ་ངག་དབང་བསྟན་འཛིན་ལགས་ཀྱིས་བདེན་པའི་མེ་ལྕེ་སྐོར་སྐྱོད་ངོ་སྤྲོད་དང་འབྲེལ་བའི་གསུང་བཤད་གནང་བ་དང་། སྐུ་མགྲོན་གཙོ་བོ་མཁན་པོ་ཆོས་རྡོ་རྗེ་ལགས་དང་། དགེ་བཤེས་བྱམས་པ་འཕྲིན་ལས་སོགས་ཀྱིས་ཀྱང་གསུང་བཤད་གནང་རྗེས། བོད་ཀྱི་རྒྱལ་གཅེས་དཔའ་བོ་རྣམས་ཀྱི་སྐུ་པར་འགྲེམས་སྟོན་དང་། མི་མང་ནང་མཚན་རྟགས་བསྡུ་རུབ་བཅས་གནང་ཡོད་འདུག

ཐེངས་འདིའི་མཛད་སྒོ་དེ་ནི་བདེན་པའི་མེ་ལྕེ་སྐོར་སྐྱོད་དང་། བོད་ཀྱི་དམངས་གཙོའི་དུས་ཆེན་ཐེངས་ ༥༢ པ་སྲུང་གཙི། བཀའ་བློན་ཁྲི་པ་མཆོག་གིས་སྲིད་སྐྱོང་བའི་མཛད་འགན་བཞེས་ཏེ་ལོ་གཅིག་འཁོར་བའི་དུས་དྲན་སྲུང་གཙི་བཅས་དུས་ཆེན་གསུམ་འཛོམས་ཀྱི་མཛད་སྒོ་ཞིག་ཆགས་ཡོད་པ་དང་། དེ་ནི་ས་གནས་བོད་རིགས་ཚོགས་པ་གསར་འཛུགས་རྗེས་ཀྱི་ལས་འགུལ་གཞི་རྒྱ་ཆེ་ཤོས་ཐོག་མ་དེ་ཆགས་ཡོད་འདུག