ཁྲིན་ཆོན་ཀོར་རྨས་ཕོག་སྟེ་རྒྱ་ནང་དུ་ལོག་འདུག

ཕྱི་ཟླ་བརྒྱད་པའི་ཟླ་མཇུག་ལ་བོད་དབུས་གཙང་ཁུལ་དུ་རྒྱ་གཞུང་དཔོན་རིགས་ཚོའི་སྣུམ་འཁོར་བརྡབ་སྐྱོན་རིམ་པར་བྱུང་སྟེ། ཁྲིན་ཆོན་ཀའོ་གཙོས་མགོ་ཁྲིད་ཁག་ཅིག་ལ་རྨས་སྐྱོན་དང་ཁག་ཅིག་རྐྱེན་འདས་སུ་གྱུར་འདུག  

ཕྱི་ཟླ་ ༨ ཚེས་ ༢༠ ནས་ ༢༩ བར་གྱི་ཉིན་གྲངས་ ༡༠ ཙམ་ནང་། རྒྱ་གཞུང་གིས་བོད་རང་སྐྱོང་ལྗོངས་སུ་འབོད་པའི་ཁོངས་གཏོགས། ལྷོ་ཁ་དང་ཀོང་པོ་དཔལ་ཡུལ། ལྷ་ས་བཅས་བོད་དབུས་གཙང་གི་ས་ཁུལ་ཁག་ནང་། རྒྱ་གཞུང་གི་མགོ་ཁྲིད་ཚོའི་རླངས་འཁོར་བརྡབ་སྐྱོན་གྱི་དོན་རྐྱེན་ཁག་ ༤ རིམ་པར་བྱུང་ཡོད་པ་མ་ཟད། དོན་རྐྱེན་དེ་ཁག་ཁྲོད་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཁྲིན་ཆོན་ཀོའི་གཙོས་མཐོ་རིམ་དཔོན་རིགས་ཁག་ཅིག་ལ་རྨས་སྐྱོན་དང་ཁག་ཅིག་རྐྱེན་འདས་སུ་ཕྱིན་ཡོད་འདུག 

ཨེ་ཤ་ཡ་རང་དབང་རླུང་འཕྲིན་ཁང་གིས་གནས་སྤེལ་བ་ལྟར་ན། ཕྱི་ཟླ་ ༨ ཚེས་ ༢༨ ནས་ ༢༩ གང་རུང་ཞིག་ལ། བོད་རང་སྐྱོང་ལྗོངས་དམཪ་ཤོག་དྲུང་ཆེ་ཁྲིན་ཆོན་ཀོ་ཡི་སྣུམ་འཁོར་ལྷོ་ཁ་བརྒྱུད་ཀྱི་ལམ་གཞུང་ཞིག་ཏུ་བརྡབ་སྐྱོན་བྱུང་སྟེ། ཁྲིན་ཆོན་ཀོ་ལ་རྨས་སྐྱོན་ཕོག་ཡོད་འདུག  ཁོ་ལ་རྨས་སྐྱོན་ཚབས་ཆེ་ཆུང་གང་འདྲ་ཞིག་ཕོག་ཡོད་མེད་ཀྱི་ཞིབ་ཕྲའི་གནས་ཚུལ་ཤེས་རྟོག་བྱུང་མེད་ཀྱང་། ད་ལྟ་བོད་ཡུལ་ནས་ཕྱིར་ཐོན་ཏེ་རྒྱ་ནག་ནང་ལོགས་ཤིག་ཏུ་སྨན་བཅོས་ཆེད་ཁྲིད་ཡོད་འདུག 

ཕྱི་ཟླ་ ༨ པའི་ཟླ་མཇུག་ཅིག་ལ་ལྷ་སར་སྣུམ་འཁོར་བརྡབ་སྐྱོན་གྱི་དོན་རྐྱེན་ཞིག་གི་འོག བོད་རང་སྐྱོང་ལྗོངས་མི་དམངས་ཁྲིམས་ཁང་གི་ཁྲིམས་དཔོན་ཞིག་རྐྱེན་འདས་སུ་ཕྱིན་ཡོད་པ་དང་། ཕྱི་ཟླ་ ༨ ཚེས་ ༣༠ ཉིན་ཁོའི་ཕུང་པོ་མེར་བསྲེགས་ཀྱིས་དུར་མཆོད་བྱེད་སྒོ་སྒྲུབ་ཡོད་འདུག ད་ལྟའི་ཆར་ཁོའི་མིང་དང་ལོ་རྒྱུས་སོགས་ཞིབ་ཕྲའི་གནས་ཚུལ་ཤེས་རྟོག་བྱུང་མེད་ཀྱང་། ཁོ་ནི་རྒྱ་རིགས་ཤིག་ཡིན་འདུག 

ཕྱི་ཟླ་ ༨ ཚེས་ ༢༤ དང་ ༢༥ གང་རུང་ཞིག་ལ། བོད་ཀྱི་ཀོང་པོ་དཔལ་ཡུལ་དུ་བསླེབས་ལ་ཉེ་བའི་རི་ལམ་ཀྱག་ཀྱོག་ཅིག་ཏུ། སྣུམ་འཁོར་བརྡབ་སྐྱོན་གྱི་དོན་རྐྱེན་ཞིག་གི་འོག  བོད་རང་སྐྱོང་ལྗོངས་ཀྱི་བདེ་འཇགས་ཚན་པའི་མགོ་ཁྲིད་སངས་རྒྱས་ཟེར་བ་ཞིག་རྐྱེན་འདས་སུ་ཕྱིན་འདུག སངས་རྒྱས་ནི་རང་ལོ་ ༤༨ ནས་ ༤༩ ཙམ་ཡིན་པ་དང་། ཕ་ཡུལ་ཀོང་པོ་ནས་ཡིན་པ་མ་ཟད། གཟའ་ཟླ་བུ་ཕྲུག་རྣམས་ཀྱང་ཀོང་པོར་ཡོད་འདུག ཁོ་ནི་ནམ་རྒྱུན་ལྷ་སའི་འབྲས་སྤུངས་དགོན་པའི་ནང་བདེ་འཇགས་དོ་དམ་འགན་འཛིན་གྱི་ལས་ཀ་བྱེད་བཞིན་ཡོད་འདུག 

གཞན་ཡང་། ཉེ་ཆར་ལྷ་སར་བྱུང་བའི་སྣུམ་འཁོར་བརྡབ་སྐྱོན་གྱི་དོན་རྐྱེན་གཞན་ཞིག་གི་ཁྲོད། བོད་རང་སྐྱོང་ལྗོངས་ཀྱི་མགོ་ཁྲིད་ཞིག་རྐྱེན་འདས་ཕྱིན་ཡོད་ཀྱང་། ད་ལྟའི་ཆར་མགོ་ཁྲིད་དེའི་མིང་དང་ཞིབ་ཕྲའི་གནས་ཚུལ་ཤེས་རྟོག་བྱུང་མེད་པ་རེད།

ཕྱི་ཟླ་ ༨ ཟླ་མཇུག་ལ་བྱུང་བའི་སྣུམ་འཁོར་བརྡབ་སྐྱོན་གྱི་དོན་རྐྱེན་དེ་དག་ཁྲོད། འབྲེལ་ཡོད་མགོ་ཁྲིད་ཚོའི་སྐུ་སྲུང་མི་སྣ་ཁག་ཅིག་རྐྱེན་འདས་དང་། ཁག་ཅིག་ལ་རྨས་སྐྱོན་ཕོག་ཡོད་འདུག ཡིན་ནའང་། རྒྱ་གཞུང་གི་དཔོན་རིགས་དེ་ཚོར་བསྟུད་མར་རླངས་འཁོར་བརྡབ་སྐྱོན་བྱུང་བའི་གནས་ཚུལ་རྣམས་རྒྱ་གཞུང་གི་གསར་ལམ་ཁག་ཏུ་གཅིག་ཀྱང་སྤེལ་མི་འདུག