རྒྱ་ནག་གཞུང་གིས་ཁམས་དཀར་མཛེས་རྫོང་གི་བུ་མོ་ཆུང་ཆུང་ཞིག་ལ་ལོ་གསུམ་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
རྒྱ་གར་ལྷོ་ཕྱོགས་སེ་ར་ཏྲེ་ཧོར་ཁམས་ཚན་གྱི་གྲྭ་བསྟན་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༢༥ ཉིན་དཀར་མཛེས་རྫོང་མི་དམངས་ཁྲིམས་ཁང་གིས། འདི་ལོ་ཕྱི་ཟླ་༦ པའི་ཚེས་ ༢༤ ཉིན་དཀར་མཛེས་རྫོང་ཐོག་ཏུ་ཞི་བའི་ངོ་རྒོལ་གནང་མཁན་བུ་མོ་འཇིཊ་མེད་སྒྲོལ་མར། རྒྱལ་ཁབ་ཁ་བྲལ་གཏོང་མཁན་གྱི་ཉེས་མིང་འོག་ལོ་ ༣ དུས་བཀག་བཙོན་འཇུག་ཁྲིམས་ཐག་བཅད་འདུག ཁྲིམས་ཐག་བཅད་རྗེས་སྔ་ཕྱི་ཐེངས་གཉིས་སུ་ནང་མིར་ཐུག་འཕྲད་བྱས་བཅུག་ཡོད་ཀྱང་། ཕྱི་ཚེས་ ༢༨ ཉིན་ཁོ་མོ་དཀར་མཛེས་གནས་རྒྱ་ནག་གི་བཙོན་ཁང་ཞིག་ཏུ་འཁྲིད་ཡོད་འདུག
རང་ལོ་ ༡༧ ཡིན་པའི་བུ་མོ་འཇིཊ་མེད་སྒྲོལ་མ་ནི། དཀར་མཛེས་རྫོང་ཀ་བྲག་ཤང་ཤོང་ཁ་གྲོང་ཚོའི་ཕ་ཆོས་ཀྱི་ཉི་མ་དང་མ་ཨ་མཚོ་ལྷ་མོ་གཉིས་ཀྱི་བུ་མོ་ཡིན་ཞིང་། འདི་ལོའི་ཕྱི་ཟླ་ ༦ པའི་ཚེས་ ༢༤ ཉིན་ཁོ་མོས་ཁམས་དཀར་མཛེས་རྫོང་གི་ཁྲོམ་གཞུང་དུ། “ ༸རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས། པཎ་ཆེན་ཆུང་སྲིད་རིན་པོ་ཆེས་གཙོས་པའི་བོད་མི་ཆབ་སྲིད་བཙོན་པ་རྣམས་གློད་གྲོལ་གཏོང་དགོས། རྒྱ་རྒྱ་ཡུལ་དུ་ལོག་དགོས། བོད་བོད་ཡུལ་དུ་སྡོད་དགོས། ” ཞེས་ངོ་རྒོལ་སྐད་འབོད་བྱེད་སྐབས། དྲག་ཆས་ཉེན་རྟོག་པས་རྡུང་རྡེག་གཏོང་བཞིན་འཇུ་བཟུང་བཙོན་འཇུག་བྱས་ཡོད།
གསར་འགོད་པ། དོན་གོ
བོད་ནང་དུ་འདི་ལྟར་གཞོན་ནུ་ལའང་ཁྲིམས་གཅོད་ཀྱི་ཡོད་པས། མི་རིགས་རང་ཉིད་ལ་གཞུང་ཞིག་མེད་ན། གནས་སྟངས་འདིའི་འོག་ནས་ག་དུས་ཀྱང་ཐར་མི་སྲིད་པ་སྟོན་བཞིན་པ་མ་རེད་དམ།