ཁ་ཆེའི་སྟོན་པར་ཐེར་འདོན་བྱས་ཡོད་པའི་ཨ་རིའི་གློག་བརྙན་ཞིག་གི་དོན་རྐྱེན་འོག ཨེ་ཇིབ་དང་ལེ་བྷེ་ཡའི་ནང་གི་ཨ་རིའི་གཞུང་ཚབ་ལ་གཏོར་སྐྱོན་དང་།གཞུང་ཚབ་ལས་བྱེད་གཅིག་དམར་གསོད་བཏང་འདུག
ཕྱི་ཚེས་ ༡༡ ཉིན་ཨེ་ཇིབ་རྒྱལ་ས་ཀའེ་རོ་ནང་ཡོད་པའི་ཨ་རིའི་གཞུང་ཚབ་ཁང་དུ་ཨེ་ཇིབ་མི་མང་གིས་ངོ་རྒོལ་སྐད་འབོད་དང་གཞུང་ཚབ་ཁང་ལ་གཏོར་སྐྱོན་བཏང་ཡོད་པ་མ་ཟད། གཞུང་ཚབ་ཁང་གི་ཨ་རིའི་རྒྱལ་དར་མར་ཕབ་སྟེ་རལ་ཡོད་འདུག གཞན་ལེ་བྷེ་ཡའི་རྒྱལ་ས་བྷན་གྷ་ཛེ་རུ་ཡོད་པའི་ཨ་རིའི་གཞུང་ཚབ་ཁང་ལའང་གཅིག་མཚུངས་ཀྱི་ངོ་རྒོལ་བྱས་ཡོད་པ་མ་ཟད། ངོ་རྒོལ་སྐབས་གཞུང་ཚབ་ཁང་ལ་ལག་འབོམ་གཡུག་པ་དང་མེ་མདའ་བརྒྱབ་པ་སོགས་བྱས་ཏེ། ཨ་རིའི་གཞུང་ཚབ་ལས་བྱེད་གཅིག་དམར་གསོད་དང་གཞན་གཅིག་ལ་རྨས་སྐྱོན་ཕོག་ཡོད་པ་དང་། ལས་བྱེད་གཞན་རྣམས་བྲོས་བྱོལ་བྱས་རྗེས་གཞུང་ཚབ་ཁང་ལ་མེ་བརྒྱབ་ཡོད་འདུག
ངོ་རྒོལ་དེ་དག་གི་རྒྱུ་རྐྱེན་ནི། ཨ་རིའི་ཁཱ་ལེ་ཧྥོ་ནེ་ཡའི་མི་སེར་མིང་ལ་སམ་བྷ་སེ་ལི་(Sam Bacile) ཟེར་པ་ཞིག་གིས་བཟོ་སྐྲུན་བྱས་པའི་གློག་བརྙན་ཞིག་ཏུ། ཁ་ཆེའི་སྟོན་པ་མུ་ཧམ་མཱ་ཌི་(Muhammad) ལ་ཐེར་འདོན་བྱས་པའི་རྐྱེན་གྱིས་ཡིན་འདུག གོང་གི་དོན་རྐྱེན་ཁག་བྱུང་པ་ཐོས་འཕྲལ་གློག་བརྙན་བཟོ་སྐྲུན་པ་སམ་བྷ་སེ་ལི་ཁོང་སྦས་ལྐོང་བྱས་ཡོད་ཀྱང་། ཁོས་ཁ་པར་བརྒྱུད་ཁ་ཆེ་ཆོས་ལུགས་ནི་སྐྲན་ནད་(Cancer) ཅིག་ཡིན་པ་དང་། ཁོ་རང་གི་གློག་བརྙན་དེ་ཆབ་སྲིད་ཀྱི་དྲིལ་བསྒྲགས་ཤིག་ཏུ་འགྱུར་འཇུག་འདོད་ཡོད་ཚུལ་བརྗོད་ཡོད་འདུག
གསར་འགོད་པ། བནྡེ་སྐྱབས།
