བཙན་བྱོལ་བར་རྒྱས་ལས་ཁུངས་རྒྱག་འཆར།

རྒྱ་ནག་གཞུང་གིས་བོད་མི་བཙན་བྱོལ་བའི་བདེ་སྡུག་ཆེད་ལས་ཁུངས་གསར་རྒྱག་དང་། ཕྱི་རྒྱལ་བ་དང་ཕྱི་སྡོད་རྒྱ་རིགས་ཚོར་གཞུང་གི་ལས་ཀ་སྤྲོད་འཆར་ཡོད་ཟེར།

དེ་རིང་ཕྱི་ཚེས་ ༡༢ ཉིན་རྒྱ་ནག་གཞུང་འབྲེལ་གསར་ལམ་རྒྱལ་སྤྱིའི་དུས་བབ་(Global times) ནང་ཐོན་པའི་གནས་ཚུལ་ལྟར་ན། པེ་ཅིན་གྲོང་ཁྱེར་སྲིད་གཞུང་གིས་ཐེངས་དང་པོར་ཕྱི་རྒྱལ་བ་དང་ཕྱི་སྡོད་རྒྱ་རིགས་ཚོར་རྒྱ་ནག་གཞུང་ནང་ལས་ཀ་སྤྲོད་འཆར་ཡོད་པ་ཁྱབ་བསྒྲགས་བྱས་ཡོད་འདུག་ལ། ཁྱབ་བསྒྲགས་ནང་ཕྱི་རྒྱལ་བ་དང་ཕྱི་སྡོད་རྒྱ་རིགས་སུ་ཡིན་ཡང་རྒྱ་ནག་གཞུང་ནང་ལས་ཀ་བྱ་རྒྱུའི་སྙན་ཞུ་འབུལ་ཆོག་པ་དང་། ཆ་རྐྱེན་ཚང་མཁན་རྣམས་ལ་གཞུང་ནང་ལས་གནས་མཐོ་བོ་སྤྲོད་རྒྱུ་ཡིན་ལུགས་བཀོད་འདུག

སྙན་ཞུ་འབུལ་མཁན་ཚོའི་ཆ་རྐྱེན་ནི། འབྲེལ་ཡོད་གཞུང་དང་རྒྱལ་སྤྱིའི་ཚོགས་སྡེ་ཁག་ཅིག་ནང་ཉུང་མཐར་ལོ་ལྔའི་རིང་དགེ་རྒན་ཆེན་མོའམ། ཉམས་ཞིབ་པ། ཆེད་མཁས་པ། ཚོང་ལས་རིག་པ་བ་སོགས་ཀྱི་ཉམས་མྱོང་ཡོད་མཁན་དང་། ལོ་ ༥༥ ལས་མ་བརྒལ་བ་ཞིག་ཡིན་དགོས་སྐོར་གསལ་འདུག

ཕྱི་ཚེས་ ༡༠ ཉིན་གོང་གི་གསར་ཁང་དེ་དང་ཧོང་ཀོང་དུ་ཡོད་པའི་རྒྱ་ནག་གི་གསར་ཁང་མེན་པའོ་(Ming Pao) གཉིས་ཀྱི་ནང་། བཙན་བྱོལ་བོད་མི་ཚོར་འབྲེལ་ལམ་ཞབས་ཞུ་དང་། ཕྱིར་རྒྱལ་ནང་དུ་ལོག་མཁན་ཚོར་རོགས་འདེགས་རྒྱབ་སྐྱོར་བྱེད་པའི་ལས་ཁུངས་གང་མགྱོགས་གསར་འཛུགས་བྱ་འཆར་ཡོད་ཚུལ་བསྒྲགས་ཡོད་འདུག

གནས་ཚུལ་དེའི་ནང་། བོད་རང་སྐྱོང་ལྗོང་གི་གཙོ་འགན་འོག་ལས་ཁུངས་དེ་ཟླ་འདིའི་ནང་མགོ་འཛུགས་བྱ་འཆར་ཡོད་པ་དང་། ད་སྔ་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ་ཁག་ནང་ཕྱི་སྡོད་རྒྱ་རིགས་ཚོའི་ཆེད་ལས་ཁུངས་ཡོད་ཀྱང་། ད་སྔ་བོད་མི་ ༡༥༠༠༠༠ ཙམ་བཙན་བྱོལ་དུ་ཡོད་པ་རྣམས་ཀྱི་ཆེད་དུ་ལས་ཁུངས་མེད་སྟབས་ད་ཆར་གསར་འཛུགས་བྱ་རྒྱུ་ཡིན་སྐོར་གསལ་འདུག

རྒྱ་ནག་མི་རིགས་སློབ་ཆེན་ཞིག་གི་དགེ་རྒན་ཆེན་མོ་ཞའོ་ཀུན་ཞེན་(Xiong Kunxin) ཞེས་པ་ཞིག་གིས་ “ལས་ཁུངས་འདིས་ཏཱ་ལའི་བླ་མར་མཇལ་རྒྱུའི་རེ་བ་བཟུང་སྟེ་ཕྱིན་མཁན་བོད་རིགས་གཞོན་སྐྱེ་ཚོར་ཕན་ཐོགས་ཆེན་པོ་ཡོང་ངེས། བོད་རིགས་གཞོན་སྐྱེ་དེ་དག་ཕྱིར་ལོག་འདོད་ཡོད་ཀྱང་གཅིག་ནས་དངུལ་མེད་པ་དང་། གཉིས་ནས་ཕྱིར་ལོག་ན་འཛིན་བཟུང་བྱ་རྒྱུར་དོགས་ཏེ་ཞེད་སྣང་བྱེད་ཀྱི་ཡོད་པ་རེད” ཅེས་བརྗོད་ཡོད་འདུག

གསར་འགོད་པ། བནྡེ་སྐྱབས།