དམིགས་བསལ་ཚོགས་ཆེན་གྱི་གྲོས་གཞི་དང་འབྲེལ་ཏེ་བོད་གནས་ཉམས་ཞིབ་པ་ཚེ་རིང་རྡོ་རྗེ་ལགས་སུ་ཡིག་ཐོག་གི་དྲི་བ་ཁག་ཅིག་བཏོན་པར་ལན་འདེབས་གནང་ཡོད།
དྲི་བ། བོད་ནང་གི་ཛ་དྲག་གནས་སྟངས་དང་རང་ལུས་མེར་བསྲེགས་གཏོང་མཁན་རྣམ་པའི་མངོན་འདོད་ཐོག་ཕྱི་ཕྱོགས་ནས་ལས་དོན་གང་ཞིག་བརྩམ་དགོས།
ལན། བོད་ནང་གི་རང་ལུས་མེར་བསྲེགས་གནང་མཁན་ཚོས་འབོད་སྒྲ་ལས་གསལ་བོར་བསྟན་པ་ནི། ༸གོང་ས་མཆོག་བོད་དུ་ཕེབས་རྒྱུ་དང་འགྲོ་བ་མིའི་ཐོབ་ཐང་དགོས་པ་དེ་ཡིན། ངས་བལྟས་ན། དེ་ལས་ཀྱང་གལ་ཆེ་བའི་གནད་དོན་ཞིག་ནི། ཁོང་ཚོས་བཙན་བྱོལ་བོད་མི་དང་རྒྱལ་སྤྱིའི་སྤྱི་ཚོགས་ལ་རེ་ལྟོས་བྱེད་པ་དང་གྲུབ་འབྲས་ཤིག་ལ་སྙེག་པ་འདི་ཡིན། མི་ལུས་རིན་ཆེན་བློས་གཏོང་བ་དེ་གྲུབ་འབྲས་ཤིག་རག་མིན་ལ་མ་ལྟོས་པར་གསོན་པའི་རེ་ཐག་ཆད་ནས་བྱས་པ་ཞིག་ཡིན་མི་སྲིད། འོ་ན། བཙན་བྱོལ་བ་ཚོས་རེ་ལྟོས་དེའི་བརྒྱ་ཆ་ཇི་ཙམ་ཞིག་བསྒྲུབ་ཐུབ་བམ། རྒྱལ་སྤྱིའི་སྤྱི་ཚོགས་ཀྱིས་ཁ་ཡོད་ལག་ཡོད་ཀྱི་ཕན་ནུས་ཇི་ཙམ་འདོན་ཐུབ་བམ། གཞིས་པ་བོད་མི་མང་ཆེ་བས་དྲི་བ་འདི་གཉིས་ལ་ལན་རྙེད་ཐབས་ཕལ་ཆེར་མེད་པ་རེད་སྙམ།
དེའི་ཕྱིར། བཀའ་ཤག་དང་གྲོས་ཚོགས། གཞུང་འབྲེལ་མ་ཡིན་པའི་སྲིད་དོན་ཚོགས་པ་ལ་སོགས་ཀྱིས་བོད་ནང་གི་གནས་སྟངས་ཛ་དྲག་པ་སྐྱོབ་ཆེད་ནུས་ཤུགས་གང་བཏོན་དང་། གྲུབ་འབྲས་གང་རག དཀའ་ངལ་དང་མི་འཇོན་ས་གང་ཡོད་རྣམས་སྦ་གསང་མེད་པར་གཞིས་པ་བོད་མི་ཚོར་གོ་བརྡ་གསལ་བོར་སྤྲོད་དགོས། དེ་འདྲ་བྱས་ན། ཁོང་ཚོས་རང་ཉིད་སྐྱོབ་ཆེད་གང་འདྲ་གནང་དགོས་སྐོར་ལ་ཕྱོགས་ཡོངས་ནས་ལྟ་ཐུབ་པ་དང་། མེར་བསྲེགས་གཅིག་པུ་མ་ཡིན་པར་ཐབས་ལམ་གཞན་ཡང་རྙེད་སྲིད། བཙན་བྱོལ་བ་ཁ་ཤས་ཀྱིས་བཙན་བྱོལ་བའི་མི་འཇོན་ས་དང་། ཉམས་ཞན་ས་དེ་བོད་ནང་ལ་ཁ་གསལ་བོར་བརྗོད་ན། གཞིས་པ་ཚོ་སེམས་ཤུགས་ཆགས་འགྲོ་བས་མ་བཤད་ན་བཟང་ཟེར་གྱི་འདུག འདི་རྦད་དེ་ནོར་བ་རེད། ཁོང་ཚོ་དང་པོར་བློ་ཕམ་སྐྱེས་སྲིད་ཀྱང་། རིམ་གྱིས་བཙན་བྱོལ་བ་དང་རྒྱལ་སྤྱིར་རེ་ལྟོས་ཆེན་པོ་བྱ་མི་རུང་བ་ཤེས་འགྲོ་བ་དང་། བསམ་བློ་གཏོང་སྟངས་གསར་བའམ་ཐབས་ལམ་གཞན་རྙེད་སྲིད། གལ་སྲིད་ད་དུང་མུ་མཐུད་ནས་གོ་བརྡ་གསལ་བོ་མ་སྤྲད་ན། ཁོང་ཚོས་ལས་འགུལ་དང་ཐབས་ལམ་ལ་ཕམ་ཁ་འབྱུང་བའི་རྐྱེན་ངན་དུ་འགྲོ་བ་དང་། མ་འོངས་པར་བོད་ཕྱི་ནང་བར་ལ་ཡིད་ཆེས་ཀྱང་བརླག་སྲིད། དེའི་དབང་གིས་གསང་རྒྱ་བྱ་མི་དགོས་པའི་གྲུབ་འབྲས་དང་། ཞན་ཆ་རྣམས་ཇི་བཞིན་དུ་གཞིས་པ་ཚོར་བརྗོད་ན་ལེགས། འདི་འདྲ་བྱས་ན་ང་ཚོར་རྒྱུ་འབྲས་དང་དམངས་གཙོ། བློ་རྒྱ་ལ་སོགས་ཡོད་པའི་རྟགས་དང་། གཞིས་པ་ཚོའི་ལས་འགུལ་གྱི་གྲོགས་སུ་འགྲོ་བ་ཡིན།
གནད་འགག་གཞན་ཞིག་ནི་བཙན་བྱོལ་ཕྱོགས་ནས་གཞིས་པ་བོད་མི་ཚོར་རང་དབང་འཐབ་རྩོད་ཐད་ནས་བློ་སྒོ་འབྱེད་པར་ཕན་པའི་བརྡ་འཕྲིན་མཁོ་སྤྲོད་ཐུབ་དགོས་ཀྱི་འདུག གཞན་གྱི་བཙན་གནོན་འོག་ནས་རང་དབང་ཇི་ལྟར་བརྩོན་ལེན་བྱ་ཐབས་ལ་ཕན་པའི་ཤེས་བྱ་སྣ་ཚོགས་ཡོད་ཀྱང་། གཞིས་པ་ཚོས་ལྟ་ཀློག་གི་གོ་སྐབས་རག་གི་མེད། ཤེས་བྱ་གང་འདྲ་དགོས་ཞེ་ན། རྒྱ་ནག་གཞུང་གི་སྟོབས་ཤུགས་དང་ཉམས་ཞན་ས་གང་ཡིན་བརྗོད་པའི་དཔེ་དེབ་དང་རྩོམ་ཡིག རྒྱ་ནག་གི་ཆབ་སྲིད་གནས་བབས། གཡོ་ཐབས་སྐོར་གྱི་ཤེས་བྱ། འཛམ་གླིང་གི་ཆབ་སྲིད་དང་དཔལ་འབྱོར། སྲིད་དབང་སྒེར་འཛིན་གྱི་དར་རྒུད་སྐོར་སོགས་ཡོད། མདོར་ན། གཞིས་པ་ཚོའི་རང་དབང་ལས་འགུལ་དང་ཐབས་ལམ་ལ་ཉེ་བར་མཁོ་བའི་བརྡ་འཕྲིན་མཁོ་སྤྲོད་ཐུབ་ཚེ། ཁོང་ཚོའི་ལས་འགུལ་དང་བསམ་བློ་ལ་ཁ་ཡོད་ལག་ཡོད་ཀྱིས་ཕན་ཐོགས་ཆེན་པོ་ཡོད།
དྲི་བ། བོད་ནང་རང་ལུས་མེར་བསྲེགས་མ་ཡིན་པའི་ལས་འགུལ་གཞན་མང་པོ་ཞིག་སྤེལ་གྱིན་ཡོད་པ་ལས། གང་ཞིག་འཕྲལ་ཕུགས་ཀྱི་བོད་པའི་རྩ་དོན་ཐོག་གལ་ཆེན་པོར་མཐོང་གི་ཡོད་དམ། དེའི་རྒྱུ་མཚན་ཅི་ཡིན།
ལན། དེ་ནི་བོད་སྐད་ཡིག་འཛིན་སྐྱོང་སྤེལ་གསུམ་གྱི་ལས་འགུལ་རེད་དྲན་ཡོད། དེའི་རྒྱུ་མཚན་ནི། བོད་སྐད་ཡིག་འདི་བོད་མིའི་ངོ་བོ་དང་ཁེ་ཕན་སྲུང་བྱེད་ཀྱི་ལྕགས་རི་ལྟ་བུ་ཡིན་པ་དང་། གནད་འགག་འདི་པཎ་ཆེན་རིན་པོ་ཆེ་སྐུ་གོང་མ་གཙོས་པའི་གནད་ཡོད་བོད་མི་མཐོང་རྒྱ་ཅན་ཚོས་སྔར་ནས་སྔོན་དཔག་ཐུབ་འདུག དེ་ནི་རྒྱ་ནག་དམར་ཤོག་གི་བཙན་གནོན་འོག་ནས་བོད་མིའི་སློབ་གསོ་དང་། དཔལ་འབྱོར། རིག་གནས། ཆིག་སྒྲིལ་བཅས་ལ་མེད་དུ་མི་རུང་བ་ཡིན། ཁོང་ཚོས་འདིའི་ཐད་ནས་མི་རིགས་ཀྱི་ཐོབ་ཐང་རྩོད་ལེན་བྱས་ན། རྒྱ་ནག་གི་བཅའ་ཁྲིམས་དང་མཐུན་པས་རྒྱ་གཞུང་གིས་དྲག་གནོན་བྱེད་བདེ་བོ་མེད་པ་ཤེས་ཀྱི་ཡོད། བོད་མི་ཚོས་བོད་ཡིག་གི་གོ་ཁྲབ་གྱོན་ཐུབ་ཚེ། རང་ཉིད་སྐྱོབ་པའི་ཉམས་མྱོང་དང་པོ་དེ་རག་པ་རེད།
དྲི་བ། བོད་ནང་གི་ཛ་དྲག་གནས་སྟངས་ལ་གཞིགས་ཏེ་བོད་རྒྱ་འབྲེལ་མོལ་བསྐྱར་མཐུད་དགོས་མིན་དང་། དགོས་ན་ཅི་ལྟར་བསྐྱར་མཐུད་བྱེད་དགོས་སམ།
ལན། བོད་ནང་གི་ཛ་དྲག་གནས་སྟངས་དེ་འཕྲལ་དུ་སེལ་བ་ལ་བོད་རྒྱ་འབྲེལ་མོལ་བསྐྱར་མཐུད་བྱས་ན་ཕན་འབྲས་ཤིག་འབྱུང་རྒྱུ་བསམ་པ་མི་འདུག རྒྱ་ནག་དམར་ཤོག་གཞུང་རང་ཉིད་ལ་མ་གཞི་ནས་དཀའ་ངལ་ཆེ་ཆུང་རུ་འཛིང་ནས་ཡོད་པ་དང་། བོད་ཀྱི་གནད་དོན་ལས་ཀྱང་ཚབས་ཆེ་བའི་གཞུང་དམངས་དང་གཞུང་ནང་ཁུལ་གྱི་གནད་དོན་མང་པོར་འཕྲད་པའི་སྒང་དེར། བོད་ཀྱི་གནས་སྟངས་ལ་གུ་ཡངས་སྤྲད་ན་རྒྱ་ནག་དམར་ཕྱོགས་ཀྱི་དབང་སྒྱུར་ལ་གཡོ་འགུལ་ཐེབས་པ་ཧ་ཅང་གསལ་བོ་ཡིན། བོད་རྒྱ་འབྲེལ་མོལ་ཐད་ནས་བོད་ཕྱོགས་ནས་རང་འགུལ་ལམ་འུ་ཐུག་གིས་ཕར་ཕྱོགས་ལ་འབྲེལ་མཐུད་མ་བྱས་ན་ལེགས། རྒྱ་ནག་དམར་ཕྱོགས་སྒེར་གཅོད་ལམ་ལུགས་མཇུག་མ་སྒྲིལ་ན། བོད་རྒྱ་འབྲེལ་མོལ་རྣལ་མ་ཞིག་འབྱུང་མི་སྲིད། འོན་ཀྱང་། རྒྱ་ནག་མི་དམངས་ལ་འབྲེལ་མོལ་བྱ་རྒྱུ་གལ་ཆེན་པོར་བཟུང་ནས་ཤུགས་སྔར་བས་ཆེ་བ་འདོན་དགོས། དེས་བོད་ནང་གི་ཛ་དྲག་གནས་སྟངས་ལ་འགྱུར་བ་འགྲོ་བར་ཕན་ཐོགས་ཡོད།
གསར་འགོད་པ། ཚེ་རིང་རྒྱལ།
རེད་རེད། ཀླུ་མཁར་བྱམས་ཟེར་བའི་ལས་ངན་ཁྱེད་ནས་ཀྱང་ཤེས་ནས་ཅིག་བཤད་ཡོད་ན་དེ་རིང་གི་ཚད་འདིར་ལྷུང་དགོས་དོན་མེད་པ ་་་་་་་ཨོམ་མ་ཎི་པདྨེ་ཧཱུམ།།།
རེད་རེད། བསམ་ཚུལ་མི་མཐུན་སའང་རེ་འགག་ཡོད་ཀྱང་། གཞི་རྩའི་འདི་ལྟར་ཤེས་ནས་བཤད་ན་ཉན་སྤྲོ་བོ་འདུག་་་་་་
་་་་་ བོད་རྒྱ་འབྲེལ་མོལ་ཐད་ནས་བོད་ཕྱོགས་ནས་རང་འགུལ་ལམ་འུ་ཐུག་གིས་ཕར་ཕྱོགས་ལ་འབྲེལ་མཐུད་མ་བྱས་ན་ལེགས། རྒྱ་ནག་དམར་ཕྱོགས་སྒེར་གཅོད་ལམ་ལུགས་མཇུག་མ་སྒྲིལ་ན། བོད་རྒྱ་འབྲེལ་མོལ་རྣལ་མ་ཞིག་འབྱུང་མི་སྲིད། ་་་ཟེར།