གཟའ་ཕུར་བའི་ཉིན་ཨ་རིའི་གྲོས་ཚོགས་གོང་མའི་འཐུས་མི་གཉིས་ཀྱིས། རྒྱ་གཞུང་གིས་ཀོ་ཀྲི་ཧྲིན་གང་མགྱོགས་ཀློད་གྲོལ་དགོས་པའི་གྲོས་གཞི་བཏོན་འདུག
ཟླ་འདིའི་ཕྱི་ཚེས་ ༡༣ ཉིན་ཨ་རིའི་གྲོས་ཚོགས་གོང་མའི་དམངས་གཙོ་ཚོགས་པའི་འཐུས་མི་བྷར་བྷ་རཱ་དང་( Barbara Boxer)དང་། སྤྱི་མཐུན་ཚོགས་པའི་འཐུས་མི་ཇའོ་ཧོན་(John Corning)རྣམ་གཉིས་ཀྱིས་མཉམ་དུ་གྲོས་གཞི་ཞིག་བཏོན་ཏེ། ད་ལྟ་བཙོན་འོག་ཡོད་པའི་འགྲོ་བ་མིའི་ཐོབ་ཐང་ཁྲིམས་རྩོད་པ་ཀོ་ཀྲི་ཧྲིན་རྒྱ་གཞུང་གིས་གང་མགྱོགས་ཀློད་གྲོལ་གཏོང་དགོས་པ་མ་ཟད། ཀོ་ཀྲི་ཧྲིན་རང་ཉིད་ཀྱི་བློ་འདོད་གཞིར་བཟུང་ཨ་རིར་ཡོང་བཅུག་སྟེ་བཟའ་ཟླ་དང་བུ་ཕྲུག་ལྷན་འཛོམས་བྱ་དགོས་པ་བརྗོད་འདུག
ཉིན་དེར་རང་དབང་ཞེས་པའི་ཨ་རིའི་འགྲོ་བ་མིའི་ཐོབ་ཐང་ཚོགས་པ་གསར་འཛུགས་གནང་མཁན་ཇའོ་སའེ་ཧྥེ་ (Joseph)ལགས་ཀྱིས་ཀྱང་བསྒྲགས་གཏམ་ཞིག་སྤེལ་ཏེ། ཨ་རིའི་གྲོས་ཚོགས་གོང་མའི་འཐུས་མིས་ཆབ་སྲིད་ཤོག་ཕན་ཚུན་གྱི་རྒྱ་ལས་བརྒལ་ཏེ། མཉམ་འབྲེལ་ཐོག་གྲོས་གཞི་དེ་འདྲ་ཞིག་བཏོན་པར་བསྔགས་བརྗོད་དང་། མ་འོངས་པར་གྲོས་གཞི་དེར་གྲོས་ཚོགས་གོང་མའི་ནང་རྒྱབ་སྐྱོར་ཐོབ་རྒྱུའི་རེ་སྐུལ་དང་། དེ་བཞིན། ཁོང་གིས་རྒྱ་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་ཀོ་ཀྲི་ཧྲིན་ཀློད་གྲོལ་གཏོང་དགོས་པ་བརྗོད་འདུག
ཀོ་ཀྲི་ཧྲིན་ནི་རྒྱ་ནག་ནང་སྙན་གྲགས་ཅན་གྱི་འགྲོ་བ་མིའི་ཐོབ་ཐང་ཁྲིམས་རྩོད་པ་ཞིག་ཡིན་ལ། འགྲོ་བ་མིའི་ཐོབ་ཐང་དོན་གཉེར་བ་དང་ཆོས་འཁོར་རྩ་རླུང་སྒོམ་སྒྲུབ་པ་དག་གི་ཁེ་དབང་སྲུང་ཆེད་ཁྲིམས་རྩོད་བྱས་པའི་རྐྱེན་གྱིས། རྒྱ་གཞུང་གིས་སྔ་ཕྱིར་ཁོང་ལ་འཇིགས་སྐུལ་གཅར་རྡུང་བྱས་ཡོད་པ་མ་ཟད། ༢༠༠༥ ལོ་ནས་བཟུང་སྟེ་ཁོང་གི་ཁྲིམས་རྩོད་པའི་ལག་ཁྱེར་རྩིས་མེད་དང་། ཉེས་མིང་སྣ་ཚོགས་བཏགས་སྟེ་འཇུ་བཟུང་བཙོན་འཇུག་འོག ཐེངས་མང་པོར་གར་ཡོད་ཆ་མེད་དུ་གྱུར་བའི་གནས་ཚུལ་བྱུང་ཡོད་པ་རེད།
གསར་འགོད་པ། ཚེ་རིང་རྒྱལ།
དེ་ནི། ང་ཚོས་ད་ལྟའི་བར་དུ་ཁ་ཕར་འཁོར་ནས་སྐད་ཆ་བཤད་ཤེས་པ་མ་གཏོགས། ཁ་ཚུར་འཁོར་ནས་བསམ་གཞིགས་གཏོང་མི་ཤེས་པའི་དབང་གིས་བྱུང་བ་རེད། ང་ཚོས་བོད་ནང་གི་འཐབ་རྩོད་པ་རེ་རེའི་མི་ཚེ་ལོ་རྒྱུས་དང་། དམིགས་ཡུལ། འཚོལ་སྙེགས། ཤེས་ཡོན་གནས་ཚད། འཐབ་རྩོད་ཀྱི་བརྒྱུད་རིམ་རེ་རེ་ཞིབ་ཕྲའི་སྒོ་ནས་འཛམ་གླིང་གི་ཚོགས་སྡེ་ཁག་ལ་མཁོ་སྤྲོད་བྱེད་ཤེས་རྒྱུ་ཕར་ཞོག ཐ་ན། ག་རེ་ཡིན་ནམ། ཞེས་བསམ་གཞིགས་ཕྲན་ཙམ་མེད་པར་ཁ་ནས་གང་བྱུང་དུ་ཕ་རོལ་བོར་དྲི་བ་འཁོད་མཁན་འུ་ཅག་བོད་པ་རང་ཚོས་ཀྱང་། བོད་ནང་གི་འཐབ་རྩོད་པ་དག་གིས་ལོ་རྒྱུས་གནས་སྟངས་མག་མོག་ཙམ་དང་། ཐ་ན་ཕལ་ཆེ་བས་དེ་ཙམ་ཡང་ཤེས་ཀྱིན་ཡོད་པ་མ་རེད། དེ་ལྟ་བུའི་ཞི་གཏུགས་ཤིག་ལ་གཞན་གྱིས་ཅི་ལྟར་བདག་པོ་རྒྱག་དགོས་པ་རེད། མ་གཞི་ཕྱི་རོལ་རྒྱུ་རྐྱེན་སྣ་ཚོགས་པ་ཡོད་ནའང་། བརྒྱ་ཆའི་དགུ་བཅུ་གོ་དགུ་ནི་ང་ཚོ་རང་གིས་མ་འཇོན་པས་རེད་ལོ།
ད་བར་རྒྱ་གཞུང་གི་སྡུག་རྩུབ་ཆེ་བའི་སྲིད་བྱུས་ལས་བོད་ནང་རང་ལུས་མེར་བསྲེགས་དཔའ་བོ་ལྔ་བཅུ་ལྷག་ནི་བཙན་བྱོལ་རེ་བཅོལ་ཕུགས་བཅོལ་བྱ་རྒྱུའི་ཨ་རིའི་གྲོས་ཚོགས་ནང་གྲོས་ཆོད་འཁྱེར་འཇོག་མི་ཐུབ་པ་རྒྱུ་མཚན་གང་ཡིན་ནམ། ཡང་ན་སྲིད་དོན་སྣེ་འཁྲིད་དེ་ཚོར་ངེད་ཚོའི་མགྲིན་ཚབ་པས་གོ་བརྡ་སྤྲད་མི་ཐུབ་པའམ་ཡང་ན་འཇོན་མེད་དམ། རྒྱུ་དངོས་སྤྲོད་དགོས་ཀྱི་ཡོད་དམ།
ང་ཚོ་བོད་མི་སྟོང་ཕྲག་མང་པོ་འཛིན་བཟུང་དང་། བཙོན་འཇུག མནར་གཅོད་དང་རྡུང་རྡེག་སོགས་ཡ་ང་བའི་གནས་སྟངས་མང་པོ་ཞིག་བྱུང་དང་འབྱུང་བཞིན་ཡོད་ཀྱང་། དེ་དག་མ་མཐོང་བར་རྒྱ་མི་ཁྲིམས་རྩོད་པ་གཅིག་ལ་ཨ་རིའི་གྲོས་ཚོགས་མན་ནས་རྒྱབ་སྐྱོར་དེ་འདྲ་གནང་དགོས་དོན་རྒྱུ་རྐྱེན་གང་ལ་ཐུག་པ་རེད་དམ།
བོད་མིའི་ཡ་ང་བའི་གནས་སྟངས་རྣམས་ནམ་ཡང་མཐོང་ཡང་མ་མཐོང་བའི་ཁུལ་དུ་འཇོག་རྩིས་རེད་དམ།
ཕུར་བའི་མ་རེད། ཕུར་བུའི་རེད།