བོད་རིགས་གློག་བརྙན་བཟོ་སྐྲུན་པ་དོན་འགྲུབ་དབང་ཆེན་ལ་ ༢༠༡༢ ལོའི་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ཐོབ་འདུག
ཁ་སང་ཕྱི་ཚེས་ ༡༣ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་གསར་འགོད་རང་དབང་སྲུང་སྐྱོབ་ཚོགས་པས་ (Committee to Protect Journalist) ༢༠༡༢ ལོའི་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ (International Press Freedom Awards) ཐོབ་མཁན་གསར་འགོད་པ་བཞིའི་མིང་ཁྱབ་བསྒྲགས་བྱས་ཡོད་པ་དང་། དེ་དག་ནི། བྷི་རཱ་ཛལ་ནས་ཡིན་པ་མའུ་རེ་ཀོོ་ནེཀ་ (Mauri Konig) དང་ཁཱ་ཛ་ཀི་སི་ཐན་ནས་ཡིན་པ་ཨ་ཛེམ་ཇོན་(Azimjon Askarow)། ལེ་བྷི་རེ་ཡའི་མའེ་ཨ་ཛན་གྷོ་(Mae Azango)། བོད་མི་དོན་འགྲུབ་དབང་ཆེན་བཅས་ཡིན་འདུག
རྒྱལ་སྤྱིའི་གསར་འགོད་རང་དབང་སྲུང་སྐྱོབ་ཚོགས་པའི་ཚོགས་གཙོ་ཇོལ་སེ་མོན་ (Joel Simon) གྱིས། “གསར་འགོད་པ་འདི་དག་གིས་བདེན་པའི་ཆེད་དུ་རླབས་ཆེན་གྱི་ལས་དོན་བསྒྲུབས་པ་དེས་ང་ཚོར་བློ་སྟོབས་བསྩལ་བྱུང་། ཨ་ཛེམ་ཇོན་དང་དོན་འགྲུབ་དབང་ཆེན་གཉིས་ཀྱིས་ཛ་དྲག་གནས་སྟངས་སྐོར་གསལ་བསྒྲགས་བྱས་རྐྱེན་འཇུ་བཟུང་བཙོན་འཇུག་བྱས་ཡོད། ཁོང་གཉིས་ལ་རང་དབང་མ་ཐོབ་པར་དུ་ང་ཚོ་རང་དགར་འདུག་གི་མིན་ ” ཞེས་བརྗོད་འདུག
ཨ་ཛེལ་ཇོན་གྱིས་ཁཱ་ཛ་ཀི་སི་ཐན་ནང་གི་དཔོན་རིགས་ཚོའི་ལྐོག་ཟ་རུལ་སུངས་དང་སྡུག་སྤྱོད་སྐོར་ཕྱིར་བསྒྲགས་བྱས་རྐྱེན་འཇུ་བཟུང་གིས་ཚེ་བཙོན་དུ་བཅུག་ཡོད་པ་དང་། དོན་འགྲུབ་དབང་ཆེན་གྱིས་རྒྱ་ནག་གི་དབང་སྒྱུར་འོག་ཡོད་པའི་བོད་མི་ཚོའི་དཀའ་སྡུག་དང་མངོན་འདོད་གློག་བརྙན་དུ་ཕབ་ལེན་བྱས་རྐྱེན། རྒྱ་གཞུང་གིས་འཇུ་བཟུང་བྱས་ཏེ་ལོ་དྲུག་གི་ཁྲིམས་ཐག་བཅད་ཡོད།
འབྱུང་འགྱུར་ཕྱི་ཟླ་ ༡༡ པའི་ཚེས་ ༢༠ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་གོང་གི་གསར་འགོད་པ་བཞི་ལ་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ཐེངས་ ༢༢ པ་དེ་སྤྲོད་རྒྱུ་ཡིན་འདུག
གསར་འགོད་པ། བནྡེ་སྐྱབས།
ཧ་ཅང་བཟང་། དེ་ནི་མི་བོ་ཁོང་དང་ཁོང་ལ་རྒྱབ་སྐྱོར་བ་ཚོའི་གྲུབ་འབྲས་ཞིག་རེད། ལམ་བུ་འདི་བརྒྱུད་ནས་ཁོང་དང་འདྲ་བའི་བོད་ཞེན་བཙོན་པ་ཚོའི་ལམ་བུ་གསར་པ་ཞིག་གང་མགྱོགས་གཏོད་པར་རེ།།
བྱ་དགའ་འདི་རིགས་ཀྱིས་སྐབས་རེར་འབུལ་ཡུལ་དེའི་གནས་སྟངས་སྡུག་ཏུ་གཏོང་བ་ཡང་འདུག གང་ལྟར་ཐལ་མོ་རྡེབ་རྒྱུ་རང་རེད།
ཡག་པོ་བྱུང་འདུག
དོན་འགྲུབ་དབང་ཆེན་མྱུར་དུ་བཙོལ་གྲོལ་ཐོབ་པའི་སྨོན་ལམ་ཡོད།
འཚམས་འདྲི་བཀྲིས་བདེ་ལེགས་ཞུ།
དོན་གྲུབ་དབང་ཆེན་བསམ་པ་འགྲུབ་པར་ཤོག
གཞི་ལུས་བོད་མིར་རང་དབང་ཐོབ་པར་ཤོག
འཚམས་འདྲི་བཀྲིས་བདེ་ལེགས་དང། བཙན་བྱོལ་ནང་གི་ཆབ་སྲིད་ཚོགས་པ་ཁག་གི་ལས་འགུལ་ནང་ཁོང་ནི་མངོན་གསལ་དེ་ཙམ་མི་མངོན་རུང་རྒྱལ་སྤྱིའི་གསར་འགོད་ནས་གཟེངས་རྟགས་གནང་བ་དེས་བོད་དོན་ཐོགས་སྔར་ལས་དོ་སྣང་བྱ་མཁན་མང་བ་ཡོང་ངེས། ཁོང་གཟུགས་གཞི་བདེ་ཐང་ཐོག་རང་དབང་ཐོབ་པར་ཤོག།