ཞལ་ཆེམས་ཞིབ་ཏུ་ཀློགས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༦༧ སྟེང་གི་རྩོམ་སྒྲིག་པའི་གཏམ།

དྷ་རམ་ས་ལར་དམིགས་བསལ་ཚོགས་ཆེན་ཐེངས་གཉིས་པ་སྐོང་རྒྱུ་རེད། བོད་ནང་གི་ཛ་དྲག་གནས་སྟངས་ལ་བོད་གཞུང་མང་གཉིས་ཀྱིས་གདོང་ལེན་གནང་སྟངས་ལ་གྲོས་ཁ་བསྡུར་རྒྱུ་རེད། བོད་ནང་ཛ་དྲག་ཡིན་པ་ཤེས་འདུག ཛ་དྲག་གནས་སྟངས་ལ་རྒྱབ་དཔུང་གི་ལས་འགན་ཡོད་པའང་རྟོགས་འདུག ཉིས་སྟོང་བརྒྱད་ཚུན་ལ་དམིགས་བསལ་ཚོགས་ཆེན་ཐེངས་གཅིག་དང་རྒྱལ་ཡོངས་ཚོགས་ཆེན་ཐེངས་གཉིས་ཚོགས་སོང་། དམིགས་བསལ་ཚོགས་ཆེན་དང་པོར་བོད་ནང་གི་ཛ་དྲག་གནས་སྟངས་སྐོར་རེད། རྒྱལ་ཡོངས་ཚོགས་ཆེན་དང་པོར་བཙན་བྱོལ་བོད་མིའི་སྲིད་འབྱོར་རིག་གསུམ་སྐོར་དང་། གཉིས་པར་༧གོང་ས་མཆོག་གིས་ཆབ་སྲིད་ཐུགས་འགན་བཞག་རྗེས་ཀྱི་བཅའ་ཁྲིམས་བསྐྱར་བཅོས་ཐག་གཅོད་རེད། ད་ཐེངས་སླར་ཡང་བོད་ནང་གི་ཛ་དྲག་གནས་སྟངས་སྐོར་བསླེབས་སོང་། 

    བོད་ཀྱི་དུས་བབ་ཚང་གིས་དེ་སྔའི་དམིགས་བསལ་ཚོགས་ཆེན་དང་རྒྱལ་ཡོངས་ཚོགས་ཆེན་རིམ་པའི་གྲུབ་འབྲས་དང་། ད་རེབ་འཚོགས་འཆར་གྱི་གྲོས་གཞིའི་ཐོག་ལ་བཙན་བྱོལ་ནང་གི་ཤེས་ཡོན་ཅན་དང་ལས་འགུལ་བ་སྐོར་ཞིག་ལ་དགོངས་ཚུལ་དྲིས་ཡོད། འགའ་རེས་དེ་སྔའི་ཚོགས་ཆེན་དག་ལ་གྲུབ་འབྲས་གང་ཡང་མ་ཐོན་ལ། ད་རེབ་ཀྱང་རེ་བ་མེད་སྐོར་བཤད་སོང་། འགའ་རེས་གྲུབ་འབྲས་རྡོག་རྡོག་སྟོན་རྒྱུ་མེད་ཀྱང་དངོས་ཤུགས་བརྒྱུད་གསུམ་ནས་ཐོན་ཡོད་པའི་ཡིད་ཆེས་ཡོད་ཟེར། ཡང་ཁག་ཅིག་གིས་རྒྱ་ནག་དང་རྒྱལ་སྤྱིར་བརྡ་ལན་གསལ་པོ་སྤྲད་དེ་གྲུབ་འབྲས་ཆེན་པོ་བླངས་ཚུལ་བཤད། ཚོགས་ཆེན་འདི་དག་གིས་ནང་དོན་ལས་རྣམ་འགྱུར་གཙོར་བཟུང་བྱེད་ཀྱི་ཡོད་ན། ནམ་ཞིག་རྔམ་རྔམ་རྫིག་རྫིག་གི་རྣམ་འགྱུར་དེ་ཡང་ཁུ་སིམ་བདེ་འཇམ་གྱི་སྣང་ཚུལ་ཞིག་ཏུ་གྱུར་ཏེ། རྒྱ་ནག་དང་རྒྱལ་སྤྱིར་བརྡ་ལན་འཁྱོལ་རྒྱུ་ཕར་ཞོག བོད་པ་ནང་ཁུལ་ནས་ཀྱང་སུན་སྣང་དང་ཁྲེལ་དགོད་བྱེད་མཁན་འབྱུང་སྲིད།     

    ད་རེབ་དམིགས་བསལ་ཚོགས་ཆེན་གྱིས་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་རྣམ་པའི་འབོད་སྒྲར་གཟབ་ནན་གྱིས་ཉན་དགོས། འདས་པོའི་ཞལ་ཆེམས་ཞིབ་ཚགས་ཀྱིས་ཀློག་དགོས། ལུས་པོ་མེ་ལ་བསྒྲོན་ཏེ་ཁུ་ཚུར་གནམ་ལ་འཕྱར་ནས་ “བོད་ལ་རང་དབང་དགོས” ཞེས་པའི་ལ་རྒྱའི་ཀི་རིང་དེ་དག་རྒྱ་གཞུང་ལ་བཏབས་པ་ཡིན་དུ་ཆུགས་ཀྱང་། “རྒྱལ་བ་རིན་པོ་ཆེ་བོད་ནང་ཕེབས་དགོས” ། “རྒྱལ་བ་རིན་པོ་ཆེ་བོད་ནང་གདན་འདྲེན་ཞུ་དགོས”ཞེས་པའི་དགོས་འདུན་འདི་དག་ངྷ་རམ་ས་ལའི་གཞུང་དང་པེ་ཅིན་གཞུང་གང་གིས་གོ་དགོས་ད་དུང་ཞིབ་ཏུ་དཔྱད་དགོས།

            བཤད་ཐུབ་པའི་སྡུག་བསྔལ་དེ་སྡུག་བསྔལ་མིན་ཟེར་བ་ལྟར། འབོད་ཚིག་འདི་དག་གི་རྒྱབ་ཏུ་བརྗོད་མི་བཏུབ་པའི་སྡུག་བསྔལ་ཅི་ཞིག་སྦེད་ཡོད་མེད་ཞིབ་ཏུ་སྔོག་དགོས། དཔའ་བོ་དཔའ་མོ་འདི་དག་བཞུད་ཁར་ཤོག་བུ་དཀར་པོའི་སྟེང་ལ་སྣག་རིས་ནག་པོར་འཁོད་པའི་ཛ་དྲག་གི་ཞུ་ཚིག་དེ་དག་བསྐྱར་དུ་ཀློག་དགོས།“བོད་པ་ནང་ཁུལ་མཐུན་ལམ་རྡོག་རྩ་ཆིག་བསྒྲིལ་བྱོས་”ཞེས་པ་འདི་གཞིས་སྲུང་སྤུན་ཟླའི་པུས་མོའི་ལྷ་ང་ས་ལ་བཙུགས་ཏེ་བྱེས་གྱར་བོད་མིར་ཞུ་བ་འཐེན་པའི་འདས་ཁའི་ཞལ་ཆེམས་རེད་ལ། ཆོལ་ཁ་ཆོས་ལུགས་ཕྱོགས་འཐེན་ཅན་ཚོར་ཨ་ཐང་ཆད་པའི་ཐ་ཚིག་ཀྱང་རེད། ད་རེབ་དམིགས་བསལ་ཚོགས་ཆེན་ཐོག་འདས་པོའི་ཞལ་ཆེམས་འདི་དག་གཞུང་ཚོགས་སྒེར་གསུམ་གྱིས་ལག་ལེན་བསྟར་ཕྱོགས་ལ་གྲོས་བསྡུར་བྱེད་དགོས། གྲོས་ཆོད་འཇོག་དགོས། ལས་རིམ་བསྒྲིག་དགོས། མནའ་གན་འཇོག་དགོས། འདི་བོད་ཕྱི་ནང་གཉིས་ཀྱི་ཛ་དྲག་གནས་སྟངས་ལ་གདོང་ལེན་གནང་ཕྱོགས་ངོ་མ་དེ་ཡིན།