སྣང་ཚུལ་སྐྱ་བོ།

སྟོང་གླེང་གི་སྐོར་ཚོ།

སྡེ་དགེ་ཀརྨ་རྣམ་དག

གལ་ཏེ་མི་རིགས་ཤིག་ལ་མཚར་སྡུག་གི་སྔོན་ཆད་ཅིག་ཡོད་མྱོང་ན། དེ་ནི་མི་རིགས་དེའི་རང་དབང་དང་གུ་ཡངས་ཀྱི་འཚོ་བར་རོལ་བ་དང་། ཤེས་རིག་དང་བསམ་པའི་དཔལ་ཡོན་དར་བའི་དུས་ཚིགས་ཤིག འགན་འཁུར་གྱི་འདུ་ཤེས་དང་མཉམ་རུབ་ཀྱི་ནུས་ཤུགས་སྒྲིམ་པའི་ཁོར་ཡུག་ཅིག མ་འོངས་ཕུགས་བསམ་རིང་ལ་ཁ་བཤད་ལག་ཏུ་ལེན་པའི་མིའི་རིགས་ཀྱི་སྤྱི་ཚོགས་ཤིག་ཡིན་འོས་ལ། གལ་ཏེ་མི་རིགས་ཤིག་ལ་གཟི་བརྗིད་ཀྱི་སྔོན་ཆད་ཅིག་ཡོད་མྱོང་ན། དེ་ནི་བསམ་ཕོད་པ་དང་སྒྲུབ་ཕོད་པ།  རྩོད་ལེན་དང་ཐོབ་ཤོར་གྱི་རེ་དོགས། དཀའ་སྡུག་ལ་གདོང་གཏོད་པའི་སྤོབས་པ་དང་།  རང་རིགས་ཀྱི་ “ལ་རྒྱའི་མགོ་བོ་གཞན་གྱི་རྐང་འོག་ཏུ་མི་འཇོག” པའི་སྙིང་སྟོབས་དང་ཆོད་སེམས་དེ་ཡིན་འོས།  ང་ཚོ་གངས་རྒྱུད་པའི་མི་རིགས་འདི་ལ་དེ་འདྲའི་སྔོན་ཆད་ཅིག་ཡོད་ཨེ་མྱོང་ངམ་ཟེར་བའི་དབང་དུ་བཏང་ན། ལོས་ཀྱང་ཡོད་དེ། ལོ་རྒྱུས་ཀྱི་གཙང་བོའི་གཞོགས་ན་འགྲེངས་ཏེ། རྒྱང་ལྟ་ཡིས་ཆུ་མོའི་མགོ་ཁུངས་ཐེངས་གཅིག་ཉུལ་ན། རང་རིགས་ཀྱི་སྐད་ཡིག་དང་རྒྱལ་ཁབ་ཀྱི་ཁྲིམས་ལུགས་གསར་གཏོད། ཕྱི་ཕྱོགས་ཀྱི་ཤེས་རིག་ནང་འདྲེན་དང་དར་སྤེལ། ཁྲང་ཨན་རྒྱལ་སའི་མདུན་ཐང་ལ་དཔུང་དམག་གི་སྒར་ཆེན་བཏབ་པ་དང་། གངྒཱའི་ཆབ་གཞོགས་སུ་མཐོ་སྒང་གི་རྡོ་རིང་བསླངས་པ་སོགས་ད་ལྟ་དྲན་ནའང་ཡི་ག་སངས་པའི་བོད་བཙན་པོའི་དངོས་བྱུང་གི་གཏམ་རྒྱུད་འདི་དག་མཐོང་ན།  ང་ཚོ་ནི་ལོ་རྒྱུས་རིང་བའི་མི་རིགས་ཤིག་དང་རླབས་ཆེན་གྱི་མི་རིགས་ཤིག་ཡིན་པའི་སྤོབས་སེམས་ཤིག་ངང་གིས་སྦྱིན་མི་ཡོང་ངམ།  འོན་ཀྱང་མ་འོངས་ཁ་བའི་བདག་པོ་དང་། དུས་རབས་ཀྱི་རྩོད་ལེན་པ།  མི་རིགས་ཀྱི་སྣེ་ཤན་པ། བཙན་པོའི་སྙིང་སྟོབས་དང་ལོ་རྒྱུས་མ་འོངས་བུ་ཚའི་ལག་ཏུ་བརྒྱུད་སྤྲོད་བྱེད་མཁན་ཏེ། ཉམ་ང་བའི་མི་རིགས་ཤིག་གི་རེ་ལྟོས་ཡོད་ཚད་ནས་ཡོད་ཚད་འཆོལ་ས་རུ་འབོད་པའི་ད་ལྟ་རང་རེའི་གཞོན་རབས་ཀྱི་སྐོར་ཚོ་ཕལ་ཆེ་བ་ཞིག་མི་རིགས་མི་རིགས། མཐུན་སྒྲིལ་མཐུན་སྒྲིལ། ལ་རྒྱ་ལ་རྒྱ། གསར་གཏོད་གསར་གཏོད། སྙིང་སྟོབས་སྙིང་སྟོབས། ཕུགས་བསམ་ཕུགས་བསམ། མདུན་སྐྱོད་མདུན་སྐྱོད་ཅེས་གླེང་ལ། དེ་དག་རེ་རེའི་མཇུག་ཏུ་དགོས། དགོས། ཞེས་གྲངས་ལྟར་ཟློ་བཞིན་དུས་རབས་ཀྱི་དཀྱོག་མཚམས་ན།  ལག་ལེན་དང་གོམ་འགྲོས་ཀྱི་རྡོག་མགོ་མ་ཐེག་པར་ཧད་དེ་འགྲེངས་ནས་ཡོད།  “འདི་ནི་སེམས་ནང་ལ་དཀའ་སྡུག་གི་རང་དབང་མཚུངས་ནའང་ལུས་ཕུང་ལ་མནར་གཅོད་ཀྱི་ན་ཟུག་ཐེབས་མི་དགོས་པའི་རང་དབང་ཙམ་ཡོད་པ། རང་ཚུད་བཙན་བྱོལ་སྤུན་ཟླ་ ”  མ་གཞི་ད་ལྟ་ནི་དཔལ་འབྱོར་གྱི་དུས་རབས་ཤིག   འཕེལ་རྒྱས་ཀྱི་དུས་རབས་ཤིག  སད་རྟོག་གི་དུས་རབས་ཤིག  བསམ་གཞིག་གི་དུས་རབས་ཤིག གསར་གཏོད་ཀྱི་དུས་རབས་ཤིག རང་རྒྱལ་གྱི་དུས་རབས་ཤིག  ཤེས་རིག་གི་དུས་རབས་ཤིག་ཡིན་ལ།  བྱེ་བྲག་བོད་མི་རིགས་ལ་མཚོན་ན་སྲུང་སྐྱོབ་ཀྱི་དུས་རབས་ཤིག རྩོད་ལེན་གྱི་དུས་རབས་ཤིག  ལག་ལེན་གྱི་དུས་རབས་ཤིག  ཐབས་མཁས་ཀྱི་དུས་རབས་ཤིག་ཏུའང་སླེབས་ནས་ཡོད།

དུས་རབས་ཀྱི་ཁུག་སོ་འདི་འདྲ་ཞིག་ནས་ད་དུང་ང་ཚོས་ “རྙིང་པ་ཐམས་ཅད་ལྷ་ཡི་སྲོལ་དང་གསར་པ་ཡོད་ཚད་བདུད་ཀྱི་འཕྲུལ” དུ་མི་སེམས་པར་གསར་རྙིང་གང་ཞིག་ཡིན་རུང་ཕན་ཐོགས་ངེས་ཅན་རེ་ཡོད་ན་དང་དུ་ལེན་པ་དང་ཕན་ཐོགས་མེད་ན་འདོར་བ་ལ་ཆགས་ཞེན་གྱིས་ཕངས་སེམས་འཆོར་དགོས་དོན་འདུག་གམ།  འདི་ཕ་མེས་ནས་ཡོད་པའི་ལུགས་སྲོལ་རེད། དེ་ཡང་མེས་ནས་བརྒྱུད་པའི་གོམས་གཤིས་རེད་ཅེས་རྩོད་ཅིང་ཚིམས་ནས་ཡོད། ད་ལྟ་ད་དུང་ཡང་ ”ན་ལ” གཉིས་དེ་ཉིད་ལ་འཇུག་མིན་དང་སུམ་ཅུ་པའི་འགྱུར་ཕྱག་དངོས་ཡིན་མིན་ལ་”སྨྲ་སྒོ་དང་སི་ཏུ། ཞ་རྣམ་པྲ་”གསུམ་གྱི་འདོད་ཚུལ་མི་མཐུན་པ་ལྟ་བུ་སོགས་ནམ་ཡང་ཐག་ཆོད་དུ་མེད་པའི་རྩོད་ཤགས་རེའི་མཇུག་སྐྱོང་བཞིན་སྡོད་པ་ལས།  སྐབས་བབ་བོད་སྐད་ཡིག་བྱིངས་དང་མཐུན་ལ། བོད་ཀྱི་བརྡ་སྤྲོད་ཀྱི་དགོངས་དོན་བཞིན་འབྲི་ཀློག་བཤད་གསུམ་ཐུབ་པའི་དྭངས་གཙང་གི་ཁོར་ཡུག་ངེས་ཅན་ཞིག་སྐྲུན་པའི་འདུ་ཤེས་འཁྲུངས་ན་དོན་སྙིང་རེ་མི་ཆེ་ཨང་།  སློབ་གྲྭ་ཁག་ལ་མཚོན་ནའང་ཤེས་ཀྱང་ཆོག་མ་ཤེས་ཀྱང་རུང་ཕན་ཐོགས་ལྷག་པོ་གང་ཡང་མེད་པའི་རྩོད་ཤགས་འགྱེད་མཚམས་རེ་ཞིག་བསྐྱུར་ཏེ།   མཁས་དབང་ ”ཉན་ཤུལ་མཁྱེན་རབ་འོད་གསལ་གྱི་སུམ་རྟགས་” ལྟ་བུ་སློབ་གཞིར་བཞག་སྟེ་སྦྱང་བརྩོན་བྱས་ན་དོན་དངོས་ལག་ལེན་ལ་ཕན་ཐོགས་དེ་མི་ཆེ་གྲང་།  སྔར་ཡོད་གཞུང་ལུགས་ཀྱི་འགྲེལ་ལ་འགྲེལ་བ་བྲིས་ཏེ་འགྲེལ་བའི་རི་བོ་བརྩེགས་པ་ལས། བོད་ཡིག་གཅིག་པུའི་ཐོག་ནས་རྒྱུས་ལོན་མི་ཐུབ་པའི་དེང་རབས་ཀྱི་དགོས་མཁོའི་ཤེས་བྱ་དག་བོད་ཡིག་ཏུ་ཕབ་སྒྱུར་གྱིས། ཚད་མཐོའི་རིག་གནས་ནང་འདྲེན་བྱ་རྒྱུ་ནི་ད་ལྟའི་མི་རབས་ཀྱི་འོས་འགན་དུ་སོང་ཡོད།  སློབ་སྦྱོང་གི་ཐད་ནས་བསམས་ན་ང་ཚོས་དབྱིིན་ཡིག་སྦྱོང་། ལོ་རྒྱུས་སྦྱོང་། སྙན་ངག་སྦྱོང་། བརྡ་སྤྲོད་སྦྱོང་། ནང་ཆོས་སྦྱོང་། སློབ་མས་ཚང་མ་སྦྱོང་ལ་དགེ་རྒན་གྱིས་ཚང་མ་སློབ། རེད་དེ།  ང་ཚོས་ཚང་མ་ཤེས་མེད་ལ། སྤུས་ཚད་ངེས་ཅན་ཞིག་དེ་བས་ཤེས་མེད། ཚང་མ་འོལ་སྤྱོད་ཙམ་དུ་ལུས་ཡོད།  དགོས་དགོས་ཀྱི་སྟོང་གླེང་མང་པོས་མི་ཚེ་ལ་བཞི་ཤད་མི་འཐེན་པར་རང་གང་ལ་སྤྲོ་ཞིང་མོས་པའི་རིག་གནས་ཤིག་བདམས་ཏེ། རིགས་གཅིག་རྐང་འཛིན་དང་ཆེད་སྦྱོང་། ཞིབ་འཇུག་གི་ཁ་ཕྱོགས་སུ་སྐྱོད་ཐུབ་ན་ཅི་མ་རུང་ཨང་། དེ་ལྟར་མ་བྱུང་ཡང་རང་གིས་གང་ལ་སྦྱངས་པའི་རིག་གནས་དེ་ཉིད་སུ་ཞིག་གི་མདུན་དུ་སོང་ནའང་ཤེས་སྙམ་གྱི་སྤོབས་གདེང་ཞིག་རྙེད་པ་བྱུང་ན་སློབ་སྦྱོང་གི་འབྲས་བུ་ཐོན་པ་ཡིན་ལ། རང་ཉིད་ཀྱི་མི་ཚེ་དོན་ལྡན་དང་གཟི་བརྗིད་དུའང་སེམས་ལོས་ཆོག

ཤེས་རིག་ཕྱི་འདྲེན་གྱི་མི་རབས།

རི་ཆུ་གོམ་ལ་གཞལ་བའི་འགྲུལ་བཞུད་ཀྱི་དུས་རབས་ནས་ང་ཚོའི་མེས་པོ་དག་རིག་རྟོག་སད་ཡོད་ལ། དཀའ་སྡུག་གི་གོ་རིམ་མང་པོ་ཞིག་བརྒྱུད་དེ་རླབས་ཆེན་གྱི་ཤེས་རིག་ནང་འདྲེན་བྱས་ཡོད།  རླབས་ཆེན་གྱི་མེས་པོ་མཇུག་རྫོགས་པའི་སྟོན་མཇུག་དེ་ནས་ད་ལྟའི་བར་ང་ཚོ་ལ་དོན་དམ་གྱི་མཁས་དབང་དང་། རླབས་ཆེན་གྱི་མི་སྣ་བྱུང་མྱོང་ངམ་ཞེ་ན།  ངོ་མ་དྲི་ཚིག་དེ་ནི་ངའི་གཤེད་མ་རུ་སྣང་འོང་ལ། དྲན་ན་མིག་ཟུང་གི་མཆི་མ་ཤམ་ཤམ་དུ་བཞུར་འོང་། ངོ་མ་བཤད་ན་དུས་ཚིགས་དེ་ནས་ད་ལྟའི་བར་དོན་དམ་གྱི་མཁས་དབང་དང་། རླབས་ཆེན་གྱི་མི་སྣ་མ་བྱུང་བ་མིན་མོད།  ཁོང་ཚོས་རང་མི་རིགས་ཀྱིི་ཆེད་དུ་མགོ་བོ་དགྱེ་མྱོང་ལ། རྔུལ་ཆུ་གཏོར་མྱོང་། ལ་ལུང་བརྒལ་ཡོད་ལ། བློས་བཏང་བྱས་ཡོད། ཤེས་རིག་སྦྱངས་ཡོད་ལ། རྩོམ་ཡིག་བྲིས་ཡོད།  རེད་དེ།  མཐའ་མཇུག་གི་ཕམ་ཁ་ནི་ཁོ་ཚོ་རང་ཉིད་ཀྱིས་འཁྱེར་དགོས་ཁེལ་ཡོད། ཁོ་ཚོ་སྐྱོ་གདུང་རུམ་གང་ཁྱེར་ནས་བུད་སོང་། ཁོ་ཚོ་ནི་རང་མི་རིགས་ཀྱིས་བསམ་གཟས་ནས་ཕྱིར་འོང་མེད་པའི་འཕྲང་ལམ་དུ་བརྫངས་བཞག་པ་རེད། དྲིན་ལན་ལོག་བཅལ་བྱས་པ་རེད། ཁོ་ཚོ་ནི་ངའི་དྲན་ཡུལ་ནས་ནམ་ཡང་ཡལ་དུ་མེད་པའི་ ”མཁས་དབང་དགེ་འདུན་ཆོས་འཕེལ་དང་དཔལ་དོན་གྲུབ་རྒྱལ་” རྣམ་པ་ལྟ་བུ་རེད།  ད་དུང་མཚམས་འདི་ནས་ཆེས་དགའ་དུང་གི་མིག་ཆུ་ཤམ་ཤམ་བཞུར་བཞིན་དྲན་ཡོང་བ་ནི་དཀའ་སྡུག་ལ་ནམ་ཡང་མགོ་བོ་སྒུར་མ་མྱོང་ཞིང་།  བསམ་ཕོད་པ། བཤད་ཕོད་པ། ཁ་བཤད་ལག་ཏུ་ལེན་ཕོད་ལ། ”སྒེར་ཚུགས་དང་བློ་འབྱེད་བསམ་བློ།” ལར་ཞེན་དང་སྙིང་སྟོབས།  རླབས་དང་ཚད་མཐོ་ཞིང་འགྱུར་མེད་ཀྱི་ལྟ་གྲུབ་ཡོད་པ། ཅི་ལ་ཐུག་ཀྱང་རང་ཚུགས་འཆོར་མ་མྱོང་ལ། ནམ་ཡང་ཨ་ཐང་ཆད་མ་མྱོང་བའི་དཔའ་བོ། དོན་དམ་གྱི་མཁས་དབང་། རླབས་ཆེན་གྱི་སློབ་དཔོན་ ”འབའ་པ་ཕུན་ཚོགས་དབང་རྒྱལ་” རེད།  ཁོང་ནི་སྟོབས་ཆེན་རྒྱལ་ཁབ་ཅིག་གིས་གཉའ་ནས་མནན་ཀྱང་མ་ནོན་ལ། མི་ལོ་བཅོ་བརྒྱད་ཀྱི་བཙོན་ཁང་འཛམ་གླིང་ན་རླབས་ཆེན་ཚན་རིག་གི་སློབ་དཔོན་འཐོན་སའི་སློབ་གཉེར་ཁང་དུ་བསྒྱུར་པའི་གངས་རིའི་དཔའ་བོ་ཁེར་རྐྱང་ཞིག་རེད།  

འོན་ཀྱང་མི་རིགས་ཤིག་གི་ལས་དབང་གི་ཆེད་དུ་དཀའ་སྡུག་ཅི་ཙམ་མྱོང་བ་དང་ཚེ་སྲོག་གཏའ་མར་བཞག་པའི་བློས་བཏང་ཅི་ཙམ་གནང་ཡོད་པ་ཚོར་མཁན་ཧ་ཅང་ཉུང་།  དྲིན་ལ་དྲིན་དུ་མི་ཚོར་ཞིང་ལེགས་ཉེས་དང་དཀར་ནག་ཤན་འབྱེད་ཀྱི་བློ་མིག་རྒྱ་ཁབ་ཀྱི་བུ་ག་ལས་དོག་པའི་ཅོལ་ཆུང་འགའ་རེས། ཁོང་ལ་རྒྱལ་ཁབ་དང་མི་རིགས་འཚོང་མཁན་གྱི་ཞྭ་མོ་གཡོག་བཞིན་ལོ་རྒྱུས་ཀྱི་ཉེས་ཅན་མི་སྣ་རུ་བགྲང་གི་ཡོད།  ཁོང་ལ་ཞྭ་མོ་གཡོག་མཁན་གྱི་གྲལ་ན་མཁྲེགས་འཛིན་དང་རྨོངས་ཞེན་ཅན་ཡོད་ལ།  ཤེས་ཡོན་པ་ཡིན་ཟེར་མཁན་དང་རློམ་མཁན་ཡང་ཡོད།  དེ་དག་གིས་ཁོང་ངོ་ཤེས་མེད།  དོན་དུ་རང་ཉིད་ངོ་མ་ཤེས་པ་དང་ངོས་མ་ཟིན་པ་མིན་ནམ།  ང་ཚོ་ལ་མི་རིགས་ཀྱི་ལས་དབང་སེམས་མཁན། ཤེས་རིག་དར་སྤེལ་དང་ནང་འདྲེན་བྱེད་མཁན་ཡོད་ཀྱང་མིར་བརྩི་ཡི་མེད། མིར་འཇོག་གི་མེད།  མཐོང་གི་མེད། ད་ལྟ་ང་ཚོས་རླབས་ཆེན་གྱི་མི་སྣ་ཁོ་ཚོ་ལྟར་ཤེས་རིག་ནང་འདྲེན་གྱི་ལས་དོན་མ་འཇོན་ནའང་མིག་སྔའི་ཤེས་རིག་སྲུབ་སྐྱོབ་བྱེད་རན་ལ་ཐུག་ཡོད།  འོན་ཀྱང་ད་དུང་དེ་ལས་ལྡོག་སྟེ་སྙིང་རྗེ་ཆེ་མདོག། དཀྱེལ་ཡངས་མདོག གུ་ཡངས་མདོག བསམ་གཞིག་ཆེ་མདོག ལྷག་བསམ་དཀར་མདོག སུ་ལས་ཀྱང་མཁས་མདོག སུས་ཀྱང་མ་འཇོན་པ་འཇོན་མདོག་སྟོན་མཁན་གྱི་རིགས་ཤིག་གིས་ཤེས་རིག་ཕྱི་འདྲེན་གྱི་ལས་དོན་སྤེལ་བཞིན་ཡོད། ཁ་ཐུག་གིས་བཤད་ན་ད་ལྟ་ནང་ཆོས་དབྱིན་ཡིག་ལ་ཕབ་སྒྱུར་ལས་རིམ་གྱི་སྐྱོ་གར་སྣང་ཚུལ་འདི་འདྲ་རེད། ལས་རིམ་འདི་ཅིའི་ཕྱིར་སྐྱོ་གར་ཞིག་ཏུ་ཆགས་སོང་བ་རེད་ཅེ་ན།  ང་ཚོས་མི་རིགས་ཀྱི་ཚེ་སྲོག་ཏུ་འབོད་པའི་སྐད་ཡིག་གི་རྣམ་ཤེས་ནང་ཆོས་ལ་ཐིམ་ནས་ཡོད་པས་རེད། མི་རིགས་གཞན་གྱིས་བོད་ཡིག་ལ་དོ་སྣང་བྱེད་ཀྱི་འདུག་ཅེས་སྤོབས་པ་མཐོ་མདོག་དང་ང་རྒྱལ་ཚ་མདོག མི་རིགས་གཞན་གྱིས་བོད་ཡིག་ལ་དོ་སྣང་བྱེད་པས་བོད་ཀྱི་སྐད་ཡིག་ཡང་དག་དང་རིན་ཐང་གཞི་ནས་རྙེད་ཀྱི་ཡོད་པ་ལྟར་བྱེད། མི་རིགས་གཞན་གྱིས་བོད་ཡིག་ལ་དོ་སྣང་བྱེད་པ་ནི་བོད་ཀྱིི་སྐད་ཡིག་སྙན་དྲགས་པ་དང་བདེ་དྲགས་པ། བོད་ཀྱི་སྐད་ཡིག་ལ་ཤ་ཚ་དང་དུང་ཞེན་ཆེ་དྲགས་པས་ཡིན་ནམ།  སོམས་དང་།  ཁོ་ཚོས་བོད་ཡིག་སྦྱོང་པ་ནི་ནང་ཆོས་ལ་ཞིབ་འཇུག་དང་རྒྱུས་མངའ་ཡོང་ཆེད་རེད།  ཤེས་རིག་ནང་འདྲེན་བྱ་ཆེད་རེད།  ནང་རིག་དབྱིན་ཡིག་ལ་ཕབ་སྒྱུར་ཟིན་ཚེ་འདི་འདྲའི་དགའ་མོས་དང་འདི་འདྲའི་དོ་སྣང་བྱེད་དམ། འདི་ནི་རང་ལ་འགོད་དགོས་པའི་དྲི་རྟགས་ཤིག་རེད།  མཚམས་འདི་ནས་ནམ་ཞིག་ཉམ་ཆུང་བའི་མི་རིགས་འདིའི་སྐད་ཡིག་གི་བླ་སྲོག་ད་ལྟའི་ལེགས་སྦྱར་གྱི་གནས་རིམ་དུ་མི་ལྷུང་བའི་སྨོན་འདུན་ཡང་ཆབས་ཅིག་འདེམས།

གཏམ་རྒྱུད་ལ་འཐིམ་ཉེན་ཆེ་བའི་ལྷག་དཀར།

ད་ལྟ་ང་ཚོས་བདུན་ཕྲག་གཅིག་གི་རེས་གཟའ་ལྷག་པ་ནི་ཆེས་དམིགས་བསལ་གྱི་དམིགས་བསལ་དུས་ཚིགས་ཤིག་ཏུ་ལྟ་བཞིན་ཡོད། ལྷག་དཀར་བརྩི་སྲུང་བྱེད། ལྷག་དཀར་རྗེས་དྲན་བྱེད། ལྷག་དཀར་ཁྱབ་སྒྲོག་བྱེད། ལྷག་དཀར་དགོང་ཚོགས་འཚོག  ཉིན་འདི་དག་གི་རིང་ལ་ང་ཚོས་བོད་སྐད་སྐྱོན། བོད་སྐད་གཙང་མ་སྐྱོན། བོད་ཡིག་འབྲི། བོད་ཡིག་དག་མོ་འབྲི། བོད་ཟས་ཟ། རྩྭམ་པ་ཟ། བོད་ཇ་འཐུང་།  བོད་ལྭ་གྱོན། བོད་གཞས་གཏོང་།  བོད་གླུ་ལེན། ཕ་ཡུལ་གྱི་ཕ་མ་གླེང་། ཕུ་ནུ་མིང་སྲིང་གླེང་། གངས་རི་གླེང་། རྩྭ་ཐང་གླེང་། འབྲི་གཡག་གླེང་། ལུག་ཁྱུ་གླེང་། ལས་དབང་དྲན། གནས་བབས་དྲན། བཙན་པོའི་ལོ་རྒྱུས་དྲན། མ་འོངས་དྲན། ལོས་ཀྱང་ཡིན་ཏེ། འདི་ནི་རྒྱལ་བའི་བླ་གཟའ་ཡིན་ལ། མནར་གཅོད་ཀྱི་རྩུབ་ཤུགས་ཇི་ལྟར་བཙན་རུང་དཀའ་སྡུག་སྣ་དགུའི་འོག་ནས་དཔའ་མ་ཞུམ་པར་གཞིས་ལུས་བོད་མིས་སྤེལ་བའི་ལས་འགུལ་རེད། ད་དུང་སྐྱི་གཡའ་ཞིང་འཇིགས་སུ་རུང་བའི་དུས་ཚིགས་ཉིས་སྟོང་བརྒྱད་ལོར་དར་མགོ་ཚུགས་པའི་རླབས་ཆེའི་བྱ་འགུལ་རེད། འདིས་ནི་ཡུལ་སྲོལ་གོམས་གཤིས་ཀྱི་རང་དབང་མེད་པ། སྐད་ཡིག་རིག་གནས་ཀྱི་རང་དབང་མེད་པ། བཟའ་རྒྱུ་ཡོད་ཀྱང་ཟ་དབང་མེད་པ། གོན་རྒྱུ་ཡོད་ཀྱང་གྱོན་དབང་མེད་པ། འགྲོ་སྡོད་ཀྱི་རང་དབང་མེད་པ། རང་མི་རིགས་དང་རིག་གཞུང་། ཡུལ་སྲོལ་གོམས་གཤིས་ལ་བརྩེ་བ་དང་དུང་བ་གློད་ཐབས་མ་བྱུང་བར་དེ་དག་རྒྱུན་འཛིན་དང་། དེ་དག་ལ་སྤྱོད་འདོད་ཇི་ལྟར་ཆེ་རུང་དེ་ལྟར་དགའ་བའི་རྣམ་འགྱུར་ཙམ་སྟོན་པ་ལའང་རང་དབང་མེད་པའི་གོ་རིམ་དུ་ལྷུངས་ནས་ཡོད་པ་མཚོན་གྱི་ཡོད། ཅི་འདྲའི་རང་དབང་མེད་ཀྱང་རང་རིགས་ཀྱི་ཐུན་མིན་ཆ་ལུགས་གོམས་སྲོལ། སྐད་ཡིག་རིག་གཞུང་ལ་དུང་བའི་ཟབ་ཚད་མཚོན་གྱི་ཡོད། མདོར་ན་མི་རིགས་ཤིག་གི་སྐྱོ་གར་གྱི་ལས་དབང་ཞིག་མཚོན་གྱི་ཡོད།  འདི་ལྟར་རླབས་ཆེ་ཞིང་དོན་སྙིང་ལྡན་པའི་བྱ་འགུལ་ཞིག་གི་མཇུག་སྐྱོང་བ་དང་། བརྩི་སྲུང་བྱེད་པ་ནི་དངོས་གནས་གཟི་བརྗིད་དང་དོན་སྙིང་ལྡན་པ་ཞིག་རེད་ལ།  ཅི་འདྲའི་འོས་པ་ཞིག་ཀྱང་རེད་ཨང་།

འོན་ཀྱང་བདག་ནི་འདིའི་ལས་དབང་ལ་སེམས་ཁྲལ་ཆེ་ཞིང་། འདིའི་ཚེ་སྲོག་ལ་སེམས་ཁུར་ཡང་ཆེ་སྟེ། འདིའི་ལས་དབང་དཔྱ་ཁྲལ་འགྱུར་ཉེན་འདུག འདིའི་ཚེ་སྲོག་གཏམ་རྒྱུད་ལ་འཐིམ་ཉེན་འདུག ལྷག་དཀར་ལས་འགུལ་གྱི་ཚེ་སྲོག་རྙེད་ནས་ཡུན་རིང་སོང་མེད་ནའང་དང་པོ་དར་བའི་ཚ་རླབས་ཀྱི་སྣང་ཚུལ་དང་ཚོར་བ་ལྟར་ད་ལྟ་མཐོང་རྒྱུ་ཉུང་།  མ་གཞི་ནས་དུས་རྒྱུན་དུ་རང་ཉིད་བོད་རིགས་ཡིན་པའི་འདུ་ཤེས་དང་བོད་མི་ཡིན་པའི་ལར་ཞེན་མེད་ན་ལྷག་དཀར་ནི་ལྷག་དཀར་རང་སྟེ། བདུན་རེའི་ནང་གི་རེས་གཟའ་ལྷག་པ་ནི་ཉིན་དཀར་ཉི་མ་གཅིག་གི་དུས་ཡུན་ཙམ་རེད།  མི་ཞིག་ལམ་དུ་སྐྱོད་ཚེ་ཕར་ཕྱོགས་ནས་ཚུར་ལ་ཐོན་འོང་བའི་བོད་རྔུལ་གྱོན་མཁན་གྱི་ཕོ་སར་ཞིག་ལ་ཐུག་སྐབས། ཁྱོད་ཀྱིས་བོད་རྔུལ་གྱོན་དོན་ཅི་ཡིན་ཞེས་སེམས་ལ་ལྷག་དཀར་མིན་ནམ་སྙམ་བཞིན་འདྲི། དེ་རིང་ལྷག་དཀར་མིན་ནམ་ཞེས་ལན་འདེབས། ཨོ་་་ངས་ཚོར་མ་སོང་།  ཡིན་ན་ངས་ཀྱང་བོད་རྔུལ་ཞིག་གྱོན་དགོས་འདུག་ཅེས་ངོ་མདོག་ཅུང་དམར་པོར་གྱུར་ཏེ་སྨྲ་བར་བྱེད། འགའ་རེས་དེ་རིང་ལྷག་དཀར་ཡིན་པས་བོད་ལྭ་གྱོན་དགོས་ཞེས་གྱོན་པར་བྱེད། ལ་ལས་སང་ཉིན་ལྷག་དཀར་ཡིན་པས་ཞེས་དེ་རིང་ནས་བོད་ལྭ་དང་བོད་རྔུལ་གྲ་སྒྲིག་བྱེད་ལ། ལྷག་དཀར་ཉིན་གྱི་དགོང་མོར་སླེབ་དུས་ད་ལྷག་དཀར་ཚར་སོང་ཞེས་དུས་ཆེན་གྱི་འཁྲབ་སྟོན་ཞིག་མཇུག་བསྒྲིལ་བ་ལྟར་བོད་ཆས་ལྟེབ་རྩེག་རྒྱག་པར་བྲེལ།  དེ་རིང་ལྷག་དཀར་ཨེ་རེད་ཅེས་འདྲི་མཁན་ཡོད་ལ། དེ་རིང་ལྷག་དཀར་ཡིན་པ་བརྗེད་སོང་ཟེར་མཁན་ཡོད། ལྷག་དཀར་ཡིན་པས་བོད་རྔུལ་ཙམ་ཞིག་མ་གྱོན་ན་ངོ་ཚ་ཡོང་ཞེས་སེམས་ལ་དྲན་མཁན་ཡོད་ལ། ཁ་ནས་དངོས་སུ་སྨྲ་མཁན་ཡང་ཡོད། རེས་གཟའ་ལྷག་པ་སྔོན་མ་ལ་བོད་ཆས་གྱོན་ཀྱང་ལྷག་དཀར་རྗེས་མའི་སྐབས་སུ་མ་གྱོན་མཁན་ཡང་མང་པོ་མཐོང་རྒྱུ་ཡོད།  སྤྱིར་ན་བོད་ལྭ་དང་བོད་རྔུལ་གྱོན་མ་གྱོན་ཙམ་ནི་གལ་ཆེན་དང་འགག་གནད་ཅིག་མིན་ནའང་།  དེ་དག་ལས་ང་ཚོས་མཐོང་ཐུབ་པ་ནི་ང་ཚོ་ལ་ངོ་ཚའི་འདུ་ཤེས་ཙམ་ལས་ལྷག་དཀར་གྱི་འདུ་ཤེས་མེད་པ་དང་། ལྷག་དཀར་གྱི་དམིགས་ཡུལ། ལྷག་དཀར་གྱི་མཚོན་དོན་ཚོར་གྱི་མེད་པ་དེ་རེད། དེས་ན་འུར་འདྲོགས་ཙམ་མིན་པར་དོན་དམ་གྱི་ལྷག་དཀར་ཞིག་བརྩི་སྲུང་ཐུབ་པའི་རེ་བ་དང་འདུན་མ་ཅི་འདྲའི་མི་ཆེ་ཨང་། བོད་ནང་དུ་རང་ལུས་མེར་བསྲེགས་ཀྱི་ལས་འགུལ་གནས་སྐབས་ལྟ་བུ་ལ་མཚོན་ན། དང་ཐོག་ང་ཚོར་མིག་ཆུ་མོད། ན་ཟུག་དྲག ངོ་མདོག་ཤོར། སྡུག་ཡུས་ཆེ། ཚོར་ཤུགས་ཆེ། རང་ལུས་མེར་བསྲེགས་ཀྱི་ལས་འགུལ་ད་ལྟ་ད་དུང་སྔར་ལྟར་གནས་ནའང་། ད་ལྟ་ང་ཚོར་ན་ཟུག་ཡལ་གྲབས། མིག་ཆུ་འཆད་གྲབས། ཚོར་བ་འཇགས་གྲབས། སྡུག་ཡུས་སངས་གྲབས་བྱེད་པའི་སྣང་ཚུལ་འདིས་ཀྱང་ང་ཚོའི་སེམས་ནང་གི་འདུ་ཤེས་དང་རང་ཚུགས། ལར་ཞེན་དང་ཕྱི་ཐག་ལ་འགྲེལ་བཤད་ཅིག་རྒྱག་གི་མི་འདུག་གམ། མཚམས་འདི་ནས་ལྷག་དཀར་གྱི་ཚེ་སྲོག་གཏམ་རྒྱུད་ལ་མི་འཐིམ་པའི་སྨོན་འདུན་དང་ཆབས་ཅིག་བྲེལ་སྟབས་ཀྱིས་རེ་ཞིག་མཇུག་བསྡུས་པ་ཡིན།

སྤྱི་ལོ་ ༢༠༡༢ ཟླ་ ༨ ཚེས་ ༢༩ ཉིན་ས་རཱ་བོད་ཀྱི་མཐོ་སློབ་ཏུ་མཇུག་གྲུབ་པར་བགྱིས།