ཐུབ་བསྟན་དབྱིག་གཉེན།
ད་ལམ་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་དེ་བོད་ནང་བོད་མི་ ༥༡ གིས་རང་ལུས་མེར་བསྲེགས་བཏང་ནས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་བྱས་པ་དང་། བོད་ནང་རྒྱ་ནག་གིས་སྲིད་བྱུས་དམ་དྲག་ཆེ་རུ་བཏང་ནས་བོད་ནང་གི་གནས་སྟངས་ཛ་དྲག་ཆེ་བའི་དུས་ཚོད་འདིར་བསྐོང་ཚོགས་གནང་བ་ཞིག་ཡིན་པ་མ་ཟད། ཉིན་ཤས་རྗེས་བོད་ནང་གི་ཛ་དྲག་གི་གནས་སྟངས་ལ་གཞིགས་ཏེ་རྒྱལ་སྤྱིའི་ནང་ལས་འགུལ་སྤེལ་ཕྱོགས་ལ་བསམ་བསྡུར་བྱ་རྒྱུར་དམིགས་བསལ་ཚོགས་ཆེན་ཐེངས་གཉིས་པ་འཚོགས་རྒྱུ་ཡིན་པ་རེད། དམིགས་བསལ་ཚོགས་ཆེན་གྱི་གྲོས་གཞི་དང་དུས་ཚོད་ཀྱི་གལ་ཆེའི་རང་བཞིན། གལ་གནད་བཅས་ལ་གཞིགས་ན་ཚོགས་ཆེན་དེའི་ཆེད་བོད་མི་མང་སྤྱི་འཐུས་གྲོས་ཚོགས་ནས་ལམ་སྟོན་དང་གྲོས་སྒོ་གངཙམ་ཡོང་རྒྱུར་ཚོད་དཔག་དང་རེ་བ་བྱས་ཀྱང་། མངོན་གསལ་དོད་པའི་ལམ་སྟོན་དང་ཚོགས་འདུའི་དགོས་དབང་དང་། གལ་ཆེའི་རང་བཞིན་བཅས་ཀྱི་སྐོར་ལ་གྲོས་ཚོགས་ནང་དེ་ཙམ་བགྲོ་གླེང་གནང་མེད་པའི་ ཁར། བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་ཀྱིས་སྤྱི་འཐུས་སྒེར་གྱི་གྲོས་ཆོད་གྲོས་འཆར་ངོ་བོར་དམིགས་བསལ་ཚོགས་ཚོགས་ཆེན་གྱི་རྒྱབ་གཉེར་དོན་ཚན་རྣམས་ལག་ལེན་དོན་འཁྱོལ་ཐུབ་ཐབས་ལ་བཀའ་ཤག་དང་སྤྱི་འཐུས་རྒྱུན་ལས་ཀྱིས་མཇུག་བསྣོན་གནང་དགོས་པའི་གྲོས་འཆར་ཞིག་གྲོས་ཚོགས་ལ་ངོ་སྤྲོད་གནང་ཡོད་ནའང་། གྲོས་ཆོད་གྲོས་འཆར་དེར་གྲོས་ཚོགས་ནང་བགྲོ་གླེང་གང་ཙམ་གནང་རྗེས་གྲོས་ཆོད་འཇོག་རྒྱུར་སྤྱི་འཐུས་ཀྱི་མང་མོས་རྒྱབ་སྐྱོར་མ་ཐོབ་པར་བརྟེན་གྲོས་འཆར་དེ་ཟག་པ་རེད།
སྤྱི་འཐུས་རྣམས་པས་གནད་དོན་དེར་བགྲོ་གླེང་གནང་སྐབས་སོ་སོའི་དགོངས་འཆར་སྣ་ཚོགས་གསུངས་གནང་ཞིང་། སྤྱི་འཐུས་མང་པོས་དེའི་གོང་དམིགས་བསལ་ཚོགས་ཆེན་དང་གཞུང་མང་རྒྱལ་ཡོངས་ཚོགས་ཆེན་སོགས་ཀྱིས་རྒྱབ་གཉེར་དོན་ཚན་རྣམས་ལག་ལེན་འགེལ་ཐུབ་པ་བྱུང་ཡོད་ལུགས་གསུངས་པ་ཙམ་ལས། ལག་ལེན་བསྟར་མ་གནང་བར་དེ་མུར་བཞག་པ་མེད་སྐོར་གསུངས་མཁན་མང་པོ་འདུག ཡ་ཚན་ཤོས་གཅིག་ལ་སྤྱི་འཐུས་གྲོས་ཚོགས་ཀྱི་ཚོགས་ཐེངས་འདིའི་ལས་ཉིན་དང་པོར་བོད་ནང་ཛ་དྲག་གནས་སྟངས་དང་རང་ལུས་བསྲེགས་གཏོང་མཁན་རྣམས་ལ་གདུང་སེམས་མཉམ་སྐྱེད་ཀྱི་གཞུང་འབྲེལ་གྲོས་ཆོད་གྲོས་འཆར་ལ་བགྲོ་གླེང་གནང་སྐབས་དམིགས་བསལ་ཚོགས་ཆེན་དང་པོའི་རྒྱབ་གཉེར་ཡིག་ཆར་བདག་པོ་བརྒྱབ་མ་སོང་ཞེས་དགོངས་འཆར་གསུང་མཁན་སྤྱི་འཐུས་དེས་ད་ལམ་གྱི་སྤྱི་འཐུས་སྒེར་གྱི་གྲོས་ཆོད་གྲོས་འཆར་དེར་འགག་པ་གནང་བ་མ་ཟད། འོས་ཤོག་བསྡུ་སྐབས་རྒྱབ་སྐྱོར་མེད་པའི་ཕྱག་བརྐྱངས་སོང་། དེ་ནི་སྤྱི་འཐུས་རྣམས་པས་གྲོས་ཚོགས་ནང་གནད་དོན་གང་ཞིག་ལ་བཀའ་བསྡུར་བགྲོ་གླེང་གནང་སྐབས་དང་། གྲོས་ཆོད་འཇོག་སྐབས་དོན་ལ་མ་གཟིགས་པར་གྲོས་འཆར་འདོན་མཁན་སྤྱི་འཐུས་བྱེ་བྲག་པར་དགོངས་པ་བཞེས་ནས་ཐག་གཅོད་གནང་གི་མེད་དམ་སྙམ་པའི་ཚོར་སྣང་བྱུང་།
གྲོས་ཚོགས་ཀྱི་ལས་ཉིན་དང་པོར་བགྲོ་གླེང་གནང་བའི་གནད་དོན་དང་སྤྱི་འཐུས་སྒེར་གྱི་གྲོས་ཆོད་གྲོས་འཆར་གཉིས་ལ་འབྲེལ་བ་གཏིང་ཟབ་ཡོད་པ་དང་། ལྷག་པར་གྲོས་ཆོད་གྲོས་འཆར་དེར་སྤྱི་འཐུས་ལྷན་ཚོགས་ཀྱིས་རྒྱབ་སྐྱོར་གནང་ཐུབ་ཡོད་ན་རིང་མིན་འཚོགས་རྒྱུའི་དམིགས་བསལ་ཚོགས་ཆེན་གྱི་རང་བཞིན་དང་གནད་འགག་བཅས་ཤུགས་ཆེ་རུ་འགྲོ་རྒྱུར་ཕན་ཐོགས་བྱེད་ཐུབ་ཡོད་ནའང་། སྤྱི་འཐུས་རྣམས་པས་གྲོས་ཆོད་གྲོས་འཆར་དེར་མང་མོས་རྒྱབ་སྐྱོར་ཐོབ་མེད། དེ་ལྟར་ཐག་གཅོད་གནང་བ་དེས་བོད་མི་མང་སྤྱི་འཐུས་རྣམས་ཀྱིས་དམིགས་བསལ་ཚོགས་ཆེན་དེ་གལ་གནད་ཆེ་ཆུང་གང་འདྲ་ཞིག་ལ་ངོས་འཛིན་གནང་ཕྱོགས་ལ་ཐེ་ཚོམ་བྱུང་། སྤྱི་འཐུས་སྒེར་གྱི་གྲོས་ཆོད་གྲོས་འཆར་དེར་བགྲོ་གླེང་གནང་སྐབས་སྤྱི་འཐུས་ རྣམས་ཀྱིས་དམིགས་བསལ་ཚོགས་གྱི་གནད་འགག་དང་གལ་ཆེའི་རང་བཞིན་བཅས་ཀྱི་སྐོར་ལ་དགོངས་འཆར་དེ་ཙམ་གནང་མེད་ཅིང་། བཀའ་ཤག་ནས་ཀྱང་དམིགས་བསལ་ཚོགས་ཆེན་གཉིས་པའི་གནད་འགག་སྐོར་འགྲེལ་བཤད་ཚིག་གཅིག་གསུངས་མེད།
སྤྱི་ཚོགས་ནང་དམིགས་བསལ་ཚོགས་ལ་དོ་སྣང་དང་རྒྱབ་སྐྱོར་གྱི་གནས་སྟངས་གང་འདྲ་མེད་ཐད་བཀའ་ཤག་དང་སྤྱི་འཐུས་ལྷན་ཚོགས་ཀྱི་ཐུགས་ཞིབ་གནང་གི་ཡོད་རེ་དང་། རྒྱ་བལ་འབྲུག་གསུམ་གྱི་ས་གནས་འཐུས་ཚོགས་དང་རང་དབང་བདེན་པའི་ལས་འགུལ་གྱི་མི་འཐུས། ས་གནས་མགོ་འཛིན་རྣམས་གཞུང་འབྲེལ་བཀའ་རྒྱའི་དགོངས་དོན་བཞིན་དམིགས་བསལ་ཚོགས་ཆེན་ལ་ཚོགས་བཅར་མ་གནང་ཀ་མེད་ཡིན་པ་དང་། དམིགས་བསལ་ཚོགས་ཆེན་ལ་མང་ཚོགས་ཀྱི་རྒྱབ་སྐྱོར་དང་དོ་སྣང་ཡོད་མེད་གཙོ་བོ་གཅིག་ནི་ཕྱོགས་མཐར་བཞུགས་པའི་བཀའ་ཟུར་རྣམ་པ་དང་སྤྱི་ཟུར་ཁོངས་ནས་ཚོགས་ཞུགས་གནང་མཁན་ཇི་ཙམ་ཡོད་དང་། བོད་དོན་ལ་དོ་སྣང་ཅན་གྱི་མི་སྣའི་ཁོངས་ནས་ཚོགས་བཅར་གནང་ཇི་ཙམ་ཡོད་པ་བཅས་ནས་ གསལ་རྟོགས་ཐུབ་སྙམ། ད་བར་གྱི་གནས་ཚུལ་ཤེས་རྟོགས་བྱུང་བར་གཞིགས་ན་ཚན་པ་དེ་དག་ནས་ཚོགས་བཅར་བ་གྲངས་ཚད་ཉུང་ཙམ་ཡོད་སྐད་དང་། མང་ཚོགས་ནང་དམིགས་བསལ་ཚོགས་ཆེན་ཆེད་བསམ་འཆར་བསྡུ་ལེན་གྱི་ཚོགས་འདུར་མཉམ་ཞུགས་བྱེད་མཁན་གྱི་གྲངས་འབོར་ཐད་དམིགས་བསལ་ཚོགས་ཆེན་དང་པོ་དང་བསྡུར་ན་ཁྱད་པར་ཆེན་པོ་ཡོད་པ་དེ་ལའང་ཐུགས་སྣང་གནང་དགོས།
སུ་ཡིན་ན་ཡང་གལ་གནད་དམ་བཟུང་དང་ཟུར་འདོན་བྱས་ནས་བཤད་རྒྱུ་ཧ་ཅང་གལ་ཆེན་རེད། དེས་དངོས་དོན་གང་མང་ལ་ངོ་སྤྲོད་ཐུབ་པ་མ་ཟད། རང་ནོར་རང་ལ་ངོ་འཕྲོད་པར་ཡང་ཕན་པ་ཆེའོ།། དཔེར་ན། དམིགས་བསལ་ཚོགས་ཆེན་དང་བོའི་རྒྱབ་གཉེར་ཡིག་ཆར་བདག་པོ་བརྒྱབ་མ་སོང་ཟེར་མཁན་སྤྱི་འཐུས་དེས། སྤྱི་འཐུས་སྒེར་གྱིས་གྲོས་ཆོད་གྲོས་གཞི་ལ་དགག་པ་བརྒྱབ་པ་གཉིས་ཞིབ་བསྡུར་གྱིས་དཔྱད་གླེང་གནང་དགོས་པ་ལྟ་བུ་རེད།
ཐུགས་རྗེ་ཆེ། མིང་ཡག་པོ་འདུས་དམིགས་གསལ་ཚོགས་ཆེན་ཟེར་བ་དེ་ཡག་པོ་འདུས། ཡིན་ན་ཡང་དམིགས་གསལ་ཚོགས་ཆེན་ཡིན་འགྲིག་གི་རེད། དོན་འབྲས་ཡོད་པ་གལ་ཆེན་རེད། ང་མཐོ་ང་ཆེ་བསམ་ན་བོད་མི་དམངས་ལ་ཕན་ཐོགས་ཀྱི་མ་རེད། དེ་མ་ཡིན་པར་གནས་ཚུལ་དངོས་ཡོད་གྱིས་ལས་ཀ་བྱེད་པ་ཐུགས་རྗེ། སྟེང་མཐོ་ས་དང་འོག་དམའ་ས་གཉིས་ཀྱིས་ཐུགས་མདུན་གཟབ་གཟབ་གནང་། དོན་འབྲས་ཡོངས་བར་སྨོན། རང་སྒེར་ངོས་ནས་བྲས་པ་ཡིན།
གྲོས་ཚོགས་ནང་ཕན་ཚུན་ནང་འཁྲུགས་མ་བརྒྱབ་ན་ཨོའོ་ཙི་མ་རེད་པས། དེ་འདྲའི་རིགས་ནི་འཆར་ཅན་འདྲ་ཞིག་རེད། སྐབས་སྔོན་མའི་མཇུག་སྐྱོང་བ་ནི་གཏན་འཁེལ་རེད། མིང་ལ་ནི་དམིགས་བསལ་ཚོགས་ཆེན་དམིགས་བསལ་ཚོགས་ཆེན། འཆར་ཅན་ཚོགས་ཆེན་ཟེར་ན་ཆོག།
ད་བར་དུ་ཁ་ནས་ཅིག་བཤད་ཀྱིན་ལག་ནས་གཞན་ཞིག་བྱས་བསྡད་པ་རེད། གྲོས་ཆོད་ནི་མ་ཎི་གསོག་གསོག་ལྟར་བྱས་ཀྱང་ལག་ལེན་ནི་གསེར་གྱི་ཐིགས་པ་རང་རེད། དོན་དུ་༧གོང་ས་མཆོག་གི་བཀའ་མི་བརྩི་མཁན་ནི་ལས་ཀྱི་སྣེ་མོར་གཏོགས་པ་འདི་ཚོ་རེད།