དེ་རིང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཚོམས་ཆེན་ནང་། པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཉིན་གསུམ་རིང་གི་ཚོགས་ཆེན་དབུ་འཛུགས་གནང་ཡོད་པ་དང་། ཚོགས་གཙོའི་གཏམ་ནང་བོད་གཞུང་དམངས་ཡོངས་ལ་འབོད་སྐུལ་དོན་ཚན་གསུམ་གནང་འདུག
དེ་རིང་ཕྱི་ཚེས་ ༢༡ ཉིན་གྱི་སྔ་དྲོར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཚོམས་ཆེན་ནང་། པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཉིན་གསུམ་རིང་གི་ཚོགས་ཆེན་སྐབས་བཞི་པ་དབུ་འཛུགས་གནང་ཡོད་པ་དང་། ཚོགས་འདུའི་དབུ་འབྱེད་མཛད་སྒོའི་ཐོག་མར་སྐུ་མགྲོན་གཙོ་བོ་བཀའ་ཟུར་ཀིརྟི་རིན་པོ་ཆེ་མཆོག་གིས་སྣང་གསལ་མར་མེ་ཞལ་འབྱེད་དང་འབྲེལ། ཚོགས་ཞུགས་པ་ཡོངས་སྐུ་བཞེངས་ཐོག་བོད་མི་རིགས་དང་བསྟན་སྲིད་ཆེད་སྐུ་སྲོག་བློས་བཏང་གནང་བ་རྣམས་དང་། ད་ལྟ་ཁྲིམས་ཆད་མནར་གཅོད་མྱོང་བཞིན་པའི་རྒྱལ་གཅེས་དཔའ་བོ་དཔའ་མོ་ཡོངས་ལ་མྱ་ངན་གུས་འདུད་གནང་རྗེས། མཐུན་ཚོགས་ཀྱི་ཕྱི་འབྲེལ་དྲུང་ཆེ་བུད་དྷ་སྐྱབས་ལགས་ཀྱིས་ཚོགས་ཆེན་ངོ་སྤྲོད་དང་། དྲུང་ཆེ་གངས་སྲས་ལགས་ཀྱིས་ཚོགས་པའི་རྒྱུན་ལས་ཚོའི་ལོ་གསུམ་གྱི་ལས་བསྡོམས་སྙན་སྒྲོན། ཚོགས་གཙོ་ཆབ་བྲག་ལྷ་མོ་སྐྱབས་ལགས་ཀྱིས་ཚོགས་གཙོའི་གཏམ་བཤད་སྒྲོགས་སྦྱང་བཅས་གནང་སོང་། ཚོགས་འདུའི་ཐོག་གདན་ཞུའི་སྐུ་མགྲོན་རྣམ་པ་དང་། མཐུན་ཚོགས་ཀྱི་རྒྱུན་ལས་རྣམ་པའི་གཙོས་ཚོགས་མི་རྣམས། དེ་བཞིན། ཟུར་ཞུགས་པ་དང་གསར་འགོད་པ་བཅས་མི་གྲངས་ ༥༠ ཙམ་འདུ་འཛོམས་བྱུང་འདུག
ཕྱི་ཚེས་ ༢༡ ནས་ ༢༣ བར་ཉིན་གསུམ་རིང་གི་ཚོགས་ཆེན་ཐོག བོད་ཀྱི་རྩོམ་ཡིག་གོང་སྤེལ་དང་རྩོམ་པ་པོ་གསོ་སྐྱོང་། བོད་ཀྱི་སྐད་ཡིག་འཁྲིད་ཐབས་ལེགས་བཅོས། བོད་ནང་གི་ཞི་རྒོལ་རིམ་བྱུང་གི་འཕེལ་རིམ་དང་དོན་སྙིང་། ཁྲིམས་ཆད་ཕོག་པའི་རྒྱ་ནག་ནང་གི་རྩོམ་པ་པོའི་སྐོར། བོད་ནང་གི་ཤེས་ཡོན་པའི་བསམ་བློ་དང་འོས་འགན། བཙན་བྱོལ་ནང་གི་ཤེས་ཡོན་པའི་བསམ་བློ་དང་འོས་འགན། བོད་རྒྱ་སོག་ཡུ་གུར་དང་བཅས་པའི་རྩོམ་པ་པོའི་མཉམ་འབྲེལ་དང་འོས་འགན། པེན་བོད་ཀྱི་རྩོམ་པ་པོའི་མཐུན་ཚོགས་ཡར་རྒྱས་གཏོང་ཐབས་བཅས་བརྗོད་གཞི་ཁག་གི་ཐོག་བགྲོ་གླེང་དང་། ཚོགས་འདུའི་ཉིན་མཐའ་མར་སྒྲིག་གཞི་བསྐྱར་བཅོས་དང་བྱུང་སོང་རྩིས་ཁྲ་གསལ་བསྒྲགས། གྲོས་ཆོད་གཏན་འབེབས། སྐབས་བཞི་བའི་རྒྱུན་ལས་གསར་འདེམས་དང་ལས་བགོ་བཅས་གནང་རྒྱུ་ཡིན་འདུག
མཛད་སྒོའི་ཐོག་སྐུ་མགྲོན་གཙོ་བོ་བཀའ་ཟུར་ཀིརྟི་རིན་པོ་ཆེ་མཆོག་གིས་གསུངས་བཤད་གནང་དོན། “རྩོམ་པ་པོ་ཟེར་བ་དེ་ཤེས་ཡོན་ཅན་དང་མི་མང་གི་ཁ་ལོ་སྒྱུར་བ་བོ། སྤྱི་ཚོགས་ཁྲོད་ནུས་པ་ཆེན་པོ་ཡོད་མཁན་གྱི་ཚོགས་སྡེ་ཞིག་ཆགས་ཡོད་པ་རེད།” ཅེས་གསུངས་ཏེ། སྤྱིར་ཆབ་སྲིད་ཀྱི་ལས་ཀ་རྣམས་ནི་སྐབས་དང་སྐབས་ལ་འགྱུར་འགྲོ་བ་མ་གཏོགས། མི་ཐོག་ནས་མི་ཐོག་བྱས་ཏེ་སྡོད་ཀྱི་མེད་པ་དང་། རྩོམ་པ་པོས་བརྩམས་བཞག་པའི་བརྩམས་ཆོས་ཀྱི་ནུས་པ་དེ་མི་ཐོག་ནས་མི་ཐོག་བརྒྱུད་དེ་སྡོད་ཐུབ་ཀྱི་ཡོད་སྟབས། བོད་ཀྱི་མི་ཐོག་གསར་རྙིང་བརྗེ་བཞིན་པའི་སྐབས་འདིར། མི་ཐོག་གསར་བའི་ནང་ནས་ཤེས་ཡོན་ཅན་གྱི་དཔུང་ཁག་ཅིག་ཡོད་པ་དང་། དེ་བཞིན། བོད་དེ་ཆགས་དང་འཇིག་ལ་ཐུག་པའི་དུས་ཚོད་གཉན་འཕྲང་ཅན་འདིར། རྩོམ་པ་པོའི་དཔུང་ཁག་ཅིག་རང་དབང་གི་ཐོག་ནས་འཐོན་བཞིན་པ་དེ་ནི། མ་འོངས་པར་བོད་དེ་ཡག་པོ་ཡོང་ས་རེད་བསམ་པའི་རེ་བ་བཅོལ་ས་དང་ཡིད་ཆེས་བྱེད་ས་ཞིག་ཆགས་ཀྱིན་ཡོད་པའི་སྐོར་གསུངས་སོང་།
ཀིརྟི་རིན་པོ་ཆེ་མཆོག་གིས་མུ་མཐུད་དུ་རྩོམ་གསར་རྙིང་གཉིས་ཀྱི་བར་ལ་བར་སྟོང་ཆེན་པོ་ཞིག་ཤོར་ཏེ། མི་རབས་རྙིང་པ་ཚོས་རྩོམ་གསར་བར་གོ་བ་ལེན་མ་ཐུབ་པ་དང་། མི་རབས་གསར་བས་རྩོམ་རྙིང་པའི་གོ་དོན་མ་རྟོགས་པའི་གནས་སྟངས་ཤིག་ཡོང་གི་ཡོད་སྟབས། སྔ་མའི་རྙིང་བའི་རྒྱུན་མ་ཆད་པ་དང་གསར་བའི་སྟེང་ལ་འགྲོ་ཐུབ་པ་གཉིས་དགོས་རྒྱུ་དེ་གལ་ཆེན་ཡིན་པ་དང་། ད་ལྟའི་རྒྱ་ནག་ལྟར་སྐད་ཡིག་ལ་གསར་རྙིང་གི་འགྱུར་བག་ཆེན་པོ་ཤོར་ཏེ། མི་རབས་གསར་བ་ཚོས་སྔར་གྱི་རྒྱ་ཡིག་ནང་ཡོད་པའི་རིག་གཞུང་མཐའ་དག་ལ་གོ་བ་ལེན་མི་ཐུབ་པའི་གནས་སྟངས་དེ་འདྲ་མི་འབྱུང་བའི་ཆེད། རྩོམ་པ་པོ་རྣམས་ཀྱིས་ནམ་རྒྱུན་ཐུགས་ཁུར་དང་བསམ་གཞིགས་ཞིབ་མོ་གནང་སྟེ། ཐ་སྙད་དང་ཚིག་སྦྱོར་སྤྱོད་སྟངས་ཐད་ཚིག་དོན་འཇུག་ཡུལ་མ་ནོར་བ་ཏག་ཏག་ཅིག་གནང་རྒྱུ་གལ་ཆེན་པོ་ཡིན་པ་གསུངས་སོང་།
པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོའི་གཏམ་བཤད་ནང་བོད་གཞུང་མང་དང་བཅས་པར་གཞེན་སྐུལ་དོན་ཚན་གསུམ་བཀོད་ཡོད་པ་ནི། གཅིག བོད་ཀྱི་སྲིད་དོན་འཕོ་འགྱུར་གྱི་བྱུང་རབས་ཐད་གཞུང་འབྲེལ་གྱི་ཡིག་ཆ་ཞིག་གཏན་འབེབས་གནང་དགོས། དེ་ནི་བོད་མིའི་སྒྲིག་འཛུགས་ཀྱི་གཞུང་འདིས་རང་གི་བྱུང་རབས་གསལ་བོ་ཞིག་གཞིས་བྱེས་མི་དམངས་ལ་ངོ་སྤྲོད་ཐུབ་པའི་ཆེད་དུ་མ་ཟད་སྲིད་དོན་བྱུང་རབས་ཀྱི་ཆ་ནས་ཀྱང་གནད་འགག་ཅིག་ཆགས་ཡོད། དེ་ཡང་ཐོག་མའི་བོད་བཙན་པོའི་སྐབས་ཀྱི་ཐུ་བྷོད་རྒྱལ་ཁབ་ཆེན་པོ་ནས་བོད་གཞུང་དགའ་ལྡན་ཕོ་བྲང་བར་དང་། ཐ་མར་བཙན་བྱོལ་དམངས་གཙོའི་བོད་གཞུང་ཞིག་ཆགས་པའི་རིམ་པ་ནས་དེ་རིང་གི་བོད་མིའི་སྒྲིག་འཛུགས་ཞེས་པའི་བར་གྱི་འཕེལ་འགྲིབ་བམ་འཕོ་འགྱུར་དག་ཚང་དགོས།
གཉིས། ང་རང་ཚོའི་སྲིད་ལུགས་ཀྱི་གོ་རྟོགས་སྤེལ་དགོས། དེ་ཡང་གཙོ་བོ་ང་ཚོའི་བཙན་བྱོལ་བོད་མིའི་བཅའ་ཁྲིམས་ཐོག་མར་གཏན་འབེབས་གནང་སྟངས་ནས། ད་བར་གྱི་འགྱུར་འགྲོས་དང་ངོ་བོ་གང་འདྲ་ཞིག་ཡིན་པ་གོང་རིམ་ནས་གསལ་བཤད་གནང་དགོས་ལ་འོག་རིམ་ནས་སློབ་སྦྱོང་ཡང་བྱེད་དགོས། བཙན་བྱོལ་བོད་མིའི་བཅའ་ཁྲིམས་ཀྱི་དབང་ཚད་དང་ཁྱབ་ཚད། འགན་ནུས་དང་ངོ་བོ་བཅས་གསལ་རྟོགས་མ་ཐུབ་བར་དུ་ང་རང་ཚོའི་གཞུང་ངམ་སྒྲིག་འཛུགས་འདིའི་ངོ་གདོང་ངོ་མ་ཡང་མཐོང་དཀའ་བ་ཞིག་རེད།
གསུམ། ཚོགས་སྡེ་ཁག་ནང་ཁུལ་འདུམ་འགྲིག་གི་ཐབས་ལམ་འཚོལ་དགོས། དེའི་འགན་གཙོ་བོ་ཚོགས་སྡེ་ཁག་གི་གནད་ཡོད་མི་སྣ་ཁག་ལ་རག་ལས་ཡོད། གནད་དོན་འདི་ཁ་གསལ་བོར་བཤད་ན་བོད་ཀྱི་གཞོན་ནུ་ལྷན་ཚོགས་དང་དབུ་མའི་ལམ་མི་མང་ལས་འགུལ་ཁང་གཉིས་ཀྱིས་གཙོས། འདི་གཉིས་ཀྱི་ཕྱོགས་གཏོགས་དང་བཅས་པ་ཚང་མས་ཕྱོགས་གཉིས་ཀྱི་ཚོགས་མིའམ་མི་དམངས་བསྡུ་སྐོང་གིས་ཕན་ཚུན་སེམས་ཐག་ཉེ་བོའི་ཐོག་ནས་སོ་སོའི་ལྟ་བ་དང་ལས་འགུལ་སྤེལ་ཕྱོགས་སོགས་གསལ་བཤད་དང་བགྲོ་གླེང་སྦྱང་བཤད་ཡང་ཡང་གནང་དགོས། ང་ཚོས་དགྲ་ཕྱོགས་ལའང་སེམས་ཐག་ཉེ་བོ་གནང་ཐུབ་ན་རང་རིགས་ནང་ཁུལ་ལ་ལག་པ་གཏོང་མི་ཐུབ་དོན་མེད། ཐབས་ལམ་འདིས་ཚོགས་སྡེ་སོ་སོའི་བར་གྱི་མ་མཐོང་ལོག་མཐོང་གི་འགལ་བ་དག་ཇེ་ཉུང་ལ་འགྲོ་བ་དང་ལྷག་པར་མི་དམངས་ཀྱི་བསམ་བློའི་གོ་རྟོགས་སྤེལ་རྒྱུར་དགེ་མཚན་ཆེན་པོ་ཡོད་བཅས་བཀོད་འདུག
གསར་འགོད་པ། ཚེ་རིང་རྒྱལ།
གསར་འགོད་པ། ཚེ་རིང་རྒྱལ།
དང་།
ཇོ་རུ་ཚེ་རིང་།
༢༠༡༢/༠༩/༢༢ ཉིན་འདོན་སྤེལ་བྱས། དྲ་གྲོགས་ཀརྨ་རྡོ་རྗེ་ལགས་ཀྱིས་ཐུགས་སྣང་ཆེན་པོས་བསམ་ཚུལ་བཏོན་པར་དགའ་བསུ་ཞུ། པེན་ཕྱི་སྡོད་རྩོམ་པ་པོའི་མཐུན་ཚོགས་ཀྱི་ཚོགས་གཙོའི་གཏམ་བཤད་བཀོད་ཡོད་པའི་ “དམངས་གཙོ་” ཞེས་པའི་ཐ་སྙད་དེ། ཁོང་ཚོའི་གཏམ་བཤད་རང་གི་ནང་དེ་ལྟར་བཀོད་སྟབས་རང་སོར་བཞག་པ་ཡིན། གསར་འགོད་པ་སྒེར་གྱི་ངོས་ནས་གང་བྱུང་བྲིས་པ་ཞིག་མིན་ཞེས་གསལ་བཤད་ཞུ་འདོད་བྱུང་། ་་་ཟེར།
གསར་འགོད་པ་ཇོ་རུ་ཚེ་རིང་ངམ། ཚེ་རིང་རྒྱལ་ལགས་ཀྱིས་གསལ་བཤད་ལ་བཀའ་དྲིན་ཆེ་ལགས།
དྲ་གྲོགས་ཀརྨ་རྡོ་རྗེ་ལགས་ཀྱིས་ཐུགས་སྣང་ཆེན་པོས་བསམ་ཚུལ་བཏོན་པར་དགའ་བསུ་ཞུ། པེན་ཕྱི་སྡོད་རྩོམ་པ་པོའི་མཐུན་ཚོགས་ཀྱི་ཚོགས་གཙོའི་གཏམ་བཤད་བཀོད་ཡོད་པའི་ “དམངས་གཙོ་” ཞེས་པའི་ཐ་སྙད་དེ། ཁོང་ཚོའི་གཏམ་བཤད་རང་གི་ནང་དེ་ལྟར་བཀོད་སྟབས་རང་སོར་བཞག་པ་ཡིན། གསར་འགོད་པ་སྒེར་གྱི་ངོས་ནས་གང་བྱུང་བྲིས་པ་ཞིག་མིན་ཞེས་གསལ་བཤད་ཞུ་འདོད་བྱུང་།
གསར་འགོད་པ། ཚེ་རིང་རྒྱལ་ལགས་སུ།
་
བཙན་བྱོལ་བོད་མིའི་བཅའ་ཁྲིམས།
སྔོན་གླེང་།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༼མང་གཙོའི་༽ལམ་སྟོན་གནང་བའི་འོག ང་ཚོ་བཙན་བྱོལ་བོད་མི་ཡོངས་ནས་་་་་་་་་་་་་་་་་་་་་
༼བོད་རྒྱལ་ལོ། ༢༡༢༤ ཕྱི་ལོ་ ༡༩༩༨༽
མི་དམངས་མ་རེད་ མི་མངས་སམ་མི་མང་རེད། དམངས་གཙོ་མ་རེད། མང་གཙོ་རེད། རང་གི་སྒྲིག་འཛུགས་ཀྱི་བཐརཙ་ཁྲིམས་དང་བཅའ་ལ་མིག་དཔེར་བླངས་དགོས། ཡང་ན་རང་འདོད་ལྟར་བསྒྱུར་གཏོང་ཐུབ་པར་བྱ་དགོས།
ཐུ་བྷོད་རྒྱལ་ཁབ་ཆེན་པོ། འདི་ལས། མཐོ་བོད་རྒྱལ་ཁབ་ཆེན་པོ་ཞེས་བྲིས་ན་ཁུངས་དག་པ་ཡིན་དགོས་པ་མི་འདུག་གམ། ད་དུང་དཔྱད་དགོས།
ཆབ་བྲག་ཡབ་སྲས་སྐུ་འཁོར་རྣམས་གཡས་བར་བཞུགས་འདུག
རྒན་ལྷ་མོ་སྐྱབས་མཆོག་ལ་བཀྲ་ཤིས་བདེ་ལེགས་ཞུ། ཁྱེད་རང་ནི་ཁ་དོན་མཚུངས་ཤིང་བོད་རིགས་ཤེས་ལྡན་པ་དང་རྩོམ་པ་པོ་གཉོམ་ཆུང་ཞིག་ཡིན། སྐུ་ཚེ་རིང་ཞིང་བཞེད་དགོངས་ལྷུན་གྱིས་འགྲུབ་པའི་སྨོན་འདུན་དང་སྦྲགས་བོད་ཀྱི་རྩོམ་པ་པོ་མཐུན་ཚོགས་ཀྱི་ཚོགས་མི་ཡོངས་ལ་བཀྲ་ཤིས་བདེ་ལེགས་ཞུ།
རེ་འབོད་གསུམ།
པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་ཆེན་སྐབས་བཞི་བ་རྒྱལ་ཁའི་ངང་མཇུག་བསྡུས་ནས་ཐེངས་འདིར་གྲོས་ཆོད་གང་བྱུང་རྣམས་ལག་ལེན་ལ་བསྟར་ཐུབ་པའི་སྨོན་འདུན་ཞུ།
གཞན་། མཐུན་ཚོགས་ལ་སྔར་ནས་ཆད་ཡོད་པའི་བུ་ལོན་རྣམས་ད་རེབ་བཏང་སྙོམས་སུ་མི་འཇོག་པར་བསྡུ་ལེན་དང་། ཕྱིན་ཆད་མི་བུ་སྒེར་བར་
སྔར་གནས་བཞིན་བུ་ལོན་མི་འཇོག་པའི་རེ་འབོད་ཞུ།།
ཕྱི་ནང་ཡུལ་གྲུ་ཁག་ན་ཡོད་པའི་པེན་བོད་ཀྱི་རྩོམ་པ་པོའི་མཐུན་ཚོགས་ལ་བུ་ལོན་ཆད་པའི་ཚོགས་མི་སུ་ཡིན་གྱིས་ངོ་ཚ་དང་ལས་རྒྱུ་འབྲས་ཁྲེལ་ལྡན་བག་ཡོད་པའི་ཀུན་སློང་ཁུར་ནས་ཚོགས་ལ་དུས་ལྟ་བ་ལོན་སྤྲོད་རེ་འབོད་ཞུ།
ཚོགས་མི་དཀྱུས་མ་ཀུན་དགའ་ནས།