༧གོང་ས་མཆོག་གིས་ཧིན་རྡུའི་གསུང་ཆོས་དབུ་འཛུཊ་ཐོག་བཀའ་སློབ་བསྩལ།

དེ་རིང་ཉིན་རྒྱབ་༧གོང་ས་མཆོག་ངྷ་ཤོད་ཉེན་རྟོག་ཐང་ཆེན་དུ་རྒྱ་གར་གྱི་ཧིན་རྡུ་བླ་ཆེན་མཱོ་རཱ་རེ་བྷ་པུ་ཡི་གསུང་ཆོས་དབུ་འཛུགས་མཛད་སྒོར་ཆིབས་སྒྱུར་བསྐྱངས་ཏེ་རྒྱ་གར་ཆོས་ཞུ་བ་ཚོར་བཀའ་སློབ་གནང་ཡོད།

དེ་རིང་ཕྱི་ཚེས་ ༢༢ ཉིན་རྒྱབ་ཆུ་ཚོད་ ༢ དང་ཕྱེད་ཀའི་ཐོག ཧི་མ་ཅཱལ་ཀང་རཱ་རྫོང་ངྷ་ཤོད་ཉེན་རྟོག་ཐང་ཆེན་(Police ground) དུ་རྒྱ་གར་ཧིན་རྡུའི་བླ་ཆེན་མཱོ་རཱ་རེ་བྷ་པུ་(Morari Bapu) ཡིས་ཉིན་ ༩ རིང་གི་གསུང་ཆོས་དབུ་འཛུགས་སྟེང་། ༧གོང་ས་མཆོག་གདན་ཞུས་ལྟར་ཆིབས་སྒྱུར་གྱིས་མཱོ་རཱ་རེ་བྷ་པུ་དང་ལྷན་དུ་གསུང་ཆོས་དབུ་འཛུགས་ཀྱི་སྣང་གསལ་སྒྲོན་མེ་ཞལ་འབྱེད་གནང་སོང་།

ཐེངས་འདིའི་མཱོ་རཱ་རེ་བྷ་པུ་ཡི་གསུང་ཆོས་ནི་ཕྱི་ཚེས་ ༢༢ ནས་ཕྱི་ཚེས་ ༣༠ པར་གནང་རྒྱུ་ཡིན་འདུག་ལ། གསུང་ཆོས་ཀྱི་ནང་དོན་དང་བརྗོད་བྱ་གཙོ་བོ་ནི་རྒྱ་གར་གྱི་རིག་བྱེད་གཏམ་རྒྱུད་ར་མ་ཡ་ཎ་(Ramayana) ཡིན་འདུག་ལ། གསུང་ཆོས་དབུ་འབྱེད་མཛད་སྒོའི་ཐོག་གསུང་ཆོས་གོ་སྒྲིག་ཚོགས་ཆུང་གིས་༧གོང་ས་མཆོག་དབུ་འབྱེད་མཛད་སྒོར་ཆིབས་སྒྱུར་གནང་པ་དང་། ཐེངས་འདིར་ནང་པ་དང་ཧིན་རྡུའི་བླ་ཆེན་གཉིས་ལྷན་འཛོམས་གནང་བྱུང་པ་ནི། ཆོས་ཞུ་བ་ཚོའི་བསོད་ནམས་དང་སྐལ་བ་བཟང་པོ་ཞིག་ཡིན་སྐོར་བརྗོད་སོང་།

དབུ་འབྱེད་མཛད་སྒོའི་སྟེང་༧གོང་ས་མཆོག་གིས། ཆོས་གྲོགས་མཱོ་རཱ་རེ་བྷ་པུ་དང་ཐེངས་གཉིས་པར་མཇལ་འཕྲད་བྱུང་པར་དགའ་ཚོར་ཆེན་པོ་སྐྱེས་ཡོད་པ་དང་། ཁོང་བོད་ནས་སྐྱེས་ཡོད་ཀྱང་སྐུ་ཚེ་ཕལ་ཆེ་བ་རྒྱ་གར་ནང་བསྐྱལ་ཡོད་སྟབས་རྒྱ་གར་ནི་ཁོང་ཉིད་ཀྱི་ནང་ལྟ་བུ་ཞིག་ཆགས་ཡོད་པ། རྒྱ་གར་ནི་འཛམ་གླིང་གི་ཆོས་ལུགས་རྙིང་ཤོས་དར་ཡུལ་ཞིག་དང་། ཆོས་ལུགས་རྙིང་ཤོས་མང་པོའི་འབྱུང་ཁུངས་ལྟ་བུ་ཆགས་ཡོད་པ་མ་ཟད་ཚང་མ་མཉམ་གནས་བྱེད་སྡོད་ཡོད་པ། ཁོང་གིས་དུས་རྒྱུན་རྒྱ་གར་ནི་ཆོས་ལུགས་འཆམ་མཐུན་གྱི་དཔེ་མཚོན་ཞིག་ཡིན་པར་རྗོད་ཀྱི་ཡོད་སྐོར་གསུངས་སོང་།

ཡང་ཁོང་གིས་རྒྱ་གར་ཆོས་ཞུ་བ་ཚོར། ཁོང་གིས་མཚམས་རེར་རང་ཉིད་རྒྱ་གར་གྱི་གནའ་བོའི་རིག་གཞུང་འཆད་མཁན་གྱི་ཕོ་ཉ་ཞིག་ཡིན་ཚུལ་གསུང་གི་ཡོད་སྐོར་དང་། འཛམ་གླིང་གི་ཆོས་ལུགས་དབུ་ཁྲིད་ཚོས་ཁ་ཡོད་ལག་ཡོད་ཐོག་མང་ཚོགས་ལ་ཆོས་ལུགས་ཀྱི་གོ་རྟོགས་སྤེལ་དགོས་པ། མཱོ་རཱ་རེ་བྷ་པུ་ཡིས་ཆོས་ཁང་ཞིག་གི་ནང་བསྡད་འདུག་རྒྱུ་མ་ཡིན་པར་ཁ་ཡོད་ལག་ཡོད་ཀྱིས་མང་ཚོགས་དང་འབྲེལ་བ་བྱས་ཤིང་། མང་ཚོགས་དང་སྐད་ཆ་བཤད་དེ་ཆོས་ཀྱི་གོ་རྟོགས་སྤེལ་གྱི་ཡོད་པར་བསྔགས་བརྗོད་ཡོད་ཅེས་གསུངས་སོང་།

མཐར་༧གོང་ས་མཆོག་གིས་ཧིན་རྡུ་ཆོས་ཞུ་བ་ཚོར། དུས་རྒྱུན་དངུལ་གཅིག་པུར་དོ་སྣང་བྱེད་བསྡད་ན་མཚམས་རེར་གནོན་ཤུགས་དང་དཀའ་ངལ་རིགས་ཡོང་གི་ཡོད་སྟབས། མི་ཚེ་ཡག་པོ་ཞིག་ཡོང་ཕྱིར་སོ་སོ་གཅིག་པུ་མིན་པར་མི་གཞན་གྱི་བདེ་སྡུག་ལ་སེམས་ཁུར་དང་རོགས་འདེགས་བྱ་རྒྱུ་གལ་ཆེན་པོ་ཡིན་པ། དེ་རིང་འདིར་མི་ཧ་ཅང་མང་པོ་འདུ་འཛོམས་བྱུང་ཡོད་པ་འདི་ཡང་སྤྲོད་སྐྱིད་ཀྱི་འདུ་འཛོམས་ཤིག་མིན་སྟབས། ཆོས་ཞུ་བ་ཚང་མས་སོ་སོའི་ནང་སེམས་ཀྱི་འཕེལ་རྒྱས་ཐད་ནས་ངེས་པར་དུ་ཤེས་བྱ་མི་ཉུང་པ་ཞིག་འཐོབ་པར་བྱ་དགོས་པ་དང་། གང་ཐོབ་པ་དག་ཉིན་ནས་ཟླ་དང་། ཟླ་ནས་ལོ་བྱས་ཏེ་རིམ་བཞིན་ཡར་རྒྱས་གཏོང་དགོས་སྐོར་སོགས་བཀའ་བསྩལ་སོང་།

གསར་འགོད་པ། བནྡེ་སྐྱབས།