དེ་རིང་ཕྱི་དྲོ་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བཀའ་བློན་བདེ་སྐྱིད་ཆོས་དབྱངས་མཆོག་གིས། བོད་ནང་གི་རྩོམ་པ་པོ་གངས་མིང་པས་བརྩམས་པའི་༼ས་བྱི་ཁྲག་བྲིས་དམར་པོ༽ཞེས་པའི་དེབ་དབུ་འབྱེད་གནང་སོང་།
དེ་རིང་ཕྱི་ཚེས་ ༢༤ ཉིན་གྱི་ཕྱི་དྲོ་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། དཔེ་དེབ་དབུ་འབྱེད་ཀྱི་གསལ་འགོད་གསལ་བསྒྲགས་ཤིག་བསྐྱངས་ཏེ། དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཆེད་ཕེབས་ཀྱིས། བོད་ནང་གི་རྩོམ་པ་པོ་གངས་མིང་པ་ལགས་ཀྱི་བརྩམས་པའི་ ༼ས་བྱི་ཁྲག་བྲིས་དམར་པོ༽ཞེས་པའི་དེབ་དེ་དབུ་འབྱེད་འགྲེམས་སྤེལ་བྱས་སོང་། རྩོམ་པ་པོ་ཁོང་ད་ལྟའི་ཆར་རྒྱ་ནག་གི་འཇུ་བཟུང་བཀག་སྡོམ་འོག་བཞུགས་ཡོད་འདུག
༼ས་བྱི་ཁྲག་བྲིས་དམར་པོ༽ཞེས་པའི་དེབ་ནང་གཙོ་བོ། ཕྱི་ལོ་ ༢༠༠༨ ནས་ ༢༠༠༩ བར་གྱི་ས་བྱི་ཞི་རྒོལ་ཆེན་མོའི་སྐབས། རྩོམ་པ་པོ་གངས་མིང་པ་ཁོང་གིས་དངོས་སུ་མཐོང་བ་དང་ཐོས་པ། ས་གནས་ཁག་ཅིག་ལ་ཆེད་ཕེབས་ཀྱིས་གནས་སྟངས་ལ་ཞིབ་འཇུག་དང་། སྐབས་དེར་རྨས་སྐྱོན་ཕོག་སྟེ་སྨན་ཁང་ནང་སྡོད་མཁན་ཁག་ཅིག་ལ་བཅར་འདྲི་ཞུས་པ་སོགས། སྒྲོ་འདོགས་དང་འཁྱོག་བརྗོད་མེད་པའི་ཐོག་ནས་གནས་ཚུལ་རྣམས་ཟིན་བྲིས་བརྒྱབ་པ་ཞིག་ཡིན་འདུག དེ་དང་མཉམ་དུ་བོད་ཀྱི་རྩ་དོན་དང་བོད་དོན་འཐབ་རྩོད་བྱེད་ཕྱོགས། རྒྱ་ནག་གི་སྲིད་ཇུས་བཅས་ཀྱི་ཐད་རྩོམ་པ་པོ་རང་ཉིད་ཀྱི་བསམ་ཚུལ་དང་རེ་སྐུལ། ༢༠༠༨ ལོའི་དམིགས་བསལ་ཚོགས་ཆེན་དང་པོའི་སྐབས། རྩོམ་པ་པོ་ཁོང་གིས་བརྒྱུད་ལམ་ཁག་ལ་ལྟ་ཉན་བྱས་ཏེ། ཉིན་རེ་རེའི་གནས་ཚུལ་རྣམས་ཟིན་ཐོ་བཀོད་པ་རྣམས་དང་། དེ་བཞིན། རྩོམ་པ་པོ་རང་ཉིད་དམིགས་བསལ་ཚོགས་ཆེན་ལ་དངོས་སུ་ཞུགས་ཐབས་མེད་པའི་སེམས་ཀྱི་སྐྱོ་ཚོར་དང་། དམིགས་བསལ་ཚོགས་ཆེན་ཐོག་ཞུ་འདོད་ཀྱི་བསམ་ཚུལ་བཅས་བཀོད་ཡོད་འདུག
བཀྲ་ཤིས་བདེ་ལེགས་ཀྱིས་༼ས་བྱི་ཁྲག་བྲིས་དམར་པོ༽དེབ་ཀྱི་བྱུང་རིམ་དང་རྩོམ་པ་པོ་ངོ་སྤྲོད་གནང་དོན། “ བོད་ནང་གི་གནས་སྟངས་ཚང་མས་མཁྱེན་གསལ་ཡིན་པ་ལྟར། རྩོམ་པ་པོ་ཁོང་རང་གིས་དེབ་འདི་པར་འགྲེམས་གནང་མ་ཐུབ་པར་བརྟེན་ནས། མི་གསུམ་པ་ཞིག་བརྒྱུད་ང་ཚོ་འབྲེལ་ཡོད་ལ་སྐུར་ཏེ་ངེས་པར་དུ་པར་འགྲེམས་ཞུ་དགོས་པ་གསུངས་འདུག ཡིན་ནའང་། དེབ་དེ་ངའི་ལག་པར་མ་འབྱོར་བའི་ཉིན་གཉིས་ཀྱི་སྔོན་ལ་རྩོམ་པ་པོ་ཁོང་རྒྱ་གཞུང་གིས་འཇུ་བཟུང་བཙན་ཁྲིད་བྱས་ཏེ། ད་ལྟའི་ཆར་རྒྱ་གཞུང་གི་བཀག་ཉར་འོག་ཡོད་པ་རེད།” ཅེས་བརྗོད་དེ། དེབ་དེ་པར་འགྲེམས་བྱེད་དོན་གཙོ་བོ་ནི། རྩོམ་པ་པོ་ཁོང་གིས་ངེས་པར་དུ་སྤྱི་ཚོགས་ཁྲོད་འགྲེམས་སྤེལ་ཡོང་བའི་རེ་སྐུལ་ལྟར་པར་འགྲེམས་ཞུས་པ་ཡིན་པ་དང་། དེབ་འདིས་རྩོམ་པ་པོ་ཁོང་ཉིད་ཀྱི་མགྲིན་ཚབ་བྱས་ཏེ། ཐེངས་འདིའི་དམིགས་བསལ་ཚོགས་ཆེན་ཐོག་འགྲེམས་སྤེལ་ཡོང་བའི་རེ་བ་ཡོད་ལ། དེ་བཞིན། དམིགས་བསལ་ཚོགས་ཆེན་དེ་བོད་ནང་གི་ཛ་དྲག་གནས་སྟངས་དང་འབྲེལ་བ་ཆགས་ཡོད་སྟབས། བོད་ནང་གི་གནས་སྟངས་དང་བོད་མིའི་མངོན་འདོད་ངེས་པར་ཤེས་དགོས་སྟབས། བོད་ནང་གི་བོད་མི་ཚོའི་འབོད་སྒྲ་མཁྱེན་རྟོགས་དང་དྲན་གསོ་ཡོང་བའི་ཆེད། དེབ་འདིའི་ནང་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམ་པའི་ཞལ་ཆེམས་དང་། བོད་ནང་དུ་རིམ་པར་བྱུང་བའི་ཞི་རྒོལ་སྐབས་སོ་སོའི་འབོད་ཚིག་བཅས་ཀྱང་ཟུར་བཀོད་བྱས་ཡོད་སྐོར་ངོ་སྤྲོད་གནང་སོང་།
ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས། བོད་ནང་གི་རྩོམ་པ་པོ་གངས་མིང་པ་ལགས་ཀྱིས་བརྩམས་པའི་༼ས་བྱི་ཁྲག་བྲིས་དམར་པོ༽དབུ་འབྱེད་དང་སྦྲགས། “རྩོམ་པ་པོ་ཁོང་གིས་སོ་སོའི་སྲོག་ལ་མ་འཛེམས་པའི་ཐོག་ནས་བོད་ནང་གི་གནས་ཚུལ་རྣམས་ཡིག་ཐོག་ལ་བཀོད་ཡོད་པ་རེད། ད་ཐེངས་དམིགས་བསལ་ཚོགས་ཆེན་དང་ཁ་ཐུག་འཁེལ་བ་དེ་ཧ་ཅང་ཡག་པོ་བྱུང་འདུག” ཅེས། བོད་ནང་གི་བོད་མི་ཚོས་རང་སྲོག་བློས་གཏོང་གི་སྒོ་ནས། བོད་མིའི་རང་དབང་དང་ཐོབ་ཐང་བརྩོན་ལེན་གནང་བཞིན་པའི་སྐོར་གྱི་གནས་ཚུལ་དང་། པར་རིས། གློག་བརྙན། ཡིག་བྲིས་སོགས་རིང་ཐུང་ལ་མ་བལྟས་པའི་ཐོག་ནས་ཧ་ཅང་རྩ་ཆེན་པོ་གནང་གི་ཡོད་སྐོར་གསུངས་སོང་།
དེ་བཞིན། དེབ་དེའི་སྔོན་གླེང་དུ་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། “ ས་བྱི་ཞི་རྒོལ་ཆེན་མོའི་སྐབས་བོད་ཆོལ་ཁ་གསུམ་ནས་ཕོ་མོ་དང་རྒན་གཞོན། ཞིང་འབྲོག གྲྭ་བཙུན་དབྱེ་བ་མེད་པའི་ཐོག་ནས་རྒྱ་གཞུང་ལ་ཞི་བའི་ངོ་རྒོལ་བྱེད་སྐབས། རྒྱ་ནག་གཞུང་གིས་གནད་དོན་སྣ་ཚོགས་ལ་ཁ་གཡར་ནས་བོད་མི་རྣམས་གསོད་རྡུང་བཙོན་འཇུག་སོགས་བྱས་དང་བྱེད་བཞིན་པ་རྣམས། དངོས་སུ་མིག་གིས་མཐོང་བ་དང་དངོས་ཡོད་ཀྱི་གནས་ཚུལ་ཤེས་མཁན་ཚོས། རང་སྲོག་ལ་མ་འཛེམས་པར་ཉིན་རེའི་ནང་གང་བྱུང་བ་རྣམས་ཟིན་ཐོར་བཀོད་དེ། འཛམ་གླིང་མི་མང་གིས་བོད་ཀྱི་དཀའ་སྡུག་ཤེས་རྟོགས་ཆེད་འདི་ལྟར་སྙིང་སྟོབས་བསྐྱེད་པ་ནི། བོད་མི་རིགས་ཀྱི་སྙིང་སྟོབས་དང་ཞི་བའི་འཐབ་རྩོད་རྣམས་ལོ་རྒྱུས་ཀྱི་དེབ་ཐེར་ནང་ནམ་ཡང་གསོན་གནས་ཐུབ་པ་ཞིག་ཆགས་ཡོད།” ཅེས་བཀོད་འདུག
ས་བྱི་ཁྲག་བྲིས་དམར་པོའི་མཐའ་མཇུག་གི་གཏམ་དུ། རྩོམ་པ་པོ་ཁོང་ཉིད་ཀྱིས་ “ཁྲི་མུན་ན་སྡུག་བསྔལ་མྱོང་མི་ཚོ་སྡུག་གྱོང་གིས་འཚོ་དགོས་པ་ཡིན་ནམ། ཁོ་ཚོས་ཐོད་དུ་བླངས་པའི་སྡུག་བསྔལ་ནི་འུ་ཅག་བོད་པ་ཚང་གི་སྡུག་བསྔལ་ཡིན་ན། འུ་ཅག་གིས་སེམས་ནས་བཟོད་ཐུབ་བམ། གཏན་ནས་བཟོད་མི་ཐུབ། དེས་ན་རང་རང་གི་གོ་གནས་དང་ལས་ཀ། ཅ་ནེ་སོགས་ཀྱང་གལ་ཆེ་རུང་གཙོ་བོ་མི་རིགས་ཀྱི་ཆེད་དུ་གསོན་དགོས་ལ་ཤི་བའི་ཉིན་མོར་འཆི་དགོས། འདི་ལྟར་འཆི་བ་ལ་རིན་ཐང་ཡོད་པས། ཡོད་ཚད་ཀྱིས་མཐུན་པའི་དཔུང་བ་མཉམ་གཤིབས་ཀྱིས་བདེན་པའི་འོ་དོད་འབོད། ཞི་བའི་ཡར་ལངས་མུ་མཐུད་སྤེལ།” ཞེས་བྲིས་འདུག
རྩོམ་དེབ་འདི་གང་ནས་འཐོབ་ཀྱིན་ཡོད་དམ། ངས་ངེས་པར་དུ་ཀློག་རྒྱུ་ཡིན། དཔའ་བོ་ཤེས་ཡོན་ཅན་དེར་སྙིང་ནས་དགའ་བ་སྒོམ་ཡོད།
བོད་ནང་གི་རྩོམ་པ་པོ་གངས་མིང་པས་ལགས་ཀྱིས་བརྩམས་གནང་བའི་དེབ་དེ་ངོ་མ་བལྟ་འདོད་ཆེ་བས་གང་མང་མི་མང་ནང་བཀྲམ་ཐུབ་པའི་རེ་བ་ཡོད།
བོད་ནང་གི་རྩོམ་པ་པོ་གངས་མིང་པ་ལགས་ཀྱིས་བརྩམས་པའི་༼ས་བྱི་ཁྲག་བྲིས་དམར་པོ༽གང་མང་སྤར་ནས་དབུ་འབྱེད་དང་སྦྲག་འགྲེམ་སྤེལ་གསལ་སྒྲག་ཐུབ་པར་དགའ་སྤོབས་ཆེ་ལགས། རྗེས་སུ་ཡི་རང་ཡང་ཡོད་ལགས། ཐུགས་རྗེ་ཆེ་ཞེས་ཀྱང་ཞུའོ། །