ཝང་ལ་ཁྲིམས་ཐག་བཅད་འདུག

དེ་རིང་སྔ་དྲོ་རྒྱ་ནག་ཁྲིན་ཏུའུ་གྲོང་ཁྱེར་ཁྲིམས་ཁང་གིས། ཝང་ལིས་ཅོན་ལ་ལོ་ ༡༥ དུས་བཀག་བཙོན་འཇུག་གི་ཁྲིམས་ཐག་བཅད་འདུག

དེ་རིང་ཕྱི་ཚེས་ ༢༤ ཉིན་གྱི་སྔ་དྲོ་རྒྱ་ནག་ཟི་ཁྲོན་ཁྲིན་ཏུའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས། དེ་སྔའི་ཁྲུང་ཆིན་གྲོང་ཁྱེར་གྱི་མགོ་གཙོ་གཞོན་པ་དང་ཉེན་རྟོག་སྡེ་ཁག་གི་མགོ་གཙོ་ཝང་ལིས་ཅོན་ལ། ཁྲིམས་འགལ་ཕྱོགས་འཁྱེར་གྱི་ཉེས་མིང་འོག་དུས་བཀག་བཙོན་འཇུག་ལོ་ ༧ དང་། ངོ་ལོག་བྲོས་བྱོལ་གྱི་ཉེས་མིང་འོག་དུས་བཀག་བཙོན་འཇུག་ལོ་ ༢ དང་ལོ་གཅིག་གི་ཆབ་སྲིད་ཁེ་དབང་མེད་པ་བཟོས་པ། དབང་ཆ་སྒེར་གཅོད་ཀྱི་ཉེས་མིང་འོག་དུས་བཀག་བཙོན་འཇུག་ལོ་ ༢ ། ལྐོག་དངུལ་རུལ་སུངས་ཀྱི་ཉེས་མིང་འོག་དུས་བཀག་བཙོན་འཇུག་ལོ་ ༩ ཁྲིམས་ཆད་ཕོག་ཡོད་ཀྱང་། མཐའ་མའི་ཐག་གཅོད་ལ་ཉེས་ཆད་ཁག་ཕྱོགས་བསྡོམས་ཀྱིས་ལོ་ ༡༥ དུས་བཀག་བཙོན་འཇུག་དང་། ལོ་གཅིག་གི་ཆབ་སྲིད་ཁེ་དབང་འཕྲོག་ཡོད་འདུག

རྒྱ་གཞུང་སི་སི་ཌེ་བེ་བརྙན་འཕྲིན་ཁང་གིས་ཝང་ལི་ཅོན་གྱིས་ཁྲིམས་ཁང་གི་ཁྲིམས་ཆད་ཁག་དང་ལེན་གྱིས་བསྐྱར་དུ་ཞུ་གཏུགས་མི་བྱེད་པའི་ཁས་ལེན་བྱས་ཡོད་སྐོར་བརྗོད་ཡོད་ལ། དེ་བཞིན། རྒྱ་གཞུང་ཞིན་ཧྭ་གསར་ཁང་གིས་སྤེལ་བའི་གནས་ཚུལ་ནང་། ཝང་ལིས་ཅོན་ཨ་རིའི་གཞུང་ཚབ་ཁང་དུ་འཛུལ་དགོས་དོན་ནི། ཁོ་རང་གི་ཉེན་རྟོག་དཔོན་གྱི་ལས་གནས་བརྗེ་སྤོར་བྱས་པ་མ་ཟད། ལག་འོག་གི་ལས་མི་མང་པོ་ཞིག་ལ་ཁྲིམས་འགལ་ཐོག་ཞིབ་བཤེར་བྱས་པར་བརྟེན། རང་ཉིད་ཉེན་ཁ་ལས་ཐར་ཆེད་ཨ་རིའི་གཞུང་ཚབ་ཁང་དུ་འཛུལ་ཏེ་ཆབ་སྲིད་སྐྱབས་བཅོལ་ཞུས་པ་དང་། དེ་བཞིན། ཁྲིམས་མཐུན་མ་ཡིན་པའི་ཐོག་ནས་མི་མང་ལ་ཁྲིམས་ཆད་བཅད་པ་དང་། ཏ་ལེན་གྱི་བཟོ་ཚོང་གནད་ཡོད་མི་སྣའི་ལག་ནས་ལྐོག་དངུལ་བླངས་ཏེ་དོགས་ཡོད་འཇུ་བཟུང་འོག་ཡོད་པའི་ཉེས་ཅན་ཕྱིར་གཏོང་བཅུག་པ། ཀུའུ་ཁའེ་ལའེ་ཡི་མི་གསོད་གྱོད་དོན་སོགས་པོ་ཞི་ལའེ་དང་འབྲེལ་ཡོད་ཀྱི་ཉེས་དོན་མང་པོ་ཞིག  ཁྲིམས་ཁང་གི་ཁྲིམས་བཤེར་གསལ་བཤད་ནང་གླེང་སློང་བྱས་ཡོད་པ་མ་ཟད། ཝང་ལིས་ཅོན་གྱིས་མི་གཞན་པའི་ཚབས་ཆེ་བའི་ཁྲིམས་འགལ་ཉེས་དོན་གྱི་ཁུངས་སྣེ་ཕྱིར་བརྟོལ་ཏེ། འབྲེལ་ཡོད་གྱོད་གཞིར་ཞིབ་བཤེར་ཐད་དགེ་ཕན་གྱི་ནུས་པ་ཆེན་པོ་ཐོན་ཡོད་དང་། རྣམ་འགྱུར་ལེགས་པོའི་སྒོ་ནས་རང་ཉེས་ངོས་ལེན་བྱས་ཡོད་པ་བཅས་ལ་བརྟེན་ནས་ཁྲིམས་ཆད་ཇེ་ཡང་དུ་བཏང་ཡོད་སྐོར་བཀོད་འདུག 

ཝང་ལིས་ཅོན་གྱི་གྱོད་དོན་དེ་ནི་པོ་ཞིས་ལའེ་གཙོས་རྒྱ་གཞུང་དཔོན་རིགས་ནང་ཁུལ་གྱི་དབང་ཤུགས་འཐབ་རྩོད་དང་འབྲེལ་བ་དམ་པོ་ཆགས་ཡོད་སྟབས། དབྱེ་ཞིབ་པ་མང་པོ་ཞིག་གིས་ཁྲིམས་ཁང་གིས་བསྒྲགས་པའི་ཝང་ལིས་ཅོན་གྱི་ཉེས་པ་ཐེར་འདོན་གྱི་ཁྲིམས་བཤེར་གསལ་བཤད་ནང་། པོ་ཞི་ལའེ་དང་འབྲེལ་ཡོད་ཀྱི་གནད་དོན་མང་པོ་ཞིག་གླེང་སློང་བྱས་ཡོད་པའི་ཐོག་ནས། རྒྱ་གཞུང་གིས་སྐབས་བཅོ་བརྒྱད་པའི་ཚོགས་ཆེན་སྔོན་ལ་པོ་ཞི་ལའེ་ཡི་གནད་དོན་ཐག་གཅོད་བྱ་རྒྱུ་ཡིན་པ་མ་ཟད། པོ་ཞིས་ལའེ་ལ་དུས་བཀག་ཁྲིམས་ཆད་ཕོག་རྒྱུ་ཡིན་པ་དང་། པོ་ཞི་ལའེ་ཡི་གྱོད་དོན་ཐག་གཅོད་གཙོས་སྐབས་རྗེས་མའི་དཔོན་རིགས་གསར་འདེམས་ཐད། ཀྲུག་ཡུང་ཁཱང་ལ་ཐེ་ཇུས་ཀྱི་དབང་ཤུགས་གང་ཡང་མེད་པ་ཆགས་ཟིན་པའི་ཚོད་དཔག་བྱས་ཡོད་པ་རེད།

ཝང་ལིས་ཅོན་གྱི་གྱོད་དོན་དེ་ཟླ་འདིའི་ཕྱི་ཚེས་ ༡༧ དང་ ༡༨ གཉིས་ལ་ཁྲིམས་ར་ཚོགས་ཏེ་ཁྲིམས་བཤེར་བྱས་ཤིང་། ཕྱི་ཚེས་ ༢༤ ཉིན་ཁྲིམས་ཐག་བཅད་དེ་ཕྱིར་བསྒྲགས་བྱས་ཡོད། རྒྱལ་སྤྱིའི་གསར་ལམ་ཁག་གིས་ཝང་དང་པའོ་གྱོད་དོན་དེ་ནི། རྒྱ་གཞུང་ཆབ་སྲིད་ལྷན་ཁང་གི་རྒྱུན་ལས་དང་ཁྲིམས་སྲིད་ལྷན་ཁང་གི་དྲུང་ཆེ་ཀྲུག་ཡུང་ཁཱང་ལ་འབྲེལ་བ་དམ་པོ་ཆགས་ཡོད་པར་ངོས་འཛིན་བྱེད་བཞིན་ཡོད་ཀྱང་། ཟླ་འདིའི་ཕྱི་ཚེས་ ༢༡ དང་ ༢༢ ཉིན་ཀྲུག་ཡུང་ཁཱང་སིང་གྷ་པའོ་དང་ཨ་ཧྥུ་ཧན་ལ་བསྐྱོད་ཡོད་པ་མ་ཟད། ཝང་ལིས་ཅོན་ལ་ཁྲིམས་ཐག་བཅད་པའི་ཉིན་དེར། རྒྱ་ནག་གི་གསར་ལམ་ཁག་ཏུ་ཀྲུག་ཡུང་ཁཱང་ཕྱིའི་རྒྱལ་ཁབ་ཏུ་ཕྱོགས་བསྐྱོད་པའི་སྐོར་གྱི་གནས་ཚུལ་ཕྱིར་སྒྲོག་བྱས་ཡོད་རེད།  

གསར་འགོད་པ། ཚེ་རིང་རྒྱལ།