བསླེབ་ལ་ཉེ་བའི་ཕྱི་ཟླ་ ༡༠ རྒྱ་གཞུང་དམར་ཤོག་ཚོགས་འདུ་ཐེངས་བདུན་པའི་ཐོག པའོ་དམར་ཤོག་རྩ་འཛུགས་ཁྲོད་ཕྱིར་ཕུད་བཏང་རྗེས་ཁྲིམས་ལ་སྦྱོར་རྒྱུ་ཡིན་པ་དང་། མ་མཐར་ཁོ་ལ་ལོ་ ༢༠ ཁྲིམས་ཐག་གཅོད་སྲིད་པའི་ཚོད་དཔག་བྱེད་བཞིན་འདུག
ཉེ་ཆར་གསར་ལམ་ཁག་ཏུ་གནས་ཚུལ་སྤེལ་དོན་ལྟར་ན། ཕྱི་ཟླ་ ༡༠ ནང་འཚོགས་འཆར་གྱི་རྒྱ་གཞུང་སྐབས་བདུན་པའི་དམར་ཤོགས་ཚོགས་འདུ་ཐེངས་བདུན་པའི་ཐོག པའོ་ཞི་ལའེ་དམར་ཤོག་རྩ་འཛུགས་ཁྲོད་ཕྱིར་ཕུད་དང་གཞུང་གི་ལས་གནས་རྣམས་ཕྱིར་བསྡུ། རྒྱལ་ཡོངས་མི་དམངས་འཐུས་མིའི་ཐོབ་ཐང་རྩིས་མེད་བཅས་བཟོས་རྗེས། པའོ་ཞི་ལའེ་ཡི་གནད་དོན་ཁྲིམས་ཐོག་ལ་བསྐྱལ་ཏེ་ཁྲིམས་ཁང་ནས་ཐག་གཅོད་བྱ་རྒྱུ་ཡིན་འདུག
རྒྱ་ནག་ལའེ་ཉིན་ཞིང་ཆེན་ནས་ཐོན་པའི་གནས་ཚུལ་ལྟར་ན། རྒྱ་ནག་དབུས་གཞུང་གི་བཀོད་མངག་འོག་ས་གནས་མི་སྣ་ ༣༠༠ ཡིས་གྲུབ་པའི་ཞིབ་བཤེར་ཚོགས་ཆུང་གིས། ཕྱི་ཟླ་ ༩ ཚེས་ ༢༣ ཉིན། དེ་སྔོན་པའོ་ཞི་ལའེ་ཏཱ་ལེན་དང་ལའེ་ཉིན་དུ་དཔོན་གནས་འཁུར་བཞིན་པའི་སྐབས་ཁྲིམས་འགལ་ནག་ཉེས་བསགས་ཡོད་པའི་སྐོར་གྱི་ཞིབ་བཤེར་སྙན་ཐོ་བཟོས་ཚར་ཡོད་པ་དང་། པའོ་ཞི་ལའེ་ཡི་ལྐོག་དངུལ་རུལ་སུངས་ཀྱི་གྲངས་འབོར་རྒྱ་སྒོར་དུང་ཕྱུར་ ༡ བརྒལ་ཡོད་ཅིང་། དེའི་ཁྲོད་ཏཱ་ལེན་ཧྲི་ཏིག་ཁེ་ལས་ཚད་ཡོད་བཟོ་གྲྭའི་ལས་འཛིན་ལྷན་ཚོགས་ཀྱི་མགོ་གཙོ་ཞིས་མཱེན་གྱིས་སྤྲད་པའི་ལྐོག་དངུལ་གྱིས་སྤྱི་འབོར་གྱི་སུམ་ཆ་གཅིག་ཟིན་ཡོད་འདུག
མཱེན་ཅིན་གསར་འགྱུར་དྲ་བས་རྒྱ་གཞུང་གི་སྲིད་དོན་མི་སྣའི་སྐད་ཆ་ལུང་འདྲེན་གྱིས་གནས་ཚུལ་སྤེལ་བ་ལྟར་ན། པོ་ཞི་ལའེ་ལ་ལྐོག་དངུལ་རུལ་སུངས་དང་། དབང་ཆ་ཐལ་སྤྱོད། ཁྲིམས་འགལ་ཕྱོགས་འཁྱེར། འཚོ་ཐབས་རུལ་སུངས་བཅས་ནག་ཉེས་ཁག་ ༤ ཐོག་ནས་ཁྲིམས་བཤེར་བྱ་རྒྱུ་ཡིན་པ་མ་ཟད། པའོ་ཞི་ལའེ་ཡི་ནག་ཉེས་ནི་ཝང་ལིས་ཅོན་ལས་ལྕི་བ་ཡོད་སྟབས། པའོ་ལ་མ་མཐར་ལོ་ ༢༠ ལྷག་གི་དུས་བཀག་བཙོན་འཇུག་གི་ཁྲིམས་ཐག་ཕོག་སྲིད་པ་བརྗོད་འདུག
ཡིན་ནའང་། པའོ་ཞི་ལའེ་ཡི་ཕམ་ཉེས་ལ་ཐད་ཀར་འབྲེལ་བ་ཆགས་ཡོད་པའི་རྒྱ་གཞུང་མཐོ་རིམ་དཔོན་རིགས་ནང་ཁུལ་གྱི་འཐབ་རྩོད་དེ་མུ་མཐུད་འགྲོ་བཞིན་ཡོད་སྟབས། པའོ་ཞི་ལའེ་ལ་ཁྲིམས་ཐག་གཅོད་པའི་ཉིན་མོ་དེ་རྒྱ་གཞུང་སྐབས་བཅོ་བརྒྱད་པའི་ཚོགས་ཆེན་གྱི་རྗེས་ལ་དུས་འགྱངས་བྱས་ཏེ། ཕྱི་ལོ་ ༢༠༡༣ ཟླ་ ༢ སྔ་རྗེས་ཙམ་ལ་ཐག་གཅོད་བྱ་རྒྱུ་ཡིན་པའི་ཚོད་དཔག་བྱེད་བཞིན་ཡོད་པ་རེད།
ཟླ་འདིའི་ཕྱི་ཚེས་ ༢༢ ཉིན་གྱི་དགོང་མོ་གློ་བུར་དུ་ཅཱང་ཙེ་མཱེན་ཁོའི་ཆུང་མ་ཝང་ཀྲི་ཕེན་དང་། དེ་སྔའི་རྒྱ་གཞུང་སྲིད་འཛིན་གཞོན་པ་ཟུར་བ་ཙིན་ཆིན་ཧོང་། སྲིད་བློན་གཞོན་པ་ཟུར་པ་ལིས་ཧྥིན་ཆིན། སྲིད་བློན་གཞོན་པ་ཟུར་པ་ཙིན་ཕའེ་ཐན། རྒྱ་ནག་དབུས་ཉེན་སྲུང་སྡེ་ཁག་གི་རུ་གཙོ་ཟུར་པ་ཡཱུག་ཞིས་ཀའེ་སོགས་ཀྱི་འགྲོ་རོགས་འོག རྒྱ་ནག་རྒྱལ་ཁབ་ཟློས་གར་ཁང་ཆེན་མོའི་ནང་ཡོང་སྟེ། ལིས་ཧྥིན་ཆིན་གྱིས་རྩོམ་སྒྲིག་བྱས་པའི་༼ཡིད་དུ་འོང་བའི་སྔོ་ལྗང་གི་ཌ་ན་བྷེ་གཙང་བོ(Blue Danube)༽ཞེས་པའི་དུས་ཡུན་ཆུ་ཚོད་ ༢ ཕྱེད་ཀ་ཅན་གྱི་རོལ་གཞས་འཁྲབ་སྟོན་ལ་བལྟས་རྗེས། གར་སྟེགས་སྟེང་བུད་དེ་འཁྲབ་སྟོན་ལ་གདེང་འཇོག་གི་གཏམ་བཤད་ཀྱང་སྤེལ་ཡོད་འདུག དེ་ནི་ཅཱང་ཙེ་མཱེན་ལོ་སྔོན་མའི་ཕྱི་ཟླ་ ༡༠ ཚེས་ ༩ ཉིན་པེ་ཅིན་དུ་ལྕགས་ཕག་ལོའི་གསར་བརྗེ་ལོ་ ༡༠༠ འཁོར་བའི་དུས་དྲན་མཛད་སྒོར་ཞུགས་པའི་རྗེས། མང་ཚོགས་འདུ་འཛོམས་སར་དངོས་སུ་ཐོན་པ་ཐེངས་དང་པོ་ཆགས་ཡོད།
སྐབས་དོན་དཔྱད་བརྗོད་པ་དག་གིས། རྒྱ་གཞུང་གི་དཔོན་རིགས་གསར་བ་འདེམས་སྒྲིག་གི་མཐའ་མའི་ཐག་གཅོད་སླེབས་ལ་ཉེ་བའི་སྐབས་དང་བསྟུན་ནས། ལོ་ ༨༦ སོན་པའི་ཅཱང་ཙེ་མཱེན་མང་ཚོགས་ཀྱི་མཐོང་ལམ་དུ་ཐོན་པ་དེ་ནི། རྒྱ་གཞུང་དཔོན་རིགས་ནང་ཁུལ་གྱི་དབང་ཤུགས་འཐབ་རྩོད་ཛ་དྲག་ཏུ་གྱུར་ཡོད་པ་དང་། ཙིན་ཆིན་ཧོང་དང་ཀྲུག་ཡུང་ཁཱང་གཙོས་ཅཱང་ཤོག་ཁག་གིས་འཕག་འཚག་རྒྱག་བཞིན་པ་གསལ་བོ་མངོན་ཡོད་ཀྱང་། རྒྱ་ནག་གཞུང་འབྲེལ་གསར་ལམ་ཁག་ཏུ་དེའི་སྐོར་གྱི་གནས་ཚུལ་གང་ཡང་མ་ཐོན་པ་དེས། ཅཱང་ཤོག་ཁག་གི་དབང་ཤུགས་ཀྲུང་ནན་ཧེ་ནས་ཉམས་ཉེས་ཆེན་པོ་ཕྱིན་ཟིན་པའི་ངོས་འཛིན་བྱེད་བཞིན་འདུག
གསར་འགོད་པ། ཚེ་རིང་རྒྱལ།
ཕྱི་ལ་ཐོན་དགོས་ན། མའོའི་རོ་ཁོགས་དེ་ཕྱི་ལ་བཏོན་རན་པ་དང་། སྡིག་ཅན་ཙང་ཙྰང་མིན་གསོན་དུར་དུ་བཅུག་རན་པ་རེད་དེ། རྒྱ་རིགས་མི་མང་ལ་ཤེས་སྟོབས་མེད་པས་ལན་པ་རེད་སྙམ་པ་དང་། གནས་ཚུལ་གཞན་རྣམས་བསྐྱར་དུ་ཟློས་འདོད་མེད་ལགས།
ཡག་པོ་འདུག བྲེལ་འཚུབ་ཀྱིས་ཡིག་ནོར་འགའ་རེ་མངོན་གྱིན་གདའ། སྐྱོན་ཆེ་བ་མ་མཐོང་། ཐུགས་རྗེ་ཆེ།