ཉེ་བའི་ལོ་འགའི་རིང་བོད་ཀྱི་སྐད་གསུམ་སྤྱོད་པའི་སློབ་གཉེར་བ་དག་གི་དགོས་མཁོ་སྐོང་ཆེད། མི་རིགས་དཔེ་སྐྲུན་ཁང་དང་བོད་ལྗོངས་མི་དམངས་དཔེ་སྐྲུན་ཁང་གཉིས་མཉམ་འབྲེལ་ཐོག མཁས་དབང་བཀྲ་ཤིས་ཚེ་རིང་ལགས་དང་དགེ་རྒན་ཆེན་མོ་ལྷག་པ་ཚེ་རིང་གཉིས་ཀྱིས་བོད་རྒྱ་དབྱིན་གསུམ་གྱི་ ༼སྐད་གསུམ་ཚིག་མཛོད་གསར་བ༽ ཞེས་པ་ཞིག་སྒྲིག་ཏེ་ཉེ་ཆར་དངོས་སུ་པར་བསྐྲུན་འགྲེམས་སྤེལ་བྱས་ཡོད་འདུག ཚིག་མཛོད་འདིར་བསྡོམས་ཐ་སྙད་ ༡༥༣༢༧ བསྡུས་ཡོད་ཅིང་། དེའི་ནང་རྒྱུན་སྤྱོད་ཐ་སྙད་དང་གསལ་འགྲེལ་ཡི་གེ་གོ་བདེ་བར་བྱེད་པ། སྟབས་བདེ་དང་ཐུང་ངུའི་ངང་བོད་ཀྱི་སྤྱི་ཚོགས་འཚོ་བ་དང་ལོ་རྒྱུས་རིག་གནས་དཔེ་བརྗོད་ཀྱི་ལམ་ནས་ཞིབ་བརྗོད་བཅས་བྱས་ཡོད་པ་མ་ཟད། མཆན་འགྲེལ་ཡི་གེ་དང་དཔེ་བརྗོད་ཁག་རྒྱུན་སྤྱོད་ཀྱི་དབུས་གཙང་སྐད་སྤྱད་ཡོད་འདུག ཚིག་མཛོད་དེ་ནི་མཁས་དབང་བཀྲ་ཤིས་ཚེ་རིང་ལགས་ཀྱིས་དེ་སྔ་དཔར་སྐྲུན་བྱས་པའི་༼བོད་རྒྱ་དབྱིན་གསུམ་ཚིག་མཛོད༽ ཀྱི་རྨང་གཞིའི་སྟེང་ལེགས་སྒྲིག་བྱས་པ་ཞིག་ཡིན་འདུག 
ཐེངས་འདིའི་ ༼སྐད་གསུམ་ཚིག་མཛོད་གསར་བ༽ འགྲོ་གྲོན་ཐད་མཁས་དབང་བཀྲ་ཤིས་ཚེ་རིང་ཁོང་རང་ངོས་ནས་རྒྱ་སྒོར་འབུམ་ ༥ བཏང་སྟེ་ཁྱོན་དེབ་ཁྲི་ ༣ པར་བསྐྲུན་འགྲེམས་སྤེལ་བྱས་ཡོད་པ་ལས། རྩོམ་པ་པོར་ལེགས་སྐྱེས་སུ་ཕུལ་བའི་དེབ་ཕྲེང་ ༢༠༠༠ ལས་གཞན་པའི་དེབ་ཁྲི་ ༢ མ་འོངས་པའི་ལོ་གཉིས་ཀྱི་ནང་མི་རིགས་དཔེ་སྐྲུན་ཁང་དང་བོད་ལྗོངས་མི་དམངས་དཔེ་སྐྲུན་ཁང་བཅས་ཀྱིས་དེབ་ཁྲི་ ༡ འགྲེམས་སྤེལ་བྱ་རྒྱུ་ཡིན་འདུག་ལ། ད་དུང་པེ་ཅིང་མི་རིགས་དཔེ་སྐྲུན་ཁང་གིས་ཀན་སུའུ་དང་སི་ཁྲོན། མཚོ་སྔོན། ཡུན་ནན་སོགས་ཞིང་ཆེན་དང་ས་ཁུལ་གཞན་གྱི་འགྲེམ་སྤེལ་བྱ་རྒྱུ་དང་། བོད་ལྗོངས་མི་དམངས་དཔེ་སྐྲུན་ཁང་གིས་བོད་རང་སྐྱོང་ལྗོངས་སུ་པར་སྐྲུན་འགྲེམ་སྤེལ་དང་ཚོང་འགྲེམས་བྱ་འཆར་ཡོད་པ་མ་ཟད། རྒྱལ་ཁབ་ཀྱི་མི་རིགས་སྐད་ཡིག་སྡེ་ཁག་དང་རྒྱལ་ཡོངས་དམངས་ཆེན། རྒྱལ་ཡོངས་སྲིད་གྲོས། ཀྲུང་གོའི་སྤྱི་ཚོགས་ཚན་རིག་གླིང་། རྒྱལ་ཁབ་མི་རིགས་ཆོས་ལུགས་ཨུ་ཡོན་ལྷན་ཁང་སོགས་སྡེ་ཁག་དང་འབྲེལ་བའི་སྐད་ཡིག་ཞིབ་འཇུག་ལས་ཁུངས་དང་། ཀྲུང་དབྱང་མི་རིགས་སློབ་ཆེན་དང་། ལྷོ་ནུབ་མི་རིགས་སློབ་ཆེན།ནུབ་བྱང་མི་རིགས་སློབ་ཆེན། བོད་ལྗོངས་མི་རིགས་སློབ་ཆེན།ལྷ་ས་དགེ་འོས་མཐོ་རིམ་ཆེད་ཚན་སློབ་གྲྭ་སོགས་སློབ་ཆེན་ཁག་དང་། བོད་ཁུལ་གྱི་མཐོ་འབྲིང་ཡན་གྱི་སློབ་གྲྭའི་དཔེ་མཛོད་ཁང་བཅས་སུ་ལེགས་སྐྱེས་སུ་འབུལ་རྒྱུ་ཡིན་འདུག
གསར་འགོད་པ། དོན་གོ
འདྲ་དཔར་ནང་མཁས་པ་མི་གཉིས་དང་བོད་ཀྱི་ཨོམ་གཟུགས་དང་བཅས། སྐད་གསུམ་ཚིག་མཛོད་གསར་པ། ཞེས་བྲིས་འདུག་པ་ལ།
དོན་གོས། བོད་རྒྱ་དབྱིན་གསུམ་གྱི་ ༼སྐད་གསུམ་ཚིག་མཛོད་གསར་བ༽ ཞེས་པ་ཞིག་སྒྲིག་ཏེ་ཉེ་ཆར་དངོས་སུ་པར་བསྐྲུན་འགྲེམས་སྤེལ་བྱས་ཡོད་འདུག ཅེས་པའི་གསར་པ་ལ་གསར་བ་ཞེས་བ་ཡིག་འབྲི་དགོས་དོན་ཅི་ཡིན་ནམ། ལགས།
སྐད་གསུམ་ཚིག་མཛིད་གསར་པ་འདི། རྩོམ་སྒྲིག་གནང་མཁན་རྣམ་གཉིས་ཀྱི་བཀའ་འཁྲོལ་འོག ཉེ་ཆར་སཱ་ར་མཐོ་སློབ་ཀྱིས་སྤུས་ལེགས་འཁྱེར་བདེ་ཞིག་ཏུ་པར་སྐྲུན་གནང་འདུག འགྲེམས་སྤེལ་གནང་ཕྱོགས་གང་འདྲ་ཡིན་ཧ་གོ་མ་སོང་། དེབ་དཔར་བ་ཧ་ལས་པའི་སྤུས་དག་པོ་གནང་འདུག
ངས་ཁོང་གཉིས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་དུས་བབ་ཚང་གི་ཁོང་གཉིས་ཀྱི་ལོ་རྒྱུས་མདོར་བསྡུས་ཞིག་གསུང་གནང་ཡོད་པ་ཞུ་ཞུ།
བཀྲིས་བདེ་ལེགས་སོ།།
ཡིན་དང་ཡིན། དཀའ་ངལ་ལ་མ་འཛེམས་པར་ང་ཚོ་ཁ་བ་གངས་ཅན་པའི་ཆོས་དང་རིག་གཞུང་མི་ཉམས་གོང་འཕེལ་དང་ཉམས་པ་སླར་གསོ་བྱེད་མཁན་དེ་ཚོ་ལ་དུས་རྟག་ཏུ་རྗེས་སུ་ཡིད་རིང་བྱེད་དགོས་པ་དང་། དེ་ཚོའི་རིགས་ལ་ང་ཚོས་ཞབས་འདེབས་དང་རྒྱབ་སྐྱོར་གང་མང་དགོས། ཨ་མའི་བུ་བཀྲིས་བདེ་ལེགས་གྲངས་མེད་ཞུ།
ངོ་མ་བཟང་གི བཀའ་དྲིན་ཞུ་འོས་པ་ཞིག་རེད། ལྷག་པར་དུ་བོད་ཀྱི་ཐ་སྙད་རྙིང་པ་༼དབྱིན་ཇི་༽དབྱིན་བོད་རྒྱ་ཞེས་བཀོད་པ་བསྔགས་བྱས་གནས་སུ་འདུག ཡིན་ན་ཡང་ང་ཚོའི་ཤེས་རིག་ལས་ཁུངས་ནས་བོད་ནང་གི་ཤེས་ཡོན་པའི་སྡེ་ཁག་ལ་ཁ་གཏད་དེ། ཐ་སྙད་རྙིང་བ་གང་མང་ཞིག་ལ་འགྱུར་བ་བཏང་ནས། དབྱིན་ཇི་ལ་ཨིན་ཇི་དང་། ཆེད་ལས་ལ་ཁྱད་ལས་སོགས་བྲིས་པ་ནི། ཕན་ལས་གནོད་པ་ཆེ་བའི་ལས་ཀ་ཞིག་རེད། ད་དུང་མིང་ཚིག་ལ་འགྲེལ་བཤད་བྱེད་སྐབས། ཉལ་ཁྲི་ནི་འཁྲིག་པ་སྤྱོད་ས་རེད་ཅེས་ཞེན་ལོག་པའི་འགྲེལ་བཤད་བྱེད་བཞིན་ཡོད་པ་དེ་དག་རྦད་དེ་མཚམས་བཞག་ན་ཡག་པོ་འདུག
བོད་མི་རིགས་དང་རྒྱལ་ཁབ་ཀྱི་ཆེད་དུ་འདི་ལྟར་དཀའ་ངལ་འཛེམས་མེད་འབད་རྩོལ་གནང་བ་སྙིང་ཐག་ནས་ཐུགས་རྗེ་ཆེ་ཞུ་བཞིན་ཡོད།