དེ་རིང་གཟའ་པ་སངས་ཉིན་གྱི་ཕྱི་དྲོར་དམིགས་བསལ་ཚོགས་ཆེན་ཐེངས་གཉིས་པ་ཡོངས་སུ་མཇུག་བསྒྲིལ་ཡོད་ལ། ཐེངས་འདིའི་ཚོགས་ཆེན་ཐོག་ཁྱོན་གྲོས་ཆོད་ཁག་ ༣༤ ཙམ་ལ་སྤྱི་མོས་གཏན་འབེབས་བྱུང་སོང་།
དེ་རིང་ཕྱི་ཚེས་ ༢༨ ཉིན་གྱི་ཕྱི་དྲོིའི་ཆུ་ཚོད་ ༤།༣༠ ཐོག་དམིགས་བསལ་ཚོགས་ཆེན་ཐེངས་གཉིས་པ་ཡོངས་སུ་མཇུག་བསྒྲིལ་བའི་མཛད་སྒོ་དེ་ངྷ་སྟེང་བོད་ཁྱིམ་ཚོགས་ཁང་དུ་ཚོགས་སོང་ལ། མཛད་སྒོའི་ཐོག་དབུས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས། སྤྱི་འཐུས་ཚོགས་གཙོ་གཞོན་གཉིས་དབུས་པའི་སྤྱི་འཐུས་རྣམ་པ། སྲིད་སྐྱོང་བ་བློ་བཟང་སེང་གེ་མཆོག་གི་དབུས་པའི་བཀའ་བློན་རྣམ་པ། དེ་བཞིན་ཐེངས་འདིའི་ཚོགས་བཅར་པ་རྣམས་བཅས་འདུ་འཛོམས་ཐོག ཚོགས་ཆུང་སོ་སོའི་བསམ་ཚུལ་ཕྱོགས་བསྡོམས་རེ་རེ་བཞིན་ཚོགས་ཆེན་ཐོག་སྙན་སྒྲོན་ཞུས་ཏེ་གཏན་འབེབས་གནང་རྗེས། སྲིད་སྐྱོང་དང་སྤྱི་འཐུས་ཚོགས་གཙོ་རྣམ་གཉིས་ཀྱིས་མཇུག་བསྡོམས་གསུང་བཤད་གནང་སོང་།
ཐེངས་འདིའི་ཚོགས་ཆེན་ཐོག་ཚོགས་བཅར་བ་ཡོངས་ཀྱིས་སྤྱི་མགྲིན་ནས་བར་ལམ་༸གོང་ས་མཆོག་ཐུགས་ཕམ་བྱུང་བར་དགོངས་པ་དྭངས་གསལ་ཡོང་བའི་གསོལ་འདེབས་ཞུ་རྒྱུ་དང་། རྗེས་འཇུག་བོད་འབངས་རྣམས་ཀྱི་བླངས་དོར་ཞུ་དགོས་ཆེད་གྲོས་ཆོད་ཁག་ ༣ ཙམ་ཟུར་འཇོག་དང་། ད་ལྟའི་བོད་ནང་གི་ཛ་དྲག་གནས་སྟངས་ལ་བོད་གཞུང་མང་གཉིས་ནས་གདོང་ལེན་གྱིས་བོད་མིའི་སྤྱི་ཚོགས་ནང་ལས་འགུལ་སྤེལ་ཕྱོགས་ཐད། བོད་བསྟན་སྲིད་མི་རིགས་ཆེད་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་དྲན་གསོའི་ཆེད་ཁོང་རྣམ་པའི་འདྲ་རིས་དང་ལོ་རྒྱུས་ཀྱི་དྲན་རྟེན་ཁང་ཆེད་འཛུགས། ཁོང་རྣམ་པའི་ཁ་ཆེམས་རྣམས་སྐད་ཡིག་འདྲ་མིན་ཐོག་བསྒྱུར་ཏེ་ཁྱབ་བསྒྲགས་བྱ་རྒྱུ་མ་ཟད། མ་འོངས་པའི་ལོ་རྒྱུས་ཡིག་ཚགས་སུ་ཉར་རྒྱུ། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཉིན་མོ་ཞིག་སྲུང་གཙི་གཏན་ཁེལ་དགོས་རྒྱུ། གཞུང་མང་ཛ་དྲག་ལས་འགུལ་ཚོགས་ཆུང་ཞིག་གསར་དུ་བསྐྱར་འཛུགས་ཀྱིས་གཞུང་འབྲེལ་མིན་པའི་ཚོགས་པ་ཁག་དང་ནུས་པ་མཉམ་རུབ་ཀྱིས་ལས་འགུལ་སྤེལ་རྒྱུ་སོགས་གྲོས་ཆོད་དོན་ཚན་ ༡༦ བཞག་ཡོད།
རྒྱལ་སྤྱིའི་ནང་ལས་འགུལ་སྤེལ་ཕྱོགས་ཐད། མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས་ནང་བོད་དོན་རྒྱབ་སྐྱོར་ཡོང་བའི་ལས་འགུལ་མུ་མཐུད་སྤེལ་རྒྱུ་དང་། དོན་གཅོད་མེད་པའི་རྒྱལ་ཁབ་ཁག་ཏུ་དོན་གཅོད་དང་ཡང་ན་བོད་དོན་རྒྱབ་སྐྱོར་ཚོགས་པ་འཛུགས་ཐབས་བྱ་རྒྱུ། བཙན་བྱོལ་བོད་མིའི་ཁྲིམས་ལུགས་མཁས་པ་རྣམས་ཀྱིས་ཞིབ་འཇུག་དང་འབྲེལ། དཔང་རྟགས་བསྡུ་རུབ་ཀྱིས་རྒྱ་ནག་གི་སྐབས་སོ་སོའི་འབྲེལ་ཡོད་དཔོན་རིགས་ཁག་ཐེར་འདོན་གྱིས་ནག་ཉེས་བཙུགས་ཏེ་རྒྱལ་སྤྱིའི་ཁྲིམས་ཁང་ཁག་ཏུ་ཁྲིམས་གཏུགས་བྱ་རྒྱུ། རྒྱལ་སྤྱིའི་གཞས་པ་གཞས་མ་སྐད་གྲགས་ཅན་རྣམས་ལ་འབྲེལ་བ་བྱས་ཏེ་སྒྱུ་རྩལ་དང་འབྲེལ་བའི་སྒོ་ནས་བོད་དོན་ཁྱབ་བསྒྲགས་ཀྱི་ལས་འགུལ་སྤེལ་རྒྱུ། བོད་མིའི་སྒྲིག་འཛུགས་ཀྱི་དྲ་རྒྱ་དང་དྲན་བརྙན་དབྱིན་ཡིག་དང་རྒྱ་སྐད་བཅས་སྐད་ཡིག་འདྲ་མིན་ཐོག་བོད་དོན་དྲིལ་བསྒྲགས་ཡོང་བར་ཤུགས་གནོན་རྒྱག་རྒྱུ། ཨ་རིའི་གཞུང་གིས་བོད་དོན་དམིགས་བསལ་འབྲེལ་མཐུད་བསྐོ་བཞག་གནང་ཡོད་པ་བཞིན། ཡུ་རོབ་གྲོས་ཚོགས་གཙོས་རྒྱལ་ཁབ་སོ་སོའི་གྲོས་ཚོགས་སམ། སྲིད་གཞུང་གིས་བོད་དོན་འབྲེལ་མཐུད་གསར་འཛུགས་ཡོང་ཐབས་ལ་འབད་བརྩོན་གནང་རྒྱུ་སོགས་གྲོས་ཆོད་དོན་ཚན་ ༧ བཞག་ཡོད།
ཨེ་ཤ་ཡའི་ནང་ལས་འགུལ་སྤེལ་ཕྱོགས་ཐད། རྒྱ་གར་གཙོས་ལྷོ་ཤར་ཨེ་ཤ་ཡའི་རྒྱལ་ཁབ་ཚང་མའི་ནང་བོད་ཀྱི་ཆོས་དང་སྐད་ཡིག་རིག་གཞུང་། ཡུལ་གོམས་གཤིས་ལུགས། ཁོར་ཡུག་གི་གནད་དོན་སོགས་ངོ་སྤྲོད་དང་། བོད་དོན་རྒྱབ་སྐྱོར་དེ་ལྷོ་ཤར་ཨེ་ཤ་ཡའི་འཚོ་བ་དང་ཐོན་ཁུངས། ཁོར་ཡུག་དང་གནམ་གཤིས་སོགས་ལ་འབྲེལ་བ་ཆེན་པོ་ཡོད་པའི་གནད་དོན་གསལ་བཤད་ཀྱིས་འབྲེལ་མཐུད་གནང་སྟེ་བོད་དོན་རྒྱབ་སྐྱོར་ཡོང་ཐབས་དང་། རྒྱལ་ཁབ་དེ་དག་གི་མགོ་ཁྲིད་ལ་འབྲེལ་མོལ་མགོན་སྐྱབས་གནང་ཐབས་ལ་འབད་བརྩོན་གནང་རྒྱུ། བོད་ནང་རྒྱ་གཞུང་གིས་སྡུག་སྦྱོང་མནར་གཅོད་ཚད་མེད་གཏོང་བཞིན་པའི་གནས་སྟངས་རྣམས་བོད་རིགས་ཁ་ཆེ་བ་རྣམས་ཀྱིས་ནུས་ཤུགས་བསྒྲིལ་ཏེ། ཆོས་ལུགས་གཅིག་པའི་འབྲེལ་ལམ་བརྒྱུད་ཁ་ཆེ་རྒྱལ་ཁབ་ཁག་ནས་བོད་ཀྱི་བདེན་དོན་ལ་རྒྱབ་སྐྱོར་གནང་ཐབས་བྱ་རྒྱུ། ལྷོ་ཤར་ཨེ་ཤ་ཡའི་ནང་པའི་སྤྱི་ཚོགས་ཀྱི་དབུ་འཁྲིད་རྣམས་བཙན་བྱོལ་ནང་གདན་ཞུས་ཐོག ནང་ཆོས་སྐོར་བགྲོ་གླེང་བརྒྱུད་བོད་དོན་རྒྱབ་སྐྱོར་ཐོབ་ཐབས་བྱ་རྒྱུ་སོགས་གྲོས་ཆོད་དོན་ཚན་ ༨ བཅས་སྤྱི་མོས་ཐོག་གཏན་འབེབས་གནང་ཡོད།
མཇུག་ཏུ་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་བཤད་གནང་བའི་ནང་། ཐེངས་འདིའི་དམིགས་བསལ་ཚོགས་ཆེན་གྱི་ཚོགས་མི་ཡོངས་ཀྱིས་དགོངས་འཆར་གནང་བའི་ནང་། སྒྲིག་འཛུགས་དང་འཛིན་སྐྱོང་གི་ངོས་ནས་ལག་བསྟར་གནང་དགོས་པ་མང་པོ་གསུངས་ཡོད་པ་ལྟར། ད་ལྟའི་བར་བཀའ་སྤྱི་ཐུན་མོང་ཐོག་ཕྱག་ལས་གང་འཚམ་གནང་ཡོད་པ་དང་། མ་འོངས་པར་སྔར་ལས་ལྷག་པའི་སྒོ་ནས་འབད་བརྩོན་གནང་རྒྱུ་དང་། གང་བསྒྲུབ་ཐུབ་པ་དང་གང་བསྒྲུབ་མ་ཐུབ་པའི་རིགས་རིམ་པས་སྙན་སེང་ཞུ་རྒྱུ་ཡིན་སྐོར་དང་། ད་ལྟའི་བར་བཀའ་སྤྱི་གཉིས་ཀྱིས་ཐོག་ནས་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་ཏུ་ཡོད་པའི་གྲོགས་པོ་རྙིང་པ་གང་མང་མང་མཇལ་འཕྲད་དང་། སྔར་གྱི་འབྲེལ་བ་གང་ཐུབ་ཀྱིས་སྲ་བརྟན་དུ་གཏོང་རྒྱུའི་འབད་བརྩོན་གནང་གི་ཡོད་པ། ཨེ་ཤ་ཡའི་ནང་ཆོས་རིག་དང་ཕྱི་དྲིལ་བཀའ་བློན་ཕེབས་ཡོད་པ་ལྟར། མ་འོངས་པར་གང་མང་ཕེབས་རྒྱུའི་འབད་བརྩོན་གནང་རྒྱུ་ཡིན་པ་དང་། རྒྱ་ནག་གཞུང་གིས་ང་ཚོའི་སྤྱི་ཚོགས་ནང་དཀྲོགས་གཏམ་བཟོ་རྒྱུ་ཁོ་ཚོའི་གསར་འགྱུར་བརྒྱུད་ལམ་དུ་གསལ་བོར་བཀོད་ཡོད་ལ། བོད་མི་ཚོ་ཕར་བསླུ་འགུག་ཆེད་ལས་ཁུངས་གསར་རྒྱག་གིས་ལས་གཞི་འདྲ་མིན་སྤེལ་བཞིན་པ་སོགས། ང་ཚོའི་རྡོག་རྩ་ཆིག་སྒྲིལ་ཡོད་པའི་སྤྱི་ཚོགས་ནང་དཀྲོགས་གཏམ་སྤེལ་པའི་འབད་བརྩོན་གནང་བཞིན་པ་གསལ་བོ་ཡིན་སྟབས། མ་འོངས་པར་དེའི་ཐད་དོ་སྣང་ཤུགས་ཆེར་གནང་རྒྱུའི་འབོད་སྐུལ་གནང་སོང་།
དེའི་རྗེས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། འདས་པའི་ཉིན་ ༤ རིང་ཚོགས་བཅར་བ་ ༤༣༢ ཀྱིས་ཚོགས་ཆུང་ཆ་བགོས་དང་ཚོགས་ཆེན་ཐོག་གོ་བསྡུར་སྦྱང་བཤད་གནང་བར་ཐུགས་རྗེ་ཆེ་ཞུས་བ་དང་འབྲེལ། ཐེངས་འདིའི་སྙན་ཐོའི་ཐད་སྤྱི་འཐུས་རྒྱུན་ལས་ཀྱིས་དོན་ཚན་རེ་རེ་བཞིན་དབྱེ་བསེས་བྱས་ཏེ་སུས་འགན་འཁུར་དགོས་མིན་དང་ག་དུས་གནང་དགོས་མིན། གང་འདྲ་བྱས་ཏེ་གནང་དགོས་མིན་དབྱེ་བ་བྱས་རྗེས། འཛིན་སྐྱོང་བཀའ་ཤག་དང་སྤྱི་འཐུས། གཞུང་འབྲེལ་མ་ཡིན་པའི་ཚོགས་པ། བོད་མི་ཞིག་ཡིན་པའི་ཆ་ནས་འགན་ལེན་དགོས་པའི་རིགས་ཡོང་ངེས་སྟབས། མ་འོངས་པར་ལག་ལེན་བསྟར་བར་འབད་བརྩོན་གནང་རྒྱུ་དང་། ཚོགས་ཞུགས་པ་རྣམས་པས་ཀྱང་ཐེངས་འདིའི་ཚོགས་འདུའི་ནང་དོན་ཆ་ཚང་ས་གནས་མི་མང་ལ་གསལ་བཤད་གནང་རྒྱུ་གལ་ཆེན་ཡིན་པ་དང་། ད་རེབ་ཀྱི་དམིགས་ཡུལ་གཙོ་བོ། བཀའ་སྤྱི་གཉིས་ཀྱིས་མང་ཚོགས་ནང་བསམ་ཚུལ་གསར་བ་ཡོང་གི་རེད་བསམ་སྟེ་ཚོགས་པ་ལྟར་ད་ལྟ་རྒྱབ་གཉེར་སྙན་ཐོ་ཐོན་ཡོད་པ་རེད། དེ་མིན་པའི་འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་ཀྱི་གནང་རྒྱུའི་རིགས་ད་དུང་ཡོད་པ་དང་། ད་ལྟའི་ཆར་རྒྱལ་སྤྱིའི་ཐོག་བོད་ཀྱི་གནས་སྟངས་གླེང་སློང་བྱེད་ཀྱི་ཡོད་ཀྱང་། དེ་ལས་ཤུགས་ཆེ་རུ་གཏོང་ཆེད་གཞུང་མང་གཉིས་ནས་ལས་འགུལ་སྤེལ་རྒྱུ་ཧ་ཅང་གལ་ཆེན་པོ་ཡིན་སྐོར་གསུངས་སོང་།
ཉེ་ཆར་༸གོང་ས་མཆོག་ཐུགས་ཕམ་གྱི་གནས་ཚུལ་བྱུང་བའི་ཐད་སྤྱི་འཐུས་ཚོགས་གཙོ་མཆོག་གིས། “ ༸གོང་ས་མཆོག་ཐུགས་ཕམ་ཐད་གྲོས་ཆོད་ཟུར་འཇོག་ཐུབ་པ་དེ་གཟི་བརྗིད་རེད་བསམ་གྱི་ཡོད། གཙོ་བོ་སྒྲིག་འཛུགས་དང་མི་སྒེར་ཁག་ཅིག་གིས་༸གོང་ས་མཆོག་གིས་བོད་གཞུང་མེད་པ་བཟོས་པ་རེད་ཅེས་པའི་སྐད་ཆ་དང་འབྲེལ་ནས་ཡོང་བ་ཞིག་རེད། དེ་དབུ་མ་དང་རང་བཙན་ཐོག་སྦྲེལ་ནས་གཞི་རིམ་མང་ཚོགས་ནང་བསམ་ཚུལ་མང་པོ་ཞིག་ཡོང་གི་ཡོད་པ་གོ་བསྡད་ཀྱི་འདུག དེ་ལ་སེམས་འཚབ་ཆེན་པོ་ཡོང་གི་འདུག རང་བཙན་རྩོད་མཁན་ཚོར་རང་བཙན་རྩོད་པའི་ཐོབ་ཐང་ཡོད་རེད། དེ་སུ་གཅིག་གིས་འཕྲོག་ཐུབ་ཀྱི་མ་རེད། ལོ་རྒྱུས་ཀྱི་ཐོག་ནས་བོད་རང་བཙན་གཙང་མ་རེད། གནས་ལུགས་དང་རྒྱུ་མཚན་ཡོད་པ་རེད། ཡིན་ནའང་། བོད་མིའི་སྒྲིག་འཛུགས་ཀྱི་ལངས་ཕྱོགས་དབུ་མའི་ལམ་ཐོག་འགྲོ་བཞིན་པ་དེ་མུ་མཐུད་གནས་བསྡད་ཡོད་པ་རེད་ལ། དེ་ལ་བསྐྱར་ཞིབ་དང་འགྱུར་བ་གཏོང་བའི་བསམ་ཚུལ་ད་ལྟའི་བར་དུ་ཡོད་པ་མ་རེད། མ་འོངས་པར་ཡོང་བ་ཡིན་ནའང་བརྒྱུད་རིམ་ཞིག་གི་ཐོག་ནས་འགྲོ་དགོས་པ་ལས། ལམ་སེང་འགྱུར་བ་གཏོང་དགོས་པ་ཆགས་ཡོད་པ་མ་རེད། ལངས་ཕྱོགས་ག་རེ་ཡོད་ཀྱང་། ནང་ཁུལ་འཆམ་མཐུན་གྱི་ཐོག་ནས་ནུས་པ་མཉམ་སྤུངས་བྱ་རྒྱུ་ཧ་ཅང་གལ་ཆེན་པོ་རེད། རྟག་ཏུ་དེའི་ཐོག་བརྩད་བརྒྱབ་བསྡད་ན་སྤྱི་བའི་རྕ་དོན་ལ་ཕན་མིན་མཁྱེན་གསལ་རེད། ” ཅེས་གསུངས་བྱུང་།
སང་ཉིན་ཞོགས་པའི་ཆུ་ཚོད་ ༨ པའི་ཐོག་༸གོང་ས་མཆོག་དང་བླ་ཆེན་རྣམ་པ་དབུ་བཞུགས་དང་། ཚོགས་བཅར་བ་ཡོངས་མཉམ་ཞུགས་ཐོག་མཆོད་འབུལ་སྨོན་ལམ་གནང་རྒྱུ་ཡིན་འདུག་ལ། སྐབས་དེར་སྲིད་སྐྱོང་བ་མཆོག་གིས་གསུང་བཤད་དང་། རྒྱལ་ཁབ་འདྲ་མིན་ནས་ཕེབས་པའི་ཚོགས་ཞུགས་པ་ཚོས་ཡུལ་ལུང་སོ་སོའི་སྐད་ཡིག་ཐོག་གཏམ་བཤད་བཅས་གནང་རྒྱུ་ཡིན་འདུག
ཨ་མཆོད་རབ་འབྱུང་ཡིན་པ་དཔར་ལས་ཤེས། །
ཨ་མཆོད་རང་བཙན་ཆགས་པ་མཆན་ལས་ཤེས། །
སྤྱི་འཐུས་ཚོགས་གཙོ་མཆོག་གི་གཏམ་བཤད་དེ་ནན་ཙམ་གསུངས་ཐུབ་འདུག
ད་ལྟའི་དུས་སྐབས་འདི་འདྲར་གསུང་བཤད་དང་ཞིབ་འཇུག་ཆ་ཚང་ཐད་ཀར་ཕྱི་གསལ་ནང་གསལ་དགོས་པ་ལས་ཕྱི་ཁོག་གིས་བཏུམས་ནས་བསྡད་པའི་དུས་སྐབས་མ་རེད།
༧རྒྱལ་བ་མཆོག་ཐུགས་ཕན་བྱུང་བ་འདིས་ང་ཚོ་ཚར་པ་རེད། ང་ཚོ་གཟབ་དགོས། རྩམ་གཟན་གཟབ་དགོས། གདོང་དམར་གཟབ་དགོས། ང་ཚོ་ཚང་མ་གཟབ་དགོས་པ་རེད།
ཨ་མཆོད་ནི་ཨ་མཆོད་རང་རེད།
མཁས་དབང་དགེ་ཆོས་ཀྱིས།
རྭ་ལྟར་གྱོང་བའི་ཨ་མཆོད་འདི་ཚོ་རང་མེད་ན།།
ལ་ལུང་ལྷ་འདྲེ་མང་བོས་སེམས་ཅན་ལ་གནོད་ཡོང་།།
ཞེས་པ་འདི་ཉིད་ལ་ཆོ་ལོ་རུ་འབུལ་ལོ།།
ངོ་མ་གསར་འགྱུར་གལ་ཆེན་པོ་རེད།བོད་རྒྱལ་ཡོངས་དམིགས་བསལ་ཚོགས་ཆེན་ཐེངས་གཉིས་པ་འདི་ལོ་རྒྱུས་རང་བཞིན་དང་གཟི་བརྗིད་ལྡན་པ་རེད།དེ་བས་ཀྱང་བོད་གཞིས་ལུས་རྣམས་ཀྱིས་བློས་གཏོང་དང་མངོན་འདོད་རེ་བ་ཚུན་ཆད་སྙིང་དུ་གནག་སྟེ་རང་རང་གི་བསམ་ཚུལ་མཐའ་དག་གྲུ་དང་སྦུགས་ནས་མ་སྐུང་བར་ལྷུག་བརྗོད་གནང་བ་ནི་རིན་ཐང་བྲལ་བ་ཞིག་གོ།
ཚུལ་འདི་ནི་རྒྱ་ནག་སྒེར་གཅོད་སྲིད་གཞུང་བཞིན་མི་གཅིག་གིས་ལག་པ་བརྐྱངས་ན་ཀུན་གྱིས་ལག་པ་རྐྱོང་དགོས་པ་དང་།མི་གཅིག་གིས་ལག་པ་བསྐུམས་ན་ཐམས་ཅད་ཀྱིས་སྐུམ་དགོས་པ་མ་ཡིན་པས།དམར་ཕྱོགས་སྲིད་གཞུང་ལའང་གཉིད་མི་ཡོང་བའི་བརྡ་ལན་ཞིག་སྤྲད་ཡོད་ལ།ཁོ་བོ་ད་ཐེངས་སྤོབས་པས་ཁེངས་ཡོད་ཅིང་།སྦལ་བ་ན་རྐུང་ནང་ན་ཡོད་ཀྱང་བསམ་པ་གངས་དཀར་སྟོད་ན་གདའ་བའི་ཚུུལ་ལོ།།
སྔོན་ནས་ཚོད་དཔགས་བྱས་པ་བཞིན་ད་ནི་བོད་གཞུང་ཞེས་པའི་ཚིག་འདི་ངག་ནས་འདོན་པར་ཡང་ཞེད་སྣང་ངམ་མཚེར་སྣང་གིས་ཁྱེར་འགྲོ་བཞིན་འདུག
སྔོན་མ་ཡིན་ན་བོད་གཞུང་མང་ཚོེགས་ཆེན་ཐེངས་དང་པོ། བོད་རྒྱལ་ཡོངས་ཚོགས་ཆེན་ཐེངས་དང་པོ་དང་གཉིས་པ་སོགས་རྔམ་བརྗིད་ལྡན་པའི་ངང་བརྗོད་སྤོབས་པའི་ཚོགས་ཆེན་དེ་དག་ཡོད་ཀྱང་ད་ནི་ དམིགས་བསལ་ཚོགས་ཆེན། ཞེས་མགོའི་ར་དང་རྐུབ་ཀྱི་མཇུག་མ་བྲེག་ཟིན་པའི་མིང་རྡོག་རྡོག་ཅིག་ལས་འབོད་ཕོད་ཀྱི་མེད། ཕ་རོལ་བོ་ལ་དགོས་པ་དེ་ང་ཚོས་ལྷོད་མེད་དུ་བྱས་སོང་།
གྲོད་ཆོད་མང་ཕལ་ཆེར་གནད་ལ་ཁེལ་བ་དེ་འདྲ་ཤ་སྟག་རེད་འདུག་མུ་མཐུད་དོན་འཁྱོན་ཡོང་བའིསྨོན་ལམ་ཡོད།
“ཆོས་ལུགས་གཅིག་པའི་འབྲེལ་ལམ་བརྒྱུད་ཁ་ཆེ་རྒྱལ་ཁབ་ཁག་ནས་བོད་ཀྱི་བདེན་དོན་ལ་རྒྱབ་སྐྱོར་གནང་ཐབས་བྱ་རྒྱུ།” འདི་གང་འདྲ་གསུང་གི་ཡོད་ན་ཡག་པོ་ཤེས་མ་སོང་།
“གཞུང་མང་ཛ་དྲག་ལས་འགུལ་ཚོགས་ཆུང་ཞིག་གསར་དུ་བསྐྱར་འཛུགས” འདི་ཤིན་ཏུ་ལེགས།
“རྒྱ་ནག་གི་སྐབས་སོ་སོའི་འབྲེལ་ཡོད་དཔོན་རིགས་ཁག་ཐེར་འདོན་གྱིས་ནག་ཉེས་བཙུགས་ཏེ་རྒྱལ་སྤྱིའི་ཁྲིམས་ཁང་ཁག་ཏུ་ཁྲིམས་གཏུགས་བྱ་རྒྱུ།” ཡོད་ཚོད་ནང་ལས་ལེགས་ཤོས་དང་ལས་དོན་འདི་ཤིན་ཏུ་ནས་བསྒྲུབ་པར་བོད་མི་འགོ་མང་ཡོངས་ནས་འབེད་པ་གནང་དགོས།
བོད་རྒྱལ་ལོ།
རྒྱལ་སྤྱིའི་ནང་ལས་འགུལ་སྤེལ་ཕྱོགས་ཐད། བཙན་བྱོལ་ཁྲིམས་ལུགས་མཁས་པ་ཚོས་ཞིབས་འཇུག་དང་འབྲེལ། དཔང་རྟགས་ཁུངས་བཙན་བསྡུ་རིབ་ཀྱིས་ནག་ཉེས་ཐེར་འདོན་གྱིས་སྐབས་སོ་སོའི་རྒྱ་ནག་གི་འབྲེལ་ཡོད་དཔོན་རིགས་ཁག་རྒྱལ་སྤྱིའི་ཁྲིམས་ཁང་ཁག་ཏུ་ཁྲིམས་གཏུགས་བྱ་རྒྱུ་དང་། རྒྱལ་སྤྱིའི་སྐད་གྲགས་ཅན་གྱི་གཞས་པ་གཞས་མ་རྣམས་ལ་འབྲེལ་བ་བྱས་ཏེས་སྒྱུ་རྩལ་གྱི་ལམ་ནས་བོད་དོན་དྲིལ་བསྒྲག་བྱ་རྒྱུ། དབུས་སྒྲིག་འཛུགས་ཀྱི་དྲ་རྒྱ་དང་དྲ་བརྙན་ཁག་སྐད་ཡིག་འདྲ་མིན་གྱི་ལམ་ནས་དྲིལ་བསྒྲགས་ཤུགས་ཆེ་བྱེད་རྒྱུ་ཞེས་པའི་གྲོས་ཆོད་གསུམ་གནད་འགག་ཅན་དུ་མཐོང་སོང་།
ད་དུང་རྒྱལ་སྤྱིའི་ནང་སྐད་གྲགས་ཅན་གྱི་གློག་བརྙན་འཁྲབ་སྟོན་པ་དང་འཁྲབ་འཁྲིད་པ་ཚོར་འབྲེལ་བ་བྱེད་རྒྱ་ཁོ་ཚོ་བརྒྱུད་ནས་བོད་དོན་དྲིལ་བསྒྲགས་མཚོན་པའི་རྒྱབ་སྐྱོར་འཐོབ་ཐབས་བྱེད་རྒྱུ་དེ་ཆད་འདུག། ཁོ་ཚོོར་སྨོན་མཁན་དང་དགའ་མཁན་གོ་ལ་ཧྲིལ་པོའི་ནང་ཁྱབ་ཡོད་པ་རེད་ལ་ཁོ་ཚོའི་ཚོང་གི་འགྲོ་རྒྱུགས་ཀྱང་རྒྱ་ནག་ལ་ཡིན་གཅིག་ལྟོས་དགོས་པ་མ་རེད།
མཐར་གྲོས་ཚོགས་ཀྱི་ཚོགས་གཙོ་མཆོག་གིས་དོན་གནད་རང་བཞིན་ལྡན་པའི་གཏམ་བཤད་ལ་དགའ་ནས་ཡོད་ལ་རྒྱབ་སྐྱོར་ཡང་ཡོད།