གཟའ་སྤེན་པའི་ཉིན་པའོ་ཀཱ་ཀཱས་ཡོངས་ཁྱབ་གསལ་བསྒྲགས་སྤེལ་ཏེ། རྒྱ་གཞུང་གིས་ཁོའི་ཕ་ལ་སྐྱོན་འདོན་ཞུ་གཏུག་བྱས་པ་དེར་ངོས་ལེན་བྱ་ཐབས་དཀའ་བ་བརྗོད་འདུག
ཕྱི་ཟླ་ ༩ ཚེས་ ༢༩ ཉིན་པའོ་ཀཱ་ཀཱ་ཡིས་ཝེ་པའོ་དྲ་རྒྱ་བརྒྱུད་ཡོངས་ཁྱབ་གསལ་བསྒྲགས་སྤེལ་ཏེ། ཁོ་རང་ངོས་ནས་ཁོའི་ཕ་པའོ་ཞི་ལའེ་ལ་སྐྱོན་འདོན་ཞུ་གཏུག་ཕོག་ཡོད་པར་ཡིད་ཆེས་བྱེད་ཐབས་བྲལ་བ་དང་། དེའི་རྒྱུ་མཚན་ནི། པའོ་ཞི་ལའེ་ཡིས་ལག་བསྟར་བྱས་པའི་སྲིད་ཇུས་རེ་འགའི་ཐད་ལ་རྩོད་རྙོག་ཡོད་ཀྱང་། ད་ལྟའི་སྐྱོན་འདོན་ཞུ་གཏུག་དེ་དག་ནི་ཁོ་རང་ཆ་རྒྱུས་ཡོད་པའི་ཁོའི་ཨ་ཕའི་གནས་བབ་དང་མཐུན་གྱི་མེད་སྐོར་བརྗོད་ཡོད་པ་མ་ཟད། ཕྱི་ཚེས་ ༣༠ ཉིན་གློག་འཕྲིན་བརྒྱུད་ཡོངས་ཁྱབ་གསལ་བསྒྲགས་དེའི་དྲ་སྐུད་ཨ་རིའི་ཧྭ་ཨར་ཅའེ་གསར་ཤོག་ལ་སྐུར་ཡོད་འདུག གསར་ཁང་དེའི་གསར་འགོད་པས་གློག་འཕྲིན་དེ་བརྒྱུད་ནས། པའོ་ཀཱ་ཀཱ་ལ་ཁོ་རང་རྒྱ་ནག་ཏུ་ཕྱིར་ལོག་ཐུབ་ཀྱི་ཡོད་མེད་དང་འཆར་གཞི་ག་རེ་ཡོད་མེད་དྲིས་པར། པའོ་ཀཱ་ཀཱ་ཡིས་ལན་འདེབས་གང་ཡང་བྱས་མི་འདུག
འདི་ལོའི་ཕྱི་ཟླ་ ༤ ནང་པའོ་ཀཱ་ཀཱ་ཡིས་ཨ་རིའི་ཧཱ་ཝར་ཌི་སློབ་ཆེན་གྱི་ཚགས་ཤོག་ཐོག་ཡོངས་ཁྱབས་གསལ་བསྒྲགས་སྤེལ་བའི་ནང་། ཁོ་རང་ཉིད་ཕྱི་རྒྱལ་ཁག་ཏུ་སློབ་གྲྭར་བསྐྱོད་སྐབས་ཀྱི་སློབ་ཡོན་རྣམས་ནི། ཁོ་རང་གི་ཨ་མ་ཀུའུ་ཁའེ་ལའེ་ཡི་ཁྲིམས་རྩོད་དང་རྩོམ་འབྲིའི་ཡོང་འབབ་དང་། ཕྱི་རྒྱལ་གྱི་སློབ་ཡོན་རག་བ་བཅས་ལ་བརྟེན་ནས་བྱུང་སྐོར་བརྗོད་ཡོད་པ་རེད།
དེ་བཞིན། ཕྱི་ཟླ་ ༨ པའི་ནང་ཀུའུ་ཁའེ་ལའེ་ལ་ཁྲིམས་ར་མ་འཚོགས་པའི་སྔོན་ཙམ་ལ། པའོ་ཀཱ་ཀཱ་ཡིས་བསྐྱར་དུ་ཡོངས་ཁྱབ་གསལ་བསྒྲགས་ཤིག་སྤེལ་ཏེ། ཁོ་རང་ངོས་ནས་ཀུའུ་ཁའེ་ལའེ་ཡི་ཁྲིམས་རྩོད་པར་དཔང་མི་དང་དཔང་ཡིག་མཁོ་སྤྲོད་བྱས་ཡོད་པ་བརྗོད་འདུག ཡིན་ནའང་། ཞིབ་ཕྲའི་ནང་དོན་རྣམས་གསལ་ཁ་བཏོན་མེད་པ་རེད། སྐབས་དེར་གསར་འགོད་པས་དྲི་བ་བཏོན་པར། པའོ་ཀཱ་ཀཱས་རང་ཉིད་དང་ལྐོག་གསོད་ཐེབས་པའི་དབྱིན་ཇིའི་ཚོང་བ་ཧའེ་ཝར་ཊི་བར་གྱི་འབྲེལ་བ་དང་། ཁོ་རང་གི་ཨ་མའི་གྱོད་དོན་གནས་ཚུལ་སྐོར་ནས་བསམ་ཚུལ་བརྗོད་རྒྱུ་དང་ལེན་བྱས་མེད་པ་རེད།
ཀུའུ་ཁའེ་ལའེ་ཡིས་ལྐོག་གསོད་བྱས་པའི་དབྱིན་ཇིའི་ཚོང་བ་ཧའེ་ཝར་ཊི་ཡི་གྲོགས་པ་ཞིག་གིས། ཧའེ་ཝར་ཊི་ཡིས་པའོ་ཀཱ་ཀཱ་དབྱིན་ཇའི་ཧའེ་རའོ་སློབ་གྲྭའི་ནང་སློབ་འཇུག་གོ་སྒྲིག་ཐད་རོགས་རམ་བྱས་ཡོད་པ་བརྗོད་འདུག ད་ལྟའི་ཆར་རྒྱ་གཞུང་འབྲེལ་ཡོད་སྡེ་ཁག་གིས་གནས་ཚུལ་གང་རུང་ལ་རྐྱེན་བྱས་ཏེ་པའོ་ཀཱ་ཀཱར་འདྲི་བརྩད་ཀྱི་གནས་ཚུལ་གང་ཡང་བྱུང་མེད་མོད། ཡིན་ནའང་། རྒྱ་གཞུང་གིས་ཀུའུ་ཁའེ་ལའེ་དང་ཝང་ལི་ཅོན་གཉིས་ལ་ཁྲིམས་བཤེར་བྱས་པའི་སྙན་ཐོའི་ནང་པའོ་ཀཱ་ཀཱའི་མིང་ཐེངས་འགར་གསལ་འདོན་བྱས་ཡོད་པ་རེད།
དེ་སྔོན་པའོ་ཀཱ་ཀཱ་དབྱིན་ཇིའི་སྙན་གྲགས་ཅན་གྱི་སྒེར་གཅེར་སློབ་གྲྭ་ཁག་གཉིས་ནང་བསྐྱོད་ཡོད་པ་མ་ཟད། རྗེས་སུ་རིམ་པས་དབྱིན་ཇིའི་ཨོ་ཁི་སི་ཧྥོ་ཊི་མཐོ་སློབ་དང་ཨ་རིའི་ཧཱ་ཝར་ཌི་མཐོ་སློབ་གཉིས་སུ་བསྐྱོད་ཡོད་ལ། འདི་ལོའི་ཕྱི་ཟླ་ ༥ ནང་ཧཱ་ཝར་ཌི་མཐོ་སློབ་ཏུ་འབུམ་རབས་པ་སློབ་ཐོན་བྱས་ཡོད་པ་རེད།
