འདས་པའི་ལོ་གསུམ་བཞིའི་རིང་རྒྱ་གཞུང་གིས་བོད་ནུབ་རྒྱུད་ས་མཚམས་ཁག་ཏུ་དམ་དྲག་ཆེ་རུ་བཏང་སྟེ། ལྷ་ས་ནས་འགྲམ་བར་ཞིབ་བཤེར་ས་ཚིགས་བཅུ་གྲངས་གསར་དུ་བཙུགས་ཡོད་པ་མ་ཟད། ས་ཚུགས་དེ་དག་ཏུ་འགྲུལ་བཞུད་པ་ཚོར་འཇིགས་སྐུལ་དང་ཅ་དངོས་རྐུ་འཕྲོག་སོགས་བྱེད་ཀྱི་ཡོད་འདུག
ཉེ་ལམ་འདི་གའི་གསར་འགོད་པ་ངྷ་རམ་ས་ལའི་དབུས་སྣེ་ལེན་ཁང་ལ་བསྐྱོད་དེ། བོད་ནས་གསར་དུ་འབྱོར་བའི་འགྲམ་དང་ལྷ་སའི་བར་ལོ་ ༡༢ ལྷག་གི་རིང་གླ་གཏོང་རླངས་འཁོར་བཏང་མྱོང་མཁན་བོད་མི་ཞིག་ལ་བཅར་འདྲི་བྱས་པ་ལྟར་ན། སྔོན་ཆད་བལ་བོད་ས་མཚམས་འགྲམ་དང་བོད་ཀྱི་རྒྱལ་ས་ལྷ་སའི་བར་རྒྱ་གཞུང་གི་ཞིབ་བཤེར་ས་ཚུགས་ཆེ་བ་གཉིས་ཙམ་ལས་མེད་ཀྱང་། ༢༠༠༨ ལོའི་རྗེས་དང་སྔ་ལོའི་རྡོར་གདན་དུས་དབང་སྐབས། ཉེན་རྟོག་པ་དང་དམག་མིའི་ཞིབ་བཤེར་ས་ཚུགས་ ༡༥ ཙམ་ཇེ་མང་དུ་བཏང་ཡོད་འདུག
ཞིབ་བཤེར་ས་ཚུགས་དེ་དག་ཏུ། རྒྱ་གར་དང་བལ་ཡུལ་ནས་ཕྱིར་བོད་ནང་ལོག་མཁན་ཚོའི་ལག་ནས། ༧གོང་ས་མཆོག་དང་བླ་སྤྲུལ་ཚོར་བསྔོ་རྟེན་སྐྱབས་རྟེན་ཕུལ་བའི་ཐོ་ཡིག་དང་བྱིན་རླབས། བླ་སྤྲུལ་ཁག་གི་སྐུ་པར་མཐོང་ཚད་བཙན་འཕྲོག་བྱེད་ཀྱི་ཡོད་པ་མ་ཟད། འདྲི་རྩད་སྣ་ཚོགས་དང་གང་བྱུང་བཀག་ཉར་གཅར་རྡུང་བྱེད་ཀྱི་ཡོད་འདུག
ལྷ་ས་ནས་འགྲམ་ལ་ཡར་ཡོང་མཁན་རིགས་ཡིན་ན་གཞིས་ཀ་རྩེ་ཡན་གྱི་ས་ཚུགས་ཁག་ཏུ་ལག་འཁྱེར་ཐོ་འགོད་བྱེད་རྒྱུ་ཙམ་སྔོག་བཤེར་རིགས་མེད་ཀྱང་། འགྲམ་ནས་མར་ལྷ་སར་འགྲོ་མཁན་རིགས་ཡིན་ཚེ། ཐོག་མར་འགྲམ་ཉེན་རྟོག་ཞིབ་བཤེར་ས་ཚུགས་སུ་ལམ་འགྲོ་བ་རེ་རེ་བཞིན་ལག་འཁྱེར་ལ་ཞིབ་འཇུག་དང་ཅ་དངོས་ཞིབ་བཤེར་བྱེད་ཀྱི་ཡོད་པ་དང་། དེ་ནས་སྤྱི་ལེ་ཁ་ཤས་མཚམས་སུ་ ‘ཆོག་ཤན་རྫོང’ ཞིབ་བཤེར་ས་ཚུགས་ཡོད་པ་དང་། དེ་གར་ལག་འཁྱེར་ཐོ་འགོད་དང་ལག་འཁྱེར་ངོས་ཀྱི་པར་དང་ལམ་འགྲོ་བའི་གདོང་མཐུན་མིན་ཞིབ་འཇུག ལམ་འགྲོ་བའི་ཅ་དངོས་རེ་རེ་བཞིན་ཞིབ་འཇུག་ནན་མོ་བྱེད་ཀྱི་ཡོད་འདུག
དེ་ནས་ལེ་སྤྱི་ལེ་ ༨༠ ཙམ་གྱི་སར་གཉའ་ལམ་རྫོང་ཞིབ་བཤེར་ས་ཚུགས་ཡོད་པ་དང་། དེ་གར་བསྐྱར་དུ་ལག་འཁྱེར་ཐོ་འགོད་དང་ཅ་དངོས་ཞིབ་བཤེར་བྱས་ཏེ། རྒྱ་གར་ནས་འཁྱེར་ཡོང་བའི་བླ་སྤྲུལ་ཚོའི་སྐུ་པར་མཐོང་ཚད་འཕྲོག་བཅོམ་བྱེད་ཀྱི་ཡོད་པ་མ་ཟད། ཐ་ན་རྒྱ་གར་དང་བལ་ཡུལ་ནང་ཡོད་པའི་གཉེན་ཉེ་ཚོའི་པར་རིགས་མཐོང་ཡང་། དེ་གང་ནས་འཁྱེར་ཡོང་མིན་དང་། མི་དེ་སུ་ཡིན་མིན། ལས་ཀ་ཅི་ཞིག་བྱེད་ཀྱི་ཡོད་མེད་སོགས་འདྲི་རྩད་བྱེད་ཀྱི་ཡོད་འདུག
གཉའ་ལམ་དང་སྤྱེ་ལེ་ ༢༠ ཙམ་གྱི་སར་ ‘མན་པོ’ ཞིབ་བཤེར་ས་ཚུགས་ཡོད་པ་དང་། དེ་གའི་ཞིབ་བཤེར་དུས་ཚོད་ངེས་མེད་ཡིན་འདུག དེ་ནས་སྤྱི་ལེ་ཁ་ཤས་མཚམས་སུ་ ‘ལོའུ་ལོའུ’ ཞིབ་བཤེར་ས་ཚུགས་ཡོད་ཅིང་། དེ་གར་ཐོག་མར་འགྲུལ་པའི་ལག་འཁྱེར་ཐོ་འགོད་ཀྱིས་གློག་ཀླད་ནང་བཅུག་རྗེས། རླངས་འཁོར་ནང་ཡོད་པའི་འགྲུལ་བའི་ཅ་དངོས་ཡོངས་རྫོགས་ཕྱིར་བཏོན་རེ་རེ་བཞིན་ཞིབ་འཇུག་བྱེད་ཀྱི་ཡོད་པ་དང་། དེ་ནས་སྤྱི་ལེ་ ༣ ཙམ་གྱི་སར་ ‘པེ་པཱ་ཞང’ ཞིབ་བཤེར་ས་ཚུགས་སྔར་བཞིན་ལག་འཁྱེར་དང་ཅ་དངོས་ཞིབ་འཇུག་བྱེད་ཀྱི་ཡོད་འདུག དེ་ནས་སྤྱེ་ལེ་ ༩༠ ཙམ་གྱི་སར་ལྷ་རྩེ་རྫོང་ཞིབ་བཤེར་ས་ཚུགས་ཡོད་པ་དང་། དེ་གར་གོང་ལྟར་སྔོག་བཤེར་བྱེད་ཀྱི་ཡོད་པ་མ་ཟད། ལག་འཁྱེར་ཐོག་གསལ་ཁ་མེད་པའི་རིགས་ལ་དྲི་མར་བསྣམས་ཏེ། བལ་ཡུལ་དང་རྒྱ་གར་སོགས་ཕྱི་རྒྱལ་ནས་ཡོང་བ་ཡིན་མིན་ལ་བརྟག་དཔྱད་གཏོང་གི་ཡོད་པ་དང་། ཐ་ན་རླངས་འཁོར་ཁ་ལོ་བའི་སྐེ་ལ་བཏགས་ཡོད་པའི་སྲུང་སྐོར་ཚུན་སྔོག་བཤེར་བྱེད་ཀྱི་ཡོད་འདུག
ས་ཚུགས་དེ་དག་བརྒྱུད་རྗེས་ས་སྐྱའི་ཟམ་ཁ་དང་ ‘ཞཱ་ཅེ་དན’ གཞིས་ཀ་རྩེ། སྙེ་མོ་རྫོང་། ‘ཐའོ་ཧཱ་ཚོན’བཅས་སུ་རླངས་འཁོར་ཁ་ལོ་བས་ལམ་འགྲོ་རྣམས་ཀྱི་ལག་འཁྱེར་ཐོ་འགོད་ཀྱིས་ཞིབ་བཤེར་མི་སྣར་རྩིས་འབུལ་བྱེད་པ་ཙམ་ལས། དམིགས་གསལ་ཅ་དངོས་ལ་སྔོག་བཤེར་བྱེད་ཀྱི་མེད་ཀྱང་། ལྷ་སའི་གནམ་ཐང་དང་མེ་འཁོར་འབབ་ཚིགས་གཉིས་ཀྱི་བཞི་མདོར་འབྱོར་སྐབས། འགྲུལ་པའི་ལག་འཁྱེར་ཐོ་འགོད་དང་ཅ་དངོས་སྔོག་བཤེར་ཆ་ཚང་བྱས་རྗེས། ཉེན་རྟོག་པས་རླངས་འཁོར་གྱི་སྣེ་འཁྲིད་དེ། མེ་འཁོར་འབབ་ཚིགས་འདབས་སུ་ཡོད་པའི་ཞིབ་བཤེར་ས་ཚུགས་ཆེ་བ་དང་། ལྷ་སའི་བདེ་སྲུང་དམག་མིའི་ལས་ཁུངས་ལ་རྩིས་སྤྲོད་བྱེད་ཀྱི་ཡོད་པ་དང་། དེ་གར་ལམ་འགྲོ་བའི་ཅ་དངོས་ཡོངས་ལ་བསྐྱར་དུ་སྔོག་བཤེར་བྱས་ཏེ་གཞུང་བཞེས་གཏོང་དགོས་པའི་རིགས་གཞུང་བཞེས་དང་། འདྲི་རྩད་བཀག་ཉར་བྱེད་དགོས་པའི་རིགས་བཙོན་འཇུག་བཅས་བྱེད་ཀྱི་ཡོད་འདུག
མཇུག་ཏུ་གསར་འགོད་པས་ཁོ་ལ་འགྲམ་དང་ལྷ་སའི་བར་གྱི་རླངས་འཁོར་ཁ་ལོ་བའི་དཀའ་ངལ་གཙོ་བོ་ག་རེ་ཡིན་མིན་དྲིས་པར་ཁོང་གིས། “དཀའ་ངལ་ཆེ་ཤོས་ས་ཚུགས་ཁག་ཏུ་དམག་མི་དང་ཉེན་རྟོག་པ་ཚོས་རླངས་འཁོར་ནང་ཞིབ་བཤེར་ཡང་ཡང་བྱས་ཏེ། རྒྱ་གར་དང་བལ་ཡུལ་ནས་ཕྱིར་ལོག་མཁན་ཚོའི་ལག་གི་ཅ་དངོས་བཙན་འཕྲོག་བྱེད་པ་དང་། ལྷག་པར་དུ་དཔེ་ཆ་དང་གློག་བརྙན་འོད་སྡེར་སོགས་ལ་དམིགས་བསལ་དམ་དྲག་བྱས་ཏེ། མེ་མདའ་དང་དུག་རྫས་ཀྱི་ནག་ཚོང་འཁྱེར་གྱི་ཡོད་པ་ལས་ལྷག་གི་ལྟ་སྟངས་འཛིན་གྱི་ཡོད་པ་དེ་རེད། སོ་སོ་བོད་པ་ཞིག་ཡིན་པའི་ཆ་ནས་གནས་ཚུལ་དེ་རིགས་བྱུང་སྐབས་མི་སྐྱིད་པ་ཡོང་གི་འདུག་ལ། ལམ་འགྲོ་བ་ཚོར་རོགས་རམ་བྱས་ཏེ་རང་ཉིད་དཀའ་ངལ་ནང་ཚུད་པའང་བྱུང་མྱོང་ཡོད” ཅེས་བརྗོད་བྱུང་།
ཁོས་མུ་མཐུད་དུ་བརྗོད་དོན། “ད་ལོ་ལྷ་ས་ཇོ་ཁང་མདུན་དུ་བོད་མི་གཉིས་ཀྱིས་རང་ལུས་མེར་བསྲེཊ་བཏང་བའི་ཉིན་ཤས་རྗེས། ངས་ལྷ་སའི་བུད་མེད་ཅིག་དང་ཆབ་མདོའི་རྒན་པོ་ཞིག གཞན་རྒྱ་རིགས་བུད་མེད་གཅིག་བཅས་རླངས་འཁོར་ནང་བཞག་ཡོང་སྐབས། སྙེ་མོ་ཞིབ་བཤེར་ས་ཚུགས་ནས་རྒྱ་རིགས་བུད་མེད་དེ་འགྲོ་རུ་བཅུག་སྟེ་ང་ཚོ་ཚང་མ་ཉིན་ ༢ རིང་བཀག་ཉར་བྱས་སོང་། ངས་ཁོང་ཚོར་རྒྱུ་མཚན་དྲིས་སྐབས་རྒྱ་རིགས་ཡིན་ན་འགྲོ་ཆོག་གི་རེད་ཟེར། དེ་མི་རིགས་དབྱེ་འབྱེད་ཀྱི་ལས་ཀ་ཞིག་རེད། ལྷ་སར་ཡང་གནས་ཚུལ་འདི་རིགས་ཤུགས་ཆེན་པོ་རེད། ཉེན་རྟོག་པ་དང་དམག་མི། ཐ་ན་ལས་ཁུངས་ཁག་གི་ལས་བྱེད་ཚོས་ཀྱང་བོད་མི་ཚོར་ལྟ་སྟངས་ལོགས་ཀ་འཛིན་གྱི་འདུག” ཅེས་བརྗོད་བྱུང་།
༼ བོད་ཀྱི་དུས་བབ་ཚགས་པར་ལས་འདིར་བཀོད། ༽
གསར་འགོད་པ། དོན་གོ
ད་ང་ཚོ་ཕ་ཡུལ་ཐག་ཇི་རིང་དུ་འགྲོ་ཡི་ཡོད་པའི་འཚོར་བ་ཡོང་གི་འདུག
མི་རིགས་དབྱེ་འབྱེད་ཀྱི་ལས་ཀ་ནི། ཁྲིམས་འགལ་ཙམ་མ་ཟད། འཇིགས་སུ་རུང་བའི་ལས་ཀ་ཞིག་ཀྱང་རེད་དོ།
“ད་ལོ་ལྷ་ས་ཇོ་ཁང་མདུན་དུ་བོད་མི་གཉིས་ཀྱིས་རང་ལུས་མེར་བསྲེཊ་བཏང་བའི་ཉིན་ཤས་རྗེས། ངས་ལྷ་སའི་བུད་མེད་ཅིག་དང་ཆབ་མདོའི་རྒན་པོ་ཞིག གཞན་རྒྱ་རིགས་བུད་མེད་གཅིག་བཅས་རླངས་འཁོར་ནང་བཞག་ཡོང་སྐབས། སྙེ་མོ་ཞིབ་བཤེར་ས་ཚུགས་ནས་རྒྱ་རིགས་བུད་མེད་དེ་འགྲོ་རུ་བཅུག་སྟེ་ང་ཚོ་ཚང་མ་ཉིན་ ༢ རིང་བཀག་ཉར་བྱས་སོང་། ངས་ཁོང་ཚོར་རྒྱུ་མཚན་དྲིས་སྐབས་རྒྱ་རིགས་ཡིན་ན་འགྲོ་ཆོག་གི་རེད་ཟེར། དེ་མི་རིགས་དབྱེ་འབྱེད་ཀྱི་ལས་ཀ་ཞིག་རེད། ལྷ་སར་ཡང་གནས་ཚུལ་འདི་རིགས་ཤུགས་ཆེན་པོ་རེད། ཉེན་རྟོག་པ་དང་དམག་མི། ཐ་ན་ལས་ཁུངས་ཁག་གི་ལས་བྱེད་ཚོས་ཀྱང་བོད་མི་ཚོར་ལྟ་སྟངས་ལོགས་ཀ་འཛིན་གྱི་འདུག” ཟེར།
གནས་ཚུལ་ཞིབ་ཙམ་བཏང་བར་ཐུགས་རྗེ་ཆེ།