དེ་རིང་ཤེས་རབ་དགའ་ཚལ་སློབ་གྲྭའི་གོ་སྒྲིག་འོག དཔའ་བོའི་རྗེས་དྲན་ཕ་སྐད་གཙང་མའི་ཐ་སྙད་འགྲན་བསྡུར་ཐེངས་དང་པོ་བྱས་ཏེ། ནོར་གླིང་མཐོ་སློབ་ཀྱི་འགྲན་ཞུགས་པ་ཚོར་ཨང་དང་པོ་ཐོབ་སོང་།
དེ་རིང་ཕྱི་ཚེས་ ༡༠ ཉིན་ཏེ་ལྷག་དཀར་ཉིན་དང་བསྟུན་ཏེ་ངྷ་སའི་ཉེ་འདབས་ཤེས་རབ་དགའ་ཚལ་སློབ་གླིང་དུ། སློབ་གྲྭ་དེ་གའི་སློབ་ཟུར་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱི་རྗེས་དྲན་ཕ་སྐད་གཙང་མའི་ཐ་སྙད་གསར་པའི་དྲི་རྩལ་འགྲན་བསྡུར་ཐེངས་དང་པོ་དེ་གནང་ཡོད་ཅིང་། ཐ་སྙད་འགྲན་བསྡུར་དེའི་སྐུ་མགྲོན་གཙོ་བོར་དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཐ་སྙད་རྩོམ་སྒྲིག་ཚན་པའི་འགན་འཛིན་ཨ་ཙཱརྱ་ཀརྨ་སྨོན་ལམ་ལགས་དང་། ནོར་གླིང་མཐོ་སློབ་ཀྱི་སློབ་སྤྱི་མདོ་སྨད་སྤྱི་འཐུས་སྒྲོལ་དཀའ་སྐྱབས། དེ་བཞིན་སློབ་གྲྭའི་དགེ་ལས་སློབ་ཕྲུག་ཡོངས་བཅས་མཉམ་ཞུགས་གནང་སོང་།
ཐེངས་འདིའི་ཕ་སྐད་གཙང་མའི་དྲི་རྩལ་འགྲན་བསྡུར་ཁྲོད་ས་རཱ་མཐོ་སློབ་དང་ནོར་གླིང་མཐོ་སློབ། སྨན་རྩིས་ཁང་མཐོ་སློབ། ཀིརྟི་མཐོ་སློབ། ཤེས་རབ་དགའ་ཚལ་སློབ་གྲྭ་བཅས་ཀྱི་སློབ་ཕྲུག་ ༡༠ རེ་བཅས་ཁྱོན་སློབ་མ་ ༥༠ ཙམ་ཉམས་ཞུགས་གནང་ཡོད་ཅིང་། བོད་སྐད་ཐ་སྙད་གསར་པའི་སྐོར་ནས་ཅ་ལག་ལ་བལྟས་ཏེ་མིང་འབྲི་བ་དང་། དངོས་མིང་སྡེབ་འབྲི། དཔོད་བྲིས། ནོར་བཅོས། མགྱོགས་འབྲི། ཆ་ཤས། དཔེ་རིས་ངོས་འཛིན། མྱུར་རྩལ། དབྱེ་འབྱེད། མང་ཤེས་མང་ཐོབ་བཅས་དྲི་བ་རིགས་ ༡༠ ཙམ་བརྒྱུད་དེ། ནོར་གླིང་མཐོ་སློབ་ཀྱི་འགྲན་ཞུགས་པ་ཚོར་སྤྱིའི་སྐར་གྲངས་ ༡༥༠ ནས་སྐར་གྲངས་ ༩༥ ཐོབ་པར་ཨང་དང་པོའི་བྱ་དགའ་ཧིན་སྒོར་ ༡༠༠༠༠ དང་། ཤེས་རབ་དགའ་ཙལ་སློབ་གླིང་གི་འགྲན་ཞུགས་པ་ཚོར་སྤྱིའི་སྐར་གྲངས་ ༡༥༠ ནས་སྐར་གྲངས་ ༩༡།༥ ཐོབ་པར་ཨང་གཉིས་པའི་བྱ་དགའ་ཧིན་སྒོར་ ༧༠༠༠། ས་རཱ་མཐོ་སློབ་ཀྱི་འགྲན་ཞུགས་པ་ཚོར་སྤྱིའི་སྐར་གྲངས་ ༡༥༠ ནས་སྐར་གྲངས་ ༨༦ རག་པར་ཨང་གསུམ་པའི་བྱ་དགའ་ཧིན་སྒོར་ ༥༠༠༠ བཅས་ཐོབ་སོང་།
དྲི་རྩལ་འགྲན་བསྡུར་གྱི་ཐོག་མར་གོ་སྒྲིག་ཚོགས་ཆུང་གི་བོད་དགེ་སྐལ་བཟང་ཉི་མ་ལགས་ཀྱིས་དྲི་རྩལ་འགྲན་བསྡུར་གྱི་དགོས་པ་དང་གོ་སྒྲིག་བྱེད་ཕྱོགས་ངོ་སྤྲོད་གནང་སྐབས། དེང་སྐབས་བོད་ནང་དུ་རྒྱུའི་གནོན་ཤུགས་འོག་བོད་མི་ཚོས་ཕ་སྐད་གཙང་མའི་ལས་འགུལ་ལ་དོ་སྣང་དང་ཁྱབ་སྤེལ་ཤུགས་ཆེར་བྱེད་ཀྱི་ཡོད་པར་བརྟེན། བཙན་བྱོལ་རང་དབང་ལུང་པའི་ནང་གཅིག་ནས་སོ་སོའི་སྐད་ཡིག་ལ་སྦྱང་བརྩོན་ངེས་པར་བྱ་དགོས་པའི་འོས་འགན་ཡོད་པ། གཉིས་ནས་བོད་ནང་གི་བོད་མི་ཚོའི་ཕ་སྐད་གཙང་མའི་ལས་འགུལ་ལ་རྒྱབ་སྐྱོར་བཅས་ཀྱི་ཆེད་དུ་ལྷག་དཀར་གཟའ་ཚེས་དང་བསྟུན། ཤེས་རབ་དགའ་ཚལ་སློབ་གྲྭའི་སློབ་ཟུར་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་འཇམ་དཔལ་ཡེ་ཤེས་དང་དགུ་འགྲུབ་གཉིས་ཀྱི་རྗེས་དྲན་ཕ་སྐད་གཙང་མའི་ཐ་སྙད་གསར་པའི་འགྲན་བསྡུར་འདི་གོ་སྒྲིག་བྱས་པ་ཞིག་དང་། གོ་སྒྲིག་ཚོགས་ཆུང་གིས་ཐེངས་འདིའི་འགྲན་བསྡུར་ཁྲོད་ངྷ་ས་ཁུལ་དང་ཉེ་འཁོར་ཚོགས་སྡེ་མང་ཚོགས་གང་མང་མཉམ་ཞུགས་ཡོང་རྒྱུར་འབད་བརྩོན་བྱས་ཀྱང་། སྡེ་ཚན་ ༥ ལས་མ་བྱུང་པ་དེ་ནི་བཙན་བྱོལ་སྤྱི་ཚོགས་ཁྲོད་བོད་པའི་སྐད་རིག་ལ་འཛིན་པའི་རྣམ་འགྱུར་ཞིག་གསལ་ཐོན་བྱུང་ཡོད་པ་དང་། དེ་ནི་བློ་ཕམ་བྱ་གཞི་ཞིག་ཡིན་སྐོར་བརྗོད་སོང་།
དེའི་རྗེས་ཤེས་རབ་དགའ་ཚལ་སློབ་གྲྭའི་ངེས་སྟོན་པ་བུ་ཕྲུག་ཤཱསྟི་ལགས་ཀྱིས་སློབ་གྲྭ་ངོ་སྤྲོད་དང་སྦྲགས། བོད་ཀྱི་སྐད་ཡིག་ནི་བོད་པའི་ཆོས་དང་རིག་གཞུང་གི་གཞི་རྟེན་ཡིན་པར་ཚང་མས་རྗོད་ཀྱི་ཡོད་ཀྱང་། བཙན་བྱོལ་ནང་གི་བོད་མི་ཚོས་བོད་སྐད་བཤད་དུས་ཧིན་རྡུའམ་དབྱིན་སྐད་ཀྱི་ཐ་སྙད་མ་བསྲེས་པར་བོད་སྐད་གཙང་མ་བཤད་མཁན་ཧ་ཅང་དཀོན་པ་དང་། བོད་ནང་དུ་རྒྱ་སྐད་ཀྱི་བསྲེས་སླད་ཤོར་གྱི་ཡོད་པའི་གནས་སྟངས་ཤིག་ཆགས་ཡོད་སྐོར་བརྗོད་དེ། ཁོང་གིས་ “བོད་པའི་སྐད་ཡིག་ལ་བོད་རང་གིས་བདག་པོ་མ་བརྒྱབ་ན་གཞན་གྱིས་བདག་པོ་རྒྱག་གི་མ་རེད་”ཅེས་བརྗོད་སོང་།
ཐ་སྙད་འགྲན་བསྡུར་གྱི་ལས་རིམ་ཡོངས་སུ་གྲུབ་མཐར་སྐུ་མགྲོན་གཙོ་བོ་ཨ་ཙཱརྱ་ཀརྨ་སྨོན་ལམ་ལགས་ཀྱིས་བོད་ཕྱི་ནང་གཉིས་ཀྱི་ཐ་སྙད་གསར་བཟོའི་ཁྱད་པར་དང་འབྲེལ་གསུངས་དོན། བོད་ནང་ལ་མཚོན་ན་རྒྱ་ནག་གི་སྲིད་ཇུས་དང་རྒྱའི་སྐད་ཡིག་གི་བཙན་འཛུལ་འོག བོད་ཀྱི་སྐད་ཡིག་གི་གནས་བབ་ཛ་དྲག་ཏུ་ཡོད་ཀྱང་། དེང་སྐབས་སོ་སོའི་སྐད་ཡིག་ལ་དོ་སྣང་ཆེན་པོ་ཡོད་པ། སྔོན་ཆད་བོད་ནང་གི་ཐ་སྙད་གསར་པའི་རིགས་རྒྱ་སྐད་རྐྱང་པ་གཞིར་བཟུང་གིས་བོད་ སྒྱུར་བྱས་པའི་ཁ་ཕྱོགས་ལ་དེང་སང་འགྱུར་བ་ཆེན་པོ་ཐེབས་བཞིན་པ་ནི། དེང་གི་ཅ་དངོས་ཐོན་རྫས་གསར་པ་གང་ཞིག་གི་མིང་དང་ཐ་སྙད་བོད་སྒྱུར་རམ་གཏན་འབེབས་བྱེད་སྐབས་རྒྱ་ཡིག་ཙམ་མིན་པར་དབྱིན་ཡིག་དང་ཧྥ་རན་སིའི་སྐད་ཡིག་སོགས་ཅ་དངོས་གང་དེའི་ཐོག་མའི་མིང་དང་ཐ་སྙད་ཡོང་པའི་མ་ཡིག་ལ་གཞི་བཅོལ་ཏེ་བོད་སྐད་ནང་གསར་བཟོ་གཏན་འབེབས་བྱེད་ཀྱི་ཡོད་པ་དེ། བོད་སྐད་ཡིག་གི་ཐ་སྙད་གསར་པའི་རིགས་ཚད་ལྡན་ཅན་དུ་འགྲོ་ཐུབ་པའི་བཟང་ཕྱོགས་ཀྱི་འགྱུར་བ་ཞིག་ཡིན་སྐོར་བརྗོད་བྱུང་།
ཁོང་གིས་མུ་མཐུད་བཙན་བྱོལ་ནང་གི་བོད་སྐད་ཡིག་གི་གནས་བབ་སྐོར་ནས། བཙན་བྱོལ་སྤྱི་ཚོགས་ནང་གི་བོད་མི་རྣམས་རྒྱལ་ཁབ་འདྲ་མིན་ནང་གནས་ཡོད་པའི་གནས་སྟངས་འོག བོད་མི་ཚོས་བོད་སྐད་བཤད་སྐབས་སོ་སོའི་གནས་ཡུལ་གྱི་སྐད་ཡིག་དང་བསྲེས་སླད་མེད་པར་བོད་སྐད་གཙང་མ་བཤད་མི་ཤེས་པ་དང་། ཅ་དངོས་གང་ཞིག་ཉོ་ཚོང་བྱེད་སྐབས་དེ་དག་གི་མིང་དང་ཐ་སྙད་བོད་སྐད་ནང་བཤད་མི་ཤེས་པའི་གནས་སྟངས་ཤིག་ཏུ་གྱུར་ཡོད་པ། བོད་མི་ཚོ་བཙན་བྱོལ་དུ་འབྱོར་རྗེས་ཀྱི་༧གོང་ས་མཆོག་གི་བཀའ་སློབ་ནང་། དགེ་རྒན་ཚོས་སློབ་ཚན་གང་ཞིག་བསླབ་ཀྱི་ཡོད་ཀྱང་སེང་ཉིན་གྱི་ཁྲིད་གཞི་དོ་དགོང་ནས་གྲ་སྒྲིག་བྱས་ཏེ། སང་ཉིན་སློབ་ཚན་ཁྲིད་སྐབས་ཚང་མ་བོད་སྐད་ཡིག་ནང་ཆ་ཚང་བསླབ་ཐུབ་པ་ཞིག་བྱ་དགོས་པར་གསལ་ཡོད་ཀྱང་། ཚང་མས་དོ་སྣང་མ་བྱས་པར་འཐུས་ཤོར་དུ་ཕྱིན་མཐར། ད་ལོ་ ༥༠ རྗེས་སུ་ད་གཟོད་སྐད་ཡིག་གི་ཐད་ནས་རང་ཉིད་འཐུས་ཤོར་དང་རྗེས་ལུས་ཐེབས་ཡོད་པའི་ཚོར་སྣང་ཡོང་གི་ཡོད་སྐོར་བརྗོད་སོང་།
ཡང་ཁོང་གིས་དེང་སྐབས་བོད་ཕྱི་ནང་གཉིས་སུ་སྒེར་དང་སྒྲིག་འཛུགས་མང་པོ་ཞིག་གིས་བོད་སྐད་ཀྱི་ཐ་སྙད་གསར་བཟོའི་སྐོར་ལ་ཤུགས་རྒྱག་གི་ཡོད་པ་དང་། ཅ་དངོས་གཅིག་ལ་མིང་མི་འདྲ་བ་འགར་རེ་ཡོང་གི་ཡོད་ཀྱང་། མཚམས་རེར་གོ་བརྡ་མ་འཕྲོད་པའི་དཀའ་ངལ་ཡོང་སྲིད་ནའང་། ཅ་དངོས་གཅིག་ལ་མིང་ངམ་ཐ་སྙད་མི་འདྲ་བ་མང་པོ་ཞིག་པ་དེ་ཕན་ཚུན་ལ་དཔྱད་གཞི་དང་། ཐ་སྙད་གསར་པ་གཏན་འབེབས་ལ་ཕན་ཐོགས་ཡོང་པའི་རྒྱུ་ཆ་ཞིག་ལས་འགལ་རྐྱེན་ཞིག་ལ་ཁོང་སྒེར་ངོས་ནས་ངོས་འཛིན་བྱེད་ཀྱི་མེད་སྐོར་བརྗོད་སོང་།
ཐེངས་འདིའི་ཕ་སྐད་གཙང་མའི་ཐ་སྙད་གསར་པ་འགྲན་བསྡུར་གྱི་བྱ་དགའ་ཨང་དང་པོའི་སྦྱིན་བདག་ནི་བསང་ཆུ་འབྲུག་བྷེ་ལགས་དང་། ཨང་གཉིས་པའི་བྱ་དགའི་སྦྱིན་བདག་ནི་བཀྲ་ཤིས་དོན་འགྲུབ་ལགས། ཨང་གསུམ་པའི་བྱ་དགའི་སྦྱིན་བདག་ཟླ་བ་རིན་ཆེན་ལགས་བཅས་ཀྱིས་གནང་ཡོད་འདུག
གསར་འགོད་པའི་ཐེངས་འདིའི་འགྲན་བརྡུར་ཁྲོད་ཨང་དང་པོ་ཐོབ་མཁན་ནོར་གླིང་གི་འགྲན་ཞུགས་པའི་ནང་གི་སློབ་མ་ཀླུ་མཚོ་སྐྱིད་ལགས་སུ་ཁོ་ཚོས་ཐེངས་འདིའི་འགྲན་ཞུགས་ཆེད་གྲ་སྒྲིག་གང་འདྲ་བྱས་ཡོད་མེད་དང་། ཨང་དང་པོ་ཐོབ་པའི་གདེང་ཚོད་ཡོད་མེད་དྲིས་པར་ཁོ་མོས། ཟླ་གཅིག་དང་ཕྱེད་ཀའི་གོང་གོ་སྒྲིག་ཚོགས་ཆུང་གིས་ཁོ་ཚོར་བོད་ནང་གི་མཁན་པོ་ཚུལ་ཁྲིམས་བློ་གྲོས་ཀྱིས་རྩོམ་སྒྲིག་བྱས་པའི་བོད་སྐད་ཐ་སྙད་གསར་པའི་ནང་གི་ཐ་སྙད་ ༨༠༠༠ ཙམ་དཔེ་རིས་དང་བཅས་པ་མཁོ་སྤྲོད་གནང་བྱུང་པ་ལྟར་དེ་སྦྱངས་ཡོད་ཚུལ་དང་། ཉིན་བཅུའི་གོང་ཙམ་ནས་ཁོ་ཚོ་འགྲན་ཞུགས་པ་དག་གིས་དགོང་མའི་རང་སྦྱང་སྐབས་གྲོས་བསྡུར་གང་ལེགས་བྱས་ཡོད་སྐོར་དང་། ཤེས་རབ་དགའ་ཚལ་སློབ་གྲྭའི་འགྲན་ཞུགས་པ་དག་གིས་སྦྱོང་བརྡར་ཧ་ཅང་ཡག་པོ་བྱེད་ཀྱི་ཡོད་སྐོར་གོ་ཐོས་བྱུང་པ་ལྟར་ཨང་དང་པོ་ཁོ་ཚོར་འཐོབ་ངེས་ཡིན་པ་དང་། ཨང་གཉིས་པ་གསུམ་པའི་ནང་ཚུད་ཐུབ་པའི་རེ་བ་བཟུང་ཡོད་སྐོར་བརྗོད་བྱུང་།
གསར་འགོད་པ། བནྡེ་སྐྱབས།
འདི་ལྟར་གང་སར་གོ་སྒྲིག་བཟོ་བ་དངོས་གནས་དོན་ལྡན་ཞིག་ཏུ་མཐོང་གི་ཡོད་ལ།ལྷག་ཏུ་འགྲོ་སོང་གཏོང་མཁན་ཚོས་ཀྱང་བཏང་ས་མ་ནོར་བ་དང་།ཞུགས་མཁན་ཚོས་ཀྱང་ཧུར་ཐག་གིས་སྦྱང་བརྩོན་གནང་ནས་ཞུགས་པར་དགའ་བ་ཚད་མེད་སྐྱེས་སོང་།
ཤིན་ཏུ་ཡག་པོ་རེད། བོད་མི་བོད་སྐད་མ་སྦྱང་ན་བོད་མི་ཡིན་ཟེར་ངོ་རེ་ཚ།་ དེ་འདྲ་བའི་ལས་གུལ་ནི་བོད་ཀྱི་སྐད་ཡིག་ལ་ཉམས་པ་སླར་གསོ་དང་མི་ཉམས་གོང་འཕེལ་གཏོང་ཐུབ།
ཡིད་རང་ཆེན་པོས་གུས་བརྩི་དང་བསྔགས་བརྗོད་ཞུ།
འདི་ཚོ་བོད་ཀྱི་དཔའ་བོ་རེད་ལ་དོན་དངོས་ཀྱི་དཔའ་རྟགས་ཡང་རེད། བཀའ་དྲེན་ཆེ་རྒྱབ་སྐྱོར་ཡོད། ད་དུང་མུ་འཐུད་རོགས་གནང་།
ཧ་ཅང་དགའ་བྱུང་། གོ་སྒྲིག་གནང་མཁན་དང་སྦྱིན་བདག་ཚོར་ཐུགས་རྗེ་ཆེ་ཞུ། འགྲན་ཞུགས་པ་ཡོངས་དང་ལྷག་པར་བྱ་དགའ་ཐོབ་ས་ཚོར་དམིགས་བསལ་འཚམས་འདྲི་ཡོད།
བོད་མའི་བླ་སྲོག་ལ་གཅེས་སྐྱོང་དངོས་གནས་འདི་རིགས་རེད།
ཧ་ཅང་གི་རྗེས་སུ་ཡི་རང་ངང་རྒྱབ་སྐྱོར་དང་། སླད་མར་ཡང་དེ་ལྟ་བུའི་ལས་འགུལ་ཡང་ཡང་འབྱུང་ཐུབ་ན་མཐུན་རྐྱེན་གང་ཐུབ་སྦྱར་རྒྱུར་འདོད་བ་ཤིན་ཏུ་ཆེ་ཞུ།།
། གོ་སྒྲིག་ཚོགས་ཆུང་གིས་ཐེངས་འདིའི་འགྲན་བསྡུར་ཁྲོད་ངྷ་ས་ཁུལ་དང་ཉེ་འཁོར་ཚོགས་སྡེ་མང་ཚོགས་གང་མང་མཉམ་ཞུགས་ཡོང་རྒྱུར་འབད་བརྩོན་བྱས་ཀྱང་། སྡེ་ཚན་ ༥ ལས་མ་བྱུང་པ་དེ་ནི་བཙན་བྱོལ་སྤྱི་ཚོགས་ཁྲོད་བོད་པའི་སྐད་རིག་ལ་འཛིན་པའི་རྣམ་འགྱུར་ཞིག་གསལ་ཐོན་བྱུང་ཡོད་པ་དང་། དེ་ནི་བློ་ཕམ་བྱ་གཞི་ཞིག་ཡིན་སྐོར་བརྗོད་སོང་། ་་་ཟེར།