སོག་པོའི་རྩྭ་ས་བཙན་འཕྲོག

ཉེ་ཆར་ལྷོ་སོག་པོའི་ཨ་ལ་ཧྲན་མཱེན་ཨུ་ཆི་ན་ཆི་ས་ཁུལ་དུ། སོག་རིགས་འབྲོག་པ་ཚོས་ཕ་ས་ཕྱིར་སྤྲོད་དགོས་པའི་ངོ་རྒོལ་འབོད་སྐུལ་བྱས་འདུག

ཟླ་འདིའི་ཕྱི་ཚེས་ ༢ ཉིན། རྒྱ་གཞུང་གིས་ནང་སོག་ཏུ་འབོད་པའི་ལྷོ་སོག་པོའི་ཨ་ལ་ཧྲན་མཱེན་ཨུ་ཆི་ན་ཆི་ས་ཁུལ་གྱི་འབྲོག་པ་རྣམས་ཀྱིས།  ༼མཛེས་པའི་ཕ་ས་ཕྱིར་སྤྲོད་དགོས༽ཞེས་པའི་འཕྲེད་དར་འཕྱར་ཏེ། ས་གནས་རྒྱ་གཞུང་གིས་འབྲོག་པ་མང་ཚོགས་ཀྱི་ཕྱུགས་འཚོ་སྐྱོང་བྱེད་སའི་རྩྭ་ས་རྣམས། ས་གནས་སོག་རིགས་འབྲོག་པའི་ལག་ནས་བཙན་འཕྲོག་བྱས་ཏེ། རྒྱ་ནག་ནང་ལོག་ནས་བསླེབས་པའི་རྒྱ་རིགས་ཁེ་གཉེར་ཚོང་ལས་བ་རྣམས་ལ་ཡུལ་སྐོར་ལྗོངས་རྒྱུའི་གླིང་གའི་ངོ་བོའི་ཐོག་ནས་ཕར་བོགས་མར་གཏོང་བཞིན་པར་ངོ་རྒོལ་བྱས་ཡོད་འདུག

ཕྱི་ཚེས་ ༨ ཉིན་ཨ་རིའི་ནེའུ་ཡུག་ཏུ་རྟེན་གཞི་བྱས་པའི་ལྷོ་སོག་པའི་འགྲོ་བ་མིའི་ཐོབ་ཐང་གནས་འཕྲིན་ལྟེ་གནས་ཀྱིས་གསར་འགོད་གསལ་བསྒྲགས་སྤེལ་བའི་ནང་། རྒྱ་གཞུང་ལ་ངོ་རྒོལ་བྱེད་མཁན་ལྷོ་སོག་པོའི་འབྲོག་པ་རྣམས། ས་གནས་གྲོང་རྡལ་སྲིད་གཞུང་གི་ཉེ་འདབས་ཟམ་མདོ་རུ་བསླེབས་མ་ཐག རྒྱ་གཞུང་གི་དཔོན་རིགས་དང་བདེ་སྲུང་མི་སྣ་ཡོང་སྟེ་བཀག་འགོག་བྱས་ཏེ་འཕྲེད་དར་བཙན་འཕྲོག་བྱས་ཡོད་པ་མ་ཟད། སོག་པོ་འབྲོག་པ་མང་ཚོགས་ཚོར་རྡུང་རྡེག་དྲག་པོ་བཏང་ཡོད་འདུག 

ད་ལྟའི་ཆར་ས་ཆ་དེའི་ཁྲིམས་མཐུན་བདག་དབང་ཡོད་པའི་སོག་རིགས་འབྲོག་པ་རྣམས། སོ་སོའི་རྩྭ་རའི་ནང་ཡར་མར་འགྲོ་བསྐྱོད་ཀྱི་སྐབས་སུའང་མི་སེར་ལག་ཁྱེར་ལ་ཞིབ་བཤེར་བརྒྱུད་འགྲོ་དགོས་ཀྱི་ཡོད་འདུག སོག་པོ་འབྲོག་པ་ཞིག་གིས་གསར་ལམ་ཁག་ཏུ། ས་གནས་སྲིད་གཞུང་གི་མགོ་གཙོ་ཁྲིན་ཐའེ་ཆོན་གཙོས་རྒྱའི་དཔོན་རིགས་དག་གིས། ས་ཆ་འདིར་མི་རབས་མང་པོ་གནས་སྡོད་བྱས་པའི་སོག་རིགས་འབྲོག་པ་མང་ཚོགས་ལ་གཅར་རྡུང་དྲག་པོ་བྱས་པར་བརྟེན། སོག་པོ་མི་རིགས་ལ་འཁོན་སེམས་དྲག་པ་བསླངས་ཡོད་པ་བརྗོད་འདུག 

གསར་ལམ་ཁག་ཏུ་གནས་ཚུལ་ཐོན་པ་ལྟར་ན། སོག་རིགས་འབྲོག་པ་རྣམས་ཀྱི་རྒྱ་གཞུང་སྐབས་བཅོ་བརྒྱད་པའི་ཚོགས་ཆེན་དང་སྟབས་བསྟུན་ནས། རྒྱ་གཞུང་གིས་ནང་སོག་རང་སྐྱོང་ལྗོངས་སུ་འབོད་པའི་མངའ་སྡེ་སྲིད་གཞུང་གི་སྒོ་ཆེན་མདུན་དུ་མི་མང་འདུ་འཛོམས་ཀྱིས་སར་ཙོག་སྟེ་ཞི་བའི་ངོ་རྒོལ་བྱ་རྒྱུ་ཡིན་པ་མ་ཟད། པེ་ཅིན་གཞུང་དང་མཉམ་འབྲེལ་རྒྱལ་ཚོགས་ལའང་ཞུ་གཏུགས་ཡི་གེ་འབུལ་འཆར་ཡོད་འདུག