ཨོ་རི་ས་བོད་མིའི་གཞིས་ཆགས་ནང་རྒྱ་གར་ཡུལ་མི་དང་ས་ཞིང་བདག་དབང་གི་རྩོད་རྙོག་ཅིག་ལྷག་ཡོད་པའི་ཐོག ཉེ་ལམ་ས་གནས་གཞིས་མགོ་ཡང་འདས་གྲོངས་སུ་ཕྱིན་ཏེ། ད་ཆར་གཞིས་མགོ་གསར་པ་བསྐྱར་དུ་བསྐོ་བཞག་མ་ཐུབ་པར་ལྷག་ཡོད་འདུག
ཨོ་རི་ས་བོད་མིའི་གཞིས་ཆགས་ནང་ས་ཐོ་ལག་འཛིན་ཁ་གསལ་མེད་པར་བརྟེན་འདས་པའི་ལོ་འགའི་གོང་ནས་རྒྱ་གར་ཡུལ་མི་དང་བོད་མིའི་བར་ས་ཞིང་བདག་དབང་གི་རྩོད་རྙོག་ཅིག་བྱུང་སྟེ་ད་ལོར་བོད་མི་ཚོས་ས་ཞིང་འདེབས་ལས་མ་ཐུབ་པའི་གནས་ཚུལ་ཞིག་བྱུང་ཡོད་ཅིང་། གནས་ཚུལ་དེའི་སྐོར་འདི་ལོའི་ཕྱི་ཟླ་ ༧ པའི་ནང་ཨོ་རི་སའི་ས་གནས་མགོ་འཛིན་ད་ལྟ་འདས་གྲོངས་ཕྱིན་ཟིན་པ་ཨ་མྱེ་ཚང་མགོན་པོ་བཀྲ་ཤིས་ལགས་སུ་སྐད་ཆ་དྲིས་སྐབས། རྒྱ་གར་ས་གནས་གཞུང་གི་ངོས་ནས་འདི་ལོའི་ཕྱི་ཟླ་ ༦ ཚེས་ ༢༨ ནས་ཞིབ་བཤེར་མགོ་འཛུགས་ཀྱིས་ཕྱི་ཟླ་ ༨ ཚེས་ ༣༡ བར་དཀའ་རྙོག་གཙང་བཟོ་བྱ་རྒྱུའི་ཐག་གཅོད་བྱུང་ཡོད་སྐོར་བརྗོད་བྱུང་། ཡིན་ནའང་ས་གནས་གཞིས་ཆགས་སུ་ཛ་དྲག་གི་དཀའ་ངལ་འབྱུང་བཞིན་པའི་གཉན་འཕྲང་གི་དུས་སྐབས་འདིར། ཕྱི་ཟླ་ ༨ ཚེས་ ༢༨ ཉིན་ས་གནས་གཞིས་མགོ་ལགས་གློ་བུར་འདས་གྲོངས་ཕྱིན་ཏེ་ད་ཆར་ས་ཞིང་དཀའ་རྙོག་རང་འཇགས་ལྷག་ཡོད་པ་མ་ཟད། ཨོ་རི་སའི་ས་གནས་གཞིས་མགོ་གསར་པ་ཡང་བསྐོ་བཞག་མ་ཐུབ་པར་ལྷག་ཡོད་འདུག
ཉེ་ལམ་དམིགས་བསལ་ཚོགས་ཆེན་ལ་བཅར་བའི་ཨོ་རི་ས་ས་གནས་རང་བདེན་ཚོགས་ཆུང་གི་ཚོགས་གཙོ་ཀརྨ་བཙུན་རྒྱལ་ལགས་སུ། རྒྱ་གར་ས་གནས་གཞུང་གིས་ཞིབ་བཤེར་གནང་ཡོད་མེད་དང་། ཡོད་ན་ཐག་གཅོད་གང་འདྲ་བྱས་ཡོད་མེད་བཅར་འདྲི་ཞུས་པར། ཁོང་གིས “ད་ལོ་ས་ཐོ་ལག་འཛིན་བསྐྱར་བཅོས་བྱ་རྒྱུའི་ཐད། ཞིང་ཁའི་ནང་རྒྱ་གར་གཞུང་གིས་ས་ཞིང་ལ་ཚད་ཆ་ཚང་བརྒྱབ་ཚར་བ་རེད། ཕལ་ཆེར་ཐེངས་བཞི་ལྔ་ཙམ་ཞིག་ཚད་བརྒྱབ་ཚར་རེད། ད་ལྟའི་ཆར་ཁོ་ཚོའི་ངོས་ནས་ཚད་བརྒྱབ་ཚར་ཡོད་ཀྱང་། ས་གནས་ཡུལ་མི་ཚོས་དེ་དྲང་མོ་བྱུང་མ་སོང་། ངོས་ལེན་མེད་ཟེར་ནས་ཞིང་ཁ་འདེབས་རྒྱུ་ཕར་ཞོག་ས་ཐོ་ལག་འཛིན་ཡང་ལག་པར་རག་ཡོད་པ་མ་རེད།” ཅེས་བརྗོད་དེ། རྒྱ་གར་དབུས་གཞུང་དང་མངའ་སྡེ་གཞུང་གི་ཐོག་ནས་བོད་མི་ཚོར་རྒྱབ་སྐྱོར་ཧ་ཅང་ཡག་པོ་གནང་གི་ཡོད་ཀྱང་། ས་གནས་ཡུལ་མིས་གཞུང་གི་ཐག་གཅོད་ངོས་ལེན་མ་བྱས་པར་དཀའ་རྙོག་བཟོ་བཞིན་པར་བརྟེན། དཀའ་རྙོག་སེལ་རྒྱུ་དཀའ་ལས་ཁག་པོ་ཆགས་ཡོད་སྐོར་དང་། གནས་ཚུལ་དེ་དག་སྲིད་སྐྱོང་མཆོག་དང་ནང་སྲིད་བཀའ་བློན། སྤྱི་འཐུས་ཚོཊ་གཙོ་བཅས་སུ་སྙན་སེང་ཞུས་ཡོད་སྐོར་བརྗོད་སོང་།
ཕྱི་ཟླ་ ༡༠ ཚེས་ ༨ ཉིན་དབུས་བོད་མིའི་ནང་སྲིད་ལྷན་ཁང་གི་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་སུ། ཨོ་རི་ས་བོད་མིའི་གཞིས་ཆགས་ཀྱི་ས་ཞིང་དཀའ་རྙོག་སྐོར་ལ་བཀའ་འདྲི་གནང་བར། ཁོང་གིས་ “ཉེ་ཆར་ཕྱི་ཟླ་ ༨ ཚེས་ ༡༠ གྲངས་ཤིག་ལ། ས་མཚམས་དབྱེ་བཀར་གྱི་ལས་གཞི་དེ་ཧ་ལམ་གང་འཚམ་ཚར་འདུག ཡིན་ནའང་ས་ཞིང་ཨེ་ཀར་ ༢༠ ནས་ ༣༠ ཙམ་ད་ལྟ་ས་གནས་གྲོང་གསེབ་ཡུལ་མིའི་ལག་ཏུ་ཤོར་འདུག དེ་བཞིན། ང་ཚོའི་ས་གནས་གྲོས་ཚོགས་ཀྱི་ཚོགས་མི་དང་མཉམ་འབྲེལ་གྱི་འགན་འཛིན་ལྷན་ཚོགས། ས་གནས་ལས་དྲུང་བཅས་རྒྱ་གར་ས་གནས་རྫོང་དཔོན་གྱི་སར་བཅར་ཏེ། ས་ཆ་ཞིབ་འཇུག་བྱས་པ་དེར་ང་ཚོས་ངོས་ནས་འདོད་པ་ཞེ་དྲག་ཁེངས་མེད་པ། ས་གནས་ཡུལ་མིའི་ལག་ཏུ་ཤོར་བསྡད་པའི་ས་ཆ་ཨེ་ཀར་ ༣༠ ཡོད་པ་དེ་ཆ་ཚང་ཚུར་བསློག་དགོས་པ། ད་ལོ་བོད་མི་ཚོས་སོ་སོའི་འཚོ་རྟེན་གྱི་ཞིང་ཁ་འདེབས་མ་ཐུབ་པའི་ཐད་གུན་གསབ་སྤྲོད་དགོས་པ་བཅས་དོན་ཚན་གསུམ་སྙན་སང་ཞུས་ཡོད་པ་དང་། དེའི་ཐད་ས་གནས་རྫོང་དཔོན་གྱིས་མངའ་སྡེ་གཞུང་གིས་ལན་འདེབས་ལྟར་གང་ཐུབ་ཅི་ཐུབ་གནང་རྒྱུ་ཡིན་པའི་ཁས་ལེན་ཡག་པོ་གནང་འདུག” ཅེས་བརྗོད་བྱུང་། དཀའ་རྙོག་དེའི་འགག་རྩ་གཙོ་བོ་དེ་རྒྱ་གར་གཞུང་གིས་བོད་མི་ཚོར་འཚོ་རྟེན་ཆེད་སྤྲད་པའི་ས་ཞིང་རྣམས། བོད་མི་ཚོས་སོ་སོས་འདེབས་ལས་མ་ཐུབ་པར་རྒྱ་གར་ཡུལ་མིར་ཕར་བོགས་མར་བཏང་བར་བརྟེན་ཏེ། ད་ལྟའི་གནས་ཚུལ་འདི་བྱུང་བ་ཡིན་པ་དང་། ས་ཞིང་ཐོག་རྒྱ་གར་ཡུལ་མི་ཞིག་གིས་ལོ་གསུམ་ལ་བསྟུད་མར་ཞིང་ཁ་བཏབ་ཚར་བ་ཡིན་ན། ཁྲིམས་ཐོག་ནས་ཞིང་ཁ་དེ་ཧ་ལམ་ཡུལ་མིར་བདག་འགྲོ་བའི་གནས་སྟངས་ཤིག་ཆགས་ཀྱི་ཡོད་སྐོར་བརྗོད་བྱུང་།
ནང་སྲིད་དྲུང་ཆེ་མཆོག་ལ་ཛ་དྲག་གི་སྐབས་སུ་ས་གནས་གཞིས་མགོ་བསྐོ་བཞག་མ་ཐུབ་པའི་རྒྱུ་མཚན་དྲིས་སྐབས། ནང་སྲིད་ལས་ཁུངས་ཀྱི་ངོས་ནས་བཀའ་བློན་དབུ་བཞུགས་ཐོག་ས་གནས་ལ་ཛ་དྲག་གནས་སྟངས་ཆགས་བསྡད་པའི་སྐབས་འདིར། ས་གནས་མགོ་འཛིན་འཕྲལ་དུ་གཏོང་དགོས་པའི་བཀའ་མོལ་རིམ་པར་བྱུང་པ་མ་ཟད། ས་གནས་མགོ་འཛིན་ཁོང་ཚེ་འདས་ཕྱིན་པའི་ཉིན་གཉིས་པ་དེར་ལམ་སེང་བཀའ་ཤག་ལ་སྙན་སེང་ཞུས་ཡོད་ལ། སྒྲིག་འཛུགས་ཀྱི་འགྲོ་སྟངས་ཐོག་ནས་མི་འགྲོའི་གནས་རིམ་དང་ཆ་རྐྱེན་ཚང་དགོས་ཀྱིན་ཡོད་སྟབས། ཉེ་ཆར་ས་གནས་མགོ་འཛིན་ཁག་གསུམ་གྱི་མི་འགྲོའི་འོས་གཞི་མཉམ་གཅིག་ཏུ་ཡར་སྙན་ཞུ་ཕུལ་ཡོད་ཀྱང་། འདེམས་བསྐོ་ལྷན་ཁང་ནས་མི་འགྲོའི་ཆ་རྐྱེན་ཡིག་ཆ་གྲ་འགྲིག་མི་འདུག་གསུངས་ཏེ་འགག་བསྡད་ཡོད་སྐོར་དང་། གལ་སྲིད་ས་གནས་མགོ་འཛིན་ལམ་སང་ཛ་དྲག་ཐོག་བསྐོ་འཇོག་བྱེད་ཐུབ་ཀྱིན་མེད་ཚེ། ནང་སྲིད་ལས་ཁུངས་རང་ནས་ཟླ་འགའི་རིང་ནང་ཁུལ་ལས་བགོས་བརྒྱབ་སྟེ་ལས་བྱེད་ཅིག་ཕར་གཏོང་ཐུབ་ན་བསམ་པའི་བཀའ་མོལ་འགྲོ་བསྡད་ཡོད་སྐོར་བརྗོད་སོང་།
གསར་འགོད་པས་དབུས་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་དུ་བསྐྱོད་དེ། ལས་བྱེད་འདེམས་ལྷན་འགན་འཛིན་འཇམ་དཔལ་ཆོས་བཟང་ལགས་སུ་བཀའ་འདྲི་ཞུས་པར། ཁོང་གིས་ “མི་གསུམ་གྱི་ཡིག་ཆ་ཞིག་མར་བཏང་གནང་ཡོད་པ་རེད། དེའི་ནང་ནས་གཅིག་ཨོ་རི་སར་བསྐོ་བཞག་བྱེད་རྒྱུ་དེ་རེད། ང་ཚོ་འདེམས་བསྐོ་ལྷན་ཁང་ལ་ང་རང་ཚུད་པའི་ཚོགས་མི་གསུམ་ཡོད་པ་རེད། མི་འགྲོ་འདེམས་བསྐོའི་གནས་ཚུལ་དེ་འདྲ་བསླེབས་དུས་ང་ཚོ་ཚོགས་འདུ་ཚོགས་དགོས་པ་རེད། ཚོགས་འདུ་ཚོགས་ཏེ་སྒྲིག་གཞི་ནང་ལྟར་ཡིག་ཆ་ཚང་མིན་ལྟ་དགོས་པ་རེད། ད་ལྟའི་མི་གསུམ་པོར་ཡིག་ཆ་ཚང་གི་ཡོད་པ་མ་རེད། དེར་བརྟེན། ང་ཚོས་བཀའ་ཤག་ལ་བསྐྱར་དུ་ཡར་ཕུལ་ཡོད། དེ་དག་འདེམས་བསྐོ་ལྷན་ཁང་ནས་ཆོད་གན་ཐོག་ལ་བསྐོ་བཞག་བྱེད་རྒྱུ་ངོས་ལེན་བྱེད་ཐུབ་ཀྱི་མི་འདུག ཁོང་ཚོར་ཡིག་ཆ་དེ་དང་དེ་ཚང་མི་འདུག ཡིག་ཆ་དེ་དག་ཚང་ན་མར་གནང་རོགས། ང་ཚོས་བསྐྱར་དུ་གོ་སྡུར་བྱེད་ཀྱི་ཡིན་ཞེས་ང་ཚོས་ཡིག་ཐོག་ནས་བཀའ་ཤག་ལ་ཡར་ཕུལ་ཡོད་ཀྱང་། ད་སྔ་ལན་གང་ཡང་འབྱོར་མ་སོང་” ཞེས་བརྗོད་སོང་། དེ་འཕྲལ་འདི་ག་གསར་འགོད་པ་བཀའ་དྲུང་ཡིག་ཚང་ལ་བཅར་སྐབས། བཀའ་དྲུང་ལགས་ནས་ཨོ་རི་ས་ས་གནས་མགོ་འཛིན་བསྐོ་བཞག་སྐོར་ལ་བཅར་འདྲི་དང་ལེན་གནང་མ་སོང་།
གསར་འགོད་པ། ཚེ་རིང་རྒྱལ།
༼བོད་
