ཐུབ་བསྟན་ཆོས་གྲགས།
ན་མོ་གུ་རུ། ཉེ་ལམ་ནས་བཟུང་མང་གཙོ་དང་རང་བཙན་བར་གྱི་ལྟ་གྲུབ་གཉིས་པོའི་ཐད་ནས་སྤྱི་ཚོགས་ནང་འུར་འདྲོགས་དང་། དོགས་འདྲོགས་མང་པོ་ཞིག་བསླངས་དང་སློང་བཞིན་པས་བོད་ཀྱི་རྩ་དོན་འཐབ་རྩོད་ལ་ངམ་ངམ་ཤུགས་ཀྱིས་གནོད་སྐྱོན་ཐེབས་བཞིན་འདུག
༸གོང་ས་སྐྱབས་མགོན་ཆེན་པོ་མཆོག་གི་གསུང་རང་ཉིད་ཀྱི་རྒྱབ་རྩར་འཁྱེར་ནས་བོད་བསྟན་པ་ཆབ་སྲིད་ཀྱི་རྩ་དོན་སྒྲུབ་མཁན་དག་ལ་དམའ་འབེབས་བྱུང་རྒྱལ་དུ་བྱེད་པ་དང་།མངོན་ལྐོག་གང་རུང་བརྒྱུད་ནས་སྤྱི་ཚོགས་ནང་ཟིང་སློང་གི་རྩོམ་ཡིག་གང་བྱུང་སྤེལ་བ་མ་ཟད། སྲིད་ཀྱི་སྣེ་མོ་འཛིན་པའི་ན་གཞོན་ཤེས་ལྡན་པ་དག་རང་གི་རྐང་མར་ཁྲག་ལས་གྲུབ་པ་དེ་གང་བྱུང་དུ་ཁ་འགྱུར་དང་།ངན་རོགས་ཕྱོགས་སྒྲིལ་བྱེད་ཐབས་སྤེལ་བ་སོགས་ཡིད་ལ་བཟོད་ཐབས་མེད་པའི་བྱ་འགུལ་གང་མང་བྱས་སོང་བ་སེམས་ཀྱིས་བཟོད་ཐབས་མ་མཆིས།
དེ་དག་ནི་ཚེ་བརྟན་རྡོ་རྗེའི་ཞི་བའི་གོམ་བགྲོད་ལས་འགུལ་ནང་རྒྱ་དར་དམར་པོ་བསྒྲེངས་པར་དབུས་བོད་ཀྱི་གཞོན་ནུ་ལྷན་ཚོགས་ནས་ངོ་རྒོལ་གསལ་གྲགས་སྤེལ་བའི་རྐྱེན་གྱིས་ཧ་ལམ་འབྲེལ་ལམ་ལ་དོ་ཕོག་བྱུང་སོང་སྙམ་པ་ཡང་ཡང་འཆར།འོན་ཀྱང་ད་བར་ཁ་མ་གྲགས་པར་གནས་པ་ནི་དུ་བ་རང་ཡལ་དུ་འགྲོ་བའི་རེ་བ་དྲག་པོ་བྱས་པ་ལས།སྤྱི་ཚོགས་ལ་འགན་མ་འཁྱེར་བ་དང་།ཡང་ན་ལྟད་མོ་བལྟས་པའི་ཟོལ་དུ་གནས་པ་ཞིག་རྩ་བ་ཉིད་ནས་མིན།
ནད་རྙིང་དེ་འདྲ་ཞིག་གི་རྐྱེན་ལས་དམ་ཚིག་མདུད་པ་བཤིག་ན་དགྲ་དགའ་གཉེན་སྡུག་གི་གནས་ལས་མ་འདས་པས་།འདིར་གསལ་འདེབས་ཚིག་རེ་གཉིས་འདྲ་ཞུ་ན།ཞི་བའི་གྲོམ་བགྲོད་པ་ཚེ་བརྟན་རྡོ་རྗེ་ནི་ང་ཚོའི་སེམས་ནང་དུས་བརྟན་དུ་མ་ཡལ་བའི་བཙན་པོའི་གདུང་རྒྱུད་ཀྱི་དཔའ་རྒོད་ཅིག་ཡིན།
སྐབས་དེ་དུས་ཁོང་གིས་རྒྱ་དར་འཁྱེར་བ་ཁག་མི་འདུག་སྙམ།རྒྱུ་མཚན་ནི་ཁོང་གིས་ཟིན་བྲིས་ཐོག་ནས་ལས་འགུལ་ལ་མཉམ་བཞུགས་ཡོང་བའི་རེ་སྐུལ་ཐེངས་མང་ཞུས་ཀྱང་།ཁོང་དང་མཉམ་དུ་བློ་གཅིག་སེམས་གཅིག་གིས་གོམ་བགྲོད་ལ་བཞུགས་རྒྱུར་མི་མང་པོར་ཐེ་ཚོམ་བྱུང་བ་དང་།ཁོང་གི་བློས་གཏོང་ཚད་གཞི་ཧ་ཅང་མཐོན་པོར་སོང་།ཁོང་དང་དམིགས་ཡུལ་གཅིག་མཚུངས་ཀྱི་གོམ་བགྲོད་པ་སུ་ཡང་བྱུང་མེད།ཁོང་མ་སྨད་གསུམ་གྱིས་ནར་རེར་ལུས་པའི་ལམ་ཕྲང་དག་དཀའ་བས་བརྫིས་ཤིང་།སྙིང་ཁོང་དུ་འགྱུར་མེད་ཀྱི་སྙིང་སྟོབས་གོ་ཆར་གྱོན་ཏེ་མདུན་དུ་བསྐྱོད།ཁོང་གིས་ཞི་བའི་ངོ་རྒོལ་དེ་རྒྱུན་མཐུད་བྱེད་ཐུབ་པའི་ཆེད་དུ་རྡི་ལི་ནས་རྒྱ་དར་དམར་པོ་ཞིག་ཀྱང་འཁྱེར་བར་བློ་ཁ་ཕྱོགས།
དེར་བརྟེན་ཁོང་ནི་བོད་ཀྱི་རང་དབང་བསུ་བའི་ཕོ་ཉ་དང་།ན་གཞོན་ཤེས་ཡོན་ཅན་ཞིག་གིས་རང་གི་རྒྱལ་ཁབ་ཀྱི་དོན་དུ་བློས་གཏོང་ཚད་མཐོན་པོ་གནང་མཁན་ཞིག་ཡིན་པ་བརྗོད་མི་དགོས་པ་ཞིག་རེད།
གཞན་ཡང་བོད་ཀྱི་གཞོན་ནུ་ལྷན་ཚོགས་ནས་ཚེ་བརྟན་རྡོ་རྗེར་རྒྱ་དར་བསྒྲེངས་པའི་ཉེར་ལེན་ལས་ངོ་རྒོལ་གསལ་གྲགས་སྤེལ་བའང་དོན་དང་ལྡན་པ་ཞིག་ཡིན།རྒྱུ་མཚན་ནི།གཅིག་ནས་བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་རང་བཙན་ཡིན་པ་དང་།གཉིས་ནས་ཡུན་རིང་མ་སོང་གོང་རྒྱ་དར་མེར་བསྲེགས་ཀྱི་ལས་འགུལ་སྤེལ་གནང་བ།ལྷག་པར་དུ་གནས་ཚུལ་གལ་ཆེ་ཤོས་ཤིག་ནི།ཐོག་མར་ཚེ་བརྟན་རྡོ་རྗེ་ལས་འགུལ་མགོ་འཛུགས་སྐབས་གཞོན་ལྷན་དང་།འབྲེལ་གཏུག་གནང་བ་མ་ཟད་གཞོན་ལྷན་གྱི་རྒྱབ་སྐྱོར་གང་ཅིར་ཡག་པོ་གནང་སོང་།
དེར་བརྟེན་གཞོན་ནུ་ལྷན་ཚོགས་དེ་ད་བར་བོད་སྤྱི་པའི་རྩ་དོན་ཐོག་ལ་ལས་དོན་གལ་ཆེན་མང་པོ་སྤེལ་གནང་ཡོད་ལ།བཙན་བྱོལ་དུ་གྱར་ནས་ཚོགས་པ་འདྲ་མིན་སྣ་ཚོགས་ཤིག་རྒྱ་བསྐྱེད་བྱུང་བའི་ནང་ནས་རྙིང་ཤོས་དང་།ནུས་པ་ཆེ་ཤོས་ལྡན་པའི་ཚོགས་པ་ཞིག་ཡིན་པ་མ་ཟད། ཚོགས་པའི་ལངས་ཕྱོགས་ཀྱང་རང་བཙན་གཙང་མར་གནས་ཡོད་སྟབས།རང་གི་ལྟ་གྲུབ་ཐོག་ནས་ལངས་ཕྱོགས་གསལ་པོ་བཟོ་དགོས་པ་དེ་ཧ་ཅང་གལ་ཆེན་ཆགས་ཡོད།
དེར་བརྟེན་ང་ཚོ་བཙན་བྱོལ་བའི་ཁོར་ཡུག་དེ་ལྟ་བུའི་ནང་ཕན་ཚུན་གུ་ཡངས་དང་།བློ་རྒྱ་ཆེན་པོ་བྱེད་རྒྱུ་ནི་གལ་ཆེན་པོ་ཡིན།གལ་སྲིད་རྙོག་གྲ་ཆུང་ཆུང་ཞིག་ལ་ཤི་འཐམ་རོ་འཐམ་བྱེད་བཞིན་འབྱུང་འགྱུར་མདུན་སྐྱོད་ཀྱི་བསམ་བློའི་འཁོར་རྒྱ་ཞིག་མེད་ན།ད་ལྟའི་གཉན་འཕྲང་ཅན་གྱི་ལམ་འཕྲང་འདི་ནས་མཐར་དཀའ་བ་ཡིན།
ཉིད་ཀྱིས་ཉིད་ཀྱི་མིག་དང་སེམས་ནང་ལ་དཔའ་བོ་གླིང་ཚ་བདག་བྱེད་སྟངས་དེར་བདག་གིས་ཡི་རང་ཞུ། དཔའ་བོ་གླིང་ཚས་ཞི་བའི་གོམ་བགྲོད་སྐབས་རྒྱ་མིའི་རྒྱལ་དར་འཁྱེར་དོན་ཐད་ངེད་གཉིས་ཀྱི་བསམ་ཚུལ་འདྲ་རྒྱུ་མི་འདུག བདག་གིས་དེར་གནད་དོན་ཆེན་པོ་ཞིག་ཡོད་པར་འདོད་ཀྱི་ཡོད། ཞིབ་ཕྲ་སྐབས་གཞན་ཞིག་ནས་བཤད་ཆོག དེ་མིན་ཆབ་སྲིད་ལྟ་གྲུབ་ངེས་ཅན་ཞིག་གི་ཐོག་ནས་ཚོགས་སྡེ་དང་མི་སྒེར་སུ་ཞིག་གིས་དོན་དག་ཅིག་ལ་ཅི་བཤད་རུང་དེ་ལམ་ཞིག་གི་ཆེད་ཡིན་པས་སྐྱོན་མེད་ནའང་། ཅི་ཟེར་འདི་ཟེར་མེད་པར་རང་འགར་རང་གཏམ་གློད་ནས་སྙད་འདོགས་མཁན་ཚོ་ནི། མི་རིགས་རྩ་དོན་གྱི་བར་ཆད་ཅིག་ཏུ་ངོས་འཛིན་ཆོག་ཆོག་རེད
ད་ལྟའི་བཙན་བྱོལ་ནང་རང་བཙན་ཐོག་ལས་འགུལ་དང་། དཔྱད་རྩོམ་བྲིས་མཁན་དེ་དག་ནི་སེམས་ཤུགས་དང་མི་རིགས་ལ་ཞེན་པ་དཀར་བ་ནི་རྗེས་སུ་ཡིད་རངས་ཞུ་དགོས་རུང་དེ་ཚོས་དངོས་ཡོད་གནས་སྟངས་ལ་བསམ་ཞིབ་མེད་པ་དང་གཅིག བོད་པའི་ཆོས་རིགས་གོམས་གཞིས་ལ་རྒྱུས་མངའ་མེད་པ་དང་གཉིས། རང་ཉིད་གང་དུ་བསྡད་ནས་སེམས་ཀྱིས་ཚོར་བ་བརྗོད་པ་གསུམ། དམིགས་ཡུལ་སྒྲུབ་རྒྱུར་གོ་རིམས་ལྡན་པའི་འཆར་གཞི་མེད་དང་བཞི། རྒྱལ་སྤྱིའི་ནང་མི་རིགས་འཆམ་མཐུན་དང་། ས་མཚམས་དབྱེ་བ་མེད་པའི་ལས་འགུལ་དར་ཁྱབ་འགྲོ་བ་ལྔ་ཡི་གནས་ཚུལ་མི་ཤེས་པའི་ལན་འདུག