མིང་གི་ཆག་སྒོ།

ཚེར་ནགས་རྡོ་རྗེ་རིན་ཆེན།

 དུས་རབས་ཉེར་གཅིག་པ་ནི་གློག་རྡུལ་བརྡ་འཕྲིན་གྱི་དུས་རབས་སུ་འབོད་པ་དང་། བྱ་བ་ཕལ་མོ་ཆེ་བརྡ་འཕྲིན་བརྒྱུད་ལམ་ནས་ཧ་ཅང་སྟབས་བདེ་ཅན་དུ་གྱུར་པ་ནི་ཅི་འདྲའི་དགའ་འོས་པ་ཞིག་རེད། ཡིན་ནའང་བཀྲ་ཤིས་སྣ་ནག་མ་དང་ལྷན་ཅིག་གི་དཔེ་ལྟར། ལྡོག་ཕྱོགས་ཀྱི་ཤུགས་རྐྱེན་རེ་ཡང་མེད་པ་ག་ལ་སྲིད། དཔེར་ན། དྲ་རྒྱའི་བརྒྱུད་ལམ་ཡར་རྒྱས་སུ་ཕྱིན་པ་དང་སྟབས་བསྟུན་མིང་གི་ཆག་སྒོ་ཡང་སྣ་ཚོགས་ཤིག་བྱུང་དང་འབྱུང་བཞིན་ཡོད། དྲ་རྒྱའི་དུས་རབས་ལ་བརྟེན་ནས་བྱུང་བའི་མིང་གི་ཆག་སྒོ་དེ་དག་སྡེ་ཚན་ནམ་རིགས་བགར་ན། དངོས་མིང་འདྲ་བོ་ཡིན་པའི་འཁྲུལ་གཞི་དང་། སྙུག་མིང་འདྲ་བོ་ཡིན་པའི་ནོར་འཛོལ། གཞན་གྱི་དངོས་མིང་དང་སྙུག་མིང་ལ་ཆེད་དམིགས་བཙན་འཛུལ་བྱེད་པ། གང་ཟག་གཅིག་གིས་མིང་རྫུན་དང་སྙུག་མིང་ཅི་རིགས་སྤྱོད་པའི་མགོ་རྙོག་སོགས་རེད། དེ་དག་ལས་དང་བོ་སྟེ་དངོས་མིང་འདྲ་བོ་ཡིན་པའི་དཀའ་ངལ་སྐོར་ཅུང་ཞིག་གླེང་བར་བྱ།

ཨ་རིའི་མའེ་ནེ་སོ་ཌ་ (Minnesota) མངའ་སྡེ་ནང་གནས་སྡོད་ཊ་རཱ་མཱ་ཧྥེ་ (Tara Murphy) ཞེས་པའི་བུད་མེད་ཅིག་གིས་ཁྲིམས་ལུགས་སློབ་སྦྱོང་བྱེད་བཞིན་པ་དང་། སློབ་སྦྱོང་གི་དུས་རིམ་ནང་ཁོ་མོ་དང་སྐྱེས་མིང་གཅིག་པ་ཅན་བཞི་ཙམ་བྱུང་། དེ་དག་ལས་གཅིག་ནི་བཙོན་པ་ཡིན་ཞིང་། གཅིག་ཆགས་སློང་ལྟད་མོ་འགྲེམས་སྟོན་བྱེད་མཁན་དང་། གཅིག་དཔེ་མཛོད་ཀྱི་དཔེ་དེབ་གཡར་ནས་ཕྱིར་ལོག་མ་བྱས་པའི་ཁྲིམས་འགལ་ཅན། གཅིག་ང་ཚོ་དཀའ་ངལ་འཕྲད་དེ་ཁྲིམས་འགལ་བྱེད་པའི་བུད་མེད་ཆགས་ཅན་ཡིན་ཞེས་གནས་ཚུལ་སྤེལ་མཁན་རེད། དེ་དག་གི་མཚན་ཤས་རེ་རེས་ཁོ་མོའི་ཆེ་མཐོང་ལ་གནོད་གཞི་བྱུང་བ་མ་ཟད། མཐའ་ན་ཁོ་མོའི་ཁྲིམས་ལུགས་བསླབ་པ་མཐར་སོན་གྱི་མཐའ་མའི་ཡིག་རྒྱུགས་སྐབས་ཀྱང་། རང་ཉིད་བདེན་དཔང་ཆེད་མཛུབ་ཐེལ་རྒྱག་དགོས་པའི་གནས་སྟངས་སུ་གྱུར།

 དེ་བཞིན་ཨ་རིའི་གློག་ཀླད་ཀྱི་སྒྲ་སྐྱེད་མཉེན་ཆས་བཟོ་མཁན་ཞིག་གི་མིང་ལ་མཱ་ཧྥེ་ (Michael McAfee) ཞེས་འབོད་ཅིང་། སྐུ་ཞབས་ཁོང་ཨ་རིའི་ལྷོ་ནུབ་ཁུལ་གྱི་མངའ་སྡེ་ཁ་ལི་ཧྥོ་ནིའི་ས་གནས་སཱན་སྒྲེ་གྷོ་རྫོང་ (San Diego County) ནང་སྡོད་བཞིན་ཡོད། ཡང་གཅིག་གི་མིང་ལའང་མཱ་ཧྥེ (Michael McAfee) ཟེར་ཞིང་། ཁོང་ཨ་རིའི་བཙོན་ཁང་ནང་བྲོས་བྱོལ་ཕྱིན་པའི་ནག་ཅན་གཏེ་བོ་ཞིག་ཡིན། དྲ་ལམ་ནས་མཱ་ཧྥེ་ (Michael McAfee) ཞེས་པའི་གང་ཟག་འདི་ཨ་རིའི་བཙོན་ཁང་ནས་བྲོས་བྱོལ་ཕྱིན་པའི་ནག་ཅན་གཏེ་བོ་ཞིག་དང་། ཨ་རིའི་གཞུང་གིས་འཚོལ་ཞིབ་བྱེད་བཞིན་པའི་གནས་ཚུལ་གསལ་སྟབས། མཉེན་ཆས་བཟོ་མཁན་སྐུ་ཞབས་མཱ་ཧྥེ་ (Michael McAfee) ཁོང་གི་བདེ་འཇགས་ལའང་དོན་མེད་དོ་ཕོག་རིམ་པར་བྱུང་། དེར་བརྟེན་ཁོང་གིས་ནུས་ཤུགས་གང་ཡོད་བསྐྱེད་ནས་རང་ཉིད་དཀར་འདོན་གྱི་བྱ་འགུལ་མང་དག་ཅིག་རྩོམ་བཞིན་པའི་མུར། སྟབས་ཡག་པ་ཞིག་ལ་ནག་ཅན་གཏེ་བོ་མཱ་ཧྥེ་ (Michael McAfee) ཨ་རི་གཞུང་གིས་བསྐྱར་དུ་འཛིན་བཟུང་ཐུབ་པའི་གནས་ཚུལ་ཐོན་ཞིང་། དེ་ནས་བཟུང་མཉེན་ཆས་བཟོ་སྐྲུན་པ་མཱ་ཧྥེ་(Michael McAfee) ལགས་གཞི་ནས་བག་ལྷོད་ངང་གནས་ཐུབ་པ་རེད།

 དེ་ལྟར་དྲ་རྒྱའི་དུས་རབས་ནང་མིང་གི་ཆག་སྒོ་སྣ་ཚོགས་ཤིག་བྱུང་དང་འབྱུང་བཞིན་པར་བརྟེན། ནུབ་ཕྱོགས་སྤྱི་ཚོགས་སུ་དེ་དག་ལ་གདོང་ལེན་བྱེད་ཕྱོགས་སློབ་སྟོན་བྱེད་མི་དང་། སྒྲིག་འཛུགས། ཐབས་ལམ་སོགས་ཀྱང་རིམ་པར་ཐོན་དང་ཐོན་བཞིན་པ་ལས། ཆེ་མཐོང་སྲུང་སྐྱོབ་ཚོགས་པའི་སྐུ་ཞབས་ཕའོ་ལའེ་ཝོ་ཌི་ (Polly Wood) མཆོག་གིས། དྲ་རྒྱའི་ཁོར་ཡུག་ནང་ཚུད་པའི་མིང་གཅིག་པ་ཅན་ཚོར་ཐུན་མོང་གི་དཀའ་ངལ་དེ། གཅིག་གི་མཚན་ཤས་ཀྱིས་གཅིག་གི་ཆེ་མཐོང་ལ་གནོད་སྐྱེད་པ་དང་། ཡང་ན་དོགས་གཞི་ཡོང་བ། དེར་བརྟེན་ཕྱི་ལོག་གི་དྲི་བ་མང་པོ་ཞིག་ལ་ལན་འདེབས་དགོས་པ། གཅིག་གི་ཁ་རྡུང་གཅིག་གིས་བཟེད་དགོས་པ། མིང་གཅིག་པ་ཅན་ཚོ་དང་རང་བཞིན་གྱིས་མ་མཐུན་པ་ཆགས་པ། དྲ་ལམ་བརྒྱུད་ནས་ལས་ཀ་འཚོལ་དུས་མགོ་རྙོག་པ་སོགས་རྣམ་པ་ཅི་རིགས་ཡོད་ཚུལ་དང་། དེ་དག་ལ་གདོང་ལེན་བྱེད་ཕྱོགས་སོགས་ཀྱང་སློབ་སྟོན་བྱས་ཡོད།

 གཞན་ཡང་ཁོང་གིས་ཊ་རཱ་མཱ་ཧྥེ་ (Tara Murphy) ཡིས་ ‘‘ངེད་ནས་རང་མིང་གཅིག་པ་ཅན་མང་པོ་ཞིག་གི་མཚན་ཤས་ཀྱིས་དཀའ་སྡུག་མྱོང་བཞིན་ཡོད་ན། ངེད་ཀྱི་ལེགས་རྗེས་རིགས་ཀྱང་ཁོང་ཚོའི་ལོངས་སྤྱོད་ཐུབ་པ་ཞིག་མ་རེད་དམ། ང་ཞེད་སྣང་ཡོང་གཞི་གཙོ་བོ་ཞིག་དེ་ཡིན།’’ཞེས་གསུངས་ཚུལ་ལུང་འདྲེན་དང་འབྲེལ་ཁྲིམས་ལུགས་ཆེད་མཁས་པ་ཞིག་གི་ངོས་ནས། རང་ཉིད་ཀྱི་ཆེ་མཐོང་གཙུག་འཛིན་དགོས་པ་དེ་ཧ་ཅང་གལ་ཆེན་ཡིན་སྐོར་ཡང་ནན་བརྗོད་བྱས་ཡོད།   ཊ་རཱ་མཱ་ཧྥེ་ (Tara Murphy) ལགས་ནི་ད་ལྟ་ཁྲིམས་ལུགས་སློབ་སྦྱོང་མཐར་ཕྱིན་མ་ཐག་ཡིན་པ་དང་། ཁོ་མོས་དཔེ་གསར་གྱོན་ཆས་དང་མིའི་མཛེས་སྡུག་སྐོར་ལ་དྲ་ཚིགས་གཉིས་ཕྱེས་ཡོད།

 དཀའ་ངལ་འདིའི་རིགས་ནུབ་ཕྱོགས་སྤྱི་ཚོགས་སུ་སྒེར་ངོས་དང་། ཡང་ན་ཁྲིམས་ཐོག་ནས་སེལ་ཐབས་བྱེད་བཞིན་པ་ནི། དཔེར་ན། ཨ་རིའི་རྟོག་སྒྲུང་རྩོམ་པ་པོ་ཝོ་ནའེ་གྷ་སི (Norb Vonnegut) མཆོག་ཨ་རིའི་ཤར་ཕྱོགས་རྒྱ་མཚོའི་ཉེ་འགྲམ་ནེའུ་དབྱིན་ལན་ (New England) ས་གནས་ཨེ་སི་ལན་ཌི་ (RhodeIsland) ནང་གཏན་སྡོད་བྱེད་ཅིང་། ཁོང་གིས་དཔེ་དེབ་ཀྱང་འགའ་ཤས་བརྩམས་མྱོང་ཡོད། འོན་ཀྱང་རྒྱ་ཆེའི་ཀློག་མཁན་མང་པོ་ཞིག་གིས་རྩོམ་པ་པོ་ཁོང་། ཁོ་བའི་གཉེན་ཉེ་འདས་གྲོངས་སུ་ཕྱིན་པའི་རྩོམ་པ་པོ་ཝོ་ནའེ་གྷ་སི (LateKurt Vonnegut (Greatnovelist) ) མཆོག་དང་གོ་ནོར་ཐེབས་མཁན་ཇི་སྙེད་བྱུང་། དེར་བརྟེན་ཁོ་བས་འཁྲུལ་གཞི་དེ་སེལ་སླད། རང་ཉིད་མི་སྒེར་གྱི་ཟིན་བྲིས་དང་། ངོ་དེབ་སོགས་བཟོས་ཏེ་རང་ཉིད་སྐོར་ཁྱབ་བསྒྲགས་ཀྱི་ཐབས་ལམ་བརྒྱུད་དཀའ་ངལ་དེ་ལས་གྲོལ་བའི་ལོ་རྒྱུས་ཡོད།

 དེ་བཞིན་ཨ་རིའི་གྲོང་ཁྱེར་ནིའུ་ཡོག་ནང་རྟེན་གཞི་བྱས་པའི་སྒྲ་འཇུག་ཁང་ཞིག་གི་མིང་བྱང་ལ་ཌེ་ཨེ་ཧྥུ་ཨེ (DFA Records) ཞེས་འབོད་པ་དང་། རྗེས་སོར་ཁེ་ན་ཌའི་ཌོ་རན་ཌོར་གླུ་གར་ཚོགས་པ་ཞིག་གི་མིང་ལའང་ཌེ་ཨེ་ཧྥུ་ཨེ (‘DeathFromAbove’) ཞེས་བཏགས་སྟབས། ཁྲིམས་ཐོག་ནས་ཁེ་ན་ཌའི་གླུ་གར་ཚོགས་པའི་མིང་གི་མཇུག་ཏུ་ཁྱད་ཚིག་ཅིག་སྦྱོར་རྒྱུ་ཐག་བཅད། ཁྱད་ཚིག་དེ་ ༡༩༧༩  ཞེས་པའི་ལོ་ཚིགས་ཤིག་ཡིན་ཞིང་། དེ་ནི་གླུ་གར་ཚོགས་པ་དེའི་ནང་གི་མི་ཞིག་གིས་ལག་པར་བྲིས་ཡོད་པས་ཡིན། རྗེས་སོར་ཁེ་ན་ཌའི་གླུ་གར་ཚོགས་པ་དེའི་མིང་ཌེ་ཨེ་ཧྥུ་ཨེ་ ༡༩༧༩ (‘DeathFromAbove’1979) འདི་ལྟར་གྱུར་པ་རེད།  ཕྱོགས་མཚུངས་ཨ་རིའི་གཞས་ཚོགས་ཤིག་གི་མིང་ལ་ལའེ་བྷིར་ཁྲའེ་ (Liberty) ཞེས་འབོད་པ་དང་། མིང་དེ་ནི་ཨ་རིའི་ The R&B འོག་གི་ལོ་རབས་དགུ་བཅུའི་ནང་སྙན་གྲགས་ཡོད་པའི་གཞས་ཚོགས་ལའེ་བྷིར་ཁྲའེ་ (Liberty) ཞེས་པའི་མིང་དང་གཅིག་མཚུངས་ཡིན་སྟབས། ཁྲིམས་ཐོག་ནས་ The R&B འོག་ཏུ་མེད་པའི་གཞས་ཚོགས་ལའེ་བྷིར་ཁྲའེ་ (Liberty) ནས། མིང་གི་མཇུག་ཏུ་ཁྱད་ཚིག་ལའེ་བྷིར་ཁྲའེ་ཨེ་ཁི་སི (LibertyX) ཞེས་ “X” ཡིག་ཆེན་འདི་འདྲ་ཞིག་འབྲི་དགོས་གྱུར་ཡོད། དེ་ལྟར་དབྱིན་ལེན་ཌིའི་གཞས་ཚོགས་ཤིག་གི་མིང་ལ་སའོ་ཌེ (Suede) ཞེས་ཟེར་གྱི་ཡོད་ཀྱང་། ཨ་རི་ནས་དེ་ལྟར་མི་ཟེར་བར་ཚོགས་པ་འདིའི་མིང་ལ་གྷི་ལོན་ཊོན་སའོ་ཌེ (The London Suede) ཞེས་ཁྱད་ཚིག་ཅིག་སྦྱར་ནས་འབོད་ཀྱི་ཡོད། དེ་ལྟར་འབོད་དགོས་དོན་ནི་ཨ་རིའི་གཞས་པ་སའོ་ཌེ་ (Suede) ཞེས་པ་དང་གོ་ནོར་མི་ཡོང་ཁྱད་ཡིན། འདི་ནས་ང་ཚོས་ལེགས་ཆ་ལེན་རྒྱུ་ཞིག་ལ། གོང་གསལ་ཐག་གཅོད་འདི་དག་གི་ཐུན་མོང་བདེན་ལུགས་ཀྱི་གཞི་འཛིན་ས་གཅིག་ནི། མིང་འདོགས་ལུགས་ཀྱི་གོ་རིམ་སྟེང་ནས་བྱ་བའི་ལས་སུ་ཞུགས་སྔ་ཤོས་ལ་ཚད་བཟུང་བྱས་ཡོད་པ་དེ་རེད།

རང་རེའི་སྤྱི་ཚོགས་ཁོར་ཡུག་ཆུང་ཆུང་འདིར་མཚོན་ནའང་། དྲ་རྒྱའི་བརྒྱུད་ལམ་ཡར་རྒྱས་སུ་ཕྱིན་པ་དང་བསྡོངས་ནས་མངོན་པ་མི་གསལ་བའི་དཀའ་ངལ་གཞན་ཞིག་ཡོད་པ་ནི། སྐྱེས་མིང་འདྲ་བོ་ཡིན་པའི་རྩོམ་འབྲི་བའི་དངོས་མིང་འཁྲུལ་གཞི་ཅན་དག་རེད། དཔེར་ན། སྔོན་ཆད་ལོ་རབས་དགུ་བཅུའི་ནང་བཙན་བྱོལ་རྒྱ་གར་དུ་རྩོམ་འབྲི་བ་འཇིགས་མེད་བློ་གྲོས་ཞེས་པ་ཞིག་བྱུང་ཞིང་། སྐུ་ཞབས་ཁོང་ད་ལྟ་ཨ་རིར་བཞུགས་ཡོད་ནའང་། ད་དུང་རྩོམ་འབྲིའི་ལས་ལ་འཇུག་བཞིན་པ་དང་། རྩོམ་རིག་གི་བྱ་དགའ་ཡང་ཐོབ་མྱོང་མཁན་ཞིག་ཡིན། ལོ་ཤས་གོང་ནས་བཙན་བྱོལ་རྒྱ་གར་དུ་བསྐྱར་དུ་འཇིགས་མེད་བློ་གྲོས་ཞེས་པའི་མིང་གཅིག་མཚུངས་ཅན་ཞིག་གིས་རྩོམ་ཡིག་རེ་གཉིས་བྱུང་སྟབས། ཁོ་གཉིས་བར་འཁྲུལ་གཞིར་གྱུར་ཅིང་འཁྲུལ་བ་དེ་སེལ་སླད། ཕན་ཚུན་བར་གསལ་བཤད་ཀྱིས་མཐའ་དོན་འཇིགས་མེད་བློ་གྲོས་ཕྱི་མས་རིག་སློབ་འཇིགས་མེད་བློ་གྲོས་ཞེས་ཁྱད་མིང་ཞིག་སྦྱོར་རྒྱུའི་ཁས་ལེན་ཞུས་པ་ལྟ་བུ་རེད།

མ་གཞི་སྐྱེ་བོ་གང་ཞིག་ཨ་མའི་མངའ་ཁ་ནས་འཇིག་རྟེན་དུ་ཐོག་མར་སྦྲུམ་དུས་སོ་སོར་སྐྱེས་མིང་རེ་བཏགས་ཡོད་པ་ཤོད་ཅི་ལ་དགོས། དེ་ནི་རང་ཉིད་ལ་བདག་ཅིང་རང་ཉིད་ངོས་འཛིན་བྱེད་གཅིག་པུ་དེའང་རེད། འོན་ཀྱང་། མི་རིགས་གང་ཞིག་གི་སྤྱི་ཚོགས་ནང་སྙུག་འཛིན་པའི་སྡེ་ནི། སྤྱི་ཚོགས་དེ་ལས་བསམ་བློ་གྲལ་རིམ་ཅུང་མཐོན་པོའི་གྲས་ཡིན་ཞིང་། རང་གི་ཁོར་ཡུག་ན་རང་ཉིད་ཀྱི་སྔོན་དུ་རང་ཉིད་དང་སྐྱེས་མིང་འདྲ་བའི་རྩོམ་འབྲི་བ་རེ་བྱུང་ཡོད་ཚེ། ཀློག་པ་པོ་རྣམས་གང་ཟག་གཅིག་ཤོས་གཅིག་ལ་གོ་ནོར་མི་ཐེབས་ཆེད། རྩོམ་འབྲི་བ་ཕྱི་མས་རང་གི་དངོས་མིང་ཐོག་ཁྱད་འབྱེད་ཀྱི་ཚིག་ཅིག་སྦྱོར་དགོས་པ་དེ་ཡང་། ང་ཚོར་ཁྲིམས་ལུགས་ཀྱི་གཞི་འཛིན་ས་མེད་ཀྱང་ཀུན་སྤྱོད་ཀྱིས་བསླབས་པའི་འགན་འཁྲི་ཞིག་ཅི་ལ་མིན།

 ལར་ནས་དེང་གི་ན་གཞོན་ཤེས་ཡོན་པ་ཕལ་ཆེ་བས་རྩོམ་ཡིག་འབྲི་བ་ནི། མི་རིགས་ཀྱི་འགན་འཁྲི་གླེང་བར་ཁེ་འཆེས། དེ་ནི་ཤིན་ཏུ་ནས་དགའ་འོས་པའི་གནད་དོན་ཞིག་ལགས་ནའང་། ང་ཚོས་དེ་སྔོན་དུ་རང་ཉིད་ཀྱི་རྩོམ་བྱང་དང་། སྙུག་མིང་། དངོས་མིང་སོགས་ཀྱིས་རང་སྡེ་གཅིག་པ་དག་ལ་བརྡབ་གསིག་མི་འགྲོ་བར་ཅིས་ཀྱང་འགན་ཐེག་དགོས། དེ་ལྟར་མི་ཐུབ་པའི་སྙུག་ཐོགས་པ་ཞིག་ཡིན་ཚེ་དེའི་རྩོམ་ཡིག་གི་འགན་འཁྲིའི་རང་བཞིན་ཡང་དུ་བའི་རྟགས་ཀྱིས་མེ་བཞིན་མ་གྱུར་གྲང་། དེས་ན་རང་རེའི་སྤྱི་ཚོགས་འདིའི་རྩོམ་པ་པོའི་སྡེ་རུ་ཡང་མིང་གཅིག་པའི་འཁྲུལ་གཞི་དེ་སྔ་སོར་བྱུང་བ་དང་ཕྱིས་འབྱུང་མི་སྲིད་པ་ཞིག་མིན་སྟབས། ཆུ་མ་འོང་གོང་གི་རགས་དང་། དགྲ་མ་འོང་གོང་གི་དོགས་ཀྱི་དཔེ་ལྟར། དཀའ་རྙོག་དེ་རིགས་ཇི་ལྟར་སེལ་བའི་ཐབས་ལམ་བཟང་ཤོས་ནི།   གཞན་དཔེ་རྗེས་འགེབས་ཏེ་ནུབ་ཕྱོགས་སྤྱི་ཚོགས་ལྟར་ཁྱད་ཚིག་ཅིག་སྦྱོར་བ་དེ་འོས་འཚམས་སུ་མངོན་ནའང་། ཁྱད་ཚིག་སུས་སྦྱོར་ཐད་གོང་གསལ་བཞིན་རང་མིང་སྟེང་རྩོམ་འབྲིའི་ལས་ལ་འཇུག་རིམ་གྱི་དབང་དུ་བྱས་ན་ལེགས། འོན་ཀྱང་དགོས་དབང་གིས་དེ་གོ་ལྡོག་བྱེད་མི་ཆོག་པ་ཡང་མེད་པར་འདོད།