ཧྥེ་ལེ་པིན་གྱིས་མོ་རོ་ཁ་ཆེ་གྲངས་ཉུང་མི་རིགས་ལ་རང་སྐྱོང་སྤྲད་འདུག

གཟའ་ཟླ་བའི་ཉིན་ཧྥེ་ལེ་པིན་གཞུང་དང་ཁ་ཆེ་ཤོག་ཁག་པར་ཞི་འགྲིག་གྲོས་མཐུན་ཐོག་ཁ་ཆེ་གྲངས་ཉུང་མི་རིགས་ལ་རང་སྲིད་རང་སྐྱོང་གི་བདག་དབང་སྤྲད་དེ། འདས་པའི་ལོ་ ༤༠ ལྷག་རིང་གི་འཁྲུག་རྩོད་མཇུག་སྒྲིལ་འདུག

ཟླ་འདིའི་ཕྱི་ཚེས་ ༡༥ ཉིན་ཧྥེ་ལེ་པིན་གྱི་རྒྱལ་ས་མཱ་ནེ་ལཱའི་མཱ་ལཱ་ཁཱ་ནིང་(Malacanang Presidential Palace)ཞེས་པའི་སྲིད་འཛིན་ཕོ་བྲང་ནང་། ཧྥེ་ལེ་པིན་གྱི་སྲིད་འཛིན་དང་མོ་རོ་ཁ་ཆེ་བཅིང་གྲོལ་གདོང་མཆོང་ཤོག་ཁག་(Moro Islamic Liberation Front) གི་ཚོགས་གཙོ་གཉིས་ཆེད་བཅར་ཐོག བར་འདུམ་གཟི་དཔང་པ་མཱ་ལཱ་ཤེ་ཡའི་སྲིད་བློན་རཱ་ཛཱ་ཀི་(Najib Razak) བྱས་ཏེ།  ཕྱོགས་གཉིས་ཀྱི་དཔོན་རིགས་དང་དྲག་ཆས་དམག་མི་ལྷན་འཛོམས་ཀྱི་མདུན་སར། ཧྥེ་ལེ་པིན་གཞུང་གི་གྲོས་མོལ་སྐུ་ཚབ་ལེའོ་ནེན་(Marvic Leonen) དང་ཁ་ཆེ་ཤོག་ཁག་གི་སྐུ་ཚབ་ཨེག་བྷལ་(Mohagher Iqbal) གཉིས་ཀྱིས། ཧྥེ་ལེ་པིན་གཞུང་དང་ཁ་ཆེ་ཤོག་ཁག་བར་གྱི་ཞི་འགྲིག་གྲོས་མཐུན་སྟེང་མཚན་རྟགས་བཀོད་ཡོད་འདུག

སྐུ་ཚབ་གཉིས་ཀྱིས་མཚན་རྟགས་བཀོད་པའི་གྲོས་མཐུན་ཆིངས་ཡིག་ཤོག་གྲངས་ ༡༣ ཅན་གྱི་ནང་། རང་སྐྱོང་ས་ཁུལ་དེར་བྷང་སཱ་མོ་རོ་(Bangsamoro) ཞེས་པའི་མིང་ཐོག་ནས་ནང་ཁུལ་གྱི་ཆབ་སྲིད་དང་དཔྱ་ཁྲལ། ས་ཁོངས་བདག་དབང་ཆ་ཚང་རང་སྐྱོང་ཁུལ་སྲིད་གཞུང་ལ་ཡོད་པ།རང་སྐྱོང་ས་ཁུལ་དེར་ཡོད་པའི་ཧྥེ་ལེ་པིན་གཞུང་གི་དམག་དཔུང་རིམ་བཞིན་ཕྱིར་འཐེན་ཐོག དེ་སྔའི་ཁ་ཆེ་ཤོག་ཁག་གི་འཇབ་དམག་རྣམས་ཀྱིས་རང་སྐྱོང་ས་ཁུལ་གྱི་བདེ་སྲུང་གི་འགན་འཁུར་རྒྱུ།  ཁ་ཆེ་ཤོག་ཁག་གི་འཇབ་དམག་ཁྲི་གཅིག་ལྷག་ཡོད་པ་རྣམས་ཕྱིར་བསྡུ་བྱ་རྒྱུ། འཐུས་མི་ ༡༥ ལས་གྲུབ་པའི་དམིགས་བསལ་ཚོགས་ཆུང་ཞིག་གསར་འཛུགས་ཀྱིས་ཁ་ཆེ་རང་སྐྱོང་སྲིད་གཞུང་གི་ཁྲིམས་སྒྲིག་ཟིན་བྲིས་གཏན་འབེབ་བྱ་རྒྱུ། ས་གནས་རང་སྐྱོང་སྲིད་གཞུང་བཙུགས་རྗེས་ཁ་ཆེ་གྲངས་ཉུང་མི་རིགས་ཀྱི་དགོས་མཁོ་དང་མངོན་འདོད་ལྟར་འཛིན་སྐྱོང་བྱ་རྒྱུ། ཕྱི་འབྲེལ་སྲིད་ཇུས་དང་དཔལ་འབྱོར་སྲིད་ཇུས།རྒྱལ་སྲུང་བདེ་འཇགས་བཅས་ཧྥེ་ལེ་པིན་གཞུང་གི་སྟངས་འཛིན་འོག་གནས་རྒྱུ་སོགས་གསལ་ཡོད་འདུག

གྲོས་མཐུན་ལ་མཚན་རྟགས་བཀོད་རྗེས་མཱ་ལཱ་ཤེ་ཡའི་སྲིད་བློན་རཱ་ཛཱ་ཀི་ཡིས་ཧྥེ་ལེ་པིན་གཞུང་དང་ཁ་ཆེ་ཤོག་ཁག་པར་ཞི་འགྲིག་གྲོས་མཐུན་བྱུང་ཐུབ་པ་དེས་ལོ་བཅུ་ཕྲག་འགའི་རིང་གི་དམར་གསོད་ཁྲག་སྦྱོར་གྱི་འཁྲུག་རྩོད་མཇུག་སྒྲིལ་ཡོད་པ་དང་། ཁ་ཆེ་གྲངས་ཉུང་མི་རིགས་ཚོར་སོ་སོའི་ཐོབ་ཐང་ལ་སྲུང་སྐྱོབ་ཀྱི་དབང་ཆ་རག་ཡོད་པ་མ་ཟད། ཧྥེ་ལེ་པིན་གཞུང་ལའང་སོ་སོའི་རྒྱལ་ཁོངས་ཁ་བྲལ་འགྲོ་མ་དགོས་པ་བཅས་ཀྱི་ཁེ་དབང་ཡོད་པ་བརྗོད་ཡོད་ལ།ཡང་ཁོང་གིས་གྲོས་མཐུན་ཆིངས་ཡིག་གིས་དཀའ་ངལ་ཚང་མ་སེལ་ཡོད་པ་ཞིག་མིན་པར། ཞི་བདེ་ལྷིང་འཇགས་ཡོང་རྒྱུར་རྨང་གཞི་འདིའི་སྟེང་ནས་ཕྱོགས་གཉིས་ཀྱིས་མུ་མཐུད་ཤུགས་གནོན་རྒྱག་དགོས་སྐོར་བརྗོད་འདུག

གཞན་ཧྥེ་ལེ་པིན་གྱི་སྲིད་འཛིན་ཨ་ཁུའེ་ནོ་(Benigno Aquino III) ཡིས་ད་དུང་བྱ་དགོས་པ་མང་པོ་ཞིག་ལྷག་ཡོད་པ་དང་། དཀའ་ངལ་དངོས་ནི་ལས་དོན་ལག་བསྟར་ཁྲོད་ཡོད་ཚུལ་དང་། ཁོང་གི་སྲིད་གཞུང་ལ་ཁ་ཆེ་གྲངས་ཉུང་མི་རིགས་ཀྱི་གནད་དོན་དེ་སེལ་རྒྱུའི་ལངས་ཕྱོགས་བརྟན་པོ་ཡོད་སྐོར་བརྗོད་འདུག་ལ། ཕྱི་ཚེས་ ༧ ཉིན་ཁོང་གིས་ཕྱོགས་གཉིས་བར་ཞི་འགྲིག་ཡོང་ཐུབ་ཡོད་པའི་གསལ་བསྒྲགས་ཀྱང་སྤེལ་ཡོད་པ་རེད། གཞན་སྐུ་ཚབ་ལེའོ་ནེན་གྱིས་ཀྱང་ཟླ་རྗེས་མ་ནས་ཞི་འགྲིག་ལས་དོན་མགོ་འཛུགས་བྱ་རྒྱུ་དང་། ཕྱོགས་གཉིས་ཀྱིས་ས་གནས་རང་སྐྱོང་བཅའ་ཁྲིམས་ཟིན་བྲིས་ལོ་འདིའི་ནང་ཚར་རྒྱུའི་དམིགས་ཡུལ་ཡོད་སྐོར་བརྗོད་འདུག

མོ་རོ་ཁ་ཆེ་བཅིང་གྲོལ་གདོང་མཆོང་ཤོག་ཁག་གི་ཚོགས་གཙོ་ཨེ་བྷི་རཱ་ཧེམ (Al Haj Murad Ebrahim) གྱིས། འདས་པའི་ལོ་ ༡༦ ཙམ་གྱི་རིང་གི་དཀའ་ཚགས་ཆེ་བའི་ཞི་འགྲིག་གྲོས་མོལ་བརྒྱུད་ནས།ད་གཟོད་ཁོ་ཚོའི་དྲག་ཆས་འཇབ་དམག་ལ་རང་དབང་དང་། ཁོ་ཚོ་ཁ་ཆེ་གྲངས་ཉུང་མི་རིགས་ལ་སོ་སོའི་མི་རིགས་དང་ས་ཁོངས་བདག་དབང་། སོ་སོའི་ངོ་བོ་སྲུང་སྐྱོབ་ཀྱི་དབང་ཚད་རག་ཡོད་པ་མ་ཟད། གྲངས་ཉུང་མི་རིགས་འདིའི་མ་འོངས་པ་སོ་སོ་རང་གི་ལག་ཏུ་ཡོད་སྐོར་བརྗོད་འདུག

དེ་བཞིན། ཁ་ཆེ་ཤོག་ཁག་གི་འཇབ་དམག་སྤྱི་ཁྱབ་དམག་དཔོན་གཞོན་པ་ཌ་ཝའོ་(Sonny Davao) ཡིས། ད་ཆར་འཇབ་དམག་གི་དམག་དཔོན་རྣམས་ཀྱིས་དྲག་མཚོན་བཞག་སྟེ་ས་གནས་རང་སྐྱོང་གཞུང་གསར་འཛུགས་བྱ་རྒྱུར་མཉམ་ཞུགས་ཀྱིས་ལས་དོན་བསྒྲུབ་རྒྱུར་གྲ་སྒྲིག་ཡོད་སྐོར་བརྗོད་འདུག

མོ་རོ་ཁ་ཆེ་བཅིང་གྲོལ་གདོང་མཆོང་ཤོག་ཁག་གམ་འཇབ་དམག་སྒྲིག་འཛུགས་ནི། ༡༩༦༠ ནང་ཧྥེ་ལེ་པིན་གྱི་ལྷོ་ཕྱོགས་མེན་ཌ་ནཱའོ་(Mindanao) ས་ཁུལ་གྱི་ཁ་ཆེ་བ་ཚོས་ས་གནས་རང་སྐྱོང་རྩོད་ལེན་བྱས་སྐབས། ཧྥེ་ལེ་པིན་གཞུང་གིས་དྲག་གནོན་གྱིས་ཇ་བྷེ་ཌ་དམར་གསོད་ཆེན་མོ་(Jabdah massacre) བྱུང་རྗེས་གསར་འཛུགས་བྱས་པ་ཞིག་ཡིན་ལ།  ས་གནས་དེའི་ཁ་ཆེ་བ་ཚོས་ཁོང་ཚོའི་རིག་གཞུང་དང་ངོ་བོ་སོགས་ཧྥེ་ལེ་པིན་དང་ཐ་དད་ཡིན་པ་མ་ཟད། ལོ་རྒྱུས་ཐོག་ཁོ་ཚོ་རང་དབང་གི་རྒྱལ་ཁབ་ཅིག་ཡིན་པ་རྩོད་ཀྱིན་ཡོད་པ་དང་། འདས་པའི་འཐབ་རྩོད་ཁྲོད་ཁོ་ཚོས་ཁ་ཆེ་དྲག་སྤྱོད་ཤོག་ཁག་གཞན་དག་དང་མཉམ་འབྲེལ་ཀྱང་བྱས་ཡོད་འདུག འདས་པའི་ལོ་ ༤༠ ལྷག་གི་འཁྲུག་རྩོད་ཁྲོད་མི་ ༡༥༠༠༠༠ ཙམ་རྐྱེན་ལམ་དུ་ཤོར་ཡོད་འདུག

གསར་འགོད་པ། བནྡེ་སྐྱབས།