བསང་ཆུ་རྫོང་དུ་ཡང་བསྐྱར་རང་ལུས་མེར་བསྲེགས།

དེ་རིང་ཉིན་རྒྱབ་བོད་ནང་གི་ཆུ་ཚོད་ ༤ ་ཙམ་ལ། མདོ་སྨད་བླ་བྲང་ཟ་ཡུས་ནང་གི་རང་ལོ་ ༥༧ ཡིན་པའི་རྡོ་རྗེ་རིན་ཆེན་ལགས་ཀྱིས། ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་དྲག་ཆས་ཉེན་རྟོག་ཁང་གི་སྒོ་འགྲམ་སྲང་ལམ་དུ་རང་ལུས་མེར་བསྲེགས་བཏང་སྟེ། རྒྱ་གཞུང་གི་དྲག་གནོན་དབང་སྒྱུར་གྱི་སྲིད་ཇུས་ལ་ངོ་རྒོལ་གནང་ཡོད་འདུག

འདི་གར་གནས་ཚུལ་མཁོ་སྤྲོད་པས་བརྗོད་པ་ལྟར་ན། རྡོ་རྗེ་རིན་ཆེན་ལགས་ཀྱིས་བསང་ཆུ་རྫོང་འོད་ལྡན་ཚོང་རའི་ཉེ་འདབས་དྲག་ཆས་ཉེན་རྟོག་ཁང་གི་སྒོ་འགྲམ་སྲང་ལམ་དུ་རང་ལུས་མེར་བསྲེགས་བཏང་སྟེ་སྐུ་གྲོངས་ཡོད་འདུག  ས་གནས་མི་མང་གིས་ཁོང་གི་སྐུ་ཕུང་ཕྱིར་སྡེ་བའི་ནང་གདན་འདྲེན་ཞུ་སྐབས་རྒྱ་གཞུང་ཉེན་རྟོག་བཙན་འཕྲོག་བྱ་རྩིས་བྱས་པར་བརྟེན། མི་མང་དང་ཉེན་རྟོག་པའི་བར་འཁྲུག་རྩོད་ཤོར་ཡོད་ཀྱང་།  མཐའ་མར་རྒྱ་གཞུང་གི་ལག་ཏུ་ཤོར་མ་བཅུག་པར་ཕྱིར་སྡེ་བའི་ནང་སྐུ་ཕུང་གདན་འདྲེན་ཞུས་ཡོད་འདུག

སྐུ་གཤེགས་དཔའ་བོ་རྡོ་རྗེ་རིན་ཆེན་ལགས་ཀྱི་སྐྱེས་ཡུལ་ཟ་ཡུས་སྡེ་བ་གོང་མ་ཡིན་པ་དང་། ཁོང་གི་བཟའ་ཟླའི་མིང་ལ་ཀླུ་ཐར་འཚོ་ཟེར་ལ། ཁོང་ལ་བུ་བུ་མོ་གཉིས་ཡོད་པ་ལས། བུའི་མིང་ལ་རྟ་བྷོའུ་དང་། བུ་མོའི་མིང་ལ་རིག་འཛིན་འཚོ་ཟེར་བ་དང་། ཁོང་ཚང་ལ་སྡོམ་པའི་བཟའ་མི་བརྒྱད་ལས་གྲུབ་པའི་མི་ཚང་ཞིག་ཡིན་འདུག 

འདས་པོ་ཁོང་ད་ནངས་ཞོགས་པ་སྔ་མོ་ནས་ཡར་ལངས་ཏེ་དང་ཐོག་བླ་བྲང་དགོན་པར་སོང་ནས་མཆོད་མཇལ་དང་སྐོར་བ་གང་ཐུབ་ཅིག་སོང་རྗེས། དགོན་པ་དང་རང་ཁྱིམ་བར་ཕར་འགྲོ་ཚུལ་འོང་ཐེངས་གསུམ་བྱས་ཏེ། མཐའ་མར་དེར་རང་ཁྱིམ་གྱི་ཕྱི་ནང་གང་སར་གཙང་སྦྲ་ཧ་ལས་པའི་ལེགས་པོ་ཞིག་བྱས་ནས་ཡར་རྒྱ་སྲང་གི་ཉེན་རྟོག་སྒོ་འགྲམ་དུ་སོང་སྟེ་རང་བསྲེགས་ཀྱིས་སྐུ་གྲོངས་ཡོད་འདུག 

གཞན་ཡང་། བླ་བྲང་དགོན་པའི་དགེ་འདུན་པ་རྣམས་དཔའ་བོ་ཁོང་མེར་བསྲེགས་གཏོང་ས་དེར་སྨོན་ལམ་གསུངས་ཏུ་བསྐྱོད་སྐབས།  རྒྱ་གཞུང་ཉེན་རྟོག་པས་བླ་བྲང་དགོན་པ་ནས་བསང་རྫོང་ཐོག་ཏུ་བསྐྱོད་སའི་ལམ་བར་གྱི་ཟམ་ཁ་ནས་བཀག་འགོག་བྱས་པར་བརྟེན།  དགེ་འདུན་པ་རྣམས་ནས་ཟ་ཁ་དེ་ནས་སྨོན་ལམ་གསུངས་རྗེས་ཕྱིར་ལོག་ཡོད་འདུག

 ད་ལྟའི་ཆར་ས་གནས་བོད་མི་མང་པོ་ཞིག་ཟ་ཡུས་སྡེ་བའི་ཕྱོགས་སུ་བསྐྱོད་བཞིན་ཡོད་ཅིང་། རྒྱ་གཞུང་གིས་ཉེན་རྟོག་དམག་མི་འགྲེམས་འཇོག་གིས་སྲང་ལམ་ཁག་ཏུ་བཀག་སྡོམ་ནན་མོ་བྱེད་བཞིན་པ་མ་ཟད། ཁ་པར་དང་དྲ་རྒྱའི་བརྒྱུད་ལམ་ཆ་ཚང་བཀག་འགོག་བྱས་ཡོད་འདུག 

གསར་འགོད་པ། ཚེ་རིང་རྒྱལ