ལི་ཅིང་ལིང་གི་༼༡༩༥༩ ལོའི་ལྷ་ས༽ བཀླགས་པ།
ཀྲང་ཕེའོ་ཡིས་བརྩམས། དཔལ་ལྡནསྟོད་རྒྱུད་གྲྭ་ཚང་གི་བོད་དགེ་སྐལ་བཟང་ཚེ་བརྟན་གྱིས་བསྒྱུར།
གཅིག
གལ་སྲིད་དེབ་ཅིག་ཁྱོད་ཀྱིས་ལག་པར་ལེན་རྗེས་བློས་མི་ཐོངས་པ་དང་། ཁྱོད་ཀྱིས་གྲོགས་མཆེད་ཚོར་ངོ་སྤྲོད་བྱེད་འདོད་པ། ཡང་ན་ཁྱོད་ཀྱིས་ད་བར་ཨུ་ཚུགས་མཐའ་སྐྱེོལ་བྱས་པའི་ལྟ་ཚུལ་ལ་འགྱུར་བ་གཏོང་མཁན་དེ་ནི། དཔེ་དེབ་སྤྱིར་བཏང་བ་ཞིག་མིན་པ་ཐག་ཆོད་ཡིན།
༼ ༡༩༥༩ ལོའི་ལྷ་ས། ༽ ཞེས་པ་ནི་དེ་ལྟ་བུའི་དཔེ་དེབ་ཅིག་རེད།
གཉིས།
ལི་ཅང་ལིང་དང་ཐེངས་མང་བོད་ཀྱི་སྐོར་ལ་གྲོས་སྡུར་བྱས་པ་བརྒྱུད་ངའི་དྲན་པའི་མེ་ལོང་ནས་བརྗེད་མི་ཐུབ་པ་ནི། ཁོ་མོས་བཤད་པའི་སྐད་ཆ་སྟེ་ཕྱི་ལོ་ ༡༩༥༠ ལོའི་ཟླ་བ་དང་པོར་མའོ་ཙེ་ཏུང་གིས་ཀྲུང་དབྱང་ལ་བཏང་བའི་ཏར་འཕྲིན་ཞིག་གི་ནང་སྤྱིར་བཏང་བྱས་ན་བོད་དུ་མི་འབོར་མང་པོ་མེད། འོན་ཀྱང་། རྒྱལ་སྤྱིའི་སྟེང་གི་གནས་བབས་མཐོ་པོ་ཡོད་དེར་བརྟེན་ང་ཚོས་ངེས་པར་དུ་དབང་སྒྱུར་བྱེད་དགོས་ཞེས་བཤད་ཡོད། ངེས་པར་དུ་དབང་སྒྱུར་བྱེད་དགོས་ཞེས་པ་དེས་དོན་དངོས་ཐོག་མའོ་ཙེ་ཏུང་གིས་ ༡༩༤༩ ལོའི་སྔོན་བོད་དེ་རང་བཙན་གཙང་མའི་རྒྱལ་ཁབ་ཞིག་ཡིན་པ་ཤུགས་ཀྱིས་ཁས་ལེན་བྱས་ཡོད་པ་རེད།
ལོ་རྒྱུས་ནི་བུད་མེད་ལ་རྣམ་པ་བཏོད་པ་ལྟར་མིས་གང་བྱུང་དུ་བཟོ་ཆོག་པ་ཞིག་མ་ཡིན། གནའ་སྔ་མོ་ནས་བཟུང་བོད་དེ་ཀྲུང་གོའི་མངའ་ཁོངས་རེད་ཅེས་འུད་སྒྲོག་བྱེད་མཁན་དེ་ཚོས་མིག་ཆེ་ཙམ་གདངས་ནས་ལོ་རྒྱུས་ཀྱི་དཔེ་དེབ་མང་ཙམ་བལྟ་ཀློག་མི་བྱེད་པའི་རྒྱུ་མཚན་ཅི་ཡིན།
༡༢༠༧ ལོར་ཡོན་གོང་མ་ཀུབ་ལའི་ཁང་གིས་བོད་ལ་དབང་སྒྱུར་བྱས་ཤིང་ས་སྐྱའི་འགྲོ་མགོན་ཆོས་རྒྱལ་འཕཌ་པ་གོང་མའི་དབུ་བླར་བཀོད། དེ་ནས་ལོ་ངོ་བདུན་ཅུ་དོན་གཉིས་སོང་བའི་རྗེས་རྒྱ་ནག་ཁྱོན་ཡོངས་སོག་པོའི་དབང་འོག་ཏུ་ཚུད། སྐབས་དེར་རྒྱ་མི་རིགས་རྣམས་སོག་པོའི་མཐོང་ཆུང་དང་བརྙས་བཅོས་མྱོང་དགོས་ཀྱི་ཡོད། འོན་ཀྱང་རྒྱ་མི་རིགས་མང་པོ་ཞིག་གིས་དུས་ད་ལྟའང་རང་ཉིད་ཀྱི་མེས་པོ་ཚོས་རང་གི་རྒྱལ་ཁབ་སོག་པོའི་ལག་ཏུ་ཤོར་ཏེ་སོག་པོས་རྒྱ་མི་རིཌ་བྲན་དུ་བཀོལ་པའི་ཡ་ང་བའི་ལོ་རྒྱུས་དེ་དག་གཏིང་བརྗེད་དུ་བཏང་ནས་ད་དུང་བོད་དེ་ཡོན་རྒྱལ་རབས་ནས་བཟུང་ང་ཚོར་དབང་བ་རེད་ཅེས་རྒྱ་མི་རིགས་ཇིང་གེར་རྒྱལ་པོའི་མི་རྒྱུད་ཡིན་པ་ལྟ་བུ་བབ་ཅོལ་དུ་སྨྲ་བར་བྱེད་ཀྱི་ཡོད། གལ་སྲིད་རང་རྒྱལ་གཞན་ལག་ཏུ་ཤོར་བའི་སྔ་ཕྱིའི་བང་རིམ་དང་། སོག་པོའི་དབར་དམིགས་བསལ་གྱི་འབྲེལ་བ་གཞིར་བཞག་ན། བོད་མི་ཚོར་ཀྲུང་གོ་ནི་བོད་ཀྱི་ཆ་ཤས་ཤིག་རེད་ཅེས་ཤོད་ཆོག་པའི་རྒྱུ་མཚན་ཡང་དག་པ་ཞིག་ཡོད་པ་མ་རེད་དམ།
རྒྱ་ནག་དང་བོད་སོག་པོའི་དབང་སྒྱུར་འོག་ནས་ཐར་བའི་རྗེས། སྔ་མས་མིང་རྒྱལ་རབས་བཙུགས་པ་དང་། ཕྱི་མ་རྒྱལ་ཕྲན་མང་པོར་གྱུར་ཏེ་ཕན་ཚུན་དབར་འབྲེལ་བ་བྱུང་བ་ཉུང་ཉུང་ཡིན། སྤྱིར་ན་བོད་ཀྱི་ཆོས་ལུགས་ཀྱི་གྲུབ་མཐའ་ཁག་གི་བླ་སྤྲུལ་འགའ་རེས་ཀྲུང་གོར་འཚམས་འདྲིར་བསྐྱོད་དེ་ལོ་རྒྱུས་ཀྱི་ཡིག་ཚགས་ནང་རྒྱ་ནག་གོང་མས་བོད་ཀྱི་བླ་སྤྲུལ་ཚོར་ཆེ་བསྟོད་བྱས་ཚུལ་འཁོད་ཡོད་ཀྱང་། མིང་གོང་མས་བོད་ལ་དབང་སྒྱུར་བྱས་པའི་དཔང་རྟགས་ཁུངས་བཙན་གང་ཡང་མིག་སྟོན་བྱ་རྒྱུ་མེད། རྒྱལ་དབང་ལྔ་པ་ཆེན་པོ་དང་ཁོང་གི་ཁ་གཏད་གཙང་པ་རྒྱལ་པོས་རང་རང་གི་ཕོ་ཉ་མངགས་ཏེ་ལེ་དབར་སྟོང་གིས་ཆོད་པའི་མན་ཇུ་གོང་མར་མཇལ་འཕྲད་དུ་བཏང་ཡོད་པ་ལས་སུས་ཀྱང་རྒྱ་ནག་མིང་གོང་མ་མིག་ནང་དུ་བཞག་མེད།
གསུམ།
མན་ཇུ་གོང་མས་ཀྲུང་གོར་དབང་སྒྱུར་བྱེད་སྐབས། པེ་ཅིང་དུ་གནས་སྤོས་ནས་ལོ་གཅིག་ཙམ་ལས་མ་སོང་ཡང་གོང་མ་ཤུན་ཙིས་ཏཱ་ལའི་བླ་མ་སྐུ་ཕྲེང་ལྔ་པ་གདན་ཞུ་བྱས། ཤུན་ཙི་ཡི་ཡབ་ཐང་ཐེ་ཙུང་གིས་ཀྱང་ཕོ་ཉ་མངགས་ཏེ་ཏཱ་ལའི་བླ་མ་མཇལ་འཕྲད་བྱས། ལྷག་དོན་དུ་གོང་མ་ཤུན་ཙི་ཁོ་རང་སྐུ་ངོ་མས་མཐའ་མཚམས་བར་ཕེབས་བསུ་ཞུ་བར་བཅར་རྒྱུའི་གྲ་སྒྲིག་བྱས་ཡོད་ཀྱང་རྗེས་སུ་དམག་འཁྲུག་གིས་རྐྱེན་པས་མཚམས་འཇོག་བྱེད་དགོས་བྱུང་ཡོད།
ཏཱ་ལའི་བླ་མ་སྐུ་ཕྲེང་ལྔ་པས་གོང་མ་ཤུན་ཙི་མཇལ་འཕྲད་བྱས་པའི་སྐོར་ལ་རྒྱས་བཤད་བྱེད་དགོས་པ་ཞིག་ལ། ཏཱ་ལའི་བླ་མས་མན་ཇུ་གོང་མ་མཇལ་འཕྲད་དུ་བཅར་བ་དེས་བོད་དེ་རྒྱལ་ཁབ་ཞིག་ཏུ་མ་ཟད་ཏཱ་ལའི་བླ་མ་རང་ཉིད་བོད་རྒྱལ་ཁབ་ཀྱི་བླ་མ་མེད་པའི་དབུ་ཁྲིད་ཞིག་ཡིན་པ་གསལ་སྟོན་བྱས་ཡོད། འོན་ཀྱང་རྒྱ་ནག་གཞུང་གིས་ཏཱ་ལའི་བླ་མས་གོང་མ་ཤུན་ཙི་ཐུག་འཕྲད་བྱས་པ་དེ་བོད་པས་རྒྱ་ནག་ལ་མགོ་སྒུར་བ་གཞིར་བཞག་གི་ཐོག་ནས་གོང་མ་དང་མཇལ་འཕྲད་བྱས་པ་རེད་ཅེས་འུད་སྒྲོག་བྱས་དང་བྱེད་བཞིན་ཡོད། བཀའ་འདྲི་ཞུ་རྒྱུར། གནམ་འོག་ཏུ་རང་ཉིད་ལ་མགོ་སྒུར་མཁན་གྱི་མི་ཞིག་ལ་ལེ་དབང་སྟོང་ཕྲག་གི་སར་ཕེབས་བསུ་ཞུ་བར་བཅར་མཁན་གྱི་རྒྱལ་པོ་དེ་འདྲ་ཞིག་ཡོད་དམ།
ཏཱ་ལའི་བླ་མ་སྐུ་ཕྲེང་ལྔ་པས་ ༡༦༥༢ ལོར་སྐུ་འཁོར་སུམ་སྟོང་དང་བཅས་རྔམ་བརྗིད་ལྡན་པའི་ངང་ནས་ལྷ་ས་ནས་པེ་ཅིང་དུ་རྡོག་ཐོན་བྱས། གོང་མ་ཤུན་ཙིས་ཁོ་རང་གི་གཉེན་ཚན་ཞིག་ཕེབས་བསུ་ཞུ་བར་བཏང་། པེ་ཅིང་དང་ཉེ་བར་བཅར་སྐབས་ཕེབས་བསུ་ཞུ་མི་སྟོང་ཚོ་མང་པོས་ལག་ཏུ་གདུགས་དང་། རྒྱལ་མཚན། བ་དན་སོགས་བསྣམས་ཤིང་རྔ་རྡུང་སྦུབ་དཀྲོལ་གྱིས་ཏཱ་ལའི་བླ་མར་ཕེབས་བསུ་ཟབ་རྒྱས་ཞུས། གོང་མ་ཤུན་ཙིས་ལེ་དབར་ཉི་ཤུའི་སར་ཕེབས་བསུ་ཞུ་བར་བཅར་བ་མ་ཟད། ད་དུང་དངུལ་རྒྱ་མ་ཁྲི་དགུ་སྟོང་བཏང་སྟེ་ཏཱ་ལའི་བླ་མ་བཞུགས་གནས་ལྷ་ཡུལ་དང་འགྲན་ནུས་པའི་ཕོ་བྲང་ཞིག་གསར་རྒྱག་བྱས་པ་རེད།
ཏཱ་ལའི་བླ་མ་སྐུ་ཕྲེང་ལྔ་པས་ཕྱི་ལོ་ ༡༦༦༧ ལོར་སོག་པོ་ཚོ་ཁག་གི་སྐུ་ཚབ་གནང་སྟེ་སོག་པོ་དང་མན་ཇུའི་མཐའ་མཚམས་གཏན་འབེབ་གནང་། ཕྱི་ལོ་ ༡༦༧༣ ལོར་ཝུ་སན་ཀུའེ་ཡིས་མན་ཇུ་གོང་མར་ངོ་རྒོལ་བྱས་ཤིང་། གོང་མ་ཁང་ཤི་དང་མན་ཇུར་ངོ་རྒོལ་བྱེད་མཁན་ཝུ་སན་ཀུའེ་གཉིས་ཀས་ལྷ་སར་ཕོ་ཉ་མངགས་ཏེ། སོག་དམག་གི་རོགས་རམ་སྐྱབས་འཇུག་ཞུས་པས་ཏཱ་ལའི་བླ་མས་གལ་ཏེ་སོག་པོའི་རྟ་དམག་བཏང་བ་ཡིན་ན་ཁྱོད་ཚོ་ཕྱོགས་གཉིས་ཀར་ཁེ་ཕན་གང་ཡང་མེད་ཅེས་གསུངས་པ་དེས། ཏཱ་ལའི་བླ་མས་རྒྱལ་ཁབ་ཞིག་གི་བདག་པོའི་ནུས་པ་དང་སྤོབས་ཉམས་མངོན་ཡོད།
བོད་ཀྱི་ལོ་རྒྱུས་སྟེང་། ཏཱ་ལའི་བླ་མ་སྐུ་ཕྲེང་ལྔ་པ་ནི་ཕུལ་དུ་བྱུང་བའི་ཆོས་སྲིད་གཉིས་ཀྱི་དབུ་ཁྲིད་ཞིག་ཏུ་ངོས་འཛིན་བྱེད་ཀྱི་ཡོད། ཁོང་གིས་སོག་པོའི་རོགས་རམ་འོག་རང་ཉིད་ཀྱི་ཆབ་སྲིད་ཀྱི་དགྲ་ཁ་གཏད་གཙང་པ་སྡེ་སྲིད་གཏོར་ཕམ་བཏང་ཏེ་བོད་ཆོལ་ཁ་གསུམ་ལ་དབང་བསྒྱུར། ཕོ་བྲང་པོ་ཏཱ་ལ་རྒྱ་བསྐྱེད་གནང་། གོང་མ་ཤུན་ཙིས་ནུབ་ཕྱོགས་བདེ་ལྡན་ཞིང་གི་ཞི་བ་སངས་རྒྱས་ཞེས་པའི་མཚན་བསྟོད་རྒྱ་ཆེ་ཕུལ་བ་དེ་དོན་ལ་གནས་པ་ཞིག་རེད།
བཞི།
ཕྱི་ལོ་ ༡༧༠༥ ལོར་སོག་པོ་ལྷ་བཟང་གིས་བོད་ཀྱི་སྲིད་དབང་བཙན་འཕྲོག་བྱས་པ་དང་། ཏཱ་ལའི་བླ་མ་སྐུ་ཕྲེང་དྲུག་པ་དམར་གསོད་བཏང་སྟེ་རང་ཉིད་ཀྱི་བུ་ཕྲུག་ཏཱ་ལའི་བླ་མ་སྐུ་ཕྲེང་དྲུག་པར་ངོས་འཛིན་བྱས། མན་ཇུ་གོང་མ་ཁང་ཤི་ཡི་ལྷ་བཟང་ཁང་གི་ཕྱོགས་སུ་ལངས་ནས་ལྷ་སར་ཨམ་བན་བཏང་སྟེ། ལྷ་བཟང་ཁང་གི་དབང་སྒྱུར་སྲ་བརྟན་བཟོ་རྒྱུར་རོགས་རམ་བྱས་ཤིང་རྗེས་སུ་ཏཱ་ལའི་བླ་མའི་ཡང་སྲིད་རྗུན་མ་ཁས་ལེན་བྱས། ལྷ་བཟང་ཁང་གིས་མན་ཇུ་གོང་མར་འབུལ་བ་རྒྱ་ཆེ་ཕུལ་ཏེ་གོང་མར་དྲིན་ལན་འཇལ། ལྷ་བཟང་ཁང་བོད་པ་ཞིག་མིན་ནའང་ཁོ་པ་བོད་ཀྱི་དབང་སྒྱུར་བ་ཞིག་ཡིན་པའི་ཆ་ནས་མན་ཇུ་གོང་མར་འབུལ་བ་རྒྱ་ཆེ་ཕུལ་བས་བོད་ཀྱི་སྲིད་དོན་གནས་བབས་དེ་མན་ཇུའི་ཁོངས་གཏོགས་རྒྱལ་ཁབ་ལྟ་བུར་བསྒྱུར་ཡོད།
ཕྱི་ལོ་ ༡༧༡༧ ལོར་སོག་པོ་འཇུན་སྒར་གྱིས་ཏཱ་ལའི་བླ་མའི་མཚན་གནས་བསྐྱར་བཟོ་བྱ་རྒྱུ་ཡིན་ཚུལ་གྱིས་བོད་ལ་བཙན་འཛུལ་བྱས་ཏེ་རྒྱལ་པོ་ལྷ་བཟང་བསད་པ་མ་ཟད་ཏཱ་ལའི་བླ་མའི་ཡང་སྲིད་རྫུན་མ་བཙོན་བཅུག་བྱས་ཤིང་། བོད་མི་རྣམས་ལ་བསྲེགས་གསོད་འཕྲོག་གསུམ་བྱས། ཕྱི་ལོ་ ༡༧༢༠ ལོར་གོང་མ་ཁང་ཤི་ཡིས་གོ་སྐབས་དེ་དང་བསྟུན་ནས་དམག་དཔུང་བཏང་སྟེ་སོག་པོ་འཇུན་སྒར་བོད་ནས་མཐར་བསྐྲད། སྐབས་དེར་བོད་མི་རྣམས་ཀྱིས་གུས་བཀུར་ཚད་མེད་ཞུ་བའི་ཏཱ་ལའི་བླ་མ་སྐུ་ཕྲེང་བདུན་པ་དབུས་སུ་ཕེབས་མ་ཐུབ་པར་ཨ་མདོ་རྗེ་སྐུ་འབུམ་དུ་བཞུགས་ཡོད། གོང་མ་ཁང་ཤི་ཡིས་དམག་དཔུང་བཏང་སྟེ་ཏཱ་ལའི་བླ་མ་ལྷ་སར་གདན་འདྲེན་ཞུས། བོད་མི་རྣམས་ཀྱིས་མན་ཇུའི་དམག་དཔུང་སྲོག་སྐྱོབ་དྲིན་ཆེན་དུ་ངོས་འཛིན་གྱིས་གླུ་ལེན་གར་འཁྲབ་ཀྱི་ཐོག་ནས་དགའ་བསུ་ཟབ་རྒྱས་ཞུས། དུས་དེ་ནས་བཟུང་མན་ཇུ་གོང་མས་བོད་ནང་རྐང་པ་བརྟན་པོ་བཙུགས་ཐུབ་པ་བྱུང་ཡོད།
གོང་མ་གཡུང་ཀྲང་དང་ཇན་ལུང་གྱིས་བོད་ལ་དབང་སྒྱུར་བྱ་ཆེད་དམག་མི་ཐེངས་མང་བཏང་སྟེ་བོད་ཀྱི་ནང་འཁྲུག་གཞོལ་འཇག་བཏང་བ་མ་ཟད་གོར་ཁ་བཙན་འཛུལ་དམག་བོད་ནས་མཐར་བསྐྲད་པ་དང་། ད་དུང་བྱ་ཐབས་མང་པོ་སྤྱད་ཡོད་པ་དཔེར་ན་བོད་སྡོད་ཨམ་བན་བཞག་པ ། བོད་ཀྱི་ས་ཆ་བགོས་པ། ཏཱ་ལའི་བླ་མའི་ཆོས་སྲིད་ཀྱི་གོ་གནས་ལ་བསྐྱར་སྒྲིག་བྱས་པ་དང་། ད་དུང་བོད་དུ་ལས་མཇུག་ལེགས་བསྡུས་ཀྱི་སྲོལ་ཡིག་ཐེངས་གཉིས་ཁྱབ་བསྒྲགས་བྱས་ཤིང་། དེའི་ནང་ཏཱ་ལའི་བླ་མ་སོགས་སྤྲུལ་སྐུ་ཆེ་ཁག་གི་ཡང་སྲིད་ངོས་འཛིན་བྱེད་ཕྱོགས་ཐད་གསེར་བུམ་དཀྲུགས་འདོན་གྱིས་ངོས་འཛིན་བྱེད་དགོས་པ་བཤད་ཡོད།
ལྔ།
ཕྱི་ལོ་ ༡༧༨༢ ལོར་དབྱིན་ཇིའི་ཕྱི་སྲིད་བློན་ཆེན་ཐོར་ཝར་ན་བོད་དུ་སླེབས་ཤིང་ཁོ་པས་དབྱིན་ཇིའི་གོང་མར་ཕུལ་བའི་སྙན་ཞུའི་ནང་བོད་མི་ཚོས་དུས་རྒྱུན་དུ་བོད་དེ་མན་ཇུའི་མངའ་འོག་ཏུ་ཡོངས་སུ་ཚུད་ཡོད་པའི་ངོས་འཛིན་བྱེད་ཀྱི་མི་འདུག་ཅེས་བྲིས་ཡོད། རྒྱ་གུང་ཁྲན་གྱི་ལོ་རྒྱུས་འབྲི་མཁན་དེ་ཚོས་མན་ཇུ་གོང་མས་སོག་ཡུལ་དང་ཤར་ཏུ་ཀི་སི་ཐན་ལ་དབང་སྒྱུར་བྱས་པ་དེར་རྒྱུ་མཚན་མང་པོ་ཤོད་རྒྱུ་ཡོད་པ་དཔེར་ན། མཐའ་སྲུང་དམག་སྒར་ག་ཚོད་བཙུགས་ཡོད་མེད་དང་། གོང་འོག་གི་སྲིད་འཛིན་མ་ལག་འཐུས་ཚང་ཅི་ཡོད་། དཔོན་རིགས་སུ་དང་སུ་བཏང་སྟེ་ཡུལ་དེ་དག་ལ་དོ་དམ་བྱེད་ཚུལ་སོགས་རྒྱས་བཤད་བྱེད་ཀྱི་ཡོད་མོད། འོན་ཀྱང་བོད་སྐོར་ལ་དོན་མེད་སྟོང་བཤད་ཁོ་ན་བྱེད་ཀྱི་ཡོད། ཁོ་པ་ཚོར་ཁག་ཅི་ཡོད། སྤྱི་ཚོགས་ཀྱི་ལམ་ལུགས་ནི་བོད་པའི་རེད། སྲིད་གཞུང་ནི་བོད་པའི་རེད། དཔོན་རིགས་ནི་བོད་པ་རེད། དངུལ་ལོར་ནི་བོད་པའི་རེད། ཁྲལ་བསྡུ་མཁན་ནི་བོད་པ་རེད། མཐའ་མཚམས་སྲུང་མཁན་ནི་བོད་དམག་རེད། འགག་སྒོ་ནི་བོད་པའི་རེད། དེར་བརྟེན་མན་ཇུ་དང་སྒོར་རྡོག་གཅིག་གི་འབྲེལ་བ་མེད།
རྒྱ་ནག་གོང་མས་བོད་ལ་ཁ་ལོ་སྒྱུར་ཡག་གི་ཐབས་ཤེས་ཤིག་ནི་གསེར་བུམ་དཀྲུག་འདོན་གྱིས་ཏཱ་ལའི་བླ་མ་དང་པན་ཆེན་བླ་མའི་ཡང་སྲིད་ངོས་འཛིན་བྱེད་ཕྱོགས་ཐད་ཚོད་འཛིན་བྱ་རྒྱུ་དེ་ཡིན་ཞིང་། དེ་ནི་ཕྱི་རྫིག་ནང་སྟོང་གི་མིང་ཙམ་དུ་གྱུར་ཡོད། གསེར་བུམ་དཀྲུག་འདོན་ཐེངས་དང་པོ་དེ་ཕྱི་ལོ་ ༡༨༠༨ ལོར་ཏཱ་ལའི་བླ་མ་སྐུ་ཕྲེང་དགུ་པ་ངོས་འཛིན་བྱེད་སྐབས་འགོ་བཙུགས་བྱས་ཤིང་། འོན་ཀྱང་ཏཱ་ལའི་བླ་མ་སྐུ་ཕྲེང་བཅུ་གསུམ་པ་སོགས་བླ་སྤྲུལ་མང་ཆེ་བས་བོད་པ་རང་གིས་ངོས་འཛིན་བྱས་པ་ལས་གསེར་བུམ་དཀྲུག་འདོན་བྱས་མེད། གསེར་བུམ་དཀྲུག་འདོན་གྱིས་ངོས་འཛིན་བྱས་པ་དེ་ཚོ་ཡང་ཁྲལ་སེལ་སླ་བཅོས་ཙམ་ཡིན།
མན་ཇུ་གོང་མའི་སྐུ་ཚབ་བོད་ལ་དོ་དམ་བྱེད་མཁན་གྱི་ཨམ་བན་དེ་ཚོ་ཡང་དུས་སྐབས་མང་ཆེ་བར་མིང་སྟོང་ཙམ་ལས་དབང་ཆ་གང་ཡང་མེད། དབང་ཆ་ནི་བོད་གཞུང་དང་ཏཱ་ལའི་བླ་མའི་ཕྱག་ཏུ་ཡོད་པ་རེད། ཕྱི་རྒྱལ་གྱི་ཆོས་སྤེལ་མཁན་དེ་ཚོའི་ལྟ་ཚུལ་ལ་བོད་སྡོད་ཨམ་བན་ནི་གོང་མས་བཏང་བའི་བོད་མིའི་བྱ་སྤྱོད་ལ་ལྟ་སྐུལ་བྱེད་མཁན་གྱི་གཞུང་ཚབ་ཆེན་མོ་ཡིན། འོན་ཀྱང་དུས་རབས་བཅུ་དགུ་པའི་ལོ་མཇུག་ཏུ་སླེབས་སྐབས་ཨམ་བན་གྱི་ནུས་པ་དེ་ཙམ་ཡང་མེད་པར་གྱུར་ཡོད། རྒྱ་གཞུང་གིས་དབྱིན་ཇིའི་མིར་སྤྲད་པའི་ལྷ་སར་བསྐྱོད་ཆོག་པའི་ལག་ཁྱེར་ལ་བོད་པས་ཁས་ལེན་མ་བྱས་པ་དང་། དབྱིན་ཇི་དང་མན་ཇུས་བོད་ཀྱི་སྐོར་ལ་ཚོང་དོན་གྲོས་ཆོད་བཞག་པ་དེར་བོད་པས་ངོས་ལེན་མ་བྱས་པའི་རྐྱེན་གྱིས་ཤོག་སྟོང་ཞིག་ཏུ་གྱུར་ཡོད།
ཆིང་གོང་མའི་དུས་མཇུག་ཏུ་སླེབས་སྐབས་གོང་མས་བོད་དུ་མན་ཇུའི་དབང་ཤུགས་ཉམས་རྒུད་དུ་འགྲོ་བཞིན་པ་ཤེས་རྟོགས་བྱུང་སྟེ། ཕྱི་ལོ་ ༡༩༠༦ ནས་ ༡༩༡༠ ལོའི་བར་མན་ཇུའི་དམག་དཔུང་ཕོན་ཆེ་བོད་དུ་བཏང་མ་ཟད་ཏཱ་ལའི་བླ་མའི་གོ་གནས་མེད་པར་བཟོས་པ་དང་། དཔོན་རིགས་མང་པོ་ཞིག་བོད་དུ་བརྫངས་ནས་ཐ་ན་བོད་གཞུང་རྩིས་ལེན་བྱ་རྒྱུའི་ཧམ་སེམས་བཅངས། བོད་སྡོད་ཨམ་བན་ཀྲང་དབྱིང་ཐང་གིས་བཤད་པའི་སྐད་ཆ་ལུང་དྲངས་ན། བོད་དུ་ལེགས་སྒྲིག་བྱེད་པ་ལ་བོད་གཞུང་མེད་པར་བཟོ་དགོས་ཀྱི་འདུག བོད་གཞུང་མེད་པར་བཟོ་བ་ལ་དམག་དཔུང་བེད་སྤྱོད་མ་བྱས་ན་ཡོང་ཐབས་མི་འདུག་ཅེས་བཤད་ཡོད། འོན་ཀྱང་ཁོ་པའི་སྐད་ཆ་དེ་ཕྱི་དྲགས་པ་རེད།
གལ་སྲིད་རྒྱ་ནག་ཏུ་ལྕགས་ཕག་ལོའི་གསར་རྗེའི་ལངས་མེད་ན་མན་ཇུ་སྲིད་གཞུང་གིས་བོད་དེ་ཤར་ཏུ་ཀི་སི་ཐན་ལྟ་བུ་རྒྱ་ནག་གི་ཞིང་ཆེན་ཞིག་ཏུ་བསྒྱུར་ཐུབ་པའི་རེ་བ་ཡོད། ཕྱི་ལོ་ ༡༩༡༢ ལོར་མན་ཇུ་སྲིད་གཞུང་རྩ་མེད་དུ་སོང་བ་དེས་བོད་མི་ཚོར་ཡོངས་སུ་རང་བཙན་གཙང་མའི་ལམ་བུ་ཞིག་ཏུ་འགྲོ་རྒྱུར་ཆ་རྐྱེན་བསྐྲུན་ཡོད་པ་རེད།
དྲུག
ཕྱི་ལོ་ ༡༩༡༠ ལོར་རྒྱ་གར་དུ་ཡུལ་གྱར་དུ་བཞུགས་པའི་ཏཱ་ལའི་བླ་མ་སྐུ་ཕྲེང་བཅུ་གསུམ་པས་ཆིང་གོང་མར་ཕུལ་བའི་ཡི་གེའི་ནང་། མན་ཇུ་དང་བོད་ཀྱི་འབྲེལ་བ་ནི་མཆོད་ཡོན་གྱི་འབྲེལ་བ་ཞིག་ཏུ་ངོས་འཛིན་བྱས་ཤིང་། དེའང་མཆོད་གནས་བླ་མ་དང་སྐུ་ཡོན་སྦྱིན་བདག་བར་གྱི་འབྲེལ་བ་ཞིག་ཡིན། མཆོད་ཡོན་གྱི་འབྲེལ་བ་ནི་ཆོས་ལུགས་ཀྱི་ནང་དོན་ལྡན་པའི་མིང་ཚིག་ཞིག་ཡིན་པར་བརྟེན་དེས་རྒྱལ་ཁབ་དང་། བདག་དབང་། ཕྱི་འབྲེལ། ནང་སྲིད་སོགས་སྲིད་དོན་ཁྱབ་ཁོངས་ཀྱི་རྙོག་འཛིང་ཆེ་བའི་གནད་དོན་དེ་ཚོར་འགྲེལ་བཤད་རྒྱག་ཐབས་མེད། ནུབ་ཕྱོགས་རྒྱལ་ཁབ་ཀྱི་སྲིད་དོན་ཚིག་མཛོད་ལྟར་ན། རྒྱ་བོད་ཕྱོགས་གཉིས་ཀའི་འབྲེལ་བའི་ངོ་བོ་དང་ཕེལ་རིམ་ལ་གཞིགས་ན། མན་ཇུ་སྲིད་གཞུང་དང་བོད་དབར་གྱི་འབྲེལ་བ་ནི་མཆོད་ཡོན་གྱི་འབྲེལ་བ་ཞིག་ཏུ་རྦད་དེ་ངོས་འཛིན་བྱེད་ཆོག་པ་ཞིག་ཡིན་ཞིང་། དེའང་མན་ཇུ་ནི་སྦྱིན་བདག་རྒྱལ་ཁབ་དང་བོད་དེའི་ཁོངས་གཏོགས་རྒྱལ་ཁབ་ཡིན།
བདག་པོའི་རྒྱལ་ཁབ་ཐོར་ཞིག་ཏུ་སོང་བ་དང་། ཁོངས་གཏོགས་རྒྱལ་ཁབ་རང་བཙན་ཐོག་བསྐྱོད་ཡོད་ཅིང་བོད་ལ་རང་བཙན་རྒྱལ་ཁབ་ཞིག་ལ་ཚང་དགོས་པའི་ཆ་རྐྱེན་ཚང་ཡོད་པ་རེད། ཕྱི་ལོ་ ༡༩༡༣ ལོར་ཏཱ་ལའི་བླ་མ་སྐུ་ཕྲེང་བཅུ་གསུམ་པ་ལྷ་སར་ཕྱིར་ལོག་ཕེབས་ཏེ་གྲགས་ཅན་གྱི་ཆུ་གླང་རྩ་ཚིག་ཆེན་མོ་ཁྱབ་བསྒྲགས་གནང་ཞིང་། དེའི་ནང་བོད་དེ་རང་བཙན་གཙང་མའི་ནང་པའི་རྒྱལ་ཁབ་ཞིག་ཡིན་ཞེས་བཀོད་ཡོད། གོ་མིན་ཏང་སྲིད་གཞུང་གི་སྲིད་འཛིན་ཡོན་ཧྲི་ཁའེ་ཡིས་ཏཱ་ལའི་བླ་མའི་མཚན་གནས་བསྐྱར་བཟོ་བྱ་རྒྱུ་ཡིན་ཚུལ་བཤད་པས་ཏཱ་ལའི་བླ་མས་སྲིད་འཛིན་ཡོན་ཧྲི་ཁའི་ལ་ང་ལ་གོ་མིན་ཏང་གི་གོ་གནས་མི་དགོས། ང་ནི་བོད་རྒྱལ་ཁབ་ཀྱི་ཆོས་སྲིད་གཉིས་ཀྱི་དབུ་ཁྲིད་མཐོ་ཤོས་དེ་ཡིན་ཞེས་གསུངས་ཡོད།
ཏཱ་ལའི་བླ་མ་སྐུ་ཕྲེང་བཅུ་གསུམ་པས་ལོ་ངོ་ཉི་ཤུའི་སྲིད་སྐྱོང་བའི་དུས་ཡུན་རིང་ནང་ཁུལ་དུ་བཅོས་སྒྱུར་བྱས་ཤིང་། དེའང་སྦྲག་སྲིད་དང་གློག་ཁང་གསར་རྒྱག་བྱས་པ་མ་ཟད། སྨན་བཅོས་མཐུན་རྐྱེན་ཡར་རྒྱས་བཏང་བ་དང་། ཕྱི་ཕྱོགས་སུ་དོ་མཉམ་གྱི་ཕྱི་འབྲེལ་སྲིད་ཇུས་བཟུང་ཡོད་ཅིང་། ལྷག་དོན་དུ་དབྱིན་ཇི་དང་རྒྱ་ནག་གཉིས་ཀར་བསྟུན་གང་ཐུབ་བྱས་ཡོད། དུས་སྐབས་དེ་དག་གི་ནང་བོད་དུ་ཀྲུང་གོའི་གཞུང་ཚབ་ཀྱང་མེད་པ་རེད། ཏཱ་ལའི་བླ་མ་སྐུ་ཕྲེང་བཅུ་གསུམ་པ་དགོངས་པ་རྫོགས་པའི་རྗེས་གོ་མིན་སྲིད་གཞུང་གིས་དགོངས་རྫོགས་མཆོད་འབུལ་ལ་ཁ་གཡར་ཏེ་སྐུ་ཚབ་ཞིག་ལྷ་སར་བཏང་ནས། བོད་ཀྲུང་གོའི་མངའ་འོག་ཏུ་བསྡུ་རྒྱུར་ཐབས་ཤེས་རབ་དང་རིམ་པ་བྱས་ཀྱང་མཐའ་མ་གྲུབ་འབྲས་གང་ཡང་ཐོན་མེད། ཕྱི་ལོ་ ༡༩༤༠ ལོར་ཏཱ་ལའི་བླ་མ་སྐུ་ཕྲེང་བཅུ་བཞི་པ་གསེར་ཁྲིར་མངའ་གསོལ་ཞུ་སྐབས་གོ་མིན་སྲིད་གཞུང་གི་སྐུ་ཚབ་ཀྱང་སྐུ་མགྲོན་ཙམ་ཡིན། རྗེས་སུ་གོ་མིན་སྲིད་གཞུང་གི་དོན་གཅོད་ཁང་བོད་དུ་བཙུགས་ཐུབ་ཙམ་བྱུང་ཡོད་ཀྱང་དེར་དབང་ཆ་མེད་པ་མ་ཟད་བོད་ལ་ཤུགས་རྐྱེན་གང་ཡང་སྤྲོད་ཐུབ་ཀྱི་མེད། རྒྱ་ནག་ཏུ་ཡོད་པའི་ཨ་རིའི་དམག་དཔོན་གཉིས་ཀྱིས་བོད་དུ་རྟོགས་ཞིབ་ཏུ་བསྐྱོད་རྒྱུར་རྒྱ་གར་སྐོར་ཏེ་བོད་གཞུང་ལ་མཐོང་མཆན་ཞུ་དགོས་བྱུང་ཡོད་པ་དང་། ཅང་ཀི་ཤིས་བོད་བརྒྱུད་དེ་ཀྲུང་གོ་དང་རྒྱ་གར་དབར་ལམ་བུ་ཞིག་བསྐྲུན་རྩིས་བྱས་ཀྱང་བོད་པས་ཁས་ལེན་གཏན་ནས་བྱས་མེད། འོན་ཀྱང་གུང་ཁྲན་ཏང་གི་ཡིག་མཁན་དེ་ཚོས་གོ་མིན་ཏང་དང་བོད་གཞུང་དབར་གྱི་འབྲེལ་བ་ནི། ཀྲུང་དབྱང་དང་ས་གནས་སྲིད་གཞུང་དབར་གྱི་འབྲེལ་བ་རེད་ཅེས་རྒྱུན་ཆད་མེད་པར་སྐྱག་རྫུན་ཁོ་ན་བཤད་དེ། དོན་དམ་པའི་དཔང་འཕེར་གྱི་ལོ་རྒྱུས་ཡིག་ཆ་གང་ཡང་མིག་སྟོན་བྱ་རྒྱུ་མེད།
བདུན།
ཕྱི་ལོ་ ༡༩༡༣ ལོའི་ལོ་མགོར་ཏཱ་ལའི་བླ་མ་སྐུ་ཕྲེང་བཅུ་གསུམ་པའི་སྤྱི་ཁྱབ་མཁན་པོ་དང་ཕྱི་སོག་དབར་ཆིངས་ཡིག་བཞག་ནས། བོད་དང་སོག་པོ་གཉིས་མན་ཇུའི་དབང་འོག་ནས་ཐར་ཏེ་ཕན་ཚུན་ཕྱོགས་གཉིས་ཀ་རང་བཙན་གྱི་རྒྱལ་ཁབ་ཡིན་པ་གསལ་བསྒྲགས་བྱས།
དེ་རྗེས་ཀྱི་ལས་དབང་ནི་ཧ་ཅང་གི་མི་འདྲ་བ་ཞིག་རེད། སོག་པོར་རང་བཙན་ཐོབ་སྐབས་ཅང་ཀི་ཤི་ཁོང་ཁྲོ་ལངས་མེད་པ་དང་། མའོ་ཙེ་ཏུང་གིས་མི་འདོད་བཞིན་དུ་རྒྱབ་བསྐྱོར་བྱས་ཤིང་། འོན་ཀྱང་དོན་དངོས་ཐོག་རང་བཙན་ཐོབ་ཟིན་པའི་བོད་ལ་ཅང་ཀི་ཤིས་དྲག་པོའི་བཙན་འཛུལ་བྱ་རྒྱུ་ཡིན་ཚུལ་གྱི་འཇིགས་སྐུལ་བྱས་པ་དང་། མའོ་ཙེ་ཏུང་གིས་བོད་མིའི་ངོ་རྒོལ་ལ་ཁྲག་དྲི་བྲོ་བའི་དྲག་གནོན་བྱས་ཏེ་དབང་འོག་ཏུ་བསྡུས་ཡོད།
ཕྱི་ལོ་ ༡༩༥༠ ལོར་ཀྲུང་གོའི་དམག་དཔུང་བོད་དུ་མ་བསྐྱོད་སྔོན་ཀྲུང་གོར་བཅའ་སྡོད་སོག་པོའི་གཞུང་ཚབ་ཆེན་མོས་མའོ་ཙེ་ཏུང་ལ་མགྲོན་ཤོག་འབུལ་སྐབས། མའོ་ཡིས་ཕྱི་སོག་ཀྲུང་གོའི་དབང་སྒྱུར་འོག་ནས་རང་བཙན་ཐོབ་པར་འཚམས་འདྲི་ཞུས་ཡོད། མའོ་ཡི་སྐད་ཆ་དེས་ཁོ་པའི་གཡོ་ཇུས་ཀྱི་རང་གཤིས་མངོན་ཡོད། འོ་ན་བོད་སྔ་ས་ནས་ཀྲུང་གོའི་དབང་འོག་ནས་ཐར་ཡོད་པ་མ་རེད་དམ། ཕྱི་སོག་ལ་སྟོབས་ཆེན་ཨུ་རུ་སུའི་རྒྱབ་སྐྱོར་ཡོད་པའི་རྐྱེན་གྱིས་སུས་ཀྱང་ཐུབ་ཚོད་གཏོང་ནུས་མེད། འོན་ཀྱང་རྒྱལ་ཁབ་སུ་གཅིག་གི་རྒྱབ་སྐྱོར་མེད་པའི་བོད་དེ་སྟོབས་ཆེན་རྒྱལ་ཁབ་ཚོས་རང་དགར་གསོད་བཅོམ་བྱ་རྒྱུ་ལས་ལྷག་མེད་པ་རེད།
ལོ་རྒྱུས་ལ་བསྐྱར་ཞིབ་བྱས་ན་བོད་གཞུང་གི་དཔོན་རིགས་ཚོས་ནང་ཁུལ་དུ་རྙོག་གྲ་ཆེན་པོ་འཕྲད་དེ། རིམ་བཞིན་ཕྱི་ཕྱོཌ་ཀྱི་སྟོབས་ཤུགས་ལ་བརྟེན་ནས་གནས་ཚུལ་ཐག་གཅོད་ཡོང་ཐབས་ཀྱི་འབད་བརྩོན་བྱེད་ཀྱི་ཡོད་པ་དཔེར་ན། སོག་པོ་དང་མན་ཇུ། རྒྱ་རིགས། དབྱིན་ཇི་བཅས་ཀྱིས་རོགས་རམ་ཞུས་ཡོད། ཕྱི་ལོ་ ༡༩༡༠ ལོར་ཏཱ་ལའི་བླ་མ་སྐུ་ཕྲེང་བཅུ་གསུམ་པས་དབྱིན་ཇིའི་ཕྱི་སྲིད་བློན་ཆེན་དང་ཐུག་འཕྲད་གནང་སྐབས་མན་ཇུའི་དམག་དཔུང་བོད་ནས་མཐར་སྐྲོད་གཏོང་རྒྱུར་རོགས་རམ་སྐྱབས་འཇུག་ཞུས་ཡོད། དེ་རྗེས་ཀྱི་ལོ་ཟླའི་ནང་བོད་གཞུང་གིས་དབྱིན་ཇིའི་རོགས་རམ་ལ་བརྟེན་ནས་ཉེན་ཁ་ལས་ཐར་ཐབས་ཐེངས་མང་བྱས་ཡོད། འོན་ཀྱང་དབྱིན་ཇི་སྲིད་གཞུང་གིས་བོད་ལ་ཡུན་རིང་སྲུང་སྐྱོབ་བྱེད་རྒྱུའི་སྟོབས་ཤུཌ་མེད་པ་རེད། དེ་སྔོན་བོད་སྡོད་དབྱིན་ཇིའི་ཕྱི་སྲིད་བློན་ཆེན་ལི་ཅེ་ཧྲེང་གིས་བཤད་པར་གཞིཌ་ན། བོད་དེ་ས་རྒྱ་ཆེ་བ་དང་། རི་བོ་མཐོ་ཞིང་གྲང་ངར་ཆེ་བ། མི་མེད་ལུང་སྟོང་མང་བ། འགྲིམ་འགྲུལ་གྱི་ཆ་རྐྱེན་སྐྱོ་བ་བཅས་ལ་བརྟེན་དབྱིན་ཇིའི་མིས་རྩ་བ་ནས་འགན་འཁུར་མི་ཐུབ་པ་ཞིག་རེད་ཅེས་བཤད་ཡོད།
བོད་མི་ཚོས་ཀྱང་རང་ཉིད་ལ་རྒྱབ་རྟེན་འཚོལ་རྒྱུའི་འབད་བརྩོན་བྱས་མེད་པ་མ་ཟད། འཆི་གསོན་གྱི་འགག་རྩའི་དུས་སྐབས་སུ་ཡང་རྒྱལ་སྤྱིའི་ནང་བོད་རང་བཙན་གྱི་གནས་བབས་ངོས་ལེན་ཐོབ་རྒྱུར་འབད་བརྩོན་གང་ཡང་བྱས་མེད་པ་རེད། པེ་དབྱང་དམག་ཤེད་ཅན་གྱི་སྲིད་གཞུང་དང་། གོ་མིན་ཏང་དང་གུང་ཁྲན་ཏང་བཅས་ཀྱིས་བོད་དེ་ཀྲུང་གོའི་ཁ་བྲལ་དུ་མེད་པའི་ཆ་ཤས་ཤིག་རེད་ཅེས་ཡང་ནས་ཡང་དུ་ཤོད་ཀྱི་ཡོད་ཀྱང་། སྐབས་དེར་རྒྱལ་སྤྱིའི་སྤྱི་ཚོགས་ཀྱིས་བོད་མིས་ངོ་རྒོལ་བྱས་པ་རྩ་བ་ནས་ཐོས་མྱོང་མེད། རང་ཉིད་ལ་ཕྱི་བཀག་ནང་སྡོམ་བྱས་ཏེ་མི་ཚེ་སྐྱེལ་བའི་འབྲས་བུར་ཀྲུང་གོས་བོད་དུ་བཙན་འཛུལ་བྱེད་སྐབས་བོད་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་སུ་ཞུ་གཏུགས་བྱས་པས་རྒྱལ་ཁབ་མང་ཆེ་བས་བོད་ལ་རྒྱུས་མངའ་མེད་པ་དང་། ཡང་ན་ཤ་ཚ་བྱེད་མཁན་མེད་པ་རེད། ཏཱ་ལའི་བླ་མ་སྐུ་ཕྲེང་བཅུ་བཞི་པས་རྒྱ་གར་གྱི་སྲིད་འཛིན་ནའེ་རུ་ལ་རོགས་རམ་སྐྱབས་འཇུག་ཞུ་སྐབས་ནའེ་རུས་བོད་ལ་རོགས་རམ་བྱ་རྒྱུའི་ནུས་པ་ང་ལ་མེད། དེའི་རྒྱུ་མཚན་ནི་འཛམ་གླིང་སྟེང་བོད་རང་བཙན་ཡིན་པ་ངོས་ལེན་བྱེད་མཁན་བྱུང་མི་འདུག་ཅེས་བཤད་ཡོད།
རྒྱལ་ཁབ་ཆེ་བས་ཆུང་བ་ཟ་བའི་རྒྱལ་སྤྱིའི་ཁོར་ཡུག་གི་ཁྲོད་བོད་ཀྱི་ཆོས་སྲིད་ཟུང་འབྲེལ་ལམ་གྱི་ལུགས་ཀྱི་ཞན་ཆ་དེས་སྲོག་རྩར་ཐུག་ཡོད་པ་རེད། དེའང་སྲིད་འཛིན་གྱི་དོ་དམ་དེ་ཆོས་ལུགས་ཀྱི་དགོས་མཁོ་ལ་བསྟུན་དགོས་པའི་རྐྱེན་གྱིས་ཆབ་སྲིད་ཀྱི་ཐད་རྙིང་ཞེན་བག་འཁུམ་གྱི་ལྟ་བ་མཁྲེགས་འཛིན་བྱེད་རྒྱུ་ནི་ལྡོག་ཏུ་མེད་པ་ཞིག་རེད། ནང་ཁུལ་དུ་ལམ་ལུགས་རྙིང་པར་བསྒྱུར་བཅོས་བྱེད་མཁན་གྱི་གསར་རྗེའི་མྱུ་གུ་རྩ་མེད་དུ་བཟོས་པ་དང་། ཕྱི་ཕྱོགས་ལ་སྒོ་མོ་བརྒྱབ་པ། གོ་སྐབས་བཟང་པོ་དམ་འཛིན་མ་བྱས་པར་རྒྱལ་སྤྱིའི་སྤྱི་ཚོགས་དང་ཁ་བྲལ་ཏེ་ཁེར་རྐྱང་དུ་བསྡད་ནས་ཉི་མ་གང་འཁྱོལ་བྱས་པའི་འབྲས་བུར་ཆག་སྒོ་ཆེན་པོ་དེ་མགོ་ཐོག་ལ་བབ་པ་ཞིག་རེད། ལྷག་དོན་དུ་ང་རང་ཡ་མཚན་ཞིང་ཡིད་སྐྱོ་དགོས་པ་ཞིག་ལ་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྟེང་། ཀྲུང་གོས་བོད་ལ་བཙན་འཛུལ་བྱས་པའི་གནད་དོན་ལ་གྲོས་བསྡུར་བྱ་རྒྱུར་ངོ་རྒོལ་བྱེད་མཁན་གྱི་རྒྱལ་ཁབ་ཐོག་མ་དེ་བོད་པར་རྒྱབ་སྐྱོར་བྱེད་མཁན་དབྱིན་ཇི་དང་རྒྱ་གར་རེད།
སྤུར་རྒྱལ་བཙན་པོ་ཁོང་ཁྲོ་ཆེན་པོ་ལངས་ཏེ་ཐད་ཀར་ཐང་རྒྱལ་རབས་ཀྱི་རྒྱལ་ས་ཁྲང་ཨན་བར་བཙན་འཛུལ་བྱས་པས་ཐང་རྒྱལ་པོས་རང་ཉིད་ཀྱི་རྒྱལ་ས་བཞག་ཏེ་ཡུལ་གཞན་ལ་བྲོས་བྱོལ་དུ་ཕྱིན་པ་རེད་ཅེས་པའི་ཚིག་བོད་པས་ཡང་ཡང་ཀློག་འདོད་པ་ཅིག་མི་འདུག་གམ། ཧ་ཧ། རྒྱ་བོད་དམག་འཁྲུགས་ལ་ལན་ཅིག་ལྟོས་དང་། སེམས་ཤུགས་འཕར་དགོས་པ་ཅིག་མི་འདུག་གམ། ཧོ་ཧོ།
ཉམས་ཞིབ་པ་ལི་ཅིང་ལིང་དང་ཀྲང་ཕེའོ་ཡི་རྣམ་གཉིས་ཀྱིས་ཇི་བཞིན་གཟིགས་ཤིང་སྲོང་བོར་སྨྲས་པ་འདིར་བཀའ་དྲིན་ཆེ་ཞུ། རྒྱ་ཡིག་གི་མ་ཡིག་རྒྱ་ཆེར་འགྲེམས་སྤེལ་གནང་རྒྱུ་གལ་ཆེའོ།
་་་་་། ནང་ཁུལ་དུ་ལམ་ལུགས་རྙིང་པར་སྒྱུར་བཅོས་བྱེད་མཁན་གྱི་གསར་རྗེའི་མྱུ་གུ་རྩ་མེད་དུ་བཟོས་པ་དང་། ཕྱི་ཕྱོགས་ལ་སྒོ་མོ་བརྒྱབ་པ། གོ་སྐབས་བཟང་པོ་དམ་འཛིན་མ་བྱས་པར་རྒྱལ་སྤྱིའི་སྤྱི་ཚོགས་དང་ཁ་བྲལ་ཏེ་ཁེར་རྐྱང་དུ་བསྡད་ནས་ཉི་མ་གང་འཁྱོལ་བྱས་པའི་འབྲས་བུར་ཆག་སྒོ་ཆེན་པོ་དེ་མགོ་ཐོག་ལ་བབ་པ་ཞིག་རེད། །་་་་་ཟེར།
འོན་ཀྱང་གུང་ཁྲན་ཏང་གི་ཡིག་མཁན་དེ་ཚོས་གོ་མིན་ཏང་དང་བོད་གཞུང་དབར་གྱི་འབྲེལ་བ་ནི། ཀྲུང་དབྱང་དང་ས་གནས་སྲིད་གཞུང་དབར་གྱི་འབྲེལ་བ་རེད་ཅེས་རྒྱུན་ཆད་མེད་པར་སྐྱག་རྫུན་ཁོ་ན་བཤད་དེ། དོན་དམ་པའི་དཔང་འཕེར་གྱི་ལོ་རྒྱུས་ཡིག་ཆ་གང་ཡང་མིག་སྟོན་བྱ་རྒྱུ་མེད། ཟེར།
་་་་་་གལ་སྲིད་རྒྱ་ནག་ཏུ་ལྕགས་ཕག་ལོའི་གསར་རྗེའི་ལངས་མེད་ན་མན་ཇུ་སྲིད་གཞུང་གིས་བོད་དེ་ཤར་ཏུ་ཀི་སི་ཐན་ལྟ་བུ་རྒྱ་ནག་གི་ཞིང་ཆེན་ཞིག་ཏུ་བསྒྱུར་ཐུབ་པའི་རེ་བ་ཡོད། ཕྱི་ལོ་ ༡༩༡༢ ལོར་མན་ཇུ་སྲིད་གཞུང་རྩ་མེད་དུ་སོང་བ་དེས་བོད་མི་ཚོར་ཡོངས་སུ་རང་བཙན་གཙང་མའི་ལམ་བུ་ཞིག་ཏུ་འགྲོ་རྒྱུར་ཆ་རྐྱེན་བསྐྲུན་ཡོད་པ་རེད། ་་་ཟེར།
བཙན་པོ་ཁྲོས་པའི་གཏམ་རྒྱུད་འདི་རུ་འདུག །
རྒྱ་ནག་རྒྱལ་པོ་འཁུམས་ལུགས་འདི་རུ་འདུག །
བོད་དམག་ངར་བའི་ལོ་རྒྱུས་འདིར་ནང་མཆིས། །
རྒྱལ་རྗེ་སྡར་མ་བྲོས་ལུས་ལུས་འདིར་ནང་མཆིས། །
ཧ་ཧ་བོད་རྗེ་རྒྱ་རྗེའི་ལོ་རྒྱུས་ཁྱད་མཚར་འགའ། །
སྐལ་ཚེས་བསྒྱུར་བ་དུས་བབ་ནང་འཁོད་ཀློགས། །
ལོ་ངོ་ཆིག་སྟོང་ལྔ་བརྒྱའི་སྔོན་ལ་བོད་མི་ཚོས་སྟོབས་ཆེན་གྱི་སྤུར་རྒྱལ་བཙན་པོའི་རྒྱལ་རབས་བཙུགས་པ་རེད། སྐབས་དེར་བོད་རྒྱལ་སྲོང་བཙན་སྒམ་པོས་ཐང་རྒྱལ་རབས་ཀྱི་ས་ཆར་བཙན་འཛུལ་བྱས་རྐྱེན་ཐང་ཐེ་ཙུང་གིས་རྒྱ་བཟའ་ཀོང་ཇོ་མནའ་མར་ཕུལ་ཏེ་ཞི་འགྲིགས་ཡོང་ཐབས་བྱས། ཐང་ཤོའོ་ཙུང་གི་དུས་སུ་སྤུར་རྒྱལ་བཙན་པོས་ཐང་རྒྱལ་རབས་ཀྱི་ས་ཆར་བཙན་འཛུལ་ཤུགས་ཆེ་བྱས་ཤིང་ཐང་ཤའོ་ཙུང་གིས་ལོ་ལྟར་བོད་ལ་དར་གོས་ཁྲི་ལྔ་ཕུལ་ཏེ་དམག་མཚམས་འཇོག་རྒྱུའི་རེ་བསྐུལ་ཞུས། ལོ་ངོ་བདུན་སོང་བའི་རྗེས་ཐང་ཏེའི་ཙུང་གིས་དར་གོས་ཀྱི་ཁྲལ་མ་སྤྲད་པར་བརྟེན་སྤུར་རྒྱལ་བཙན་པོ་ཁོང་ཁྲོ་ཆེན་པོ་ལངས་ཏེ་ཐད་ཀར་ཐང་རྒྱལ་རབས་ཀྱི་རྒྱལ་ས་ཁྲང་ཨན་བར་བཙན་འཛུལ་བྱས་པས་ཐང་རྒྱལ་པོས་རང་ཉིད་ཀྱི་རྒྱལ་ས་བཞག་ཏེ་ཡུལ་གཞན་ལ་བྲོས་བྱོལ་དུ་ཕྱིན།