དེ་རིང་གཟའ་ལྷག་པའི་ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་དང་ཊེ་ནཱེ་སོའུ་སྦྱོང་བརྡར་བསྟི་གནས་ཁང་གཉིས་ཀྱིས། བོད་པའི་གཞོན་སྐྱེས་ལས་མེད་ཚོར་དམིགས་ཏེ། ༼བོད་མིའི་མདུན་ལམ་སློབ་སྟོན་ལྟེ་གནས་ཁང་༽ དང་གློག་ཀླད་སྦྱོང་བརྡར་ལྟེ་གནས་ཁང་གཉིས་གསར་འཛུཊ་གནང་སོང་།
དེ་རིང་ཕྱི་ཚེས་ ༢༤ ཉིན་གྱི་ཞོགས་པའི་ཆུ་ཚོད་ ༡༠།༣༠ ཐོག བོད་མིའི་སྒྲིག་འཛུགས་ནང་སྲིད་ལས་ཁུངས་དང་རྒྱ་གར་གྱི་གྲོང་ཁྱེར་བྷེང་བྷེར་རྟེན་གཞི་བྱེད་པའི་ཊེ་ནཱེ་སཱོ་སྦྱོར་བརྡར་བསྟི་གནས་ཁང་ (TechnoServe India) གཉིས་ཟུང་འབྲེལ་ཐོག ངྷ་རམ་ས་ལར་བོད་མིའི་མདུན་ལམ་སློབ་སྟོན་ལྟེ་གནས་ཁང་ ( Tibetan Career Center) དང་། གློག་ཀླད་སྦྱོང་བརྡར་ལྟེ་གནས་ཁང་བཅས་ལས་ཁུངས་གཉིས་དབུ་འབྱེད་གནང་སོང་ལ། མཛད་སྒོའི་ཐོག་ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལཊ་གཙོས། བོད་མིའི་མདུན་ལམ་སློབ་སྟོན་ཁང་གི་སྤྱི་ཁྱབ་འགན་འཛིན་འཇིགས་མེད་ཚུལ་ཁྲིམས་ལགས་དང་། བྷེང་ལོར་ཊེ་ནཱེ་སོའུ་སྦྱོང་བརྡར་བསྟི་གནས་ཁང་གི་སྐུ་ཚབ་སྐུ་ཞབས་ཨ་ཤི་ཝ་ཐུ་མཱོའུ་ལེ་ངྷ་རམ་ལགས། དེ་བཞིན། བཞུགས་སྒར་བོད་ཀྱི་གཞུང་འབྲེལ་མིན་པའི་ཚོགས་པ་ཁག་གི་འཐུས་མི་བཅས་ཆེད་ཕེབས་གནང་འདུག
བོད་མིའི་མདུན་ལམ་སློབ་སྟོན་ལྟེ་གནས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་ངོ་སྤྲོད་གནང་བ་ལྟར་ན། ༼བོད་མིའི་མདུན་ལམ་སློབ་སྟོན་ལྟེ་གནས་ཁང་༽ དེ་ནི། སྐབས་བཅུ་བཞི་པའི་བཀའ་ཤག་གིས་བཙན་བྱོལ་བོད་མིའི་གཞོན་སྐྱེས་ཚོར་དམིགས་བསལ་ཐུགས་འཁུར་དང་དགོངས་པ་ཆེར་བཞེས་གནང་བ་ཞིག་དང་། ལྷག་པར་དུ་འདི་ལོའི་ཕྱི་ཟླ་ ༨ པའི་ཚེས་ ༨ ཉིན་སྲིད་སྐྱོང་བློ་བཟང་སེང་གེ་མཆོག་གིས་འདས་པའི་ལོ་གཅིག་གི་ལས་བསྡོམས་ནང་། འབྱུང་འགྱུར་བཙན་བྱོལ་བོད་མིའི་གནས་སྟངས་ཁ་གང་དུ་ཕྱོགས་མིན་གཞོན་སྐྱེས་ཚོར་རག་ལུས་ཡོད་པའི་གསུང་བཤད་གནང་བ་དང་། ༢༠༡༠ ལོར་བྷེང་ལོར་རྟེན་གཞི་བྱས་པའི་ཊེ་ནཱེ་སོའུ་སྦྱོང་བརྡར་ཁང་གིས་བོད་མིའི་གཞིས་ཆགས་ཁུལ་དུ་ཉམས་ཞིབ་བརྒྱུད། ཨ་རིའི་བོད་ཀྱི་ཐེབས་རྩ་ཁང་དུ་བོད་པའི་སྤྱི་ཚོགས་ནང་གཞོན་སྐྱེས་ལས་མེད་བརྒྱ་ཆ་ ༦༡% ཡོད་པའི་ལས་བསྡོམས་ཕུལ་ཡོད་པ་བཅས་ལ་གཞིགས་ཏེ། བོད་པའི་གཞོན་སྐྱེས་ལས་མེད་ཀྱི་གནས་སྟངས་བསྒྱུར་ཐབས་སུ་མགོ་འཛུགས་གནང་བ་ཞིག་ཡིན་འདུག
ད་ལྟའི་ཆར་བཀའ་ཤག་གི་ལམ་སྟོན་འོག་ངྷ་རམ་ས་ལ་གཙོས། ལྡི་ལི་དང་བདེ་སྐྱིད་གླིང་། ཨོ་རི་ས་ཕུན་ཚོགས་གླིང་། བྷེང་ལོ་ལྷོ་སྤྱི་ལས་ཁུངས། མོན་གྷོ་འདོད་རྒུ་གླིང་། བྷེལ་ཀོལ་ལུགས་བསམ་གླིང་། བལ་ཡུལ་སྤོག་ར་བཅས་ས་གནས་ཁག་ ༨ དུ་ལས་ཁུངས་གསར་འཛུགས་གནང་ཡོད་ལ། དམིགས་ཡུལ་གཙོ་བོ་བཙན་བྱོལ་བོད་མིའི་སྤྱི་ཚོགས་ནང་སློབ་གྲྭ་ཁུངས་མ་འཁྱོལ་བ་དང་། མཐོ་སློབ་དུ་ཕྱིན་སྟེ་སློབ་སྦྱོང་མུ་མཐུད་གནང་མ་ཐུབ་པའི་རིཊ་འཚོལ་ཞིབ་དང་འབྲེལ་ལམ་བཙུགས་ཏེ་ལས་ཀའི་གོ་སྐབས་བསྐྲུན་རྒྱུ་དང་། བོད་པའི་གཞིས་ཆགས་ཁུལ་དུ་ཡོད་པའི་གཞོན་སྐྱེས་ཚོ་མུ་མཐུད་ས་གནས་རང་དུ་གནས་ཐུབ་ཆེད་ལས་རིགས་འདྲ་མིན་ཐོག་སློབ་སྟོན་གནང་རྒྱུ་བཅས་ཡིན་ལ། གློག་ཀླད་སྦྱོང་བརྡར་ཁང་ནི་དམིགས་བསལ་གློག་ཀླད་ལ་དོ་སྣང་ཡོད་མཁན་དང་སྦྱང་འདོད་མཁན་གྱི་རིགས་ལ་དམིགས་པ་ཞིག་ཡིན་འདུག
ལྟེ་གནས་ཁང་དེ་གཉིས་ནི། ༢༠༡༣ ལོའི་ཕྱི་ཟླ་ ༧ ཚེས་ ༣༡ བར་ས་གནས་ཁག་ཏུ་གསར་འཛུགས་གནང་ཡོད་ཅིང་། དུས་ཡུན་དེའི་ནང་བོད་ནས་ཕེབས་མཁན་དང་རྒྱ་གར་ནང་སྡོད་མཁན་བཅས་དབྱེ་བ་གང་ཡང་མེད་པའི་ཐོག་བསྡུ་རུབ་གནང་རྒྱུ་ཡིན་པ་མ་ཟད། ལྟེ་གནས་ཁང་དེའི་ལས་བྱེད་རྣམ་པ་ལས་ཁུངས་རང་དུ་མི་སྡོད་པར་ས་གནས་ཁག་ནང་ཕྱིན་སྟེ། ཕ་མ་དང་ཕྲུ་གུ་ལྟ་བ་མི་མཐུན་པའི་རིགས་ཡོང་གི་ཡོད་ཚེ་ཕ་མ་དང་མཉམ་དུ་གོ་བསྡུར་གནང་རྒྱུ་དང་། དེ་མིན་གཞིས་ཆགས་ཁུལ་གྱི་སྤྱི་ཁང་དུ་འདུ་འཛོམས་ཀྱི་གོ་བསྡུར་ཐག་གཅོད་གནང་རྒྱུ་དང་། གཞོན་སྐྱེས་ལས་མེད་ཀྱི་རིགས་ལ་ཆེད་དུ་ཐུག་འཕྲད་ཀྱིས་ལས་གཞི་ངོ་སྤྲོད་དང་དམིགས་ཡུལ་འགྲེལ་བཤད་བརྒྱུད་བསྡུ་རུབ་དང་། རིམ་གྱིས་ལས་ཀའི་གོ་སྐབས་བཅས་ཕུལ་རྒྱུ་ཡིན་འདུག གལ་སྲིད། ས་གནས་གཞན་དུ་ཞུགས་འདོད་ཡོད་ཚེ་ས་གནས་བརྗེ་སྤོར་བྱེད་ཆོག་གི་ཡོད་འདུག
མདུན་ལམ་སློབ་སྟོན་ཁང་དུ་བོད་མི་ཞིག་ཡིན་ཚེ་ཆ་རྐྱེན་གང་ཡང་མེད་པའི་ཐོག་ཞུགས་ཆོག་གི་ཡོད་ཀྱང་། ལས་མེད་དངོས་དང་འགྱུར་ལྡོག་ལས་མེད་བཅས་སྡེ་ཚན་གཉིས་སུ་བགོས་ཏེ་འདེམས་སྒྲུག་སློབ་སྟོན་གནང་རྒྱུ་དང་། གློག་ཀླད་སྦྱོང་བརྡར་སྡེ་ཚན་དུ་བོད་པ་ཡིན་པ་ཙམ་གྱིས་མི་འགྲིག་པར་དབྱིན་སྐད་ཀྱི་ཤེས་ཚད་གང་འཚམ་དགོས་ཀྱི་ཡོད་པ་མ་ཟད། ཟླ་རྗེས་མའི་ཕྱི་ཚེས་ ༡༥ ཡར་སྔོན་དུ་འཚང་སྙན་དང་བཅས་ཐོ་འགོད་བྱས་རྗེས། མི་ ༢༢ གནས་སྟངས་ལ་གཞིགས་ཏེ་འདེམས་སྒྲུག་བྱ་རྒྱུ་དང་། བསླབ་གཞི་གཙོ་བོ་གློག་ཀླད་ཀྱི་རྨང་གཞིའི་ཤེས་བྱ་དང་། རྨང་གཞི་ཡོད་མཁན་ལ་གནས་ཚད་དང་བསྟུན་ཏེ་སློབ་ཁྲིད་བྱེད་ཀྱི་ཡིན་པ་དང་། གནས་ཚུལ་འདིའི་རིགས་ལས་ཁུངས་དུ་ངོ་བཅར་དང་དྲ་རྒྱ་ www.tibet.jobeestan.com བརྒྱུད་འབྲེལ་བ་གནང་ཆོག་གི་ཡོད་འདུག
ལས་ཁུངས་དབུ་འབྱེད་ཀྱི་མཛད་སྒོའི་ཐོག་ས་གནས་མགོ་འཛིན་བསོད་ནམས་རྡོ་རྗེ་ལགས་ཀྱིས། ༢༠༠༩ ལོའི་བཙན་བྱོལ་བོད་མིའི་མི་འབོར་ཞིབ་བཤེར་སྐབས་བཙན་བྱོལ་ནང་བོད་མི་སྟོང་ཕྲག་ ༩༧ མ་ཟིན་ཙམ་ཞིག་ཡོད་པ་ལས། ལོ་ ༡༩ ནས་ ༤༠ བར་མིས་བཙན་བྱོལ་བོད་མིའི་སྤྱི་འབོར་གྱི་བརྒྱ་ཆ་ ༤༠% ནས་ ༤༥% ཟིན་ཡོད་པ་དང་། ༢༠༠༡ ལོ་ནས་ ༢༠༡༠ བར་རྒན་རབས་པ་མང་པོ་འདས་གྲོངས་དང་ཕྲུ་གུ་སྐྱེས་ཚད་ཉུང་དུ་ཕྱིན་པ་སོགས་ཀྱིས། ད་ལྟའི་ང་ཚོའི་གནས་སྟངས་དེ་ལོ་གཞོན་གྱིས་གྲུབ་པའི་རྒྱལ་ཁབ་ཅིག་ཆགས་ཡོད་སྐོར་གསལ་བཤད་དང་འབྲེལ། ཁོང་གིས། “ ད་ལྟའི་ཆར་བོད་མིའི་སྒྲིག་འཛུགས་ཀྱིས་མཐོ་སློབ་ཐོན་པའི་སློབ་མ་ལས། སློིབ་གྲྭ་ཁུངས་མ་འཁྱོལ་བ་དང་འཛིན་རིམ་བཅུ་གཉིས་ཐོན་མཁན། མཐོ་སློབ་ཕྱེད་ཀ་ལས་མ་འགྲིམས་པའི་རིགས་ལ་ལས་ཀ་སྤྲོད་དགོས་བསམ་ཀྱང་སྤྲོད་ཐུབ་ཀྱི་ཡོད་པ་མ་རེད། ང་ཚོའི་དཀའ་ངལ་ཆེ་ཤོས་གཅིག བོད་མི་མང་ཆེ་བས་ང་ཚོ་རྒྱ་གར་ནང་གཏན་སྡོད་བྱེད་མཁན་མིན་པར། མ་འོངས་པའི་དུས་ཤིག་ལ་ང་ཚོར་ཕྱིར་བོད་ནང་ལོག་འགྲོ་གི་རེད་བསམ་པའི་འཕྲལ་སེལ་གྱི་བསམ་བློ་བཏང་བའི་དབང་གིས་དཀའ་ངལ་མང་པོ་ཞིག་བྱུང་གི་འདུག ང་ཚོའི་དཀའ་ངལ་གཞན་ཞིག་ནི། གཞིས་ཆགས་ཁག་དང་ས་གནས་མང་པོའི་ནང་ནང་མི་སྤུན་མཆེད་དང་ཕ་མ་ཕྱི་རྒྱལ་དུ་ཡོད་སྟབས། ཕྱི་རྒྱལ་དུ་འཐེན་རྒྱུ་དང་ཕྱི་རྒྱལ་ནས་དངུལ་གཏོང་རྐྱང་བྱས་ཏེ། གཞོན་སྐྱེས་མང་པོ་ཞིག་རང་ངོས་ནས་ལངས་ཐབས་བྱ་རྒྱུའི་བསམ་བློ་འཁོར་མ་ཐུབ་པའི་ཁར། སྤྱི་ཚོགས་ནང་ཊེ་སྦེ་དང་ཐ་མ་ནག་པོ་འཐེན་མཁན་སོགས་འཕྲོ་བརླགས་དུ་འགྲོ་བཞིན་པའི་དཀའ་ངལ་བྱུང་བཞིན་ཡོད་སྟབས། མ་འོངས་པར་གཞོན་སྐྱེས་ཚོ་སོ་སོའི་རྒྱལ་ཁབ་དང་ཕ་མར་བརྟེན་མི་དགོས་པར། སོ་སོ་རང་གི་རྐང་པའི་སྒང་ལངས་ཐུབ་པ་བྱ་རྒྱུ་དང་། ཕ་མའི་ངོས་ནས་ཀྱང་དེ་དག་ལ་བསམ་བློ་བཏང་སྟེ་མདུན་ལམ་སློབ་སྟོན་དང་འབྲེལ་བའི་གཞུང་གི་ལས་གཞི་ལ་རྒྱབ་སྐྱོར་གནང་རྒྱུ་ཧ་ཅང་གལ་ཆེན་པོ་རེད། ” ཅེས་གསུངས་སོང་།
སྲིད་སྐྱོངམཆོག་གིས་ལོ་གཅིག་ལྷག་གི་རིང་དུ་ངོ་མ་འབད་བཙོན་ཆེན་པོ་གནང་སོང་སྙིང་ནས་ཡིད་རངས་ཞུ་རྒྱུ་དང་། འབྱུང་འགྱུར་མཛད་འཆར་རྣམ་ཐུགས་བཞེད་བཞིན་འགྲུབ་པའི་སྨོན་འདུན་ཞུ།
དྲི་བ་གཅིག་དང་བསམ་ཚུལ་གཅིག་ཡོད།ད་ལྟའི་དུས་ཚོད་འདི་བོད་པ་ཚང་ལ་སློབ་སྦྱོང་གི་བྱེད་དགོས་པའི་དུས་སྐབས་ཤིག་རེད་དམ།་རང་དབང་དང་ཐོབ་ཐང་རྩོད་ལེན་གྱི་ལས་འགུལ་ལ་ཞུགས་དགོས་པའི་དུས་སྐབས་་ཤིག་རེད།་
བསམ་ཚུལ་གཅིག་ཡོད་པ་ནི།
འདས་པའི་ལོ་༥༣་ནང་བོད་དོན་བདེན་པའི་འཐབ་རྩོད་རྒྱུན་མ་ཆད་པར་གནས་ཡོད་ན་ཡང་གྲུབ་འབྲས་ཆེན་པོ་ཞིག་ཐོབ་མ་ཐུབ་པ་ནི་བསམ་བློ་གཅིག་སྒྲིལ་མེད་པ་ཁོ་ནས་ལན་པ་ཅེས་བརྗོད་ཆོགརྒྱལ་ཁབ་ཀྱི་བདག་དབང་དང་མི་རིགས་རང་དབང་གི་འཐབ་རྩོད་ཞིག་ཡིན་ན།འཐབ་རྩོད་པ་གཞི་རིམ་མི་དམངས་རྣམས་ཀྱིས་བསམ་བློ་གཅིག་སྒྲིལ་ཐོག་ལས་འགུལ་གཅིག་སྒྲིལ་གྱི་ནུས་པ་འབུར་དུ་ཐོན་པ་ཞིག་དགོས་ན་ཡང་།་བོད་མི་གཞི་རིམ་དམངས་ཚོགས་ནང་བསམ་བློ་གཅིག་སྒྲིལ་མེད་པ་དང་ལས་འགུལ་གྱི་ནུས་པ་ཁ་ཐོར་དུ་སོང་བ།ཆོལ་ཁ་དང་ཆོས་ལུགས་ཀྱི་ལྟ་ཚུལ་ཕྱོགས་ལྷུང་ཆེ་དྲག་པས་ལན་པ་རེད།་་བསམ་བློ་སྒྱུར་བཀོད་མེད་པར་མུ་ཐུད་ནས་ལམ་ནོར་ཐོག་བསྐྱོད་ན་དཔའ་བོ་སྟོང་ཕྲག་མང་པོ་ཚེ་སྲོག་ཤོར་ན་ཡང་གྲུབ་འབྲས་ཐོབ་མི་ཐུབ་པ་དེ་ངེས་པར་དུ་ཤེས་དགོས།
མི་རིགས་དང་ཆོལ་ཁ།་ཕོ་མོ་དང་རྒན་གཞོན་ཆོས་པ་དང་སྲིད་དོན་པ་ཡོངས་ཀྱིས་དགོངས་པ་བཞེས་དགོས་པ་ནི།སྲིད་སྐྱོང་སྒྲིག་འཛུགས་གཅིག་གི་འོག་ལངས་ཕྱོགས་གཅིག་དང་།་དམིགས་ཡུལ་གཅིག་དང་འབོད་སྒྲ་གཅིག་གི་ནུས་པ་མཉམ་སྤུང་བྱ་ཐུབ་པ་གནང་དགོས་པ་གལ་འགག་ཆེན་པོ་མཐོང་།
སྐབས་དེར་གུས་པ་དབྱིན་ཡིག་གི་མགྲོན་ཤོག་ལྟར་བོད་ཀྱི་རྒྱལ་ཡོངས་མང་གཙོ་ཚོགས་པའི་ངོས་ནས་མཛད་སྒོར་བཅར་བ་ཡིན། གསར་འབྱོར་གྱི་དྲི་མས་ཁེངས་པའི་སྣེ་ལེན་ཁང་གི་ཉལ་ཁང་དེའི་རྣམ་པ་ཡོངས་སུ་བསྒྱུར་ཏེ། དངོས་གནས་མདུན་ལམ་སློབ་སྟོན་ཁང་ཟེར་ངེས་དེ། འདི་མིན་ན་ཅི་ཡིན་སྙམ་པའི་སྤྲོ་བས་རབ་ཏུ་ཁེངས། འོན་ཀྱང་སྒོ་རྟགས་དང་མཛད་སྒོའི་ཁ་བྱང་གིས་མཚོན་པའི་གྱང་སྦྱར་གསལ་བསྒྲགས་ཚང་མ་དབྱིན་ཡིག་ཤ་སྟག་རེད་འདུག ང་ཙམ་མ་ཡིན་པའི་ཚོར་ཤུགས་ཆེ་བའི་ཚོགས་ཞུགས་པ་འགའ་ཞིག་གིས་ཆེད་དུ་འབད་པ་ཆེན་པོས་ཁྱོན་ཡོངས་སུ་དོ་སྣང་ཞིབ་བལྟ་ཞིག་བྱས་པ་ཡིན་ཏེ། སྒོ་ཕྱི་ནང་གང་སར་བོད་ཡིག་འབྲུ་མ་གཅིག་ཀྱང་མཐོང་རྒྱུ་མེད་པའི་ཁོར་ཡུག་ཅིག་བསྐྲུན་ཡོད་པ་ཧ་ཅང་གསལ་པོ་ཆགས་རྗེས། དེ་སྔ་མདུན་ལམ་སློབ་སྟོན་ཁང་འདི་སྤུས་དག་པོ་ཡོང་བ་ལ་བོད་ཡིག་གི་སྡིངས་ཆ་ཉུང་ན་ཡག་གི་རེད་ཅེས་པའི་བསམ་ཚུལ་བྱུང་ཡོད་པའི་སྐད་ཆ་གོ་མྱོང་། སྐད་ཆ་དེ་རླུང་གིས་ཁྱེར་བའི་ཟུར་བཤད་ཅིག་རེད་མི་འདུག་བསམ་པའི་ཚོར་སྣང་ཆེན་པོས། ལྷན་ཁང་དེའི་འགན་འཛིན་འཇིགས་མེད་ཚུལ་ཁྲིམས་ལ་དེའི་སྐོར་དྲི་བ་ཞིག་བཏང་བ་ཡིན། བོད་ཡིག་མ་བྲིས་པ་དེ་འདི་གའི་ལྷན་ཁང་གིས་་ཟུང་འབྲེལ་བྱེད་སའི་རྒྱ་གར་བས་ཁ་བྱང་འདི་བཟོས་པ་རེད། ང་ཚོས་ཀྱང་སྤམ་པོ་ཞིག་ཡོང་ཆེད་དུ་བོད་ཡིག་མ་བྲིས་པ་ཡིན་ཞེས་ལན་འདེབས་གནང་སོང་། ཐ་མར་ངས་ཁོང་ལ་རེ་སྐུལ་ཞིག་ཞུས་ཏེ་ལྷན་ཁང་འདི་ངོ་དེབ་བརྒྱུད་ཁྱབ་བསྒྲགས་བྱེད་ཐུབ་ན་མི་ཚང་མས་ཤེས་རྟོགས་ཡོང་རྒྱུར་ཡག་པོ་འདུག་ཅེས་བཤད་པ་ཡིན་ཡང་་་ངོ་དེབ་ཏུ་ད་དུང་ཅང་མཐོང་རྒྱུ་མི་འདུག་་་་་་་་བཤད་འདོད་ནི་ ་་་་དེ་རང་ཡིན་་་་
སྲིད་སྐྱོང་མཆོག་གཙོ་བྱས་སྐུ་ངོ་རྣམ་པར་ཐུགས་རྗེ་ཆེ་ཞུ་བ་བ་དང་ཆབས་ཅིག
མ་འོངས་གོ་སྐབས་རེག་པའི་སློབ་ཕྲུག་དག་གི་སློབ་འབྲས་ཀྱང་འབུར་དུ་ཐོན་པར་རེ་བ་སྙིང་ནས་བཅངས་ཡོད།
ད་ལྟའི་བྱེས་པར་ཤིན་ཏུ་མཁོ་བའི་ལས་མེད་ཚོར། །
ལས་ཁུངས་གསར་འཛུགས་གནང་བར་བཀའ་དྲིན་ཆེ། །
སྲིད་སྐྱོང་སེངྒེ་ཚང་གིས་རྩ་བའི་དམ་བཅའ་གསུམ་གྱི་ཡ་རྒྱལ་རང་མགོ་རང་མཐོན་ཐད་གོམ་པ་དང་པོ་དེ་གཞི་ནས་སྤོ་རྒྱུའི་གྲ་སྒྲིག་གནང་བཞིན་པ་འདྲ། ལག་བསྟར་རང་བཞིན་ལྡན་པ་དང་དོན་འཁྱོལ་རང་བཞིན་ལྡན་པ་གནང་གལ་ཆེའོ།
བཀའ་ཤག་གི་ལས་འཆར་དང་མཐུན་རྐྱེན་འདི་ལྟར་གྲུབ་པར་རྟེན་འབྲེལ་བཀྲིས་བདེ་ལེགས་སོ།།
ཤིན་ཏུ་ལེགས།
སྐུ་ངོ་འཇིགས་མེད་པྰཤ་ལགས་བཀྲིས་བདེ་ལེགས། ཡུན་རིང་ཞིག་ནས་དེ་རིང་མཇལ་བར་དགའ་སོང་།
ཨོ་་ད་དེ་དངོས་གནས་དཔེ་ཡག་པོ་རེད་
དངོས་གནས་བཙན་འབྱོར་ནང་གི་ལས་མེད་ཚོ་ལ་གུ་སྐབས་འདི་འདྲ་པོ་ཁག་ཅིག་བོད་གཞུངས་ངོས་ནས་སྐྲུན་རྒྱུ་ལ་རེ་བ་བྱེད་དང་བྱེད་མུལ་ཡིན་ལ་འདི་ལོའི་ཕྱི་་ཟླ་བརྒྱད་པའི་ནང་ངས་སྲིད་སྐྱོངས་མཆོག་ལ་ཐད་ཀ་འདི་འདྲའི་སྐོར་ལ་སྙན་ཞུ་ཞིག་ཀྱང་ཕུལ་པ་ཡིན།
ངས་བོད་མིའི་སྲིད་སྐྱོང་༧ ་མི་རྗེ་བློ་བཟང་སེང་གེ་མཆོག་ལ་གུས་བདུད་དང་ བཀྲིན་ཆེ་ཞེས་ཞུ་རྒྱུ་མ་ཟད་མ་འོངས་དུས་ཡུན་ནང་མཛད་བཟང་གིས་ཉི་འོད་གང་སར་རྒྱས་པའི་སྨོན་འདུན་ཞུ་བ་བཅས།།