དེ་རིང་ཨབ་གྷན་ནང་རང་སྲོག་བློས་གཏོང་གི་དྲག་སྤྱོད་པ་ཞིག་གིས་འགད་རྫས་གཏོར་ཏེ། མི་ ༤༡ དམར་གསོད་དང་ ༥༠ ཙམ་ལ་རྨས་སྐྱོན་ཕོག་འདུག
དེ་རིང་ཨབ་གྷན་མངའ་སྡེ་ཧྥར་ཡབ་ཀྱི་གྲོང་ཁྱེར་མཱའེ་མཱ་ཎའི་ནང་གི་ཨེ་ཌི་གྷ་(Eid Gah) ཟེར་པའི་ཁ་ཆེ་ལྷ་ཁང་དུ། མངའ་སྡེའི་མཐོ་རིམ་མི་སྣ་དང་དྲག་ཆས་ཉེན་རྟོག་མི་སྣ། མང་ཚོགས་བཅས་ལྷན་འཛོམས་ཐོག་གཟའ་པ་སངས་ཉིན་གྱི་ཁ་ཆེ་སྨོན་ལམ་གསུང་གྲུབ་མཚམས་སུ། མི་ཞིག་གིས་ལུས་ལ་འགད་རྫས་བཅིང་ནས་ལྷ་ཁང་དུ་རང་ཉིད་དང་ལྷན་དུ་འགད་རྫས་གཏོར་ཏེ། མི་ ༤༡ དམར་གསོད་དང་ ༥༠ ཙམ་ལ་རྨས་སྐྱོན་བཟོས་ཡོད་འདུག
མངའ་སྡེ་སྲིད་སྐྱོང་པ་གཞོན་པ་བྷ་རེ་ཛི་(Abdul Satar Barez) ཡིས་ “ང་ཚོས་སྨོན་ལམ་ཚར་ཏེ་ཚང་མས་ཕན་ཚུན་འཚམ་འདྲི་དང་བདེ་མོ་འཇོག་བཞིན་པའི་སྐབས་སུ་འགད་རྫས་གཏོར་བྱུང་” ཞེས་བརྗོད་ཡོད་པ་མ་ཟད། དྲག་སྤྱོད་པས་གཙོ་བོ་སྨོན་ལམ་དེར་ཡོང་པའི་མངའ་སྡེ་གཞུང་གི་དཔོན་རིགས་དང་དྲག་ཆས་ཉེན་རྟོག་པ་བཅས་དམིགས་འབེན་དུ་བཟུང་པ་ཞིག་ཡིན་སྐོར་བརྗོད་འདུག
དོན་རྐྱེན་དེ་བྱུང་རྗེས་ཨབ་གྷན་སྲིད་འཛིན་ཁཱར་ཛའེ་(Hamid Karzai) ཡིས། ཌ་ལེ་བྷན་ཤོག་ཁག་ལ་སོ་སོའི་མི་མང་དམར་གཏོང་བ་དང་ལྷ་ཁང་གཏོར་བཤིག སློབ་གྲྭ་དང་སྨན་ཁང་སོགས་ལ་གཏོར་བརླག་གཏོང་མཚམས་བཞག་སྟེ། གནད་དོན་གང་གི་ཐད་ལའང་ཕན་ཚུན་ཞི་འགྲིག་གྲོས་མོལ་བརྒྱུད་ཐག་གཅོད་བྱ་དགོས་པའི་འབོད་སྐུལ་ཞུས་ཡོད་འདུག
མཚེ་མེད་ཞི་བའི་བསམ་བློ་དེ་ངོ་མ་བཟི་བརྗིད་འདུག་ཡ།
འདི་ནས་མི་གཅིག་གིས་གནོད་སེམས་ཀྱིས་མི་ཞེ་གཅིག་བསད་འདུག་ལ་མི་ལྔ་བཅུ་ལ་རྨས་སྐྱོན་བཟོས་འདུག བོད་ནང་ནས་མི་བཞིས་རང་སྲོག་མེ་རུ་བསྒྲོན་ནས་ཞི་བའི་ངོ་རྒོལ་བྱས་འདུག གལ་ཏེ་བོད་ནང་གི་མི་དེ་དག་གིས་ཀྱང་མི་ཞེ་གཅིག་རེ་བསད་དེ་མི་ལྔ་བཅུ་རེ་རྨས་བ་ཡིན་ན། མི་བརྒྱ་དང་བཞི་བསད་ཡོད་པ་མ་ཟད་མི་ཉིས་བརྒྱར་རྨས་སྐྱོན་བཟོས་ཡོད་བ་རེད། གང་ལྟར་རང་རང་གི་སྲོག་བློས་བཏང་བ་གཅིག་པ་རེད། གནད་དོན་འདིའི་སྟེང་ནས་རྒྱ་རྒན་ཚོས་བོད་མིའི་མེར་བསྲེག་ངོ་རྒོལ་འདི་འཚེ་བ་ཡིན་མིན་གསལ་བོར་ཤེས་ཐུབ། འདི་ནི་དེ་རིང་སྟེ། ཉིན་གཅིག་གི་བྱུང་རྐྱེན་ཙམ་གྱིས་ངོ་སྤྲོད་བྱས་བའི་གནས་ལུགས་ཤིག་ཡིན་པ་ལས་ལོ་རྒྱུས་མང་བོ་ཕྱོགས་བསྡོམས་ཀྱིས་ར་སྤྲད་པ་ཞིག་ག་ལ་ཡིན།
རྒྱལ་གཅེས་དཔའ་བོ་བཞི་རུ་བཟོ་བཅོས་གནང་རོགས་གྱིས།
དེ་རིང་གི་དུས་ཚོད་འདིར་བོད་གངས་ཅན་ཡུལ་ནས་རྒྱལ་གཅེས་དཔའ་བོ་བདུན་གྱིས་རང་གི་མི་རིགས་ཀྱི་རང་དབང་དང། ཐོབ་ཐང། ཁྱད་པར་༸གོང་ས་མཆོག་གདན་འདྲེན་ཆེད་གཞན་ལ་གནོད་འཚེ་མེད་པར་རང་ལུས་མེར་བསྲེགས་ནས་རྩོད་ཀྱི་ཡོད་ལ། ཨབ་གྷན་དུ་མི་ཞིག་གིས་རང་སྲོག་བློས་བཏང་སྟེ་མི་ཞེ་གཅིག་གི་ཚེ་སྲོག་འཕྲོག་སྟེ་ཆབ་སྲིད་འཐབ་རྩོད་བྱེད་པ་ནི་ཇི་ལྟར་བསྡུར་རམ།