བོད་ནང་གི་སྐུ་ཚབ་ཕེབས་རྒྱུའི་ཆ་རྐྱེན་བསྐྲུན་དགོས།

སྐབས་གཉིས་པའི་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐོག་བོད་ནང་གི་སྐུ་ཚབ་དང་དཔྱད་རྩོམ་སོགས་ཐོན་ཐུབ་མེད་ཀྱང་། མ་འོངས་པར་བོད་ནང་གི་མཁས་དབང་གདན་འདྲེན་གནང་ཐུབ་རྒྱུ་ཚོགས་ཆེན་གྱི་ཆ་རྐྱེན་གལ་ཆེན་ཞིག་ཆགས་ཡོད་ཟེར།

ཟླ་སྔོན་མའི་ཕྱི་ཚེས་ ༢༧ ནས་ཉིན་གསུམ་རིང་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་དང་ངྷ་ས་བོད་ཀྱི་སྨན་རྩིས་ཁང་། ཝ་ནཱ་བོད་ཀྱི་གཙུག་ལག་སློབ་གཉེར་ཁང་གི་གསོ་བ་རིག་པའི་སྡེ་ཚན། རྡོར་གླིང་ལྕཊ་པོ་རི་དྲན་རྟེན་བོད་སྨན་སློབ་གཉེར་ཁང་བཅས་ཐུན་མོང་གི་གོ་སྒྲིག་འོག  ༼རྒྱལ་སྤྱིའི་བོད་ཀྱི་གསོ་བ་རིག་པའི་ཚོགས་ཆེན་ཐེངས་གཉིས་པ༽  བཞུགས་སྒར་ངྷ་རམ་ས་ལར་ཚོགས་ཏེ། ཉིན་གསུམ་རིང་རྒྱལ་ཁབ་ ༢༡ ལྷག་གིས་སྐུ་ཚབ་དང་སྨན་པ་གྲངས་ ༢༢༧ ལྷག་གིས་གཏམ་བཤད་ཁག་ ༣༥ དང་། དཔྱད་རྩོམ་ ༢༡ བཅས་སྒྲོག་སྦྱང་བཅས་གནང་མཐར། ཕྱི་ཚེས་ ༢༩ ཉིན་གྱི་ཕྱི་དྲོ་བོད་མིའི་སྒྲིག་འཛུཊ་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་མཁས་དབང་རྣམ་པར་ཕྱག་རྟགས་དང་། ཚོགས་བཅར་བ་རྣམས་ལ་ཕྱག་འཁྱེར་འབུལ་བཞེས་བཅས་གནང་སྟེ་ཚོགས་འདུ་ཡོངས་སུ་མཇུག་སྒྲིལ་ཡོད།  

ཐེངས་འདིའི་ཚོགས་ཆེན་ཐེངས་གཉིས་པའི་གོ་སྒྲིག་ཚོགས་ཆུང་གི་ཚོགས་གཙོ་སྨན་པ་རྡོ་རྗེ་དགྲ་འདུལ་ལགས་སུ། ཐེངས་འདིའི་ཚོགས་ཆེན་གྱི་ཚོགས་ཞུགས་མི་སྣར་ཧིན་སྒོར་ ༡༥༠༠ ཚོགས་དོད་བསྡུ་རུབ་བྱེད་སྟངས་དང་། ཚོགས་ཐོག་ཏུ་བོད་ནས་སྐུ་ཚབ་དང་དཔྱད་རྩོམ་ག་ཚོད་ཡོང་ཡོད་མེད། རྒྱལ་སྤྱིའི་རྒྱལ་ཁབ་ཁག་ནས་ཕེབས་པའི་སྨན་པ་དེ་དག་ལ་བོད་ཀྱི་གསོ་བ་རིག་པའི་སློབ་སྦྱོང་དང་ལག་ལེན་གང་འདྲ་ཡོད་མེད་བཅས་ཀྱི་ཐད་བཅར་འདྲི་བྱས་པ་ཡིན། སྐབས་དེར་ཚོགས་གཙོ་ལགས་ཀྱིས་བརྗོད་དོན་ལྟར་ན། གོ་སྒྲིག་པའི་ངོས་ནས་ཐེངས་འདིའི་ཚོགས་ཐོག་ཏུ་བཅར་མཁན་ཨམ་ཆི་དང་ཉམས་ཞིབ་པ་ཚང་མ་ཚོགས་དོད་བསྡུ་རུབ་ཀྱི་ལམ་ནས་ཐོ་འགོད་བྱས་པ་དེའི་རྒྱུ་མཚན་གཙོ་བོ་ནི། ཐེངས་འདིའི་ཚོགས་འདུ་དེ་ཕྱི་རྒྱལ་དང་རྒྱ་གར་བཅས་ཀྱི་ཨམ་ཆི་མང་པོ་ཕེབས་པའི་རྒྱལ་སྤྱིའི་རང་བཞིན་གྱི་ཚོགས་འདུ་ཞིག་ཆགས་ཀྱི་ཡོད་སྟབས། རྒྱལ་སྤྱིའི་ཚོགས་འདུའི་འགྲོ་སྟངས་ལྟར་ཚོགས་དོད་བསྡུས་པ་ཞིག་ཡིན་པ་དང་། ཚོགས་འདུ་དེར་བོད་སྨན་སྦྱངས་མྱོང་མཁན་དང་བོད་སྨན་ཉམས་ཞིབ་པ། ཨམ་ཆི་བཅས་ཕྱི་རྒྱལ་གྱི་མི་སྣ་མང་པོ་ཞིག་ཕེབས་ཐུབ་ཡོད་ཀྱང་། བོད་ཀྱི་གསོ་བ་རིག་པའི་མཁས་དབང་དང་རྒྱུད་འཛིན་པ་མང་པོ་ཡོད་སའི་གཞིས་སྡོད་བོད་མིའི་སྐུ་ཚབ་གཅིག་ཀྱང་གདན་འདྲེན་ཞུས་ཐུབ་མེད་པར་མ་ཟད།  བོད་ནང་གི་ཚབ་མཚོན་གྱི་དཔྱད་རྩོམ་གཅིག་ཀྱང་སྒྲོག་སྦྱོང་ཐུབ་མི་འདུག   

ཁོང་ལ་ཐེངས་འདིའི་ཉིན་གྲངས་གསུམ་རིང་གི་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་འདུར་གྲུབ་འབྲས་གང་འདྲ་བྱུང་ཡོད་མེད་དང་། སྐབས་དང་པོའི་ཚོགས་འདུ་དང་མ་འདྲ་བའི་ཆ་གང་ཡོད་དྲིས་པར། ཁོང་གིས “ ད ་རེས་ཀྱི་ཉིན་གསུམ་རིང་གི་ཚོགས་འདུའི་གྲུབ་འབྲས་གཙོ་བོ། རྒྱལ་ཁབ་འདྲ་མིན་ནས་ཕེབས་པའི་ཨམ་ཆི་ཕན་ཚུན་ངོ་ཤེས་དང་། ཕན་ཚུན་གྱིས་ན་ཚའི་སྐོར་དང་སྨན་བཅོས། སྨན་སྦྱོར། བསྔོ་སྨན་བཅས་ངོ་སྤྲོད་དང་སྦྱང་བཤད་བྱས་ཏེ། ཤེས་ཚད་གོང་མཐོར་འགྲོ་བར་གྲུབ་འབྲས་ཐོན་ཡོད་པ་རེད་ལ། ཚོགས་འདུ་འདི་བརྒྱུད་དེ་མ་འོངས་པར་སྨན་བཅོས་དང་ཕྱོགས་ཡོངས་ནས་སྤུས་དག་པོ་དང་གསོ་བ་རིག་པར་ཕན་ཐོགས་ཆེན་པོ་ཡོང་གི་རེད་བསམ་གྱི་ཡོད། ཚོགས་འདུ་སྔ་གཞུག་གཉིས་བསྡུར་བ་ཡིན་ན། ཕྱི་ལོ་ ༧༢༨ ལོར་ཚོགས་པའི་རྒྱལ་སྤྱིའི་བོད་ཀྱི་གསོ་བ་རིག་པའི་ཚོགས་ཆེན་ཐེངས་དང་པོའི་ཐོག རྒྱ་གར་དང་རྒྱ་ནག  སྟག་གཟིག་བཅས་ཀྱི་སྨན་རིགས་ལ་ཉམས་ཞིབ་གོ་བསྡུར་གནང་བ་རེད། ད་རེས་ང་ཚོས་རྒྱ་གར་ཨ་ཡོ་ཝའི་ཚེ་རིག་བྱེད་ཀྱི་སྨན་པ་དང་སི་ཏའི་སྨན་པ། རྒྱ་ནག་གི་སྨན་པ་བཅས་གདན་དྲངས་ཏེ་ཕན་ཚུན་གོ་བསྡུར་བྱས་ཡོད་སྟབས། དེའི་ཕྱོགས་ནས་འདྲ་བོ་འདུག་བསམ།  ད་རེས་ང་ཚོ་ཉིན་གསུམ་ལས་ཚོགས་ཐུབ་ཡོད་པ་མ་རེད། སྔོན་མ་ཟླ་བ་དང་ལོ་བསྟུད་ནས་ཚོགས་ཐུབ་པ་དེ་མི་འདྲ་བའི་ཆ་རེད་བསམ་གྱི་འདུག མ་འོངས་པར་ཚོགས་འདུ་ཐེངས་གསུམ་པ་དེ་ད་ལྟའི་ཆར་དམིགས་བསལ་གྲོས་བསྡུར་བྱས་མེད་ཀྱང་། མ་འོངས་པར་རིམ་གྱིས་གནས་ཚུལ་ཡོང་གི་རེད་བསམ་གྱི་འདུག ”ཅེས་བརྗོད་བྱུང་།

བདེ་ལེགས་སྨན་ཁང་གི་ཨམ་ཆི་ཚེ་བརྟན་ལགས་སུ་ཐེངས་འདིའི་ཚོགས་ཆེན་སྐོར་ལ་བསམ་ཚུལ་དྲིས་པར། ཁོང་གིས། “ ང་ལ་མཚོན་ན་རྒྱལ་སྤྱིའི་བོད་ཀྱི་གསོ་བ་རིག་པའི་ཚོགས་ཆེན་ཐོག་མཉམ་ཞུགས་གནང་བ་ཐོག་མ་ཡིན། འདས་པའི་ལོ་ ༢༩ ལྷག་གི་རིང་ངྷ་རམ་ས་ལར་བསྡད་དེ་སྨན་རྩིས་ཁང་དང་མཉམ་དུ་འབྲེལ་བ་ཡོད་སྟབས། ད་རེས་བཙན་བྱོལ་སྒྲིག་འཛུགས་ཀྱིས་འདི་འདྲའི་ཚོགས་ཆེན་ཞིག་ཚོགས་ཐུབ་པར་ང་རང་ཧང་སངས་སོང་། ད་རེས་རྒྱབ་ཁབ་ཁག་ ༢༡ ལྷག་ནས་བོད་སྨན་གཅིག་པུ་མ་ཡིན་པར། གཙོ་བོ་ཉམས་ཞིབ་ཀྱི་ཐོག་ལ་བགྲོ་གླེང་མང་པོ་བྱུང་སོང་། དེ་ང་རང་གིས་ཡག་པོ་མཐོང་བྱུང་། དེའི་ཐད་༸གོང་ས་མཆོག་གིས་ད་རེས་ཀྱི་ཚོགས་བཅར་བར་མཇལ་ཁ་གནང་སྐབས་ཀྱང་། ཁྱེད་རང་ཚོས་སྔོན་མར་ཡོད་པའི་སྒྲོམ་གཞི་གཅིག་པུར་ཆོག་ཤེས་བྱས་ན་འགྲིག་གི་མ་རེད། སྔར་གྱི་སྒྲོམ་གཞིའི་ཐོག་གསར་གཏོད་བྱས་ཏེ་འགྲོ་དགོས་པ་རེད་ཅེས་གསུངས་བྱུང་། ང་ཚོའི་ངོས་ནས་ཀྱང་བོད་ལུགས་གཅིག་པུ་མ་ཡིན་པར། རྒྱ་གར་དང་རྒྱ་ནག་བཅས་ཀྱི་ལེགས་ཆ་འདེམས་སྒྲིག་གིས་ཡར་རྒྱས་གཏོང་དགོས་པ་རེད་བསམ་གྱི་འདུག  ཐེངས་འདིའི་ཚོགས་འདུའི་མཇུག་བསྡོམས་སྐབས་མ་འོངས་པར་ཚོགས་ཆེན་ཐེངས་གསུམ་པ་འཚོག་རྒྱུ་ཡིན་ཞེས་བརྗོད་བྱུང་། མ་འོངས་པར་འཚོག་པ་ཡིན་ན། ཉམས་ཞིབ་ཀྱི་ཕྱོགས་ནས་ཐེངས་འདི་ལས་ཚད་མཐོ་རུ་འགྲོ་གི་རེད་བསམ་གྱི་འདུག ཡིན་ནའང་། ད་རེས་ཀྱི་གནས་སྟངས་ལ་བལྟས་ན་བོད་པའི་ནང་དུ་ཉམས་ཞིབ་བྱེད་མཁན་ཉུང་དྲག་འདུག་བསམ་གྱི་ཡོད། མ་འོངས་པར་མང་པོ་ཡོང་ཐུབ་རྒྱུ་ཧ་ཅང་གལ་ཆེན་རེད་ལ། ལྷག་པར་དུ་བོད་ནང་གསོ་བ་རིག་པར་ལག་ལེན་གནང་མཁན་ཚོ་ངེས་པར་དུ་ཕེབས་ཐབས་བྱ་དགོས་ཀྱི་འདུག དེའི་ཕྱོགས་ལ་མ་འོངས་པར་འབྲེལ་བ་དང་ཡར་རྒྱས་གཏོང་རྒྱུ་གལ་ཆེན་པོ་རེད། ” ཅེས་གསུངས་བྱུང་།

སྨན་རྩིས་ཁང་གི་འགན་འཛིན་ཟུར་པ་ཟླ་བ་ལགས་སུ་བསམ་ཚུལ་དྲིས་པར། ཁོང་གིས། “ ཐེངས་འདིའི་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་འདུའི་ཐོག་བོད་པ་ཙམ་མིིན་པར་འཛམ་གླིང་རྒྱལ་ཁབ་མང་པོའི་སྐུ་ཚབ་འཛོམས་ཐུབ་པ་དང་། ལྷག་པར་དུ་བོད་སྨན་ལ་དོ་སྣང་དང་སློབ་སྦྱོང་། ཉམས་ཞིབ་བྱེད་མཁན་མང་པོ་ཕེབས་ཏེ། རང་ཉིད་ཀྱི་ཉམས་མྱོང་དང་དཔྱད་རྩོམ་བཅས་ཁག་ཅིག་ཉམས་པ་སླར་གསོའི་ཐད་དང་། ཁག་ཅིག་རང་གི་སྨན་གྱི་ཁྱད་ཆོས་མ་བརླགས་པའི་ཐོག་ཚན་རིག་དང་མཐུན་པའི་ཉམས་ཞིབ་བྱ་རྒྱུ། ཡང་ཁག་ཅིག་མ་འོངས་པར་བོད་ཀྱི་གསོ་བ་རིག་པ་ཇི་ལྟར་འཕེལ་རྒྱས་གཏོང་མིན་བཅས་ཀྱི་ཐོག་བགྲོ་གླེང་གནང་སྟེ། སྐུལ་མ་ཆེན་པོ་ཞིག་ཆགས་འགྲོ་གིོ་རེད་བསམ་གྱི་འདུག གཙོ་བོ་ང་ཚོ་འཛོམས་པ་ཙམ་མིན་པར། མ་འོངས་པར་འབད་བརྩོན་བྱ་རྒྱུ་མི་རབས་འདིའི་ཕྲག་དུ་བབ་པའི་ལས་འགན་རེད་ལ། དེ་མ་འཁུར་བ་ཡིན་ན་ཉེན་ཁ་ཆགས་བསྡད་ཡོད་པ་རེད། འཁུར་བ་ཡིན་ན་ད་ལྟའི་དུས་ཚོད་འདི་ཧ་ཅང་གལ་ཆེན་པོ་ཆགས་འདུག” ཅེས་བརྗོད་བྱུང་།   

ཡང་ཁོང་ལ་མ་འོངས་ཚོགས་ཆེན་ཐེངས་གསུམ་པ་ཚོགས་སྐབས་ཁ་གསབ་དང་། ངེས་པར་དུ་ཚང་དགོས་པའི་ཆ་རྐྱེན་གང་ཡོད་པའི་སྐོར་དྲིས་པར།  ཁོང་གིས། “ སྔོན་ཆད་ཨ་རི་དང་འབྲུག ཡུ་རོབ་བཅས་རྒྱལ་ཁབ་ཁག་ཏུ་རྒྱལ་སྤྱིའི་བོད་སྨན་ཚོགས་འདུ་ཚོགས་ཡོད་པ་རེད།  ང་རང་གི་ངོས་ནས་རྩ་བའི་བཙན་བྱོལ་བོད་པའི་སྤྱི་ཚོགས་ནང་ཚོགས་ཐུབ་པ་དེ་ལོ་རྒྱུས་རང་བཞིན་ཆགས་ཡོད་པ་རེད་བསམ་གྱི་འདུག ཡིན་ནའང་། དེ་ལས་གཞི་རྒྱ་ཆེན་པོ་ཞིག་དང་། ལྷག་པར་དུ་བོད་ནང་མཁས་པ་མང་པོ་ཞིག་ལྷག་བསྡད་ཡོད་སྟབས། ཁོང་ཚོ་ཚོགས་འདུ་འདིའི་རིགས་ལ་བཅར་ཐུབ་པར་བྱ་རྒྱུ་དེ་མེད་དུ་མི་རུང་བའི་ཆ་རྐྱེན་ཞིག་ཆགས་ཡོད་པ་རེད། མ་འོངས་པར་ཡང་བསྐྱར་བཙན་བྱོལ་ནང་འཚོག་པ་ཡིན་ན་ཧ་ཅང་ཁག་པོ་རེད། ང་ཚོའི་ངོས་ནས་གོ་སྒྲིག་གནང་མཁན་རང་འཇགས་ཡིན་པའི་ཐོག བཙན་བྱོལ་སྤྱི་ཚོགས་མ་ཡིན་པའི་རྒྱལ་ཁབ་གཞན་དུ་འཚོག་ཐུབ་པ་ཡིན་ན། ཁོང་རྣམ་པ་ཕེབས་ཐུབ་པར་གོ་སྐབས་དང་ཆ་རྐྱེན་ཞིག་ཆགས་ཡོད་པ་རེད། དེ་ཧ་ཅང་གལ་ཆེན་པོ་རེད། ” ཅེས་བརྗོད་བྱུང་།

གསར་འགོད་པ། དོན་གོ