ཁ་སང་དམར་ཤོག་སྐབས་ ༡༧ ཚོགས་འདུ་ཐ་མ་མཇུག་སྒྲིལ་ཡོད་ལ། ཚོགས་འདུའི་སྤྱི་བསྒྲགས་ནང་མའོ་ཡི་བསམ་བློ་གླེང་མེད་པ་དང་། ཞིས་ཡིས་དམར་ཤོག་སྒྲིག་ཡིག་བསྐྱར་བཅོས་ཐད་གསལ་བཤད་བྱས་ཡོད་འདུག
རྒྱ་གཞུང་དམར་ཤོག་སྐབས་ ༡༧ པའི་ཚོགས་འདུ་ཐེངས་ ༧ པ་དང་། རྒྱ་གཞུང་དབུས་རྩ་འཛུགས་ཞིབ་བཤེར་ལྷན་ཚོགས་སྐབས་ ༡༧ པའི་ཚོགས་འདུ་ཐེངས་ ༨ པ་གཉིས་ནི། པེ་ཅིན་སྲང་དུ་ཕུག་རོན་གཏོང་མི་ཆོག་ལ་རླངས་འཁོར་གྱི་དྲ་སྒོའང་འབྱེད་མི་ཆོག་པའི་ཧ་ཅང་དམ་དྲགས་ཀྱི་གནས་བབ་ཅིག་གི་འོག་ཡོང་བསྒྲགས་མ་ཡིན་པའི་ཐོག་ཚོགས་ཏེ། ཟླ་འདིའི་ཕྱི་ཚེས་ ༤ ཉིན་མཇུག་སྒྲིལ་ཡོད་པ་མ་ཟད། གཟའ་ཉི་མའི་དགོང་མོར་ཞིན་ཧྭ་གསར་ཁང་གིས་ཚོགས་འདུ་མཇུག་སྒྲིལ་ཟིན་པའི་གནས་ཚུལ་ཞིག་སྤེལ་བ་ཙམ་མ་གཏོགས། ཚོགས་འདུ་དང་འབྲེལ་བའི་གསར་འགོད་ལྷན་ཚོགས་དང་། གསར་འགོད་པར་བཅར་འདྲིའི་གོ་སྐབས་སོགས་གང་ཡང་སྤྲད་མེད་པ་རེད།
ཞིན་ཧྭ་གསར་ཁང་གིས་སྤེལ་བའི་གནས་ཚུལ་ནང་། ཚོགས་འདུའི་ཐོག་སྐབས་ ༡༨ པའི་དམར་ཤོག་ཚོགས་འདུའི་ཐོག་གི་སྙན་ཐོ་དང་། རྒྱ་གཞུང་དམར་ཤོག་ཚོགས་པའི་སྒྲིག་ཡིག་བསྐྱར་བཅོས་ཡིག་ཆ་གཉིས། དམར་ཤོག་སྐབས་ ༡༨ པའི་ཚོགས་འདུའི་ཐོག་གྲོས་སྡུར་གཏན་འབེབས་བྱ་རྒྱུ་ཐག་གཅོད་བྱུང་ཡོད་ཚུལ་དང་། ཞི་ཅིན་ཕེན་གྱིས་དམར་ཤོག་པའི་སྒྲིག་ཡིག་བསྐྱར་བཅོས་ཐད་གསལ་བཤད་བྱས་ཡོད་སྐོར་བཀོད་འདུག ཐེངས་འདིའི་དམར་ཤོག་ཚོགས་འདུའི་སྤྱི་བསྒྲགས་ནང་ཏུན་གྱི་རིག་པའི་གཞུང་ལུགས་དང་ཅཱང་གི་མཚོན་བྱེད་གསུམ། ཧུའུ་ཡི་ཚན་རིག་འཕེལ་རྒྱས་ལྟ་བ་གསུམ་མ་གཏོགས། མའོ་ཙེ་ཏུང་གི་བསམ་བློའི་སྐོར་གླེང་སློང་བྱས་མེད་སྟབས། ཕྱི་རྒྱལ་གསར་ལམ་ཁག་གིས་རྒྱ་གཞུང་དམར་ཤོག་སྐབས་ ༡༨ པའི་ཚོགས་འདུའི་སྟེང་། ཉེ་སྔོན་གྱི་མའོ་ཡི་བསམ་བློ་དམར་ཤོག་པའི་སྒྲིག་ཡིག་ཁྲོད་ཕྱིར་ཕུད་ཀྱི་གླེང་སློང་དེ་དངོས་འབེབས་ཡོང་སྲིད་པའི་ཚོད་བགམ་བྱེད་བཞིན་ཡོད། ཕྱོགས་གཞན་ཞིག་ནས་གནས་སྟངས་འདིས་དམར་ཤོག་པའི་སྒྲིག་ཡིག་དང་རྩ་འཛུགས་ཀྱིས་ཁུངས་འཁྱོལ་གྱིན་མེད་མངོན་ཡོད།
དེ་བཞིན། ཟླ་སྔོན་མའི་ཕྱི་
ཚེས་ ༢༥ ཉིན་རྒྱ་ནག་ཧི་ནན་ཀྲིན་ཀྲིག་གྲོང་ཁྱེར་གྱི་ཙི་ཅིན་རི་བོའི་ཐང་ཆེན་གྱི་མའོ་ཙེ་ཏུང་གི་འཇིམ་བརྙན་གྱི་རྒྱབ་ཕྱོགས་ནས། ཚའོ་ཞོ་ཏུང་སོགས་རྒྱ་རིགས་ན་གཞོན་ ༤ ཡིས་མའོ་ཡི་པར་རིས་གཙབས་རལ་དུ་བཏང་ཡོད་པ་མ་ཟད། ལས་འགུལ་དེ་དང་འབྲེལ་བའི་ཁོ་ཚོའི་འདྲ་པར་ཁག་གནས་འཕྲིན་དྲ་རྒྱའི་སྟེང་བཀྲམས་ཡོད་པ་དང་། ཁོ་ཚོའི་ལས་འགུལ་དེར་དྲ་རྒྱའི་སྟེང་གླེང་སློང་ཤུགས་ཆེན་པོ་བསླེབ་བཞིན་ཡོད་སྟབས། ཟླ་འདིའི་ཕྱི་ཚེས་ ༡ ཉིན་གྱི་དགོང་མོ་ས་གནས་ཉེན་རྟོག་པས་ཚའོ་ཞོ་ཏུང་འཇུ་བཟུང་ཡོད་འདུག དེ་མིན། ཉེ་སྔོན་རྒྱ་ནག་དམར་ཤོག་སྐབས་ ༡༨ པའོ་ཚོགས་འདུའི་གསར་འགོད་སྟི་གནས་སུ་སྒྲིག་བཤོམས་བྱས་ཡོད་པའི་ཀྲའོ་ཙི་ཡང་གི་པར་རིས་དེའང་ཕྱི་ཚེས་ ༢ ནས་ཕྱིར་བསྡུ་བྱེད་བཅུག་ཡོད་འདུག
ཐེངས་འདིའི་ཚོགས་འདུ་ནི་རྒྱ་གཞུང་དབུས་ཆབ་སྲིད་ལྷན་ཁང་གིས་གོ་སྒྲིག་འོག་ཚོགས་ཡོད་ལ། ཚོགས་འདུའི་ཐོག རྒྱ་གཞུང་དབུས་དམར་ཤོག་འཐུས་མི་ ༢༠༠ དང་། རྗེས་སྣོན་འཐུས་མི་ ༡༦༥ ། རྒྱ་གཞུང་དབུས་རྩ་འཛུགས་ཞིབ་བཤེར་ལྷན་ཚོགས་ཀྱི་འཐུས་མི་དང་འབྲེལ་ཡོད་མི་སྣ་བཅས་ཚོགས་ཞུགས་བྱས་ཡོད་པ་དང་། ཚོགས་འདུའི་ཐོག་རྒྱ་གཞུང་དབུས་རྩ་འཛུགས་ཞིབ་བཤེར་ལྷན་ཚོགས་ཀྱི་ཞིབ་བཤེར་སྙན་ཐོ་ལྟར། པའོ་ཞི་ལའེ་དང་ལིག་ཀྲི་ཅོན་གཉིས་རྒྱ་ནག་དམར་ཤོག་ཚོགས་མིའི་ཁྲོད་ནས་ཕྱིར་ཕུད་གཏོང་རྒྱུ་ཐག་གཅོད་མོས་མཐུན་བྱས་ཡོད་འདུག
སྐབས་དོན་དཔྱད་བརྗོད་པ་དག་གིས། དམར་ཤོག་ཚོགས་མི་ནས་ཕྱིར་ཕུད་དང་། གཞུང་གི་ལས་གནས་ནས་ཕྱིར་ཕུད་གཉིས་ནི་རྒྱ་གཞུང་གི་གཞི་རྩའི་བཅའ་ཁྲིམས་ཀྱི་ངོས་ཐད་ནས། དམར་ཤོག་དང་སྲིད་གཞུང་གཉིས་ཀྱིས་ངོ་བོ་གཅིག་ཏུ་གྱུར་ཡོད་པ་གསལ་བོ་མཚོན་ཡོད་ལ། པའོ་ཞི་ལའེ་ཡི་གནད་དོན་ཅི་ལྟར་ཐག་གཅོད་མིན་དེ་ནི། སྐབས་ ༡༨ པའི་ཚོགས་འདུའི་སྟེང་རྒྱ་གཞུང་གི་ཆེས་མཐོའི་དབང་འཛིན་མཁན་ཆབ་སྲིད་ལྷན་ཁང་གི་རྒྱུན་ལས་མི་ ༧ ཡོང་བསྒྲགས་མིང་འདོན་བྱས་པའི་རྗེས། ཞི་ཅིན་ཕེན་དང་ལི་ཁི་ཆང་གཉིས་ཀྱིས་སྣེ་ཁྲིད་པའི་དཔོན་རིགས་གསར་བ་ཚོའི་ལས་དོན་གལ་ཆེ་ཤོས་དེ་ཆགས་ཡོད་པའི་ངོས་འཛིན་བྱེད་ཀྱི་ཡོད་འདུག
གཞན་ཡང་། ཚོགས་ཐོག་ཏུ་ཧྥན་ཀྲང་ལཱུང་དང་ཞིས་ཆི་ལཱེང་གཉིས་རྒྱ་གཞུང་དབུས་དམག་དོན་ལྷན་ཚོགས་ཀྱི་སྲིད་འཛིན་གཞོན་པར་སྐོ་བཞག་དང་། རྒྱ་གཞུང་དབུས་དམར་ཤོག་འཐུས་མིའི་རྗེས་སྣོན་འཐུས་མི་ཝང་ཞའོ་ཅོན་དང་། ཝང་ཅན་ཕེན་གཉིས་འཐུས་མིའི་ཁྲོད་འདེམས་སྒྲུག་བྱས་ཡོད་སྐོར་བསྒྲགས་ཡོད་པ་རེད།
གསར་འགོད་པ། ཚེ་རིང་རྒྱལ།
བཀུར་འོས་གསར་འགོད་པ་མཆོག་ལ།
དུས་ཐོག་གི་ཆར་ལྟར་གསར་འགྱུར་འདི་རིགས་མཁོ་སྤྲོད་གནང་བ་བཀའ་དྲིན་ཆེ།
“མའོ་ཀྲུའུ་ཞི་ཁྲི་ལོར་བརྟན་པར་ཤོག” ཅེས་གནམ་སའི་བར་དུ་གྲགས་ཀྱང་།
དེ་རིང་གི་གནས་སྟངས་འདི་མཐོང་དུས་”མའོ་ཡི་འདྲ་པར་ཙམ་ཡང་རྒྱ་ནག་ནང་ཡུན་གནས་ཐུབ་ཐབས་མེད་པ་འདྲ། ”
རྒྱ་ནག་ནང་དུ་ཆབ་སྲིད་ཀྱི་གནས་བབ་ཛ་དྲག་ཅན་དུ་གྱུར་ནའང་། བོད་་་་་་་་་་་?
ཞི་ཇེན་ཕེན་གྱི་སྲིད་འཛིན་བྱེད་སྐབས་ངའི་སེམས་ལ་རེ་བ་ཅུང་ཟད་ཡོང་གི་འདུག རྒྱུ་མཚན་ནི་གཞན་མིན་ད་སྐབས་ཞི་དང་ལྷན་དུ་དམར་ཤོག་ཀྱི་མགོ་ཁྲིད་བརྒྱ་ཆ་དྲུག་ཅུ་ལྷག་རྗེ་ལེན་བྱེད་ཀྱིན་ཡོད་ཚུལ་ཐོས་པས་དེ་ལྟར་ན་མི་རབས་གསར་བའི་དཔུང་ཁག་ཅིག་འགྲུབ་རྒྱུ་ཡིན་ཞིང་། དེས་ན་སྔོན་མ་ཅང་དང་ཧུ་སོགས་ཀྱི་སྐབས་སུ་ང་ཚོས་རེ་བ་བྱས་པ་དང་མི་འདྲ་བར་བསམ་ཡོད།
རྒྱ་ལ།
རྒྱ་ལ་དམར་གསོད་ལག་དམར་ལོ་རྒྱུས་ཁེངས་ཡོད། ། །
རྒྱ་ལ་ངན་དགུ་སྡུག་ཤི་མང་པོ་ཐེབས་ཡོད། །
རྒྱ་ལ་མ་འོའི་རོ་འཁོགས་གཅིག་ཉིད་ལྷག་ཡོད།
རྒྱ་ལ་ལྐོག་ཟ་རུལ་སུངས་གང་ནས་བསྡད་ཡོད། །
གངས་ཕྲུག་གིས།
གངས་ཕྲུག་ཨེ་གླིང་ཤར་ནུབ་གཡུ་རལ་ངོམས་ཡོད། །
གངས་ཕྲུག་བསྟན་སྲིད་དོན་ལ་ལུས་སྲོག་བཏང་ཡོད། །
གངས་ཕྲུག་མང་གྱར་ནང་བསྟན་རྩ་བ་བཟུང་ཡོད། །
གངས་ཕྲུག་མང་པོས་ཞི་རྒོལ་མེག་སྲེག་བྱས་ཡོད། །
བོད་ལ།
བོད་ལ་གཞིས་བྱེས་མཉམ་འཛོམས་འོང་བའི་དུས་ཡོད། །
བོད་ལ་རང་དབང་བདེ་སྐྱིད་ཤར་བའི་དུས་ཡོད། །
བོད་ལ་ཆོས་རིག་དཔལ་འབྱོར་འཕེལ་བའི་དུས་ཡོད། །
བོད་ལ་འཛམ་གླིང་ཞི་བདེ་སྤེལ་བའི་དུས་ཡོད། །