ཅཱང་དང་ཧུའུ་མཉམ་འདུག

དེ་རིང་སྔ་དྲོ་རྒྱ་དམར་སྐབས་ ༡༨ པའི་ཚོགས་འདུ་མགོ་བཙུགས་བྱས་ཡོད་ཀྱང་། ཧུའུ་ཡི་གཏམ་བཤད་ཁྲོད་སྐད་ཆ་གསར་པ་གང་ཡང་ཐོན་མི་འདུག

དེ་རིང་སྔ་དྲོ་ཆུ་ཚོད་ ༩ པའི་ཐོག་རྒྱ་ནག་མི་མང་ཚོགས་ཁང་ཆེན་མོ་ཟེར་པའི་ནང་དུ།  རྒྱ་དམར་སྐབས་ ༡༨ པའི་རྒྱལ་ཡོངས་དམར་ཤོག་ཚོགས་ཆེན་ཚོགས་ཡོད་ལ། ཁ་སང་ཚོགས་འདུ་སྟ་གོན་ནས་དེ་རིང་མགོ་འཛུགས་ཀྱི་ཉིན་གཉིས་རིང་།  བོད་ནང་དུ་བོད་མི་ ༦ གིས་རང་ལུས་མེར་བསྲེགས་བཏང་སྟེ།  རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་སྲིད་ཇུས་ལ་ངོ་རྒོལ་བྱས་ཏེ།  ༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་སྤྲོད་དགོས་པའི་སྐད་འབོད་བྱས་ཡོད་པ་རེད། 

རྒྱ་གཞུང་གི་དཔོན་རིགས་གསར་རྙིང་བརྗེ་སྤོར་དང་འབྲེལ་བའི་དམར་ཤོག་སྐབས་ ༡༨ པའི་རྒྱལ་ཡོངས་ཚོགས་འདུའི་སྟེང་།  ཅཱང་ཙེ་མཱེན་ནི་མགོ་ཁྲིད་གཙོ་བོ་ཨང་གཉིས་པའི་མིང་ཐོག་ནས་ཧུའུ་ཅིན་ཐའོ་དང་མཉམ་དུ་མགོ་ཁྲིད་སྟེགས་བུའི་སྟེང་བསྡད་ཡོད་པ་དང་། ཚོགས་འདུའི་དྲུང་ཡིག་ཆེན་མོར་ཞི་ཅིན་ཕེན་དང་། དྲུང་ཡིག་གཞོན་པར་ལཱུག་ཡོན་ཧྲན་དང་ལིས་ཡོན་ཁྲའོ། ལི་ཀྲན་ཧྲུའུ་གསུམ་བསྐོ་བཞག་བྱས་འདུག  དེ་བཞིན། ཐེངས་འདིར་དམར་ཤོག་མགོ་ཁྲིད་སྟེགས་བུ་སྟེང་།  དབུས་ཆབ་སྲིད་ལྷན་ཁང་གི་འཐུས་མི་རྣམས་དང་། དབུས་དྲུང་ཆེ་ལྷན་ཚོགས་ཀྱི་འཐུས་མི། དམར་ཤོག་མགོ་ཁྲིད་ཟུར་པ་ཚོ་ལས་གཞན་ད་དུང་།  ཉེ་ཆར་གསར་དུ་བསྐོ་འཇོག་བྱས་པའི་རྒྱ་དམག་གི་མགོ་གཙོ་གཞོན་པ་ཧྥན་ཀྲང་ལུང་དང་ཞུས་ཆིས་ལཱིང་། ད་ལྟའི་དབུས་དམར་ཤོག་དྲུང་ཆེ་ལྷན་ཚོགས་ཀྱི་དྲུང་ཆེ་ཧའི་ཡུང་དང་ལཱེན་ཅིས་ཧྭ། ཝང་ཧུའུ་ཉཱིན་བཅས་ཀྱང་མགོ་ཁྲིད་ཀྱི་སྟེགས་བུའི་སྟེང་བསླེབས་ཡོད་འདུག

ཧུའུ་ཅིན་ཐའོ་ཡིས་ཚོགས་འདུ་མགོ་འཛུགས་ཀྱི་སྙན་ཐོ་ཀློག་འདོན་སྐབས།  བློ་བརྟན་འགྱུར་མེད་ཀྱིས་རྒྱ་གཞུང་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ཕྱོགས་སུ་བསྐྱོད་དེ་འབྱོར་འབྲིང་སྤྱི་ཚོགས་བསྐྲུན་རྒྱུར་ཤུགས་བརྒྱག་རྒྱུ་དང་། ཚན་རིག་འཕེལ་རྒྱས་ལྟ་བ་དེ་དམར་ཤོག་པའི་ཡུན་རིང་རྒྱུན་འཛིན་བྱེད་དགོས་པའི་བསམ་བློའི་མཛུབ་སྟོན་ཡིན་པ་དང་། ཚན་རིག་འཕེལ་རྒྱས་ལྟ་བ་ནི་མཱ་ཁེ་སི་ལའེ་ཉཱན་རིང་ལུགས་དང་། མའོ་ཡི་བསམ་བློ། ཏུན་གྱི་རིག་པའི་གཞུང་ལུགས། ཅཱང་གི་མཚོན་བྱེད་གསུམ་བཅས་དང་ལམ་ཕྱོགས་གཅིག་གྱུར་ཡིན་སྐོར་བཤད་འདུག 

དེ་བཞིན།  ཧུའུ་ཅིན་ཐའོ་ཡིས་ཚོགས་ཐོག་ཏུ་རུལ་སུངས་ཀྱི་གནད་དོན་ནི། རྒྱ་གཞུང་དམར་ཤོག་གི་ཤི་གསོན་དང་འབྲེལ་བ་ཆགས་ཡོད་པ་དམིགས་འདོན་ཙམ་བྱས་ཡོད་ནའང་།  ཁོས་རྒྱ་གཞུང་གི་མ་འོངས་པའི་ལམ་ཕྱོགས་ཀྱི་ཐད་ནས་སྐད་ཆ་བཤད་སྐབས། མུ་མཐུད་དུ་བློ་བརྟན་འགྱུར་མེད་ཀྱིས་དམར་ཤོག་པའི་དབུ་ཁྲིད་རྒྱུན་འཛིན་ཐོག  རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ཕྱོགས་སུ་བསྐྱོད་རྒྱུ་ཡིན་པ་ལས།  གནའ་བོའི་སྒོ་འབྱེད་མ་ཡིན་པའི་ལམ་རྙིང་པ་དང་།  ལངས་ཕྱོགས་སྒྱུར་བཅོས་ཀྱི་ལམ་གསར་བ་གང་ལའང་བསྐྱོད་རྒྱུ་མིན་སྐོར་བཤད་ཡོད་པ་རེད། 

རྒྱ་གཞུང་གི་གསར་ལམ་ཁག་ཏུ་སྐབས་ ༡༨ པའི་ཚོགས་འདུའི་གླེང་གཞི་གཙོ་བོར།  སྐབས་ ༡༨ པའི་ལས་དོན་སྙན་ཐོ་དང་། རུལ་སུངས་བཀག་སྡོམ། དམར་ཤོག་སྒྲིག་ཡིག་བསྐྱར་བཅོས་སོགས་དྲིལ་སྒྲོག་བྱེད་བཞིན་ཡོད་པ་རེད། དམར་ཤོག་པའི་སྒྲིག་ཡིག་བསྐྱར་བཅོས་ཐེངས་སྔོན་མ་དེ་ཕྱི་ལོ་ ༡༩༨༢ ཟླ་ ༩ ནང་བྱས་ཡོད་འདུག  ཡིན་ནའང་། ཚོགས་འདུའི་མགོ་སློང་བའི་ཧུའུ་ཅིན་ཐའོ་ཡི་གཏམ་བཤད་དང་།  ཅཱང་ཙེ་མཱེན་ཐེངས་འདི་ཚོགས་ཐོག་ཏུ་དཔོན་རིགས་གཙོ་བོ་ཨང་གཉིས་པ་ཆགས་ཡོད་པ་བཅས་ལས།  རྒྱ་གཞུང་གི་ཆབ་སྲིད་ལ་དམིགས་བསལ་འགྱུར་བ་གང་ཡང་འགྲོ་ཐུབ་རྒྱུ་མིན་པ་མངོན་ཡོད་པ་རེད། དེ་བཞིན། སྲིད་དོན་དཔྱད་བརྗོད་པ་དག་གིས་ཀྱང་། ཆབ་སྲིད་བཅོས་སྒྱུར་གྱི་ཐད་ནས་འགྱུར་བ་ཆེན་པོ་ཞིག་འབྱུང་ཐུབ་རྒྱུ་མིན་པའི་ངོས་འཛིན་བྱེད་ཀྱི་ཡོད་འདུག

རྒྱ་གཞུང་སྐབས་ ༡༨ པའི་ཚོགས་འདུ་དེ་ཕྱི་ཚེས་ ༨ ནས་ ༡༤ ཚོགས་ཀྱི་ཡོད་ལ།  ཚོགས་འདུའི་གསར་འགོད་མགྲིན་ཚབ་པ་ཚེ་མཱེན་ཀྲའོ་ཡིས་བརྗོད་པ་ལྟར་ན། ཕྱི་ཚེས་ ༩ ནས་ ༡༢ བར་ཉིན་རེར་ཕྱི་ནང་གི་གསར་འགོད་པ་ཚོར་གསར་འགོད་ལྷན་ཚོགས་རེ་འཚོག་རྒྱུ་ཡིན་སྐོར་བཤད་ཡོད་པ་རེད།

གསར་འགོད་པ། ཚེ་རིང་རྒྱལ།