བལ་གཞུང་གིས་བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་ལགས་ལ་བཙོན་འཇུག་ཁྲིམས་ཐག་བཅད་ནས་ཟླ་ ༥ ལྷག་འགྲོ་བཞིན་པ་ལྟར། ཁོང་གིས་བཙོན་ཁང་ནང་ཞི་བའི་ངག་བཅད་བྱས་ཏེ་ཟླ་གཅིག་ཙམ་ཕྱིན་ཡོད་འདུག
བལ་གཞུང་གིས་བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ལ་ཁྲིམས་ཐག་བཅད་དེ་ཟླ་ ༥ ཙམ་ཕྱིན་ཡོད་པ་ལྟར། ཟླ་འདིའི་ཕྱི་ཚེས་ ༡༡ ཉིན་ས་དཀར་བསྟན་འཛིན་དང་དོན་ལྡན། སྐལ་བཟང་གསུམ་བལ་ཡུལ་བཙོན་ཁང་དུ་གླིང་ཚ་ཚེ་བརྟན་རྡོ་རྗེ་ལགས་ལ་ཐུག་འཕྲད་དུ་ཕྱིན་ཡོད་ལ། ད་ལྟའི་ཆར་ཁོང་གི་ལུས་ཕུང་བདེ་ཐང་ཡིན་འདུག་ཀྱང་། ཁོང་གིས་བཙོན་ཁང་ནང་ཞི་བའི་ངག་བཅད་བྱས་ཏེ་ཟླ་གཅིག་མ་ཟིན་ཙམ་འགྲོ་བཞིན་ཡོད་འདུག
གླིང་ཚར་ཐུག་འཕྲད་དུ་བསྐྱོད་མཁན་དོན་ལྡན་ལགས་ཀྱིས་འདི་གར་གནས་ཚུལ་བརྗོད་དོན་ལྟར་ན། ཁོ་ཚོས་ཕན་ཚུན་ཡི་གེའི་ལམ་ནས་སྐད་ཆ་བཤད་སྐབས། གླིང་ཚ་ཚེ་བརྟན་རྡོ་རྗེ་ལགས་ཀྱིས། “ངས་མུ་མཐུད་ཞི་བའི་གོམ་བགྲོད་བྱེད་རྒྱུ་ཡིན། མི་རིགས་ཤིག་གི་བདེན་པ་རྩོད་དགོས་ན། སོ་སོའི་ལུང་པར་རྐང་པ་བཞག་སྟེ་རྩོད་དགོས་པ་ལས། ཕྱི་ལོགས་ནས་བོད་དོན་རྒྱབ་སྐྱོར་དང་ཞལ་འདེབས་བསྡུ་རུབ་བྱས་ནས་ཕན་ཐོག་གང་ཡང་ཡོད་པ་མ་རེད། ང་བཙོན་གྲོལ་མ་ཐོབ་བར་དུ་ཞི་བའི་ངག་བཅད་བྱེད་རྒྱུ་ཡིན་ལ། ངའི་ཞི་བའི་འཐབ་རྩོད་ཀྱི་དགོས་པ་དང་ཉིང་དགོས་སོགས་ལ་རྒྱུ་མཚན་ལྡན་པའི་སྒོ་ནས་དཔྱད་ཞིབ་གནང་རོགས། ཁ་ཤས་ཀྱིས་ངའི་རྩོམ་ཡིག་མང་པོ་དྲྭ་ཐོག་ཏུ་བརྒྱུད་འགོད་བྱས་ན། ང་བཙོན་གྲོལ་ཡོང་རྒྱུར་དཀའ་ལས་ཁག་རབས་སོགས་བརྗོད་ཀྱིན་འདུག མི་དེ་ཚོའི་རིགས་ཀྱིས་ངའི་ཞི་བའི་འཐབ་རྩོད་དང་ང་བཙོན་གྲོལ་བྱེད་པར་ལག་པ་མ་འཆང་རོགས། ”ཞེས་བརྗོད་ཡོད་པ་རེད།
དེ་བཞིན། ཁོ་ཚོ་བཙོན་ཁང་ནས་ཕྱིར་ཡོང་ཁར་གླིང་ཚ་ཚེ་བརྟན་རྡོ་རྗེ་ལགས་ཀྱིས། “ཁྱོད་རང་ཚོས་ངའི་ཆེད་དུ་ཞལ་འདེབས་སྐར་གང་ཡང་སློང་མི་ཆོག མི་སུས་བསླང་ན་ངས་ངོས་ལེན་རྩ་བ་ནས་མེད། མང་པོ་ཞིག་གིས་ལས་འགུལ་སྤེལ་གྱི་ཡོད་ཟེར་ནས། མི་མང་གི་ལག་ནས་ཞལ་འདེབས་བསྡུ་རུབ་བྱས་ཏེ་མི་མང་སུན་པོ་བཟོ་བཞིན་ཡོད་པས་དེ་འདྲ་མ་བྱེད་རོགས། ངས་མུ་མཐུད་དུ་ཞི་བའི་གོམ་བགྲོད་བྱེད་རྒྱུ་ཡིན་ལ། ཞི་བའི་འཐབ་རྩོད་མ་ཤི་བར་དུ་བྱེད་ངེས་ཡིན། ང་ཕྱིར་འདོན་རྒྱུ་དེ་གནས་ལུགས་རྒྱུ་མཚན་ཡོད་པའི་སྒོ་ནས་ལས་ཀ་བྱེད་དགོས།” ཞེས་ནན་སྐུལ་བྱས་ཡོད་འདུག
བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་བཙོན་གྲོལ་ཡོང་ཐབས་སུ། ས་དཀར་བསྟན་འཛིན་དང་དོན་ལྡན་གཉིས་ཀྱིས་བལ་གཞུང་གིས་ཁོང་ལ་ཁྲིམས་ཐག་བཅད་པ་དེར་གནས་ལུགས་རྒྱུ་མཚན་གང་ཡང་མེད་ལ། ཁོང་ནི་བདེན་པ་རྩོད་མཁན་ཞིག་ཡིན་པས་ཉེས་ཆད་དེ་འདྲ་ཞིག་འབབ་འོས་མེད་པའི་སྐོར་འབྲེལ་ཡོད་སྡེ་ཁག་ལ་སྔ་རྗེས་སྙན་ཞུ་ཐེངས་མང་ཞུས་ཡོད་པ་མ་ཟད། ཕན་ཚུན་ངོ་ཐུག་སྟེ་སྐད་ཆ་བཤད་ན་མང་པོ་ཞིག་ར་འཕྲོད་ཐུབ་པར་དམིགས་ཏེ། བལ་ཡུལ་ནང་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་དང་། མཉམ་འབྲེལ་རྒྱལ་ཚོགས་ཀྱི་ཚོགས་མི། བོད་གཞུང་དོན་གཅོད་སྐུ་ངོ་བཅས་ལ་རེ་སྐུལ་ཞུས་ཏེ་གླིང་ཚ་ཚེ་བརྟན་རྡོ་རྗེ་ལ་ཐུག་འཕྲད་དུ་ཁྲིད་ཡོད་འདུག
ཟླ་འདིའི་ཕྱི་ཚེས་ ༩ ཉིན་སྐུ་ངོ་དོན་གཅོད་ལགས་ཀྱིས་ཁ་པར་བཏང་སྟེ། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་ཁོང་ཕྱིར་བཏོན་རྩིས་བྱས་མོད། ཁོང་གིས་ང་རང་བཙོན་གྲོལ་ཐོབ་པ་དང་མཉམ་དུ་ཞི་བའི་གོམ་བགྲོད་བྱེད་རྒྱུ་ཡིན་བརྗོད་ཀྱི་འདུག གོམ་བགྲོད་ལ་འགྲོ་རྒྱུ་ཡིན་ན་གཞུང་ལ་གྲོས་མཐུན་བྱེད་ཁག་པོ་ཆགས་ཀྱི་འདུག ག་རེ་བྱེད་དགོས་མིན་ཁོང་ལ་སྐད་ཆ་ཞིག་དྲིས་ཞེས་བརྗོད་པ་ལྟར། ཕྱི་ཚེས་ ༡༡ ཉིན་ས་དཀར་བསྟན་འཛིན་དང་དོན་ཡོན་ཁོང་གསུམ་ཆེད་དུ་བལ་ཡུལ་བཙོན་ཁང་ནང་བསྐྱོད་དེ། གླིང་ཚ་ཚེ་བརྟན་རྡོ་རྗེས་ལགས་སུ་ཐུག་འཕྲད་བྱས་རྗེས། ཁོང་གིས་བརྗོད་པའི་སྐད་རྣམས་སྐུ་ངོ་དོན་གཅོད་ལགས་སུ་སྙན་གསན་ཞུས་ཡོད་འདུག
དོན་ལྡན་ལགས་ཀྱིས་བརྗོད་ན། སྐབས་དེར་སྐུ་ངོ་དོན་གཅོད་རྟ་མགྲིན་རྡོ་རྗེ་ལགས་ཀྱིས། རྒྱལ་སྤྱིའི་འགྲོ་བ་མིའི་ཐོབ་ཐང་དང་གཞུང་ཚབ་ཁང་སོགས་ལ་གྲོས་བསྡུར་ཞིག་བྱས་ནས་ལན་སྤྲོད་ཡོང་། བལ་ཡུལ་དུ་ལོ་གསར་སྐབས་དང་ཁེལ་ཡོད་པའི་ཐག་ཆོད་མགྱོགས་པོ་ཡོང་རྒྱུ་མ་རེད་ཅེས་བརྗོད་སོང་ཟེར།
གནས་ཚུལ་མཁོ་གཏོང་པ་དོན་ལྡན་ལགས་ཀྱིས། “ངེད་གསུམ་ཁོང་ལ་སྐད་ཆ་འདྲི་རུ་ཕྱིན་པ་ཡིན། ངོ་མ་ཁོང་གི་སྙིང་སྟོབས་དང་། ཆོད་སེམས། ལ་རྒྱ་སོགས་ནི་བློ་ཡུལ་ལ་ཤོང་དཀའ་བ་ཞིག་རེད། བཙོན་ཁང་ནང་དཀའ་ངལ་ག་ཚོད་ཡོད་མེད་ང་ཚོས་ཤེས་གསལ་རེད། ཡིན་ན་ཡང་། བོད་དོན་ཞི་བའི་འཐབ་རྩོད་པ་ཁོང་གིས་ཞི་བའི་ངག་བཅད་བྱས་ནས་ཟླ་གཅིག་མ་ཟིན་ཙམ་འགྲོ་བཞིན་ཡོད་པ་རེད།” ཅེས་བརྗོད་དེ། བོད་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ལ་བལ་གཞུང་གིས་ཁྲིམས་ཐག་བཅད་དེ་ཟླ་ལྔ་ལྷག་འདས་པའི་རིང་། མདོ་སྨད་ས་རྒྱུན་གྱི་གཙོས་ཚོགས་པ་སྐྱིད་སྡུག་ཁག་གིས་ཁོང་ལ་ཁ་ཡོད་ལག་ཡོད་ཀྱི་རོགས་པ་ཡག་པོ་ཞིག་བྱས་མེད་ལ། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་དང་མཉམ་འབྲེལ་རྒྱལ་ཚོགས། གཞུང་ཚབ་ཁང་སོགས་ལ་ཁོང་བཙོན་གྲོལ་དགོས་པའི་རེ་སྐུལ་ཡིག་ངག་གཉིས་ནས་བཏོན་མྱོང་མེད་སྐོར་བརྗོད་སོང་།
འདི་ལོའི་གསུམ་བཅུའི་དུས་དྲན་ཉིན། གླིང་ཚ་ཚེ་བརྟན་རྡོ་རྗེ་མ་བུ་གསུམ་གྱིས་རྒྱ་གཞུང་ལ་ཞི་བའི་དགོས་འདུན་དོན་ཚན་ལྔ་བཏོན་ཏེ། བཞུགས་སྒར་དྷ་ནས་ཞི་བའི་གོམས་བགྲོད་ཀྱི་མགོ་བཙུགས་ཏེ་རྒྱ་བལ་ས་མཚམས་སུ་བསླེབས་སྐབས། བལ་གཞུང་ཉེན་རྟོག་པས་ཁོང་ཚོར་གཅར་རྡུང་བཀག་འགོག་བྱས་ཡོད་ལ། དེ་རྗེས་གླིང་ཚ་ཚེ་བརྟན་རྡོ་རྗེ་ཁོང་གཅིག་པུ་གསང་སྟབས་ཀྱིས་བལ་ཡུལ་ནང་ཞི་བའི་གོམ་བགྲོད་བྱས་ཡོད་ཀྱང་། ཕྱི་ཟླ་ ༥ ཚེས་ ༢༡ ཉིན་བལ་གཞུང་ཉེན་རྟོག་པས་འཇུ་བཟུང་བཙན་ཁྲིད་བྱས་ཤིང་། ཕྱི་ཟླ་ ༦ ཚེས་ ༡༥ ཉིན་བལ་གཞུང་གིས་ཁོང་ལ་བལ་ཡུལ་ཡོང་ཆོག་པའི་ཡིག་ཆ་མེད་པའི་ཉེས་མིང་འོག ལོ་ ༥ དང་ཟླ་ ༥ ཉིན་ ༢༥ ཁྲིམས་ཐག་བཅད་དེ་བཙོན་འཇུག་བྱས་ཡོད་པ་རེད།
གསར་འགོད་པ། ཚེ་རིང་རྒྱལ།
གླིང་ཚའི་ངག་བཅད་རྗེས་སུ་ཡི་རང་ཡོད། །
གླིང་ཚའི་ལུས་བདེ་སེམས་པ་བག་ཕེབས་ཤོག །
གླིང་ཚའི་བུ་རྒོད་ལགས། བོད་དོན་གྱི་ལས་འགུལ་ནི་ཆུ་ཚོད་དང་སྐར་ཆ་ཁ་ཤས་ཀྱི་རིང་ཁོ་ནར་སྤེལ་ན་ཅི་འདྲའི་ཕང་བ་ཞིག་རེད། དཔའ་ངར་དང་རྒྱལ་ཞེན་ཆེ་བའི་དཔའ་བོ་དཔའ་མོའི་སྙིང་སྟོབས་ནི་བརྗོད་ལས་འདས་པ་ཞིག་ལོས་ཡིན་མོད་ལས་འགུལ་གྱི་དུས་ཡུན་ཅུང་ཙམ་བསྲང་ན་ཇི་འདྲའི་དགའ་བ་ལ།
དེར་བརྟེན་སྐུ་ཉིད་ཀྱི་ལས་འགུལ་འདི་ཚེ་རིང་ལ་ཡུན་དུ་གནས་པའི་སྨོན་འདུན་ཞུ།
“ངས་མུ་མཐུད་ཞི་བའི་གོམ་བགྲོད་བྱེད་རྒྱུ་ཡིན། མི་རིགས་ཤིག་གི་བདེན་པ་རྩོད་དགོས་ན། སོ་སོའི་ལུང་པར་རྐང་པ་བཞག་སྟེ་རྩོད་དགོས་པ་ལས། ཕྱི་ལོགས་ནས་བོད་དོན་རྒྱབ་སྐྱོར་དང་ཞལ་འདེབས་བསྡུ་རུབ་བྱས་ནས་ཕན་ཐོག་གང་ཡང་ཡོད་པ་མ་རེད། ང་བཙོན་གྲོལ་མ་ཐོབ་བར་དུ་ཞི་བའི་ངག་བཅད་བྱེད་རྒྱུ་ཡིན་ལ། ངའི་ཞི་བའི་འཐབ་རྩོད་ཀྱི་དགོས་པ་དང་ཉིང་དགོས་སོགས་ལ་རྒྱུ་མཚན་ལྡན་པའི་སྒོ་ནས་དཔྱད་ཞིབ་གནང་རོགས། ཁ་ཤས་ཀྱིས་ངའི་རྩོམ་ཡིག་མང་པོ་དྲྭ་ཐོག་ཏུ་བརྒྱུད་འགོད་བྱས་ན། ང་བཙོན་གྲོལ་ཡོང་རྒྱུར་དཀའ་ལས་ཁག་རབས་སོགས་བརྗོད་ཀྱིན་འདུག མི་དེ་ཚོའི་རིགས་ཀྱིས་ངའི་ཞི་བའི་འཐབ་རྩོད་དང་ང་བཙོན་གྲོལ་བྱེད་པར་ལག་པ་མ་འཆང་རོགས། ”——སྐད་ཆ་འདི་དོན་དངོས་ཀྱི་ྒནས་ཚུལ་རང་རེད།
མི་མང་ཁ་གསེར་ཞེས་པ་ཡི་གནའ་དཔེའི་ནང་དོན་ལྟར་རངརེའི་ཚོས་དཔའ་གླིང་སྐོར་གྱི་དོན་དག་མང་པོ་ལ་གཞིག་ནས་གྲོས་བྱ་རོགས་་་་་
གླིང་ཚ་ཚེ་བརྟན་རྡོ་རྗེ་ལགས་སུ་རྗེས་སུ་ཡི་རང་ཞུ། ཁྱེད་ཀྱིས་ད་བར་རང་གི་ཁས་བླངས་དམ་བཅའ་བའི་དོན་འཁྱོལ་ལས་ལ་ཞུགས་བཞིན་པ་དང་ལྷག་པར་དུ་ཁྱེད་དང་ཁྱེད་འདྲ་བའི་རྒྱལ་གཅེས་པ་སྐོར་ཞིག་གི་མཛད་རྗེས་རྣམས་དེང་སྐབས་ཚོང་རྫས་སུ་གྱུར་དང་འགྱུར་བཞིན་པ་འདི་ལ་སྔོན་འགོག་གི་བརྡ་ཞིག་གནང་པ་ནི་དངོས་གནས་རྣམ་དཔྱོད་ལྡན་པའི་བསམ་དོན་ཡིན་པས་བསྔགས་འོས་དང་དེ་འདྲ་བའི་ལས་ལ་ཞུགས་མཁན་ཚོ་ནི་བོད་ཀྱི་བླ་འཚོང་བ་དངོས་ཡིན་པས་ཡིད་སྐྱོ་དགོས་པ་ཞིག་རེད།